إنصاف 🌻

#الحلقة 29 :

قعدت معاهم انصاف و فوتت معاهم وقت شباب بصح كان الوقت باش تشور للدار
• ليث : دوماج هذا النهار التالي ليك و غادي تشافري كون تعارفنا بكري كنا غادي نفوتوها غاية
• نسيمة : قادر روحك راك ب مرتك و تسمعك جيهان تقسمك و خصوصا مع الوحم تكددك
• انصاف : كرتك راهي بلكرش !!
• ليث : هههه وي راهي تتوحم
• انصاف : الله يرزقها ساعة السلاك ان شاء الله وتفرحو ب مزيودكم
• مسيمة : منا لهاداك الوقت ليقلك تكوني هنا باش تحضري للقصعة
• انصاف : ان شاء الله ...
قالتلها ان شاء الله بصح ب نبرة حزينة ناضت و جات خارجة حبسها غيث ، ايا قعدت نسيمة تنقز ف ليث باش يشوف فيه
• نسيمة : عندك عندك راه ميت بالحشمة ...
• ليث : واه راني نشوف امممم
رفد غيث الكتاب و عطاه ل انصاف
• غيث : هاكي انصاف ديه من اليوم راه تاعك
• انصاف : بصح ...
• غيث : كادو باش كي تكوني مسافرة تتفكريني و تتفكري اليامات الشابين لي فوتناهم هنا ...
• انصاف : غيث اخر هدرة نقولهالك هي أجمل أنتقام درته لوالديك هو كي دخلت الاسلام وكي بغيت هاد القوم لي كرهتهم و كي قابلت السيئة بالحسنة ،  والديك راهم فخورين بيك متأكدة ، غيث تهلالي ف روحك .
و عنقاته قدامهم ، مات بالحشمة و ليث خرجتله الليموناد من نيفه ، نسيمة صفقتلها بالشوية و عطات ليث حاجة يمسح نيفه خرجت انصاف من تما و البكية شادتها بالبسيف ...كي خرجت شافت ف تفاصيل الحي ف كلشي
• انصاف : نبغيك غيث ...

*** بعد عام ***

غاب حس انصاف ما عاودت اتصلت بيهم ما والو ف فترة غيابها قعد يستقبل غيث شيرات وشاشرة من طل الأعمار يجمعهم ف المكتبة ويحكيلهم كتاباته و خطراتش قصص كاينة ف المكتبة تما  ، وحد النهار كان قاعد بعد ما شورو البز الصغار من عنده جات نسيمة
• نسيمة : صباح الخير غيث كي صبحت ؟
• غيث : لاباس و نتي ؟ كيراكي مع التحضيرات تاع العرس
• نسيمة : ما تفكرنيش حمبوووك ، راني مغبونة ما بيا الخدمة ما بيا التوجاد علابالك أجمل حاجة درتها ف حياتك  كي قررت ما تتزوجش هههه
• غيث : قلتلك و ما سمعتيليش ههههه
• نسيمة : غيث وليت تضحك بزاف فالفترة الأخيرة ... اسكو هذا تأثير أنصاف عليك ؟ ههه
• غيث : شا راكي تقولي ، خلي الشيرة ف حالها
• نسيمة : صحا صحا غادي ندير روحي ما فقتلكش
غاس غيث و كان يشوف بعيد حتى خلعاته مسيمة و ب نظرة جدية شافت فيه
• نسيمة : غيث عطيني 5 دقايق من وقتك و سمعني ، ليقلب نعترفلك هههه على الأقل لآخر مرة ب طريقة لائقة
• غيث : هاه ؟!!!
• نسيمة : بغيتك بزاف ولوقت طويل كنت عاجبني و ما قديتش ندسها ف قلبي ، غيث نبغيك
يبس غيث ف بلاصته ، حتى لي ردت فيه ضحكة نسيمة الروح
• نسيمة : مالك نخلعت هههه هاد الهدرة كان ليق نقولهالك مين كنا فالليسي و غاضتني لي ما؟؟؟ عترفتش بصح درك لوكان تطير عينك ما نوليلكش راه عندي راجلي و فرصتك ضاعت هههه
• غيث : خلعتيني ههه ، مشكورة على حبك ليا بصح للأسف ...
• نسيمة : بلا ما تعاود ترفضني دكتور غيث راني فاهماتك هههه
شوية حتى دخل عنده شير يكون في عمره 19 عام هاكا حبسو الضحك و شاف فيه
• ؟؟؟ : سلام
• غيث : وعليكم السلام كيفاش نقد نعاونك ؟
• ؟؟؟ : نتا  أستاذ غيث  ؟
شاف ف نسيمة ومام هي ردتله النظرة
• غيث : وي انا
• ؟؟؟ : عندي أمانة ليك ، حل كرطابه و عطاه الكتاب تاع " إنصاف "
• غيث : نتا ؟ صهيب ؟! خو انصاف الصغير ...؟!
• صهيب : صح ... السلام عليكم ...
• غيث : صحا استنى خليني نسقسيك ... ، ماله راح هاكا ؟
• نسيمة : بالاك ماشي من النوع لي يهدر بزاف ، ما تقوليش كنت باغي تسقسيه عليها امممم ههه
• غيث : لا كيفاه هادي عيب ...

• نسيمة : مشي عطيتها الكتاب كادو ؟ زعما تكون ولت وبغات توريك بلي ولت ؟!
• غيث : ما نعرف ... ما سمعت عليها والو من لي راحت ايوا نخليه هنا كاش حاجة ولا تبان
هو جا يحط الكتاب طاحت منه ورقة رفدتها نسيمة لقاتها مزوقة مليح و مكتوب فيها
" إلى غيث "
• نسيمة : اوووو رسالة حب هههه شوف شوف
فكهالها من يدها و جا يقراها
• غيث : جبدي بعيد خليني نقرا ...
• نسيمة : راني رايحة اصلا ههه نخليك تقرا ب راحتك ايا باي باي
• غيث : وين  ؟
• نسيمة : غادي نتلاقا مع عماد اليوم تفاهمنا نشوفو خاتم العرس كون ما نروحش يقولي خدمتك اسبق مني و راك عارف الموشحات الاندلسية  تاعه خلينا منه ، تهلى ...
خلاها خرجت هود الريدو تاع المكتبة و حل الرسابة و هو متشوق يقرا و كانت الرسالة كالتالي :

♡ إلى من أحببت غيث ♡
أولا أود أن ألقي عليك التحية اهلا ، كيف حالك ؟ هل أنت بخير ؟ ،  ستكون رسالة طويلة أتمنى أن لا تمل وأنت تقرأها ههه ، وبينما أنت تقرأها بالتأكيد سأكون تحت التراب لذلك ركز فيما سأقوله بعناية  لأني لن أكون هناك حتى أشرح لك مجددا .
حسنا لنبدأ ، اريد أن أعتذر منك غيث لم يكن يجب أن أكذب دعني أعرفك ب نفسي مجددا إسمي انصاف عمري 28 سنة لم أقع بالحب يوما كنت حبي الأول الوسيم و الوقح ههه أحببتك من أول نظرة صحيح أني عشقت كتابك و كتاباتك لكني جعلت من القصة سببا للتقرب منك و زاد حبي لك يوما بعد يوم ، انا مريضة السرطان في مراحلي الأخيرة كنت أحاول أن لا تكتشف ذلك فيا لم أرد أن تشفق علي كنت أرفض الخضوع لعلاج الكيماوي و لأني تعرفت عليك قررت تأجيل مسألة علاجي لوقت اخر لكن مرضي اشتد و لم أعد أقوى على الحراك لم أرد أن اتركك ورائي وشكرا لأنك رفضتني بوسعي الموت وأنا مطمئنة الآن ، سأخضع لعملية في الأسبوع القادم ان شاء الله فكرت أن تكون أول من أراه إن نجحت العملية ، لكن اذا كنت تقرأ كلماتي الآن فهذا يعني أن العملية قد فشلت ...لقد أنهيت كتابك و هو جاهز للطبع لا تنسى أن تتصفحه ، وأرجوك لا تتخلى عن الكتابة حتى لا تتخلى الحروف عنك امسك القلم و اكتب لا تفقد نفسك ولا تنسى إسمي موتي لا يعني تخلي عنك لأني حتى وأنا ميتة سأظل احبك و إياك أن تبكي حذاري  ،  و طلب أخير رجاء زر قبري واتلو على روحي الفاتحة متأكدة أنها ستصلني أنا هنا دائما ب جانبك ، أون وو أنا أحبك .