إنصاف 🌻

#الحلقة 20 :

• غيث : بصح شاه ؟ جاوبتك و لقيتي روحك غالطة
• انصاف : موحال عمري ولا كانو استنتاجاتي غالطين ...، بالاك غير خيالي لي واسع ههه ...
حطت راسها والمورال كان طايحلها
• غيث : مالكي ؟ راكي متمنيتني نكون الكاتب ل هاد الدرجة ههه
خزرت فيه و هي قالبة شنايفها
• انصاف : بركا تضحك عليا... ، كانت غادي تكون حاجة بزاف شابة لوكان الإنسان لي نبغيه والإنسان لي نحترمه يكون نفس الشخص
• غيث : راكي بعيدة بزاف على حاجة سموها حب باسكو نتي ما تبغينيش ، كنتي تحوسي عليا باش  بيا توصلي للكتاب والنهاية تاعه ...
تنارفت من الهدرة تاعه و عقدت حواجبها
• انصاف : سما راك تقول بلي تقربت منك على خاطر مصالحي الشخصية ؟
• غيث : هي بالذات
• انصاف : ما عندكش الحق تتهمني ف حاجة كيما هاك ،  نتا ما تعرفش لي في قلبي خير مني ، اذا عاودت قلتها ب هاد الطريقة غادي نروح باسكو هادي إهانة ليا و لمشاعري
• غيث : قلت الصراحة ولا شيء غير الصراحة ،  واذا كانت صراحتي ضراتك لهاد الدرجة تقدي تتفضلي وقت ما بغيتي
• انصاف : راك منيتك ؟
• غيث : أكيد ما نزعقش ف هاد الصوالح
كان مجمع فوق الكرسي لي مور الكونطوار و هي مداري تحط صاكها من تما راحت دفراته بيه بالكرسي تاعه و رفدت صاكها دارته على كتفها و جات خارجة
• انصاف : صحيت على هاد الهدرة الشابة ، خرجت من تما و هي تبكي ، كان داخل عنده ليث و تكرزاو عند باب المكتبة شاف فيها ب دهشة
• ليث : شاكاين غيث ؟ الشيرة خارجة تبكي من عندك صرالك بروبلام معاها ؟
• غيث : وعليكم السلام راني مليح ونتا ؟
• ليث : امنيتي نسقسيك على حاجة و ترد كي الناس
*** في الجهة الأخرى ***
بعد مدة من المشي في 20 دقيقة ،
• إنصاف : منيته قالي هاد الهدرة ؟  بالاك حبي ليه مشي كبير لدرجة كبيرة ، بصح والفته و اعجبت بيه من النظرة الأولى و تقربي منه ماكانش ب سباب الكتاب درته غير سبة باش يهدر معايا ...شحال من خطرة تبعته و شفته شا يدير بالتفصيل الصغير ، صايي انصاف حبسي بكا من اليوم ما نزيد نشوفه ما نزيد نخمم فيه أصلا عندي مواضيع أهم نخمم فيهم ...
قعدت تستنى ف الBus ، ماله دا تاني طول هاك ...، تلفتت على يمينها شافت نسيمة ايا قعدت  تغطي ف وجهها باش ما تعرفهاش ...
• نسيمة : سلام ...مشي نتي لي تخدمي عند غيث ؟
• انصاف : وي ... لاباس ؟
• نسيمة : الحمد الله ، كيفاش جاك التعامل مع غيث
انصاف قعدت تهدر مع روحها
• انصاف :  بخبطه ب صرعه تسقسي فيا على غيث ... ،  عادي ...
• نسيمة : ااا صحا ، خليتيه مليح ياك ؟
• انصاف : هي حبيبته ولا ما نعرف كي تجيه و جاية تسقسي فيا أنا ... شغل ما علابالهاش .
• نسيمة : شا قلتي ما سمعتكش ؟؟
• انصاف : نورمالمون كان مليح ...
قعدت انصاف تحاول تبلع الموضوع معاها بصح نسيمة سماطت عليها ، و طريقة أسئلتها كانت وقحة
• نسيمة : شحال عندك من عام ؟
• انصاف : 28 عام ، علاه ؟
قعدت تشوف فيها من الفوق للتحت و تميز فيها
• نسيمة : سمحيلي اذا تواقحت معاك بصح طريقة لبستك ما تبينش عليك بلي عندك 28 عام
صايي انصاف وصلت حدها و ما قدتش تزيد تسكت ديجا كانت قانطة و كملت عليها هي
• انصاف : مارانيش ف نهاري و راكي تزيدي عليا نتي ، جيبيهالي مالتالي شا خصك ؟
• نسيمة : راني حاسداتك ...
الإجابة تاع نسيمة كانت أكثر من غريبة لدرجة خلت انصاف تضحك بلا ما تحبس
• انصاف : حاسدتني ؟ أنا ؟ علاه خير شا عندي و ما عندكش ؟
• نسيمة : ملكتي الحاجة الوحيدة لي ما قديتش نوصللها قاع حياتي ههه ما تديهاش مني إهانة بصح ما تستاهليهاش
• انصاف : هههههه نتي مريضة ياك ؟
• نسيمة : لا أنا غي صريحة ..
• انصاف : صريحة زيادة عن اللزوم حتى الصراحة ولت وقاحة
• نسيمة : نبغي غيث بعدي عليه ..
• انصاف : لوكان عينه فيك كون خيرك ، مارانيش داسة قلبه ف جيبي
• نسيمة : راني نقولك بعدي عليه
• انصاف : مشي غادي تتزوجي ؟ هذا تصرف عاقل من وحدة مراة راجل ؟ عندبالك غيث غادي يقبل هاد الجاست لي راكي ديري فيه كون يعرف مستحيل يقعد صديق ليك  ولا مهما كانت مكانتك غادي تطيحي من عينه
• نسيمة : غيث شخص بارد حتى و ندير لي نديره ما يكونش رد فعله واعر معايا و حتى وتحاولي تفضحيني نكذب عليه و نتي تربحي غير العيب ...
• انصاف : راهي تبانلي فيك نحكمك نقطعك ب سنيا والله .. آخر مرة تهدري فيه عندي هاكا راكي تسمعي ؟ ما يهمنيش نوع المرض لي عندك بصح متأكدة بلي جامي بغيتي غيث من قلبك ، مع أنو ما نعرفهش في شحال بصح بغيته كنت باغية ننساه بصح مادام وحدة كيفك تدور بيه موحال ... خليني عاقلة نسيمة و نتي لي ليقلك تخطي جرته ، هاداك إنسان قلبه مليح و يستاهل كل خير .

• نسيمة : ههههههههههه ،
• تنصاف : مالكي تضحكي ؟
• نسيمة :  بغيت ندير معاك اختبار بسيط و نجحتي 
• انصاف : شاراها تقول هادي ؟
• نسيمة : كنت نضحك معاك هههه الهدرة لي قلتها قاع ماكانش منها ، معليش تمديلي شوية من وقتك نريحو نهدرو ؟
قبلت إنصاف و ريحت معاها عند لاري تاع الBus
• نسيمة : لا لا ما نجمعوش هنا خلينا نروحو ل كاش روسطورون قريب منا
• انصاف : عقليتها تاع لهيه مالها دي رانا ف الجزائر ....
راحت معاها و قعدو يحكو تما دوموندو الJus و ماكلة خفيفة .
• انصاف : فاش راكي باغية تهدري ؟ ماراني فاهمة والو مادابيك تفهميني ...
• نسيمة : علابالي لي صرا حكالي غيث ...زيفطلي ميساج قبيلة كي صرا المشكل بيناتكم بغيت نوضحلك سوء التفاهم
كانو مريحين حدا التاقة ، حطت انصاف كراع فوق كراع و قعدت تشوف ف الناس لي رايحة جاية و تسمع ل نسيمة
• انصاف : امممم ، يديرها بالبصل منبعد يقعد يحلل
• نسيمة : بالنسبة ليا غيث انسان مميز ف حياتي نعترف كان كاين وقت بغيته فيه لدرجة الهبال ...
• انصاف : ودركا ؟
• نسيمة : بصح دركا راني مراة راجل و نسيته نهائيا دارلي بزاف صوالح شابين ف حياتي عيبه الوحيد ما يعرفش يعبر على لي ف قلبه بالاك هاد شي بسباب الماضي تاعه ...
• انصاف : علاه ماله الماضي تاعه ؟
• نسيمة : ما نقدش نحكيلك على حاجة خاصة بيه بصح اذا كنتي عزيزة عليه وكيما بي راه في بالي  متأكدة غادي يجي نهار وين يحكيلك ...
• انصاف : مارانيش فاهمة كيفاش راه يخمم ، ما عييت نسيي نفهمه ووالو
• نسيمة : نتمنى تعطيه فرصة اذا جا و طلب منك السماح
• انصاف : هو طلب منك تحكي هاد الهدرة ؟
• نسيمة : لا ..
تبدلت ملامح انصاف
• انصاف : صريحة بزاف ، كون اوموا كذبت عليا ....
شافت انصاف ف تيليفونها لقاته يصوني واسم غيث مكتوب بالنبط العريض ، و قلبها يضرب بصح لعبتها ماشي مهتمة
• نسيمة : اذا ما راكيش مهتمة ما نردش عليه ...
انصاف لعبت عينيها ف راسها ، كي جات غادي تكوبي حكمتها من يدها
• انصاف : ريبوندي ....
هدرت معاه نسيمة و تفاهمت معاه باش يجي ف البلاصة الفلانية
• نسيمة : انا نخليك دركا باسكو نقري
• انصاف : تقري ؟ وين ؟
• نسيمة : ف نفس الجامعة لي يقري فيها غيث ، أستاذة لغة فرنسية
• انصاف : استني نجي نخرجو مع بعض
حكمتها من يدها وقعدتها
• نسيمة : راه جاي غيث استنيه 10 د ويكون هنا ما تخافيش هو دقيق ف المواعيد تاعه ، و غمزتلها