#حب_من_رحم_الكراهيه
الحلقه الرابعه عشر.
عند سمر:-
كنت قاعده مع جدة جهاد وعقلي مش معاي وكل شوي نتلفت ونشوف للساعه وبعد وقت قالتلي الحاجة فاطمه انوض نشوف جهاد وين مشيت ..نضت ودخلت الحوش وكان هادي بأعتبار أن الكل قاعد بالجنان وفجأه سمعت صوت قوي جهة المكتب مشيت ناحيته ووقت قربت سمعت كلامهم:-
صلاح:-
شفتك كيف تعامل فيها وماتنكرش...انت ماتعامل فيها ع اساس انها ديه
جهاد:-
ايه مش ناكر انا نعامل فيها بأحترام وكزوجتي وفخور بهالشي...وانتم ملزمين انكم تحترموها كزوجتي واي حد يفكر يقلل من أحترامها رح يشوف مني شي مايتوقعاش.
ناصر:-
نسيت شن اللي داراته عيلتها فينا.
جهاد:-
عيلتها مش هيا ...وانت مش مسموحلك تعاقبها اللي ماتو مش مهمين عندك زي مامهمين عندي والكل عارف انا شن عانيت وان كان انتم فقدتم واحد فأنا فقدت زوز بمره .
محمود:-
بهالبساطه سامحتها عادي!! بس تعرف شي هيا أوفي وارجل منك وقاعده لعند اليوم مخلصه لدم خوها وماتطيقش لا لوجهك ولا لوجوهنا وكل ماتشوفلنا الكره واضح من عيونها لينا ...بينما أنت كل ماتشوفلها تخلي فينا نحسو من نظراتك ان شايف ملايكه قدامك وهيا تكرهك سامع تكرهك.
جهاد؛-
بصوت عالي نعرف انها تكرهني ...بس هالشي مايمنعش أن انا نعاملها كويس وهذه حياتي وانا حر فيها وحر كيف نتعامل مع زوجتي ومش مسموح لحد يدخل فيها مفهوم.
صلاح:-
مسموحلنا ندخلو طالما مرتك من عيلة سليمان فاهم.
جهاد:-
نحن مش تزوجنا عشان نوقفو الثار بين العيلتين ...ليش انتم تحشو ف خشومكم قاعدين بهالموضوع وكارهين البنت ولشن تبو توصلو.
ناصر:-انت تع...
الحاج عمران:-
خبط ع المكتب بعكازه وقال بصوت عالي "خلاص يكفي...الموضوع هذا مش مسموح لحد يفتحه مع جهاد ف الجديد ...واللي شايفه جهاد صح ويبي يديره ماشي علينا كلنا زوجته وهو حر كيف يتعامل معاها واي واحد ف الجديد نسمعه حاشي راسه بالموضوع هذا والا جابده ف لسانه يتحمل مايجيه سامعين".
الكل ساكت ولا واحد قدر يقول كلمه زياده لعند تكلم جهاد:-
مش مسموح لأي واحد فيكم ...وانا نقصد الكل واي كان أنه يهينها أو يجرحها والا يسمعها حتي ربع. كلمه والا اقسم باللي خلق السماء والارض رح يشوف مني شي عمره مايعجبه ولايتوقعه وانا قد كلامي وتعرفوني وقت نفصل ويديرلكم ربي واحد يتجرأ بس وطلع من المكتب وسيبهم.
................
عند حوش خالد:-
كنت قاعد ف الصاله أتصل عليا علي خوي بعد الجمعه :-
خالد:-
ألو علي كيف حالك.
علي:-
خلوده الحمد الله حبيبي كيف حالك انت .
