بعيداً عن دار السلام

الثاني والعشرون

نام ليث  رحت وديته بفراشه نومته..

وظليت مكابله التلفون وكاعده كلساع

اشوف.. تالي ماتحملت كمت ودكيت..

ادك ومتشيله مها.. دكيت يمكن ٥ مرات

اخير شي دزيتلها رساله..

صارت الساعه ب١١ ولا مها اتصلت ولا

ماهر.. هذا الثاني مدري وين راح..

خفت وحدي والدنيا ليل.. رحت تأكد من قفل الباب

لكيتهن مقفلات..

رجعت للغرفة مددت بالفراش..

جان تدك مها..جاوبت بسرعه

: هاا مها.. شصار

ردت : ماكو شي.. مهند طلع لصديقه..

: ليش يم صديقه.. يعني ميبات بالبيت..

ردت :لا بس راح يسهر يمه.. ليظل بالج

رديت : مها.. عفية لتظمين عليه.. احجي شكال مهند

ردت : ماكال شي.. بس بصراحة هو ضايج ومعصب

من الكل حتى مني.. وانوب اضطريت اجذب راد

رقمج مانطيته

رديت برتياح : اي همزين مانطيتي.. ماريده يشغل

باله بيه.. والله مرتاحه هنا..الحمدلله

ردت بتنهيده : الله يديم الراحة الج حبيبتي.. يله

تصبحين على خير.. راح يجيني ياسر

ردت : تصبحين على خير حبيبتي

سديته منها ورحت تمددت.. مرهقة.. وتعبانة..

الارهاق والتعب بروحي.. يعني.. كلما استقر وارتاح

تجيني كفخه تصحيني وترجعني للنقطة الصفر..

ظليت استغفر واسبح لحد ماغفيت..

صحيت على صوت المنبه.. سديته بسرعه قبل لا

يكعد.. ارنوبي.. شفت ماهر ماكو بمكانه..

بسلا بعده مراجع.. كمت طلعت لكيته كاعد بالهول..

ويدخن.. سويت السحور وحطيته بالمطبخ.. وصحته

كعدنه ناكل بهدوء.. مانطق.. ومبين على شكله..

اكو شي..ماعرته اهتمام.. شسويله مثلاً..

بعد مرور يومين

  كاعده.. الصبح اسوي حلويات..

التهي بيهن.. وهم خابرت مها بس مجاوبت.. مبين

نايمه.. شويه وسمعت الباب انفتح.. شفت..

ماهر دخل وبيده علاليك كومة.. مبين متسوك

رحت اخذتهن منه

كال : اليوم صاحبي معزوم يمي.. حسبي حسابج