إنصاف 🌻

#الحلقة 17 :

قعدت تقلب ف الكتاب باش تلقى دار النشر والطبعة
• انصاف : بصح ماكان والو ...مافيه ني دار نشر ني طبعة ني والو ، كاين غير اسم الكاتب امممم
" غيث " اسمه شباب بصح ههههه هذا راجلي صيبون قررت ههههه
• ام انصاف : انصاف ... جيبيلي الملاية تاعي من مور الباب
• انصاف : صحاااا ،
راحت جابتلها الملاية و ريحت قدامها تاكل ف العنب
• انصاف : علابالكي ماما لقيت كتاب ب إسمي
• ام انصاف : مليح ...ادخلي ف صلب الموضوع
• انصاف : المهم بغيت نقولك بلي راني خارجة
• ام انصاف : كتاب جديد ؟ شحال من كتاب لحد الساعة شريتيه و كملتيه في يومين و راه قاعد مقيوس (مرمي)  في قنت لا مستحيييييل تعاودي تشري كتاب اخر
• انصاف : راني كبيرة ماما راني قريب 28 عام و زيد ب دراهمي
• ام انصاف : صحا صحا يا مو لسان ، هادو الدراهم جهزي بيهم مشي تشريهملي كتوب قري ف المكتبة و ولي للدار علاش تضيعي ف دراهمك على التفيش لي ما يدي ما يجيب
• انصاف : علابالك بلي ما غاديش نتزوج علاش دايما تحبي معايا نفس الموضوع ب حجة الكتوب ؟
• ام انصاف : استغفر الله ، صايي دبري راسك دراهمك كوليهم حرقيهم ديريهم بخور ما كان ما دخلني اصلا واحد فيكم ف هاد الدار ما يسمعلي هدرتي ، طرطووور انا مشي أم بعدي عليا بعدي دوك الحانوت يبلع ، كان فايت صهيب و باغي ياكل طرف خبز شافته أمه ،
زيد نتا قعد غير تزيفط ف الماكلة والقراية والو لوكان غير جات قرايتك على حساب ما تسرط
• صهيب : صحا انا شا دخلني ؟
شاف ف انصاف و قعد يهدر بالشوية ، انصاف الحمارة نتي ديريها وانا نحصل معاك
• انصاف : ما درتلك والو نتا شا داك تفوت قدامها
• ام انصاف : ناس تجيب الولاد والبنات وانا نجيب الخلا من كرشي
• صهيب : روحي ردي الكتاب للمكتبة ما تنسيش
• انصاف : عاود عاود ؟ ما سمعتكش مليح ؟ راك تتواقح مع ختك الكبيرة ؟ .. حكماته من رقبته و تزير عليه بيدها تجيف فيه
• صهيب : صاااا.....ييي انصصصص..اف
• انصاف : روح ما تعاودهاش
• صهيب : هذا هو الاستغلال السيء للسلطة
• انصاف : لهى ب قرايتك باش تجيب باكك يا البوريييكوووو
قعد يخزر فيها دا الخبز تاعه و راح ، كملت شقاها و خممت تخرج ،  لبست غاية دارت ماكياجها و سرحت شعرها و خرجت للمكتبة
• انصاف : سمحيلي خالتي نسقسيك ، كاين مكتبة منا ؟
• ؟؟؟ : نعم دوري على يدك اليسرى و روحي غير نيشان تلقيها ف آخر الطريق مقابلة الإبتدائية .
دارت كيما قالتلها و تبعت هاديك الطريق لقاتها و كانت تبان قديمة شوية
• انصاف : اممم باينة مولاها راجل كبير ااااه ، كون غير يتفكر الجزء الثاني تاعها وين خايفة يصرالي كي العادة ،
سلام ... سلام ؟!
كان مول المكتبة عاطيها بالظهر و ما سمعهاش قربت من الكونطوار و هي تشوف فيه
• انصاف : سمحلي خويا معليش دقيقة باغي نسقسيك ؟!
، شافته جنب و يبان عليه ماشي جزايري كي شاف فيها بدلت اللغة تاعها ،
Hi , can you speak english ?
• مول المكتبة :  ....
تنارفت عليه كي شافته داير كيتمان و قعدت تتوغ
• انصاف : قلع جد الكيتمان باش تسمعني ...ما تفهم ني عربية ني اونجلي
قلعهم و كانو تعابير وجهه باردين انسان غبر مبالي
• مول المكتبة : واه ختي فاش نقد نعاونك ؟
و تما الحشمة لي طاحت على انصاف غير ربي لي عالم بيها
• انصاف : سمحلي ....حسبتك ما تعرفش العربية ...
• مول المكتبة : لا عادي ، واش تحتاجي ؟ آنسة ...؟! ختي ...؟!
مع أنو يبان وقح بصح ، كانت مركزة معاه هاديك اللبسة لي راه لابسها ، و الريحة لي دايرها مفوحة المكتبة ، عجبها باينة بلي حب من أول نظرة
• انصاف : واه سمحلي ، بغيت نقولك خاصني الجزء الثاني ولا التكملة تاع هاد الكتاب جيت نرده و ندي الجزء الآخر ...
• مول المكتبة : إنصاف .... من وين ديتيه ؟
• انصاف : ماشي انا ديته خويا داه عليك السيمانة لي فاتت ههه
تبدلت نظراته ليها و كان يبان منارفي
• مول المكتبة : بصح هاد الكتاب ماشي للبيع ولا القراءة د شكون عطاهله ؟ .
• انصاف : يا خويا مالك تطير و تاكل ف روحك راني نقولك خويا داه من هنا و انا وين علابالي المكتبة تاعك ماشي تاعي و زيد الكتوب مديورين باش يقروهم الناس ماشي باش يتكنزو
• مول المكتبة : سمحيلي انفعلت عليك هاد الكتاب ماشي للقراءة ومافيهش جزء آخر ، خليه هنا و تفضلي روحي اذا ما كانش حاجة أخرى نقد نعاونك فيها
• انصاف : كيفاش ما عندهش جزء آخر ؟ قصدي شوف فالصفحات تاعه ماشي مكتملين و باقي بزاف فراغات ف القصة حابة نعرفهم
جات توريه الصفحات ، فكلها الكتاب من يدها و بلعه
• مول المكتبة : ختي قلتلك ما عندهش تكملة صيبون هنا كمل اصلا هذا كتاب تافه ما عندهش معنى كيفه كيف لي كتبه انسان فاشل ...
• انصاف : نتا لي راك تخليني نقلل احترام معاك ، ما عندكش الحق باش تهين هاد الكاتب و الكتاب قريته ...؟! تعرف الكاتب تاعه ؟! ما تعرف والو مالا ما تعطيش احكام مسبقة ل حاجة تجهلها
• مول المكتبة : يا ختي كل واحد و رأيه اذا هذا ماكان تفضلي روحي
• انصاف : راك تطرد فيا ؟ هات الكتاب عطيهلي راني باغية نشريه ...
• مول المكتبة : لا حول ولا قوة الا بالله ، يا ماشي للبيع ما تفهميش ؟!!
• انصاف : كتاب كيما هذا ما يستاهلش يقعد عند واحد كيفك ما يقدرهش ولا يعطيه قيمة
شوية حتى دخلت مراة زينها يهبل انيقة ، و تبان من عائلة راقية لاطاي تاعها تاني شابة
• ؟؟؟ : سلام ، كيراك ؟
• مول المكتبة : لاباس الحمد الله و نتي ؟
و تبسم معاها ، باينة بلي معاملته مع هاديك المراة و معاملته مع انصاف ماشي كيف كيف ...
• انصاف : ماله هذا تجاهلني وراه يهدر معاها ؟؟ خوياااا راني نهدر معاك ...
• ؟؟؟ : عيب عليك تتجاهل شيرة ماشي من طبايعك ههه
حتى طريقة هدرتها و تبان رزينة و كالم ...
• انصاف : شوف لي يفهمو ... راني باغية نشري الكتاب ...
• مول المكتبة : نتي لي مديتي هذا الكتاب السيمانة لي فاتت ؟
• ؟؟؟ : واه بصح على حساب ما راني متفكرة كان شير و صغير ف العمر يبان ف الليسي راني كاتبة اسمه ف الروجيستر معلوماته لي عطاهملي ورقم البطاقة تاعه
جبد مول المكتبة الروجيستر و قرا الإسم
• مول المكتبة : صهيب *******
• انصاف : وي نيشان هاداك خويا .
• مول المكتبة : هي تخدم هنا مؤقتا و ما تعرفش مليح الكتوب الوغ سمحيلي الأخت غلطة مدتله الكاتب لي ماكانش لازم يخرج من هنا
• انصاف : غادي نعاود نولي ، و حتى نعرف اذا عنده جزء اخر ولا تبيعهلي 
جات خارجة من تما
• ؟؟؟ : غيث شكون هادي ؟؟
• مول المكتبة : والو خلينا منها خير ما جابك ؟
• ؟؟؟ : عمي راه يحوس عليك روح للدار دوك انا نعسلك المكتبة 
• مول المكتبة : اوك نخليها عليك
رفد تيليفونه و جا خارج ، كي خرج لقاها تستنى فيه عند الباب
• انصاف : اسمك غيث ؟
• غيث : استغفر الله مالكي ختي ؟  خلعتيني ...
• انصاف : الله يسترك قولي على الكتاب هاداك والله باغي نهبل