#حب_من_رحم_الكراهيه
الحلقه الثانيه:-
سمر:-لما أتصلت بياا هاله مرت خوي وقالتلي جدي سليمان يبيني عرفته جاي بمصيبه روحت وأول ماخشيت تشاحنت أنا وياه زي عادتي من وقت ماسامر خوي توفى.
سليمان:-_عيلة عمران يطالبو بالديه بدل الثار.
سمر:-وكم يبو وأنا شن دخلني عشان تقولي
سليمان:-الديه هالمره بتكون مراه مش فلوس.
سمر:-قعدت واقفه جامده في مكاني ومش قادره نستوعب.
سليمان:-اجتمعت مع عيلة عمران وقررنا نحلو قضيه الثار اللي بيناتنا من سنين وقررنا ان الحل أن مراه من عندنا تتزوج واحد من عندهم عشان تنحل القضيه .
سمر:-رفعت حاجبي وقتله وكيف يعني ديه!!
سليمان:-يعني تتزوج من غير عرس ولا مهر ولاخطوبه ومش من حقها تطلب من زوجها شي ولاحتي الطلاق ألا اذا هو طلقها بروحه ولو طلبت الطلاق هيا رح تعتبر الديه انسحبت ويرجع الثار من جديد.
.
سمر:-وبعدين كمل!
سليمان:-ف الشرط لازم تكون المرأه اللي رح يتزوجها ولدهم تكون قريبتي انا من الدرجة الأولي يعني يابنتي يا تكون حفيدتي ...وأنا ماعنديش بنات عزابيه وأحفاد في بنت عمك محسن هدايه وهذه صغيره عمرها 10 سنين بس.
سكت شوي وبلع ريقه وقال "وفيه أنتي".
سمر:-شن قصدك تقول😕
سليمان :-قصدي انتي رح تكوني الديه .
سمر:-هههههه أنت اكيد انجنيت وعقلك طار ...نا لو نحصل ع واحد من عيلة عمران ناكله بسنوني ما كله فما بالك لو نتزوج منهم هههه عليك تخريف وخلاص.
سليمان:-_خبط بعكازه ووقف بعصبيه احترمي نفسك يابنت وأصلا خلاص حني خذينا القرار ومانستنوش ف راي.
سمر:- علي جثتي لو صار هالشي نقتل روحي ومانتزوجش بواحد منهم وانتم تعرفوني انديرها .
ماما بابا قولو كلمه ليش ساكتين.
وفاء:- شن تبينا نقولو ونحن اصلا موافقين ع كلام جدك.
سمر:-انتم اكيد انجنيتوا ونا مش رح نرد عليكم واللي ف راسي بنديره وطلعت نجري لداري وسيبتهم.
.............
ف حوش عيلة عمران:-
خبط الباب وبعدها انفتح.
جهاد:-صباح الخير ياأحلي طمطم.
الحاجة فاطمه:-بأبتسامه صباح الفل جهودى مأنسنا اليوم ع الصبح شن هالمفاجأه الحلوة.
جهاد:-قرب منها وقعد ع السرير بجنبها ومسك يدها باسها أستاحشت حبيبتي طمطم وأمي ماشفتهاش من يومين قلت دام اليوم ماعنديش شغل نجي نفطر عندكم ونتصبح ف الوجه الحسن هذا.
الحاجة فاطمه:-مش عيب يا ولد تقولي طمطم امتى بتكبر وتعقل.
جهاد:-نقدرش نقول لشابة فاتنه زيك ياحناي قاعده صغيرونه ياطمطم راك وباس خدها.
الحاجة فاطمه:-لخباط انت ياولد ...امم جهودى دامك جيت عندي معاك كلمتين نبي نقولهملك.
جهاد:-أحكي حبيبتي شن في .
الحاجة فاطمه:-مسكت يده البارح سمعت جدك يحكي مع عمامك محسن وناصر وبشير بوك أنه تلاقي مع الحاج سليمان وقررو أن يفضوا قضية الثار من بعد ماأنضرب عمك محمود المره اللي فاتت .
جهاد:-بحيرة وكيف بحلوها
الحاجه فاطمه:-اللي فهمته أن بنت من عيلة سليمان يتزوجها ولد من عيلتنا بس ياخدها كديه وفهمت منهم أن البنت هيا سمر هذيك البنت عرفتها.
جهاد:-بتفكير اي بنت.
الحاجة فاطمه:-هذيك اللي من تلات سنين خوها انقتل وهجمت ع جدك ف هذيك الليلة.
جهاد:-اي اي عرفتها.
الحاجة فاطمه:-اللي نبيه منك ياجهاد لو عندي خاطر عندك انك انت اللي تتزوجها انا عارفه انك ماتبيش تتزوج هالفتره بس عشان خاطرك البنت جميلة ومتعلمه والايام هدتها وسمعت من مرت عمك زهره ان قرروا انها تتزوج صلاح ولد عمك محسن وانت عارف ان صلاح انسان جاهل ومش كويس ويشرب.
جهاد:-ياحناي انتي عارفه اني مانبيش نتزوج وماعنديش أساسا مصاريف زواج هالفتره وياما امي وحنان اختي جابولي بنات عشان نخطبهم ورفضت.
الحاجة فاطمه:- عارفه ياكبيدتي بس انت عندك شقه مستقله وعايش فيها وتقدر تسكن البنت فيها بس لو تزوجها صلاح رح يجيبها لحوش العيله ويسكنها فيه وهيا مظلومه ومانبوش نظلماها اكثر وانت انسان طيب ومش رح تذلها ولا تأذيها بعدين ياولدي هذا اقل شي نقدرو نديروه عشان خاطر هذاك الطيب ماتنسي.
جهاد:-بتنهيده حاضر ياحناي ماتشغليش بالك وكوني هانيه ان شاء الله.
الحاجة فاطمه :-الله يرضى عليك ياوليدي ويعطيك ع قيس نيتك الطيبه ...
قبل مانستمر ف الاحداث خلي نعرفكم شوي ع عيلة عمران:-
الجد عمران والجده فاطمه عندهم 4 ولاد وبنتين وهم:-
بشير:-والد جهاد ومرته فتحيه وعنده بنت اسمها حنان متزوجه وعندها ولدين وبنت .
ناصر:-الأبن الثاني مرته زهره عنده ولد أسمه فؤاد مقتول وقعد عنده ولد تاني صغير أسمه أحمد وبنت أسمها أسماء هيا بكرته وزوجها وسافرت مع زوجها.
محسن:+الولد التالث ومرته سناء عنده صلاح بكره وحمزه ولد الوسطي وحتي هو مقتول والصغير خالد
محمود:-_الولد الرابع والصغير فيهم مرته هند وعنده بس بنت صغيره اسمها هيام وهو اللي حاول مروان يقتله.
أما البنات فهما أتنين جميلة وورده والاتنين متزوجات ومستقلات ف حياتهم .
.................
ف حوش سليمان.
سمر:- كنت زي المجنونه نمشي ونجي ف دار ونحس ف روحي بننجن شوي وسمعت الباب خبطت ودخلت أمي.
وفاء:-يمكن نحكو شوي ونتفاهمو.
سمر:-علي شن بنتفاهمو،..مافيش شي نتفاهمو فيه الموضوع محسوم بالنسبه ليا وبعدين كيف قدرتي انتي وبوي تتخلو عليا هكي بالساهل قوليلي ها مش ياسر انكم فقدتم سامر بسبب هالعيلة وبسبب جدي.
وفاء:- أنا ماضحيت بيك أنا نحاول انقاض ما يمكن انقاضه افهمي.
سمر :-بعصبيه أنقاض شني وأنتي تقدمي فيا ضحيه لهالعيله القاتله.
وفاء:-مافيش حل تاني حاولنا نتقايضوا معاهم بس مافيش الا هالحل .
سمر:-بعياط ماسدكمش اللي درتوه فيا أنتي وبوي قولي وقربت منها ووقفت قدامها شوفي بعيني 3 سنوات وانتي تتجنبي فيا وكارهتني بس لأن وجهي يذكر فيك بسامر 3 سنين وانتي هاملتني وناسيتني وماتسألي عني وحسبتيني ميه زي ما مات سامر وتو جايه بتكملي الباقي وتبي تضحي بيا
وفاء:-بعصبيه انا مانبيش نضحي بيك افهمي مافيش قدامنا حل تاني ماتنسيش أن سامر خوك عنده ولد مش بنت ويوم من الايام سراج رح يكبر ويدخلوه ف دائره الثار وهكي رح يضيع من بين ايدينا .
سمر:-عند هالكلمه حسيت روحي انتهيت الا سراج مستعده ندير اي شي ع خاطره وما يضيع مني ...حسيت روحي انهرت خذيت مفتاح سيارتي وطلعت نجري وسيبت امي وراي.
...........
عند حوش عمران:-
كان الحاج عمران قاعد بمكتبه وخبط الباب قال تفضل.
الحاجه فاطمه:-السلام عليكم ياحاج ممكن نحكى معاك شوي.
الحاج عمران:-تفضلي يافاطمه خشي.
الحاجة فاطمه:-_تعالي ياجهاد وخشت .
الحاج عمران:-_خير ياحاجه شن في شغلتيني .
الحاجه فاطمه:-كل خير ياحاج أنا جايه وطالبه رايك ومشورتك .
الحاج عمران:-قولي ياحاجه شن في.
الحاجة فاطمه:-تبي الحق ياحاج انا عرفت بقصة اتفاقك مع الحاج سليمان وعرفت انك مرشح صلاح لها الموضوع وانا بصراحة قلت لجهاد انه هو اللي ياخذ البنت بدل صلاح.
الحاج عمران:-وشن الفرق بين جهاد وصلاح المهم الاتفاق يتم.
الحاجة فاطمه:-أنت عارف ياحاج ان صلاح مش مزبوط ورح يعذب البنت بعكس جهاد طيب وخلوق والبنت مظلومه وهذا اقل شي نديروه عشان هذاك الطيب والا شن رايك.
الحاج عمران:-_تنهد وقال عندك حق يافاطمه خلاص اللي تقولي بيه يمشي واعتبري الموضوع تم ورح نكلم الحاج سليمان ونحدد معاه يوم قراية الفاتحه ونتمو هالموضوع.
الحاجة فاطمه:-_ع بركة الله ربي يبارك فيك ياحاج ويدومك فوق روسنا.
..................
سمر:-طلعت نجري بالسياره وانا منهاره ونبكي ومش عارفه وين نمشي والا شن ندير وكلام امي يدور براسي فجأه لقيت روحي قدام المقبره نزلت ومشيت لقبر سامر وقعمزت قدامه.
وصرخت بأعلي صوتي عيطت وبكيت وطلعت كل اللي مخزون جواتي وقعدت نمسح ع قبره .
سامر انا محتاجتك ...الكل تخلو عني امي وبوي وجدي من بعدك قعدت وحيده ونحس ف روحي بنموت ...حتي انت ياسامر مشيت وتخليت عني وخليتني بروحي علاش درت فيا هكي ياسامر علاش مش كنت تقولي رح نقعد معاك ديمه اااااه اااااه بنموت ياسامر بنموت...قعدت ع وضعي هذا قريب ساعه وبعدها ركبت سيارتي وروحت للحوش دخلت لقيت بابا مقعمز ف الصاله وقفت قدامه ومن غير مقدمات قتله انا #موافقه وطلعت لداري.
................
مرو يومين وجي وقت قرايه الفاتحه ...قرو الفاتحه وصارت سمر قانونيا وشرعيا زوجة جهاد...دخل هو وحناه وامه واخته ومرت عمه ناصر ولبسها الدبله وطلع من غير حتي مايفكر يتأملها او يشوف لوجهها بكت وبكت لعند تعبت وقررت تنسحب لدارها وتحاول ترقد.
اليوم التالي الساعه توا 12 الصبح:-
خبطت الباب وخشت سماح.
سماح:-سمر سمر نوضي صحصحي
سمر:-شن تبي مني سماح علاش تنوضي فيا اطلعي وسكري الباب لو سمحتي.
سماح:-نوضي ياسرك نوم جهاد لوطى يستني فيك.
سمر:-تعدلت ف تقعميزتها ليش جاي شن يبي مني .
سماح:-نعرفش انزلي وشوفيه.
سمر:-فكرت بالاول نرفض بس بعدها تفكرت اني ديه ومش من حقي نرفض دمعو عيوني وقلتلها اطلعي تو نلحقك.
نضت خشيت للحمام غسلت وجهي فتحت الدولاب خديت فستان اكحل بسيط تلات اربع ومسكر من فوق ومافكرتش حتي نشوف لوجهي او نعدل شعري حطيت فوقه وشاح ونزلت .
خشيت للصاله لقيته شاد سراج ويلعب فيه شفتله بنظره من تحت وجيت مسكت سراج حبيبي اسبقني لدارك اهو تو نجيك
سراج :-_حاضر عمتو وطلع يجري.
جهاد:-ع فكره ماناكلش ف الصغار راهو
سمر:-قالولي تبيني خير.
جهاد:- علاش لابسه اكحل.
سمر:-رفعت حاجبي وقلتله شن تلبسوا لما يكون عندكم عزي.
جهاد:-تغاضيت عن كلامها اللي زي السم بدلى حوايجك بنطلعو مشوار.
سمر:-مااديرش الجو وتعاملني ع اساس كأن متزوجين فعليا.
جهاد:-مش هذا الواقع تبيني نعاملك زي حبيبتي عادى
سمر بانفعال:-احترم نفسك .
جهاد:-انتي اللي بديتي امشي البسي نستني فيك .
سمر:-شفتله من تحت وطلعت لدارى ليست جينز اكحل وبلوزه كحلي ووشاح قهوي ونزلت مشيت معاه وركبت ف السيارة طول الطريق ونحن ساكتين لعند فجأه السيارة وقفت .
جهاد:-_أنزلي
سمر:-وين جايبني
جهاد:-شن تشوفي فيها قدامك مستشفي مثلا جايبك للمول وفتحت الباب ونزلت
سمر:-قعدت دقايق ف السيارة وانا ف صراع مع نفسي ننزل او لا وبالاخر نزلت دخلنا للمول وبعدها دخلنا لمحل فساتين بسيطه
درنا فيه من غير مانحكي شي .
جهاد:-ماعجبك شي.
سمر:-مش هامني .
جهاد:-بس لازم تشري
سمر'-ليش حتي هو اجبار
جهاد:-لا مش اجبار بس طبيعي اي بنت تتزوج لازم تشري حاجات لبس ومستلزمات تانيه
سمر:-بأنكسار بس انا مش اي بنت ولا اي عروس والا نسيت انا ديه
جهاد:-تنهدت وسكت وقت شفت الدمعه بعيونها خليتها براحتها وقعدت نختارلها بروحي.
سمر:-بوسط سكوتي سرقتني ذكرى للماضي:-
سامر شن رايك اما احلى الموف والا الوردي.
سامر:-سمر والله العظيم ربي خلقني راجل مش بنت عشان نعطيك رأي
سمر:-بلاش تكون لئيم وقولي اما احلي.
سامر:-كان بيرد بس سرح بهذيك الموظفه اللي كانت واقفه وصاحب المحل يكشخ علاها عشان تأخرت ..كانت حلوة وهاديه وزي الملاك
سمر:-هوي انت ياولد الفساتين هني مش غادي
سامر:-حولي من قدامي واسكتي يابنت ورجع يتأمل ف الموظفه من جديد وفجأه سحب الفستان من يد اخته ومشي بيه جهة الموظفه وقال مرحبا
الموظفه:-اهلين كيف نقدر نساعدك
سامر؛-ايه نبيك ترحميني ارجوووك
هاله:-_ابتسمت بخجل تشبهوا لبعضكم هلبا باينتكم خوت
سامر:-اسوأ من هكي توأم بس انا احلي منها الكل يقول هكي
سمر:-ياكذاب من اللي قال ماعاد تكذب انا وانت كوبي بست ع.بعض.
سامر:-عينك ماما ديمه تقول ان انا احلي
هاله:-هههه كيف نقدر نساعدك اختي
سمر:-رفعت الفساتين قدامها اما احلي هذا والا هذا
هاله:-امم الاتنين حلوات بس براي الوردي يناسبك اكثر
سمر:-قطع عليا شرودي صوته
جهاد:-سمر وين شردتي
سمر:-مسحت دموعي وقتله بولا شي وطلعت نجري .
جهاد:-طلعت نجري وراها وخذيت معاي شن شريتلها وفجأه عيطت بصوت عالي سمررررر.
.
.
.
#يتبع
برايكم شن رح يصير وشن رح تكون الايام مخبيه لسمر يارب الحلقه تعجبكم وبليز ماتبخلوش عليا باللايك والكومنت وحتي الشير عشان التفاعل يزيد .
تحياتي صديقتكم
#zezo_a_Saad.
