First Kiss

Repent (Yoongi's story) {Part 9}

Unicode

အလွတ်မှတ်ထားသည့် ဖုန်းထဲမှ လိပ်စာအတိုင်း ရောက်သည်နှင့် ကားကို ဖြေးငြင်းစွာ ရပ်လိုက်တော့ လှပသေသပ်သည့် coffee ဆိုင်လေးက ဆီးကြိုနေသည်။ ဘေးနားမှ ကလေးငယ်ကို လှည့်ကြည့်မိတော့ ခါးပတ်ကြိုးအား လက်ချောင်းများဖြင့် တင်းတင်းကျပ်ကျပ် ဆုပ်ကိုင်ထားပုံက စိတ်လှုပ်ရှားနေမှန်း သိသာသည်။

သူကိုယ်တိုင်ကလဲ စိတ်လှုပ်ရှားနေပြီး ခြေဖျားလက်ဖျားများပင် အေးစက်ကာ တုန်တုန်ယင်ယင် ဖြစ်နေတာကြောင့် ကားကိုတောင် ဂရုတစိုက်မောင်းခဲ့ရသည်လေ။

ကားရပ်ပြီးသည်ထိ နှစ်ယောက်လုံး အောက်မဆင်းကြသေးဘဲ နေရခက်စွာ ကားအတွင်းထဲမှ လေထုကလဲ အေးစက်နေသည်။ ပြောရမည့် စကားလုံးများကို ခေါင်းထဲတွင် ကြိုးစား၍ စီနေရင်း ကားပေါ်မှ ဆင်းတော့ ကလေးငယ်ကလဲ ဆင်းလာသည်။

ဆိုင်တွင်းဝင်လိုက်တော့ မြင်ထားသည့် ပုံထဲကအတိုင်း အပင်သေးသေးလေးများနှင့် စိတ်ကို fresh ဖြစ်စေသည့် vibe မျိုးရတာကြောင့် စိတ်ကျေနပ်သွားကာ ဘေးမှာ ငြိမ်ကုတ်စွာပါလာသော ကလေးငယ်ကို ကြည့်လိုက်တော့ မျက်လုံးလေးဝိုင်းကာ ဆိုင်ထဲကို စူးစမ်းသလို ကြည့်နေလေသည်။

သူသဘောကျစွာနှင့် အသံထွက်ရုံသာ ရီလိုက်ရင်း ဆိုင်ရဲ့ ထောင့်စွန်းလေးမှာ ဝင်ထိုင်စေလိုက်သည်။ ကျန်တာတွေထက် ကလေးငယ် စိတ်တိုင်းကျနေရင် သူ့အတွက် ပြည့်စုံပြီမို့။

" ဘာသောက်မလဲ ကိုယ်သွားယူပေးမယ် "

ဒီဆိုင်က ကိုယ်တိုင်ယူစနစ်ဖြစ်ကြောင်းကို အင်တာနက်ပေါ်မှတစ်ဆင့် ရှာဖွေတုန်းက သိရှိပြီးသားမလို့ မေးလိုက်ခြင်းဖြစ်သည်။

" စီနီယာ အဆင်ပြေတာ ယူခဲ့ပါ ကျွန်မက ရပါတယ် "

ခေါင်းသာငြိမ့်လိုက်ရင်း ကောင်တာသွားကာ သူသဘောကျသလို ကလေးငယ်လဲသဘောကျလောက်မည့် ice Americano နှစ်ခွက်မှာကာ ငယ်စဉ်ကတည်းက စတော်ဘယ်ရီကြိုက်တတ်သည့် ကလေးငယ်အဖို့ စတော်ဘယ်ရီကိတ် တစ်ခုနှင့် ဝိုင်းဆီသို့ ပြန်လာခဲ့သည်။

သူ့လက်ထဲမှ ကိတ်မုန့်ကို မြင်လိုက်သည်နှင့် မျက်လုံးများက အရောင်လက်သွားသည်ကို ကြည့်ခြင်းဖြင့် အကြိုက်မပြောင်းလဲသေးဘူး ဆိုကာ သိလိုက်ရသည်။