مساء الحب والورد الاصفر 💛🌻
عندما يجرحنا من نحب علينا أن نكتب ماحدث على الرمل لتمسحها رياح التسامح والغفران
ولكن عندما يعمل الحبيب شي رائع علينا أن ننحته على الصخر حتى يبقى في ذاكرة القلب حيث لا رياح تمحوه❤️
!!!!!!!!!!!!!!!!!!!!!!
نجمة : فتحت عيوني واني بالكوة اكدر افتحها
احس عيوني ثكيلة وايدي ماكدر احركها
واكو الم اسفل بطني قريب الخاصرتي يوجعني
ضليت اباوع شويه منو بالغرفه لكيت خالي جاسم وامي
حجيت بصوت يمة
يمة
بشرى : هاا هااا
نجمة : بطني توجعني
بشرى : يي هسه اصيرين زينه
جاسم : محد خلصان منج
بشرى:شتريدني اسوي هااا
جاسم : انتي دمار العائلة كلها
والحجي وياج ميجيب نتيجه
يمة اني العليه سويته
ودفعت فلوس العمليه والمستشفى والادوية
وهذا مصرف الج مو البشرى يمه الج
وباجر يجي عليكم واحد من حمايتي يوصلكم للفلوجة
ام مهدي : الله يحفظك ابني ويجعلها بميزان حسناتك
بشرى : واني شنوو متنطيني فلوس
جاسم : لاا ماانطيج
بشرى : ليش يعني
جاسم : لان اعرفج تصرفيها على سوالفج مو على البيت والبنات
نجمة : جنت اسمع كلامهم واني الوجع ماخذ من حيلي
طلع خالي جاسم وامي ماايوكف بعينها لا خير ولا شر
ولا اخ والام والا اب
بس سد الباب خالي بدت تدعي عليه وتغلط وتفشر
وسب وحارت شسوت
حتى الممرضه من دخلت اسويلي المغذي ضلت صافنه على امي
وقربت راسها مني
الممرضه : الله يساعدكم عليها
نجمة : ضحكت بتعب وكتلها
بعدج مشايفه شي منها
اليوم الي كضيته بالمستشفى جانت بيبي ام مهدي حايرة بية
هي الي توديني للحمام وهي الي تمشيني وهي الي توكلني
وامي او المرأة الجابتني او زوجه ابوية
او ام اخواني
اريد اصنفها اي مصنف غير كلمة امي
لان الام امان
الام حب
الام حضن دافي
الام سند
الام حماية
الام اذا تأذوا جهالها تتأذه اضعافهم
تحارب وتقاوم وتتنازل وضحي في سبيل اطفالها
والاجل تضحياتها وكرمها رب العالمين خلق الجنه تحت رجلها
كل الامهات الجنه تحت رجلها الا امي
مااحسيت فد يوم عطفت علينه
او مسحت على راسنه
او تنازلت عن انانيتها وحبها النفسها الخاطرنا
كل خواتي بداخلها قصه
وكلهن مشافن حب من امي
بس بااختلاف هنا مجانن ينضربن
اني الي جنت انضرب واني الي جنت اخدم بنسوان خوالي
واني الي اتحمل كل شي
طلعت من المستشفى مثل مكال خالي جاسم
الصبح اجه علينا واحد من الحماية مالتها ورجعنا للفلوجه
وبحكم عمليتي ومااكدر اتحرك ضليت بالغرفه
ولان ضليت ليل ونهار بالغرفه
جانت تصرفات نورس كدامي واضحة
اختي الجبيرة وحبيبتي الي ماتنصح ابداً
الي لازم تكون قدوة اليه والملاك
نورس : راح اخذكم الكم صفحة بحياتي
راح اخذكم الداخل ورقات من ذكرياتي
اني البنيه الي اول منولدت للدنيا امي نبذتها ورادت الولد
اني البنية الي ماشفت حنان من ابوية ولا شفت دلاله
اني البنيه الي جنت اشفوف ابويه اول ميدخل للبيت يصيح باسم اخويه ويجيبله اشكال الاغراض والحلويات
واني مايذكرني بشي
اني البنيه الي امي ماتهتم بيها ولا تعطف عليها والمهم عدها اخوية
اني البنيه الي امي قدمتني قربان النزواتها
من حرماني وحتياجي وحب اثبات الرئي
صارت حياتي عبارة عن هامش
جنت من اروح للمدرسه ماعندي لا رقيب ولا حسيب
ولا عندي ام تكلي هذا عيب وهذا حرام وهذا غلط
ومثل كل مراهقه مندفعه صارت حياتي اندفاعيه
ومثل كل طالبة مدرسه تلاكي عيون الذياب عليها
صارت عيون الولد والذياب عليه وجنت فريسه سهله
تعرفت على شاب اسمة (عمار )
من جنت اروح للمدرسه
وهذا الشاب اشترالي تلفون حديث جنت طايرة بي وفرحانه اول مرة شخص يذكرني ويجيبلي هيج هديه
جنت احجي ويا عمار بالليل واضم التلفون بين ملابسي مااخلي واحد يشوفه
ومن تعلمت على هذا التلفون ودخلت عالم التواصل الاجتماعي ( الفيس والانستا والتلي )
كامت اعيوني مشوف عمار صرت اتهرب من عنده
اريد شخص احسن من عنده واغنى من عنده
اريد شخص يطلعني من حياة الفقر والحرمان الي اني بيها
وبيوم من الايام دخلت لكروب
وهذا الكروب بي مجموعة من الضباط والجنود
بكل الاصناف من الداخلية للدفاع للمكافحة للاجرام
الحرس الحدود للطيران الحربي للاتحادية
حتى بي ضباط وجنود البحرية
من كل المحافطات ومن كل المناطق
وكلهم رتب وكلهم فلوس وشخصيات وهيبة
وهذا الكروب الي دمر حياتي
كمت اتعرف على نقيب واسولف ويا رائد
واحجي ويا عسكري
وابين الحب للملازم
وافتح كام ويا عقيد
صرت احجي ويا الكل يمكن نص الكروب احجي ويا
بس طبعاً باسماء مستعارة واعمار مختلفه ومناطق مختلفه
وحتى حسابات مستعارة
اباوع على الضابط الي ينشر صورته
عجبني ادخل على البروفايل مالته واخذلي استطلاع على التعليقات والايكات والمعلومات الي بالبروفايل
وراها بكم يوم الاكي طريقه واحجي بيها وياا
واغلبهم جنت احصل منهم هدايه وكارتات وسوالف وضحك
جنت اكضي معظم وقتي وياهم
نجمة اختي الصغيرة شافتني ونصحتني
وهددتني هههه بس بمنو هددتني
هددتني بااهلي وعمامي وخوالي
الي هما اصلا ماايدرون وين الله مخلينه
هيج كضيت ايام مراهقتي
من بدايه عمري
من بداية زهرة شبابي
ههههه زهرة شبابي الي فقدتها ورى سراب
———-
طبعاً نورس من اهم اساسيات القصة
لان قصتها بحد ذاتها عبرة
واتمنى من البنوتات ينتبهون وياخذون العبرة من قصتها ❤️
كيكاتي لاتنسون النجمة والتعليقات الحلوة
احبكم 😍
