صباح التفائل كيكاتي 🍃
"ما ندمت على سكوتي مرة، لكنني ندمت على الكلام مرارا"
نجمة :
فتحت الرساله
مكتوب بيها
( مثل كل مرة ترجعيني شباب )
ماافهمت كلامه وليش امي ترجع هذا الرجال شباب
رفعت المحادثه علمود اشوف بقيه الرسائل
ونصدمت بالي شفتة
الي شفتة
امي كاعدة تهز عرش الرحمن بسوالفها
جنت كلشي متوقعه من امي
لكن مجنت متوقعه امي تزني وتوصل الهاي المرحلة
جانت الصور كلش مقززة
صور وهي مجردة من الملابس بالحمام
وصور وهي ويا رجال مبين جبير بالعمر
مااكدر حتى اوصف هاي الصور شنو
لو اكد اوصف الكلام الي شفته بالمحادثه
مراهقه مسوي سوايتها ولا تحجي حجيها
فزيت من صدمتي
على بشرى بعد الي شفته مستحيل اكول هاي امي
فزيت عليها وهي تخض بجسمي وتعيط
واني من صدمتي ماااكدر حتى احجي
بس اباوع عليها
حسيت الدقايق اني مكاعدة اسمع صوتها
اباوع بس شفتها تتحرك واني قاافله
تووقعت من الصدمه يمكن فقدت السمع
لحضات ورجعت للواقع
بشرى : بنت الكوا.. شعندج بغرفتي
احجي شبيج
وليش واكفه يم التلفون
بنت الع.. احجي اني ويامن الغي
نجمة: من كثر ماا اضرب كفخات على راسي رجعت العقلي
هااا جنت انظف الغرفه
بشرى : تنظفين الغرفه و واكفى يم التلفون
نجمة : من خوفي كمت اهز براسي بنفي
لالالالالا مااتقربت من التلفون
جنت اباوع على المكياج كلش حلوات
بشرى : بنت الكو.. اذا دخلتي الغرفتي بعد
والله احرك كل جسمج واخليج مشوهه
نجمة : لالالا بعد مااا ادخل
بس لاا تحركيني
بشرى : ولو اني ممقتنعه بكلامج لان اعرفج نغ...
بس اذا دخلتي الغرفتي بعد رجلج اكصها
يلاااا اطلعي برى الغرفه
نجمة : طلعت اركض من الغرفه
وجسمي كله يرجف من المنظر الي شفته
صعدت اركض للسطح
كعدت على بلوكه جانت بالسطح
وكمت ابجي واشهك واناجي ربي على الي شفته
امي الي لازم تكون مثل اعلى النا
كاعده تزني
مخافت من خوالي
مخافت على سمعتنا احنا بنات
اذا شخص عرف بيها احنا بعد منو يتقدملنا
زين شلون كدرت تخون بابا
الصور ابداً مفاركت مخيلتي وعقلي
بالعكس كمت افكر واتخيل شلون هيج اسوي هيج ويا رجال غريب
وشلون تحجي وتوصل المرحلة ماكو مستحى وخجل بكلامها
استغفرت رب العالمين ونزلت
لكيتها كاعدة تاكل
ولا عبالك مسويه شي
الي يشوفها يكول هاي المرأة ميطلع منها هاي السوالف
بشرى صاحبه بشره بيضه
وشعرها دائماً مصبوغ و واصل النص كتفها
صاحبه عيون ورموش طوال مرفوعات
معتنيه بنفسها الى اقصى درجه
يمكن بنت العشرينات ماتعتني بنفسها مثلها
ضل عقلي وياها وبقت تطلع كل يوم
بس مرات متطلع اضل اربع خمس ايام متطلع
وراها ترجع تطلع
عفت كل شي وركزت بحياتها
كمت الاحظ ادق التفاصيل
تطلع يوم الاربعاء والخميس
ساعة 8 وربع ترجع ساعة 10 ونص
الاحد والسبت
تطلع ساعة 9 الصبح ترجع ب 12
ومن تطلع بيديها علاكة سوده
زادني الفضول اريد اشوف شنو بيها العلاكة السودة
واجه اليوم الي اعرف شنو بيها هاي العلاكة
جانت راجعه مثل كل مرة دخلت للحمام تسبح
واني كمت امشي على اطراف اصابيعي
ودخلت الغرفتها
جانت العلاكة موجودة على الجرباية
فتحتها على كيف حتى لا طلع صوت
وتسمع وتجي تكتلني لو تحركني
فتحت العلاكة
لكيت بيها شريط حبوب
وسيت مال نوم لون ماروني
كتبت اسم الشريط بالمترجم
طلع حبوب مانع للحمل
شفت الي موجود بالعلاكة ولعبت نفسي منها
كرهتها وحقدت عليها
والاول مرة بحياتي ادعي على شخص بالموت
تمنيتها تموت واخلص من سوالفها
طلعت اركض من الغرفه قبل مااتجي واشوفني
ضليت كل مااا اتطلع وترجع اني ادخل وراها للغرفه لو اشوف العلاكة لو اشوف التلفون شنو بي
الي جان يخليني استحقر امي ويخليني مهضومة
تصرف على السيتات النوم والحبوب و ونستها
واحنا حسرة علينه اكل مثل الوادم
حتى نورس اختي مرات اعذرها على اغلاطها
واكول لو امي موفرتنا الحياه الكريمة
جان مامشت بهذا الطريق
جان حافظت على برائتها وماانطت نفسها لليسوى والي مايسوى
المهم
بيوم ميلادي هذا اليوم بعمري كله ماانسى
اني كل سنه اسوي كيكة واصعدها بالغرفه
لو نحتفل اني وخواتي
لو احتفل وحيدي
وهل مرة قررت اسوي الكيكه واني فرحانه كلش
واضحك واكول دخلت سنه جديدة من عمري
وصار عمري 16 سنه
سويت الكيكه وصعدتها للغرفه
اباوع على الغرفه محد بيها
نورس طلعت ويا مرتضى
وملاك راحت البيت صديقتها
احتفلت وحيدي بالكيكة
وضليت اضحك ويا نفسي
واتخيل بابا موجود ويضحكلي
وماما مو انسانه وصخة وتضحك وتصفك
وخواتي موجودات
جان هذا الاحتفال بمخيلتي
بعقلي وبكلبي
لكن هذا الشي مموجود بالواقع ابداً
لان الواقع هو من دخلت عليه بشرى
وضلت تعيط عليه
بشرى : محتفله بكوا... ياا داي...
مسوية سم الهاري وصاعدة فوك تتختلين
جيبي الكيكة
نجمة : ماما هاااي كيكتي
بشرى : مو اجي اركع النعال بوجهج
كيكتج كلتيلي
من تطلعين وتشتغلين وجيبين فلوس
عود تسمى كيكتج
ماادام اني كاعدة اصرف على البيت
كلش موجود بي يخصني
حتى هاي الملابس الي لابستهن تخصني
دايح...
نجمة : خلصت كلامها وركعت الباب
ويا ركعه الباب اني دموعي علماً عن نزولهن
وكلش كلش صعب ومقهر الانسان ينهضم من انسان كلش قريب من عندة
مو عاد اني نهضمت من امي
احس الوجع يدخل بنص صدري ينهش بيه
احساس كلش قوي بالوجع
بس شنو الي يفيد لو شنو الي اكدر اسوي واغيره
من هضيمتي وقهري
نزلت بكل عصبيه من الغرفه
اريد اعرف شسوي بالكيكة
لكيتها بالحمام تسبح
دخلت اركض الغرفتها
لكيت التلفون على الميز
وجايتها رساله من معاذ
مكتوب بيها( يلا اني انتظرج )
فتحت التلفون اريد اشوف شدازتله
لكيتها دازتله ( حبيبي اني سويتلك كيكة وراح اجيك )
ضليت ساكته على مسجاتها يعني تفرح السافل مالتها
وتقهر بنتها
شهل حقارة والنذالة
بس شحجي لازم اسكت
لان اخاف منها
كاعدك اطلع
لكيت العلاكة موجودة على الجرباية
فتحتها
نفس كل مرة
سيت نوم لون سمائي
وحبوب منع الحمل
طلعت وسديت الباب
توضيت وصعدت للغرفه
لبست ازار الصلاة
وكعدت اصلي واشكي همي وقهري الرب العالمين
ضليت ابجي واشكي
احسه رب العالمين قريب مني
ويسمعني
واني كاعدة ابجي واشكي
اجتي على بالي الايه القرآنية
بسم الله الرحمن الرحيم
( ونحن اقرب اليه من حبل الوريد )
من اجتي على بالي هاي الاية
ضليت ابجي واشهك من البجي
هدأت شويه لان تعبت وكلبي كام يوجعني من البجي
نزعت ازار الصلاة
وتمددت على الجرباية
وكامت تجيني افكار تأذيني
شكاعدة اسوي هسه ويا هذا الرجال
شلون كاعدة تحجي ويا
منو هذا الرجال
وشلون تعرفت عليه
زين هسه هي هم تكله كلام حلو
زين هي هم تحضنه مثل ما جانت تحضن بابا
جانت الافكار الي تجيني تأذيني
وتموتني وجع
واكثر شي جان يوجعني
زين بابا شنو شعورة وهو يشوف ماما كاعدة تخونه
جان هذا اكثر شي يوجعني
ضليت كاعدة بالغرفه ساعة ابجي وساعة اكره وساعة احقد وساعة اعذر
ماادري شجنت اسوي
بالاخير نزلت
لكيتها راجعه والضحكة ماليه وجهه
وكل شويه تصفن وتضحك
وترجع تلعب بالتلفون وتضحك
صافنه عليها
ملاك : نجوم وين كيكتج
خلينا نحتفل بميلادج
نورس: ييي نجمة طلعي كيكتج
اني جبتلج شموع ويايه
نجمة : باوعت على امي باوعت عليه ونزلت راسها تباوع على التلفون
ولا عبالك مسويه شي
ماكو كيكة
ملاك : شنو ماكو كيكة اني قبل شفتج كاعدة اسوين بيها
نجمة : ييي سويتها
نورس : لعد وينها دجيبيها وهاي الشموع
شوفيهن شكد حلوات
نجمة : نزلت دمعتي وحجيت بشهكه
ماكو كيكه امي اخذتها
ملاك : وين اخذتها امج
نجمة : ملاك ابداً متكول ماما البشرى
كله لو امج لو امجن لو ام حسن
ابداً متكول ماما
ردت اجاوب ملاك
بس بشرى سبقتني
بشرى : اني اخذتها ورحت الصديقاتي
عدجن اعتراض
نورس : بس هااي كيكه نجمة
مال ميلادها
بشرى : وساعة السودة الي اجتي بيها للدنيا
نورس : انت مستحيل تكونين ام
بشرى : ييي طبعاً تكولين هيج لان طالعه على ابوج الكو...
نورس : الله يعينه شلون جان متحملج
كوومن بنات
نجمة : طبعاً هاي لو اني حاجيه هيج ويا امي جان هسه اني بالمقبرة بصف ابوية
لان الضرب بس اليه
اما نورس وملاك وحسن متضربهم
تغلط عليهم ايي
تفشر عليهم ايي
بس تضربهم لا
هاي جانت حياتي ويا ( امي )
~~~~~~~~~~~~~~~~~~~~~~
النهاية القصة اني الضغط والاعصاب والسكر كلها منتهيه
لاتنسون النجمة والتعليقات الي تريح كلبي
احبكم ❤️
