بعيداً عن دار السلام

الرابع والعشرون

اول ماطبينه للبيت.. شفته تراب

رحت انطيته ليث : هاك ليث

كال بعيون ناعسه وذبلانه: شسوي بي..

رديت بملل واني منزعجه من تصرفاته ونضراته

المليانه وقاحة. : اكله.. يعني شتسوي بي.. الزمه بين

مانظف..

رد بتعب : بويه خل نام.. هسه وكت تنظيف

: البيت.. كله تراب.. يله الزمه ماطول شويه.بس

شاله وطلع.. باوعتله.. مبين تعبان من الطريق..

وارنوبي راح يطلع نخله براسه..

متنحس.. وزعلان

بس شسويله.. ابنه هم خل يتحمله..

بلشت بالبيت تنظيف وغسل وتشحيم.. من دخلته

رغم وصخه وترابه بس ردتلي روحي.. حسيته

ملكي.. ومملكتي.. لكيت الراحة والاستقرار هنا...

مستحيل افرط بيهن..

نظفت البيت تنظيف سريع..

خلصت وحسيت البيت هدوء.. دورت عليهم..

لكيت ماهر غافي.. وارنوبي نايم على صدره..

بس مفتح عيونه..اخذته بهدوء منه.. رئساً فز

اني ظليت صافنه بوجهه وهو صافن بوجهي مخترع

وخرت بسرعه وهو كال : بيج شي

كتله : لا ارجع نام.. بس داخذ ليث

ماحجه شي بس رجع نام.. اني رحت رضعت.. ليث

وغفى شو هم نعست.. غفيت وياهم على الواهس..

ماحسيت لحد الليل.. كعدني ماهر

دانروح لاهله  باوعتله بطرف عيني " مكعدني ديِروح

لاهله.. ياخي متروح لازمتك اني لو الا

تستأذن مني..افف"

رديت بنعاس : اممم.. روح شسويلك

كال : كومي بدلي.. يله

افففف يعني مكعدني دياخذني ويااه..

اذا ارتكب جريمة احد يلومني..

كمت واني اسحل بنفسي سحل..

رحت للحمام غسلت وتوضيت صليت مافاتني..

من صلاة لان نمت العصر وهسه ب٨ بليل..

صليت وبدلت ملابسي..

اخرته هوواي لان مابيه حيل وعلى كيفي اتحرك

بس هو ماكال شي بس يدخن وعيونه تفتر ورايه

كملنه ورحنه لاهله.. اخذت الغراض الي شتريتهن

لمنى.. ورحنه يمهم.. لكينه عدهم بيت السعلوة..