صباح الورد الاصفر 🌻🌼
نجمة : شعور الامومه جداً جميل
عاايشه حياتي كلها الايهم
اباوع عليه شلون يكبر كدام عيوني
وشلون ملامحة بدأت تستقر
البيت كله مخبوص باايهم
سوى جو كلش حلو للبيت
وعمتي الها الفضل الجبير بحياتي وبحياه ايهم
اني مااعرف شلون اربي طفل ولا اعرف اداري طفل
كلشي مااعرف
هي الي علمتني خطوه خطوه
عمي ابو محمد جان نعم العم والجد الصالح
يكعد ايهم بالساعات بحضنه ويناغي بي
بيوم الي طلعت الاربعين مال ايهم
عمتي سبحته سبحه الاربعين
وسوت جو كلش حلو
ام محمد : يمه بعد عمري يوم الي اسبحك سبحه عرسك
مرام : شسالفه يمه بيوم عرسه يكون جبير
ام محمد : غير حفيدي قابل شكو
مراد : بكلشي حفيدج بس مو بهاي السالفه
اشوفين اغراضه
ام محمد : ليش هسه اني مو سبحته وشفت اغراضه
مراد : من يكبر يتفل علينا من يعرف كلنا شفنا اغراضه
ام محمد : ماا انت هم شايفه اغراضك
مراد : يمه استري علينا شايفه اغراضي من جنت صغير مو من كبرت
ام محمد : والله انت اللسانك متبري منك ماادري عليمن طالع
مراد :ثلثين الولد على الخال
ام محمد : تروح فدوة الاخوتي كلهم مؤدبين واخلاق
مراد : واني هم مؤدب بس ماعندي اخلاق
ام محمد : وانت راح اضل هيج بدون مره
مراد : من اشوف وحده تفيدني عود ازوج غير هيج مااا ازوج
ام محمد : خلي اشوف الي راح اجيبها شلونها
مراد : تخبل السانها مثل لساني
ام محمد : برى منك ومنها
نجمة : عمتي ومراد من يكعدون سوى يموتونه ضحك
مراد السانه متبري منه وماايستحي من احد
يشمر الكلام شمر
واحنا نخرب ضحك عليه
نعرف مااعنده كونترول على لسانه
قابل من يتعارك ميخلي لا شرف ولا عرض ميجيبه
صافنه على ايهم شلون حلو
سابح ومخليله بوطره اطفال ريحته تخبل
وهو هم يخبل
شعره اشكر وعيونه صفر مثل عيوني
وصايرة عنده خديدات وابيض
اذكرت حلم بابا الله يرحمه من انطاني الطفل
الطفل يشبه ايهم
دمعت عيني من اذكرت الحلم
وتمنيته موجود جان اكيد فرحلي
وهو يشوف حفيدة
قريتله الفاتحة وهديتها بااسمه
محمد : بشنو صافنه حبيبت الروح
نجمة : تذكر من كلتلك بابا انطاني طفل بالحلم
وكلي هذا ابنج
محمد : ايي اذكر
نجمة : الطفل يشبه ايهم
محمد : عود صدك تحجين
نجمة : ايي والله حتى بالحلم كلي شوفي شكد حلو
وهاي ابني شكد حلو
محمد : الله ويجعل مئواه الجنه
واني جيت علمود انطيج خبر
نجمة : شنو هذا الخبر
محمد : اسمعي
انتي مو قبل ما تولدين كلتيلي على سالفه بشرى
نجمة : يا سالفه لان سالفاتها اهواي
محمد : ليش بقتج يمها كل هاي السنوات
نجمة : ييي ليش بقتني يمها كل هاي السنوات
محمد : رحت العمج حارث
نجمة :وشوداك العمي حارث
محمد : اسمعي يمعودة
نجمة : هاي سمعت
محمد : رحت العمج حارث وسألته عن الموضوع
وكلتله انتي عرفتي كل شي
بالبدايه ماقبل يحجي
بس من كلتله انتي عرفتي امج مو بشرى
وبشرى حجتلج كل شي بدأ يحجي
وكال ابراهيم من يوم ولادتج اشترالج بيت
نجمة : اليه اشترالي بيت شو ماعرف بي
محمد : اسمعي
حارث : اخويه ابراهيم جان يعرف بشرى كلش زين
ومن جنا احنا نكله خطيه بشرى ولا تضلمها
جان يكول انتو مااتعرفوها
اني ماعشرها واعرف شنو بعقلها
بيوم الي نولد نجمة واميرة ماتت
ابراهيم خاف على نجمة من بشرى
لان يعرف بشرى مراح ترحم نجمة
وهو حياته صارت خطر وكل يوم يتقرب من الموت
اشترى النجمة بيت وهذا البيت اسجل بااسمها
بس نجمة طفله ومداخله السن القانوني
وكلنا نعرف بالجنسيه بشرى امها النجمة
يعني بالقانون هي الوصيه على نجمة
فصارت هي الوصيه على البيت الي مسجل بااسم نجمة
محمد : وين هذا البيت وليش نجمة ماتعرف بي
حارث : البيت بمنطقه راقيه
وهذا البيت غالي بيوم الي اشترى ابراهيم جنت اني ويا
ومن كلتله ترى فلوسك كلها راح تروح على البيت
كال هذا ذخر النجمة
ماعرف الدنيا شراح اسوي بيها من بعدي
بس الي صار بشرى خبيثه وطلع كلام ابراهيم عليها كله صح
محمد : شلون يعني
حارث : بشرى عدها واحد بالعقارات واسطه كلش جبيرة
من صارت سالفه التهجير والنازحين
استغلت واسطتها والضروف الي مرت بيها المحافظه
وحولت البيت باسمها
بس ماا انطوها السند لحد قبل زواج نجمة بكم شهر
بيومها اجيت اني وهديت على بشرى
وردت اخذ نجمة يمي
لان عرفت راح ادمرها
لان خلصت مصلحتها من نجمة
وحتى عرضت عليها اخلي ابني يزوج نجمة
بس هي مااقبلت لان اكيد لا اني ولا ابني راح تستفاد من عدنا بشرى
محمد : يعني البيت راح على نجمة
حارث : مع الاسف اخذته بشرى الله لاينطيها
محمد : منو يعرف بهذا الموضوع
حارث : الي اعرفه بس اني وهي وام مهدي
حتى اخوانها البشرى ماايعرفون
محمد : هاي المرة طاغيه
حارث : والله ياا عمي جنا كلنا نكول الابراهيم حرام الي كاعد اسوي بيها
وجنا كلنا وياها
بس هوو اخويه جان يعرفها واحافظها
لحد الان اذكر كلمته
يكلي بشرى محد يعرفها مثلي
ولا يغرك كلامها الهادئ وشوفتها بدور المظلومة
ترى هاي شيطان
محمد : هذا الكلام الي صار بيني وبين عمج حارث
نجمة : يعني طول هذيج السنوات الفاتت جنت عايشه بفكر وحسرة وهي عايشه بخيري
محمد : البيت مأجر رحت شفته عمج حارث راح ويايه
والمستأجرين يدفعون خوش مبلغ
يعني يعيشكم كلكم برفاهيه
لان منطقه البيت راقيه
نجمة : وشستفاديت اني من البيت
جانت حسره عليه اللكمة وحسرة عليه اللبسه
وكله ابخت بشرى
وهاي املاك ابويه كلها راحت البشرى
محمد : يابه هي لاعبه لعبه كافرة تعرفين لو لا
نجمة : شلاعبه بعد
محمد : املاك ابوج من مات جانن باسم منو
نجمة : بااسمه كلهن
محمد : مااكو املاك بااسم ابوج كلها بااسمها
حتى البيت الكاعدين بي بااسمها
نجمة : بس البيت الي كاعدين بي بااسم ابويه
محمد : اكلج مااكو اي شي بااسم ابوج
متر واحد ماكو بااسمه
كله بااسمها
مشوفيها متفرعنه عليكم
لو بااسم ابوج جان نورس وحسين
بااعوا املاك ابوج واخذوا حصتهم
وانتي هم جان اخذتي حصتج
ولو اني معليه اذا اخذتي او لا هاي السالفه يمج
بس كلها باسم بشرى
وعمج حارث يجيب ويدعي عليها
نجمة : بس هو هم حقير
محمد: ليش حقير
نجمة : من طلبتي الابنه وابنه معوق
محمد : منو كلج معوق
نجمة : هي بشرى كالت جاي عمج حارث يريد يخطبج الابنه المعوق
محمد : الله اكبر عليها لج هاي شنو من مرة
عمج حارث اصلاً مااعنده ولد معوق
دخلني البيته وعوفني على ولده كلهم
وحتى من باب الضحك
كلي هذا ابني الي ردته ياخذ نجمة
نجمة : عليك الله مكاعد تكذب عليه
محمد : والله شبيج
والولد مااشالله عليه خلقه واخلاق واملاك
ولو لو قابله بي جان هديت عليكم واخذتج غصباً عنج
بس الحق يقال
ولد عمج اخلاق وجمال واملاك
نجمة : الله لايوفقها عيشتني باايام تصعب على الكافر
وكله جذب بجذب
محمد : ماادري من شنو مصنوعه هاي الانسانه
بس الي شاغل عقلي
منيلها هاي الواسطه الجبيرة الي تخليها
تلعب هيج لعبه وتحول كل الاملاك باسمها
نجمة : اذكرت واحد جانت تعرفه قبل ما صادق معاذ ويمكن هذا الشخص اول واحد تتعرف عليه
جان بالعقار يشتغل
بس بيبي ام مهدي جانت هم تعرفه
يعني جان مثل صديق العائله
معقوله هو الي سوى هاي السالفه
ومعقوله جانت مزوجته مثل معاذ
محمد :بشنوو صافنه حبيبتي
نجمة : هاا صافنه على كلامك
مااعرف صراحه منو لاعب وياها هاي اللعبه
محمد : الله يسامحها
معلينه من عدها
شو خلي اشوفه ابني الحلو
نجمة : محمد شال ايهم ويلعب ويا
واني فكري وعقلي كله بسالفه بشرى
بشرى كم واحد جانت مصادقه
وبيبي ام مهدي معقوله تعرف بسوالفها
زين معاذ بعده وياها
الله يرحمك بابا بس انت الي جنت تعرفها
هاي شيطانه مو انسانه ابداً
حتى على جهالها الي طالعين من روحها مااحنت عليهم
واني اطلب منها تحن عليه
واني بنت عدوتها الادودة
مشت ايامي بين صفنات وبين ايهم وسوالفه الحلوة خصرصاً بدأ ينشنش وخديداته كبرن
وبين محمد ودلاله
بيوم كاعدين على الغدة
وكاعدين ناكل اذكرت ملاك
وغصيت بالاكل
ماادري ليش اجتي على بالي
طلعت روحي من الغصه
بالكوة كدرت اخذ نفس
من اخذت النفس
اجاني احساس غريب كلش
حسيت اختي ملاك جوعانه
اول مرة يجيني هيج احساس
وهذا الاحساس قبضها الروحي قبض
حتى دموعي كامت اصب
حسيت اختي بيها شي
ملاك بيها شي
صعدت اركض الغرفتي
ادك عليها مغلق تلفونها
دكيت على نورس طلعلي مرتضى
كلي هسه اصيحلج ياها
دقايق وحجت ويايه نورس
بدون مقدمات ولا سلام ولا كل شي سألتها على ملاك
نورس ملاك حجيتي وياها
نورس : اسم الله شبيج فززتيني
شبيها ملاك
نجمة : اني كاعده اسألج حجيتي وياها
نورس : لا والله صارلي اكثر من 10 ايام محاجيه وياها
اخر شي من رحت الاهلي علمود اخذ فلوس من امي اجهز نفسي للولادة
وشفتها هناك بس مااحجت شي بس ساكته
ليش اكو شي
نجمة : لا مااكو شي بس بالي يمها
نورس : انشاالله ماابيها شي
نجمة : تحجي نورس واني كلبي نار على ملاك احس اكو شي بيها شي
ليش هذا الاحساس اجاني ماادري
سديت الخط من نورس
وخابرت على حسين
وسألته على ملاك
حسين : اني صارلي 20 يوم بااربيل
لكيت شغل هناك ورحت
وخابرت البارحة على امي
وسألت على ملاك
كالتلي نايمه بغرفتها
فطلبت منها تبوسلي ياها
نجمة : سديت الخط من حسين واني كلبي ممرتاح
مثل السمجة المزوهرة
هيج حالتي
ومكاعدة اعرف شنو السبب
وليش هيج تخبلت على ملاك
اريد هاي الدقيقه اشوفها كبالي
بس شلون اشوفها وهي تلفونها مغلق
واني بيت اهلي ماادخله
——————————
هلاو كيكاتي
انطوني توقعاتكم للبارت الجاي
ولاتنسون النجمة والتعليقات الحلوة
احبكم كومات ❤️
