إنصاف 🌻

#الحلقة 27 :

• غيث : أعطني إياه سأعطيه ل نسيمة
• ميرا : مادابيك والله تدير فيا مزيا .
جا ليث داخل للشومبرة و يحك ف عينيه منتفخين من الرقاد
• ميرا : رقدت حتى خمرت كنت جاية نزيفطلك غيث ينوضك
• ليث : كنت عيان ، روحي روحي باغي نبدل قشي
• ميرا : كبرت ووليت تحشم مني زعما كلي بصح
غير حل عينيه مليح شاف الخاتم ف يد غيث
• ليث : شاوا هذا ؟
• غيث : ااا إنه الخاتم الذي اشتريته ل نسيمة ، كنت قد فقدته سابقا لقد
ما خلاهش ليث يكمل هدرته طار عليه
• ليث : نتا ديته ؟؟ اهدر !!! حبس حبي خليني نتفكر ، درتهالي بلعااني ياك ؟؟ علابالك بلي نبغي نسيمة و اعترفتلها بلي تبغيها و زدت خونت الخاتم و دسيته عليا باش ما نعطيهلهاش ؟! نتا لعبتلها ب مخها باش ترفضني ؟؟؟
• غيث : انتظر مالذي تهذي به ؟ خاتمك كان ...
• ليث : ما تحلش فمك ما رانيش باغي نسمعك تهدر بلع ما تحكيليش قصة حياتك
• غيث : دعني أشرح
• ليث : ما تشرحلي ما نشرحلك ربك علابالك بلي نعشقها ، بغيتها من الصغر
و طاح فيه بالضرب للوجه ، غيث ماشي متمكن ف القتال الجسدي عنده غير مخه لي يخدم بيه و يخطط بيه
• ليث : ربككككك نسيمة تاااااعي ، كيفاش قديت تغدرنب هاكا
و غيث قعد يرد عليه ف الضربة ، ضربة يردها و عشرة لا نع انو كان عارف بلي خاسر خاسر ايا استسلمله و خلاه يفرغ غله فيه ، سمعت ميرا الزقا والحس راحت تشوفه حتى عشت تسلك ما بيناتهم
• ميرا : مالكم نتوما زوج هبلتوووو كلبتوووو ، علاش راكم مدابزين
ما عيات تسقسي فيهم و هددتهم بصح والو واحد فيهم ما حل فمه ولا هدر تعاقبو في زوج و كانت ممنوعة عليهم الخرجة و تيليفوناتهم ماكانش من القراية للدار و تأخر 5 دقايق لأي واحد فيهم تزيد مدة العقاب ليهم في زوج أيا مع الغدوة كانو دايرين إضراب ما قراوش جات نسيمة للدار باش تستفسر لي صرا راكم عارفين زوج نساء كي يبدو يحكو ف موضوع توصل الهدرة حتى لليونان
• نسيمة : اخر حاجة توقعتها تصرا انو تدابزو ، اخر مرة دابزتو فيها كي كنتو صغار
• ليث : شوري نسيمة ما دخليش روحك
• نسيمة : راك تطرد فيا باسكو رفضتك ؟ ماراكش حاس روحك راك تدير كي البز
• ليث : و نتي ما حسيتيش روحك بزة كي سمعتيله مين عمرلك راسك عليا ؟ و ما حسيتيش روحك بزة كي ما خليتينيش حتى نعترفلك اعتراف مناسب و قطعتيلي هدرتي و حرجتيني ؟؟؟
• غيث : أصمت ليث
• ليث : لا نتا لي تسكت و مادابيك تبلعه قاع ما تدخلش روحك يا الخاين
• نسيمة : شا راه يقول هذا غيث فهمني ؟؟
• غيث : يظنني أعترفت لك بمشاعري
• نسيمة : علابالي بيك راسك حجرة بصح ماشي لهاد الدرجة ليث

*** التوضيح ***

ف الإستراحة كانت غادي تعترف نسيمة ل غيث حتى شافته واقف مع وحدة كي قربت منهم
• ؟؟؟ : غيث راك عاجبني وما عرفتش كي ندير نخليها في قلبي حمبوك ما تردنيش مدلي فيسبوكك
• غيث : سمحيلي ... ما عنديش اهتمام نولي ف علاقة حب باسكو ...
• نسيمة : زعما يكون يبغيني ...
حتى سمعاته كمل الجملة
• غيث : مارانيش باغي نكمل حياتي مع وحدة جزايرية و جامي نخمم نديرها
كي راحت هاديك الشيرة تقدمتله نسيمة
• نسيمة : الهدرة لي سمعتها كاين منها ؟
• غيث : ماذا سمعتي ؟
• نسيمة : ماراكش ناوي تكمل حياتك مع جزايرية ؟؟
• غيث : صحيح ..
• نسيمة : بصح راني باغية نقولك حاجة ...
• غيث : لا تقولي رجاء ، أحاول ان أتهرب من هذا الموقف العديد من المرات نحن أصدقاء و سنبقى كذلك أعلم ما تشعرين به اتجاهي لكنه أمر خاطئ أظن أن ليث يستحق تلك الفرصة أفضل مني
• نسيمة : علابالي ...بصح هادو الصوالح قلوب أوك ما تخممش ما غاديش نزيد نجبدلك على هاد الموضوع .
كي دخلو للقسم و سمعهم ليث هو سمع غير نص الهدرة و تصحيح الهدرة كان كالتالي :
• غيث : كنت باغي نعترفلك في شحال بلي علابالي بيك تبغيني بصح خفت عليك تزعفي لوكان تعرفي بلي ما رانيش ناوي نتزوج جزائرية ، و زيد راني عارف غلطت ف حق ليث كان علابالي بلي يبغيك بصح ما قديتش نمنعك من أنك تبغيني شغل خونتك منه ...

*** نعووود ***

• ليث : سما راكي تقوليلي بلي نتي تبغيه ، و هو ما يبغيكش ؟
• نسيمة : واه .
• ليث : والخاتم علاش ديته غيث ؟
• غيث : لم تترك لي الفرصة لأشرح لك ، عمتي ميرا من وجدت الخاتم اثناء التنظيف . مشكلتك أنك متسرع جدا لما قد أسرق نسيمة منك وأنا في الأصل لا أملكها
• نسيمة : كنت قادر تملكني نتا ما بغيتش
• غيث : أخبرتك أني لا أستطيع الزواج من جزائرية ....
• نسيمة : طلب منه السماح ليث
• ليث : علاش نطلب منه السماح ؟ نتي لي ليق تطلبي منا السماح في زوج ، دخلتي بيناتنا
• نسيمة : علاه كاش نهار غريتك فيه و قلتلك بغيني ؟
• ليث : صايي بلعيه سامطة
قعد غيث يتفرج فيهم و يضحك بالشوية
• نسيمة : علاش راك تضحك ؟
• غيث : يبدو اﻻمر ممتعا حينما تتشاجران ، اكملا رجاء
• ليث : حاسبني نخدم عند طاسيلتك ؟؟؟
• غيث : مالذي قلته الأن ؟
• نسيمة : هههه عايرك
ليث : كون ما تنطقيش من فمك ما نعرف من وين تنطقي
قرب منه غيث ومدله يده
• غيث : أصدقاء ؟
ضربله ليث يده وبعدها ، باش يعنقه
• ليث : خوت ماشي أصدقاء
• نسيمة : شاهو المحل تاعي من الإعراب ؟
بعد مدة ربحو الباك و تفارقت الطرق تاعهم كل واحد وين راح تخصص نسيمة الفرنسية ، ليث علوم إنسانية ، و غيث الأدب العربي ، راحت نسيمة باش تقرا ف ولاية وحدوخرا اللغة الفرنسية حتى لي جات من تما أستاذة ، و ليث و غيث قعدو مع بعض في ولايتهم
*** بعد 8 سنين ***
• ليث : أهلا كيراكي نسيمة عاش من شافك
• نسيمة : توحشتكم بزاف بزاف ، ليث كيراك ، و شافت فيه ب نظرة ماشي كي العادة كانت فرحانة لي شافته وتضحك
• غيث : حنا تاني توحشناك ، غيبتيها حتى ما قديتش نتعرف عليك والله
طارت عليهم و عنقتهم في زوج كان أجمل لم شمل بعد 8 سنين فراق
• ليث : ما تشوفيش فيا ب هاد النظرة و ما تعنقينيش بزاف دوك نبدل رايي و نسمح ف مرتي هههههه
• نسيمة : مبروك عليك سمعت بلي خطبت
• غيث : شفتي كبر و تبدل و راه باغي يتزوج
• نسيمة : حتى نتا تبدلت غيث وليت تهدر كيفنا
• ليث : وي شفتي ههههههه
• غيث : من لي خطب راه يضحك بزاف ما دخلكش الشك نسيمة ؟
• نسيمة : وي دخلني كاش محاجب ضربهم ههههه
• ليث : ايييي ما تهدروليش ف مرتي بنت فاميلية
تعالت الضحكات و الفرحة ولت للعايلة ، خطب ليث شيرة كان يخرج معاها و موراها ب عام ونص تزوج و دار دار تلايمو ف ليلة عرسه ف الحوش مفرشين زربية و قاعدين عليها نسيمة ف الوسط و غيث على اليمنى و ليث على اليسرى ، وقعدت ميرا تشوف فيهم مالبعيد هي و سفيان
• ميرا : شكون كان حاسب غادي تسوفري ف خدمتك و تتعرف على ناس غراب شكون كان حاسب غادي يجينا فرد جديد للعايلة ، شكون كان حاسب بلي هادو 3 غادي يولو أعز صحاب مع الوقت ؟
• سفيان : كبرو وكبرنا حنا تاني ، ولدنا غادي يتزوج رانا قريب نولو جد و جدة
• ميرا : هههه خلينا ندخلو الهواء راه شوية بارد ...
هاديك الليلة كانت باردة بصح كان الهواء خفيف على القلب فيها تكسل ليث على ظهره و قعد يشوف ف النجوم
• ليث : غيث راك متفكر أول مرة تلاقينا فيها ؟
• غيث : كنت شايط و تغبن ف عمتي ميرا
• نسيمة : سمعت بلي رديت الهدرة على عمي سفيان و بلي كنت قليل تربية ، و خرجت لسانها
• ليث : راكي كبيرة نسيمة ، كون نجو نشوفو نسبة قلة التربية عندنا نتي الاولى فينا ب سباب وقاحتك
• نسيمة : راني نحاول ما نخليش فالجلد تاعك مارة حتى تشك مرتك بلي تصوطت قبل ليلة عرسك
• غيث : نسيمة أول مرة شفتك فيها كنتي انسانة مثالية
• نسيمة : كنت ؟
• ليث : هاهو راه يعترف بعد سنين
و خزر فيه
• غيث : ومازلتي ، حسيتك متفهمة وضعي وزيد كنتي رزينة ب عكس الشايط لي حداك
• ليث : غادي ....