صباح الانتصار والشجاعه 😁🦋
نجمة :محمد صارلي اهل وكان كد كلمته
من كلي اني امج وابوج
عوضني عن حرماني من حنان وسند الاب
عوضني عن حب وامان الام
صار محمد كل اهلي
اذا يشوفني ضايجه او مقهورة يحاول بكل الطرق يضحكني
ماايخليني ابداً اضوج
ولا يخليني ابجي
صح الي مريت بي مو قليل
صعد على كل انسان
اسنين يعيش بكذبه
اني جنت عايشه اسنين عمري بكذب
اكول الانسانه ماما وهي مو امي
وجنت اطلب منها الحب والحنان
وهي اشوفني عدوتها
اسنين اني عاايشه ادفع ثمن حقد وكره وانتقام وانانيه
وااصبر نفسي واكول (عسى ان تحبوا شيئاً وهو شراً لكم )
محمد اريد اسألك سؤال
محمد : كولي حبيبتي
نجمة : ليش بشرى خلتني يمها كل هاي الاسنين
محمد : شجابها على بالج
السالفه راحت صارلها اشهر
نجمة : محمد عليك الله فكر ويايه
محمد : مو كالتلج علمود تنتقم منج
نجمة : واني شنو ذنبي وليش تنتقم مني
محمد : لان اشوفج بنت عدوتها
نجمة : جان انتقمت مني سنه سنتين عشر سنين
جان من صار التهجير وطلعنا من الفلوجه عافتني هنا
وهي راحت الاخوها
محمد : بصراحه
نجمة : يي كول
محمد : اني هم كاعد افكر بهذا الموضوع
ليش بقتج وشنو السبب
نجمة : باع اني سألت نورس
محمد : يي وشكالت نورس
نجمة : اسمع
نورس مااعرفتي ليش امي بقتني يمها كل هاي السنين
نورس : نجمة انتي مثل ماتعرفين احنا كلنا نعرف انتي مو اختنا من امنه من اول يوم دخلتي بي البيتنه
ومن جانت امي تعذبج
والله لا اني ولا حسين جنه نقبل
ومرة تذكرين من خلت مرت خالو قاسم تكتلج هي وخالو قاسم
اني بيومها دخلت عليها للغرفه وعيطت وصيحت
وكتلها اذا ماا تريديها وديها يم عمامي
لان عمامي يريدوج وجانوا متمسكين بيج
يعرفون امي شنو ويعرفوها مااتحبج
ومااشوفج بنت ابراهيم ولا اشوفج بنت اميرة
لا اشوفج اميرة
لان انتي مااشاالله عليج كلش تشبهين امج
من كتلها هيج الامي خصوصاً احنا من رحنا البيت
خالو قاسم صارت علينه حسرة اللكمة
كالتلي نجمة مااعوفها
اريد انتقم منها واريد اعذب اميرة وابراهيم بكبرهم
ابنتهم
نجمة : واني شعليه
نورس : هااي بعد عقليه امي
والله بيومها توسلت بيها توديج يم عمامي
بس مااقبلت ورفضت رفض قاطع
جانت كلش متمسكه تخليج يمنا
حتى كلت بداخلي معقوله امي متريد نجمة تروح لان تحبها
نجمة : شتحب مني انتي مو جنتي شاهده شلون جانت تعذب بيه
نورس : اعرف والله
بس كثر ما امي بهذا اليوم جانت متمسكه بيج
كلت مااكو هيج انتقام
نجمة : عقلي راح يوكف من ورى امج على كوله ملاك
نورس :هههههههه هسه صرتوا ثنيناتكم تكولون امج
بعد يومين اني هم اتبرئ منها
نجمة : هم رحتيلها
نورس : ييي والله رحتلها وكتلها اني حامل اريد اروح للدكتورة انطيني فلوس
طردتني من البيت
نجمة : الله ينتقم منها بحق نبينا محمد
خير ابونا على سوالفها المكسرة
نورس : روحي لمحمد احسن
نجمة : وهاي يا محمد كل الكلام الي كالته نورس
محمد : بشرى انسانه طاغيه
حتى بنتها الي من لحمها ودمها مااساعدها
شلون لعد جنتي انتي بنت عدوتها اللدوده عايشه وياها
نجمة : هههههه جنت عايشه اميرة
تعرف محمد مرة جانت صف اول ابتدائي
كلش صغيرة بس اذكر مقتطفات من اسوالفها
نورس جانت خامس ابتدائي
وحسين صف رابع ابتدائي
اني تمرضت لان انقهرت من معلمه الرياضيات
ضربتني على ايدي وانقهرت وتمرضت
بالليل صخنت وعلى كلام نورس وحسين
يكولون من الصخونه كمتي تحجين
حسين يحجي ويا ماما يكللها راح تموت نجمة كامت تحجي
تكله وما تموت احسن اخلص منها
وضليت اني نايمه وحسين ونورس يسوولي كمادات ويبجون واني ابجي وياهم
جنت طفله ماافهم شي
شلون كلبها ماايحن على طفله
محمد : وانتي شكو كاعده تبجين
نجمة : لان اذكرت الموقف وكمت ابجي
محمد والله مو هينه عليه
محمد :اعرف والله بس لازم تنسين
هذيج هي كاعدة بالبيت تضحك وتاكل وتشرب
وتطلع
وانتي اموته نفسج من البجي
من وراها
وهاي المسكينه نورس تريد فلوس من املاك ابوها بس علمود تروح دكتورة
ومااتقبل تنطي
بنيتي هيج اشخاص طلعيهم من حياتج
وعيشي
هاي انتي الحمد لله ازوجتي صح اذيتج بالبدايه بس هسه انتي بخير
وكلها ايام ويملي حياته ابنه
وعوضي الي فقدتي بابنج
شكو شي انحرمتي من عنده عوضي بابنج
نجمة : محمد جان دكتوري النفسي
الي عالجني من اهواي امراض نفسيه
عالجني من مرض الخوف من بشرى
عالجني من اثار الصدمات الي صارتلي
عالجني على مبدأ اعيش حياتي ومااهتم
خلاني اعيش النفسي والابني
يكلي كل مااتجي بالج بشرى خلي ايدج على بطنج وانسي الاشياء البشعه واذكري الشي الحلو الي جاايج بالطريق
عالجني بحبه واهتمامه وخوفه عليه
اثبتلي اذا حبيتي الحياة راح اشوفيها ورديه
صرت اشوف حياتي ورديه
اكعد من الصبح اضحك واشاقه
واسولف واطلع ويا عمتي اجهز الابني
واخخ يااعمتي الي عوضتني عن حنان الام
اذا شوفني فرحانه وسعيدة هي تفرح وتضحك
حتى عمي من يشوفني فرحانه يفرح ويايه
ويطلع يشتريلنا نساتل ومواد مال كيك
وحلويات
وكل ماايشوفني يبوسني من راسي
اهل محمد ومحمد صارولي عوض رب العالمين الية
يوم الاربعاء 2020/4/21
كاعدة اصعد الدرج الغرفتي
واني بالتواسيل يالا اكدر امشي
بطني شكبرها صايرة
دخلت للغرفه
شفت محمد كاعد على الجربايه
محمد كوم كعدني خلص تعبت
شوكت اجيب واخلص
محمد : هههههه هانت مضل شي
تعالي اكعدي
نجمة : يمه بعد ماا تحمل حتى النفس بالكوة اخذه
توبه عليه اذا احبل مرة ثانيه
محمد : مو هي بكيفج
نجمة : والله حبيبي اذا تريد جهال انت روح احبل ابدالي
محمد : وليش احبل ابدالج قابل اروح ازوج احسن
نجمة : علمود اموووتك
يزوج عليه فوك متكلي حبيبتي حاضر احبل ابدالج
لا تعبين نفسج
بسرعه تكلي اروح ازوج
محمد : هااي خلص لا ضوجين اني بعد احبل ابدالج
المهم ترتاحين
نجمة : شلون تريدني ارتاح
وهذا ابنك كل شويه مووجعني
محمد : لا ابني هادئ وحباب طالع عليه
نجمة : اخخخخ بااع وجعني
محمد : لزمت بطنها الي صايرة مثل البطيخه تخبل
بابا حبيبي لا تأذي ماما
نجمة : اخخخخ لا هواي سمع كلامك
محمد : شنو قصدج ابني ماايسمع الكلام
نجمة : انت شكاعد اشووف
محمد ضرب بطني على كيفه بيدة
مثل الي يضرب طفل
واني الوجع صار مااينحمل
الوجع كله تركز ابطني
محمد : لاتخليني امد ايدي عليك صير عاقل
نجمة : من الوجع عيطت محمد من عيطتي جفل
محمد : شبيج خوفتيني
نجمة : راح اجيب كمت اتووجع اخخخخخخخ
محمد : شنو شنو شنو اجيبين
نجمة : اخخخخخخ روح صيح عمتي بسرعه
محمد : يي بيي
طلعت اركض من الغرفه اصيح على امي
يمه اررركضي هااي نجمة راح اجيب
ام محمد : اسم الله الرحمن الله يكومها بالسلامة
مراد مراد اركض شغل السيارة بسررعه
مراد : ييي ييي رايح رايح
محمد : يمه اني شسوي
ام محمد : تعال ويايه ساعدني انزلها من فوك
محمد : دخلت للغرفه لكيتها واكفه ولازمه بطنها وتبجي
ام محمد : يلاا لا تخافين حبيبتي
هسه دقاايق وجيبين
نجمة : كاااعدة اتووجع حموووت
ام محمد : لا مابيج كل العافيه
بنين تعالي نبدللها
نجمة : عمتي وبنين بدلولي ولبسوني العبايه
واخذوا جنطه الطفل وصعدوني للسيارة
محمد صعد يمي هو وعمتي
وبنين ومراد ليكدام
واني كرهت الدنيا من ورى الوجع كمت
اغلط وافشر على محمد
كله مننننننك ياااااحقير
كله بسببيببك كاااااعدة اتوووجع
حمووووت
محمد : يمه اني ضربتها على بطنها بس والله خفيف
معقوله بسببي
نجمة : اييييييي من وررراك كله من وراك
اخخخخخ يمة
ويريدنيييي احبل مرررره ثاااانيه
انتتتتت روووح احبل
رووووووح ازوجج
المهم اجيبببب
محمد : اعياطها اخذ الدنيا واهلها
انوب اني ماانزلت من اللسانها
بس تغلط عليه
وختامية السالفه من كاعد انزلها من السيارة
لزكتني بعضه شلعت لحم ايدي
خلتني اني هم اعيط وياااها
وامي المسكينه مااعرفت اسكت منوو بينه
اني لوو هي
ام محمد : انفضحنه والله انفضحنه
كااافي اسكتوووا
نجمة : سكتي هووووو من ورى اني حمووووت
محمد : واني من وراج ايدي رادت تروووح
بنين : العالم كامت تباوع علينه يمعوودين
محمد : دخلناها للمستشفى وهي هرجتها علينا بعياطها
الكل عرفوا اني محمد زوجها الي صار كله من ورايه
دخلناها الغرفه الفحص
وضلينا ننتظر
اصعب انتظار مر بحياتي
هدوء ومااكو صوت غير بس الدكاترة والممرضات يطبن للغرفه ويطلعن
ومانفهم شكاعد يصير داخل الغرفه
ومن نسأل يكولون بعدها
لحد ماا طلعت الدكتورة
الدكتورة : منو ويا نجمة
محمد :اني زوجها
الدكتورة : زوجتك مااتكدر تولد طبيعي
لازم عمليه قيصريه
محمد : يعني شنو
الدكتورة : يعني لازم اندخلها الغرفه العمليات
محمد : اخاف يصير بيها شي
الدكتورة : لا انشاالله ماايصير بيها شي
بس روح كمل الاجرائات مال العمليه
محمد : رحت كملت الاجرائات ورجعت النفس المكان
لكيت امي وبنين ومراد واكفين يم الباب
هاا بشروا جابت
مراد : شجابت غير هسه دخلوها للعمليات
محمد :يارب اوكف وياها وسااعدها وكومها بالسلامه
نجمة : طلعت روحي ورجعت الجسمي
اصعب وجع
مرة قريت بوحدة من الوثائق العلميه
يكولون وجع الولادة ثاني اقوى الم من بعد الموت حرقاً
تخرج الروح من الروح
واني بحكم صغر سني وخوفي من الولادة
برد جسمي ماكدرت اولد طبيعي
دخلوني الغرفه العمليات
خلولي البنج
وراها مااحسيت بشي
كعدت على وجع قوي وراها رجعت نمت
من كعدت ثاني مرة
اكدر احجي واكدر احرك جسمي
اول شخص ذكرته من بعد العمليه محمد
محمد : هاا حبيبتي الحمدلله على سلامتج
نجمة : ابني وين
محمد : هيااته يمنا
نجمة : اريد اشوفه
شال محمد طفل صغير من السرير واخلى بحضني
اجمل واروع احساس حسيته بكل حياتي
اول مااشفته بجيت
بجيت من الفرح ومن السعادة
نسيت كل اوجاع بشوفته
احلى احساس ممكن للانسان يعيشه
نورت حياتي ودنيتي ياروح امك
ام محمد : الحمدلله على سلامتج بنتي
يتربى بعز ابو ودلال امه
نجمة : الله يسلمج عمه الله يحفظج النا
مراد : الحمدلله على سلامتج خيتي
يتربه بزود ابو
محمد : الله يخليك حبيبي يوم الالك
مراد : شراح اسمي
محمد : ايهم 💕
مراد : يجنن هذا الاسم
نجمة : ايهم مااما نفديت نومتك وجمالك وجمال اسمك حبيبي ونور عيوني
انولد ايهم للدنيا
وصرت ام ايهم
البنيه الصغيرة صارت ام
ام الطفل جداً جميل 💕
__________________
هلاو كيكاتي
طبعاً ماادري ليش احس هذا البارت اللطف بارت كتبته
لاتنسون النجمة والتعليقات الحلوة
احبكم كوومات ❤️
