إنصاف 🌻

#الحلقة 23

خرجو من الشومبرة و قعد ليث يعس فيهم باش يخرجو هوما الأولين و يلحقهم خلى ميرا قد ما غفلت حلو الباب وراحو يجرو ، كاين حدا دارهم سيكس ( ملعب صغير ) و النو خيط من السما ما لبسو ني فيستاتهم ني والو .
• نسيمة : هيا خفووو دوك عمتي تفيق بينا بلي خرجنا
• ليث : سأريك الجري على أصوله
• يي أون وو : سنرى ذلك
• ليث : أنا الأول في الألعاب الرياضية في مدرستي لم يربحني أحد هل تظن أنك ب جسدك هزيل هذا ستربحني
• يي أون وو : كثير الكلام قليل العمل ...لنبدأ
• نسيمة : واحد ، إثنان ، ثلاااااثة إنطلق ... ، هيا أون وو أعلم أنك ستفوز
• ليث : شجعيني شوية ...
بعد جري دام نص ساعة على الملعب ، طاح ليث و هو ينهج
• ليث : اااه ....اه ... ح...بس حب...س ، ما قديتش نزيد نجري ، توقف أنت تفوز ...
•يي أون وو : اه ..ااا أنا الفائز ...
• نسيمة : مبروووك أون وو أنت البطل اليوم
و كانت فرحانة و هي تهدر معاه قعد ليث يشوف فيها و زعفان
• ليث : غشاش ...
طاح على ظهره ف الأرض ، قرب منه أون وو وعطاه يده
• يي أون وو : أيها الجبان هات يدك ...
حكمله يده و ناض
• ليث : لست جبانا ، سأتقبلها فقط لأني خسرت
• نسيمة : أون وو يجب أن نعود للمنزل حالا لابد أن عمتي علمت ب خروجنا
راحو للدار يجرو كي وصلو لقاوهم مقلقين عليهم
• ميرا : وين كنتو ؟؟؟ نسيمة ليث أون وو قلقتوووني علاش راكم منفخين هاكا ؟؟
• سفيان : ليث وين رحتو ؟؟
• ليث : ...
• عبد المالك : نسيمة هادي ماشي طبايعك ، خارجة ف هاد النو هاكا وبلا ما تقوليلي
• نسيمة : سمحلي أبي ... كنا ....
قطعلها أون وو هدرتها
• يي أون وو : أنا آسف سيدتي لم يكن يجدر بنا الخروج بعد ما منعتنا ، كانت غلطتي أنا من أصريت عليهم بالخروج و اللعب أحببت الجو ...
• ليث : راه يكذب ...كانت غلطتي أنا لي قلتله نديرو سباق ...
قعد أون وو يخالي ف نسيمة و يسقسي فيها
• يي أون وو : مالذي قاله ؟
• نسيمة : قال أنك تكذب و أنها غلطته
• يي أون وو : لو لم أستفز ليث ب كلامي لما حصل ما حصل  و مناداتي له بالجبان هو ما دفعه للخروج معي ...
قعدو يتفرجو فيهم و هوما واحد يدافع على واحد
• ميرا : صايي صايي سكات أون وو ليث طلعو للشومبرة بدلو قشكم ، نسيمة روحي للدار بدلي قشك و نشفي شعرك منبعد نتفاهم معاكم مليح .
• يي أون وو : ماذا ...؟ هل هذا يعني أننا نجونا ؟
• لسث : إتبعني ... لا إنها بداية حرب جديدة
• سفيان : هههه أول مرة يتعارفو و راهم دايرين هاك ما نعرف كي يكبرو و يتقاهمو علينا كي غادي يصرالنا
• عبد المالك : راني مخلوع من فصاحة الصغير هاداك ، الله يبارك عليه يبان متعلم كيفاش تعلمها ؟
• سفيان : مام انا ندهشت منه كي كنت نعلم فيه الكلمات ،  شا نحكيلكم راسه خفيف و حتى خطراتش كان يحكم كلمات بالدارجة تاعنا 
• ميرا : و شحال قعد باش تعلمها ؟
• عبد المالك : باينة 3 سنين باش تعلمها هههه
• سفيان : غادي نخلعكم ... عام تعلم فيه العربية و أتقن الهدرة بيها
• ميرا : شوفلك شوووفي سعيدة ختي الناس وين راها و حنا ولادنا عرب و من الابتدائي و هوما يقرو فيها ما تعلموهاش مليح كلمة ما يكونوهاش
• سعيدة : هههههه بصح كون نجو للصح ولادنا راهم رحمة ربي على لخرين ،
• ميرا : بصح نسيمة ذكية على ليث ..
• سعيدة : غير تبانلك هذا ماكان مام هي خطراتش تعميها كع أنو هي تكلاسي الأولى و هو الزاوج بصح يبانولي في زوج نفس النيفو هههه
• ميرا : واه شفتي ههههه
• سفيان : رواح نخرجو النساء قلعو يهدرو و غادي الدار تولي حمام
• عبد المالك : واه نشمو شوية هواء راك في شحال ما درتش ف المدينة

*** في الليل ***

سفيان : رقدو ؟
• ميرا : واه رقدو بصح الحمى مازالها فيهم ...
• سفيان : كانو يلعبو برا ف النو علابيها ضربهم البرد ...
• ميرا : أون وو كان يهترف ... ب ماماه و باباه ... زعما تبانلك غادي يتأقلم مع ليث ؟
• سفيان : يتأقلم إن شاء الله ، لازملهم وقت هذا ماكان 
ميرا : و فالقراية كي غادي تديرله يقعد هاك ؟
• سفيان : عندي فكرة بصح ليقله يقبل بيها
• ميرا : شا راك ناوي تدير ؟!
جبدها عنده ة قعد معنقها و مزير
• سفيان : خلينا من موضوع البز و القراية ركزي معايا ، ما توحشتينيش ؟ سمحيلي كيرا ماكانش لازم نخليكم و نروح ... كون قعدت هنا كون ما كرهنيش ولدي
• ميرا : توحشتك بزاف ...
فاتت عليهم ليلة رومانسية عوضو فيها الوقت لي ماكانوش فيه مع بعض ، كي جا الصباح عيط ل أون وو ، كان واقف هو وميرا يشوفو ف بعضياتهم و يضحكو
• ميرا : أون وو سنقترح عليك أمرا انا وسفيان نتمنى أن تقبل به ، ونحن لن نحاول اجبارك على أي شيء  لمجرد أن ترفض سنغلق الموضوع نهائيا و إلى الأبد .
• سفيان : فكرنا أن تتلحق بالمدرسة هنا عندنا ...
• يي أون وو : أحببت الفكرة ... أوافق
• ميرا : لكن هنالك أمر اخر ، ستكون مشكلة بالنسبة لك أن تلتحق بالمدرسة بإسمك الحالي ...لذا فكرنا أن نتبناك
قعد يشوف فيهم و ما فاهم والو
• يي أون وو : ماذا تقصدين سيدتي ؟ 
• سفيان : يعني أن اسمك و لقبك سيتغيران و تصبح مثل أخ ل ليث فقط اختلاف الأبوين لكنك لن تفقد هويتك الأصلية و الأمر يعود إليك ،
قعدو يشوفو فيه ما توقعوش من ردة الفعل لي دارها  شغل رد عليهم بلخف بلا ما يخمم و بنظرة باردة ف عينيه .
• يي أون وو :
أوافق
• ميرا : دون أن تفكر في الأمر ؟؟ أنت متأكد أنك فهمت ما قلناه لك ؟؟
• يي أون وو : نعم فهمت و أنا متأكد  ،
لم يعد لي مكان أرجع إليه منزلي مغلق والبلاد التي عشت فيها أبعد بكثير من هنا أما والداي ف لم يعد لهما وجود في هذا العالم ، أردت أن أسئلكما أمرا و كنت خائفا ...
• ميرا : عزيزي لا تقل هذا الكلام مجددا منذ جئت أصبح لك مكان ترجع إليه و كسبت منزلا جديدا ز أبوين ايضا أعلم انني لا يمكنني انا وسفيان تعزيض والديك ولكنك بمثابة ابن لنا ...
• سفيان : ميرا معها حق ، تفضل ماذا تريد أن تسأل
• يي أون وو : عندما كنا في نيويورك أنت قد حدثتني عن دينك ، أخبرتني أن هنالك نعيما ينتظر من يتبع تلك الديانة كما أنك أخبرتني أن الأطفال ان كانو صادقين لن يتعاقب أولياؤهم بالدخول للنار لم يكن لي أو لأبوي أي ديانة ... لكني أود الإلتحاق بديانتكم أعجبت ب دين الإسلام بعد حديثك المطول عنه  هل يمكنني ذلك ؟
شافت ميرا ف سفيان و هي مخلوعة ، ما أمنوش عقلهم من الهدرة لي قالها
• ميرا : أعتذر أنا ، لا أدري كيف أصف لك شعوري ، و لكن كيف توصلت لهذا القرار ؟
• سفيان : كنت أعلم أنك ستقول ذلك عاجلا أم آجلا ههه سأعلمك كل ما يتعلق ب ديننا خطوة ب خطوة  هل أنت جاهز ؟؟
• يي أون وو : أريد أن يذهب والداي لمكان مريح بعد موتهما أريد أن اساعدهما و لو بأمر بسيط ... لأني أتمنى لقائهما و بشدة و هذا سيكون أملي الوحيد ... ، أنا جاهز عم سفيان ...