#حب_من_رحم_الكراهيه
الحلقه السابعه.
جهاد؛-
وقت سمعت كلامها ومن الرجفه اللي بصوتها عرفت أنها بصراع مع نفسها وأنها ضعيفه وهشه من جواتها وتغطي ف هالضعف بغلاف القسوة مسكتها من يدها وشديتها لحضني وحطيت يدها ع قلبي وهمستلها.
"أكرهيني ..لو الكره يخليك مستريحه أنا راضى" وبستها بعمق من جبينها وتباعدت .
سمر:-
وقت شدني لحضنه وحط يدى ع صدره حسيت بكمية الضعف اللي محتاجه لها الحضن أنه يحتويها وقداش حسيت بالدفى والامان لدرجة خوفتني قعدت متصلبة ف مكاني وزاد ضياعى وتشتتي لما باسني وتباعد .
جهاد:-
وانا طالع تلفتت وقلتلها"بعد تكملي أكلك ولو حسيتى بالملل اطلعي الصالة تفرجي ع التلفزيون أحسن ماقاعده بدارك وتحسي بالقلق وأنا مش رح نضايقك رح نقعد بالدار نكمل شوية شغل عالق فيه لأن بكرا بنرجع الدوام" .وطلعت وسيبتها.
سمر:-
أول ماطلع وقعدت ع السرير نزلو دموعي "يارب أنا ليش يصير معاي هكى ليش كل هالسنين وأنا عايشه ف الاهمال ولما لقيت من يهتم بيا يطلع هالشخص من هالعيله" يااارب ساعدني يارب ...مسحت دموعي وغيرت حوايجي لبست بجامة نوم قطنية وردية وعلاها رسمة بيقزباني وكليت لأنى كنت ميتة جوع وبعدها سمعت نصيحته وطلعت للصالة نقلب ف التلفزيون.
.................
عند هاله:-
بعد ماروحت سمر من عندنا قعدت شوي مع عمتي وفاء وبعدها عشيت سراج ولبسته حوايج النوم ودخلته لداره وفتحتله ع الرسوم :-
"سراج ماما تفرج ع الرسوم بسريرك لعند تغفي حبيبي باهي ".
سراج:-
حاضر ماما
هاله:-
بسته من خده سلمهولي وليدي العسل شوى ندودش ونجيك باهي ماما.
سراج '-باهي
دخلت دوشت ولبست روب الدوش وطلعت فتحت الدولاب وقابلتنى بلوزتي الوردية أول ماشفتها سرقتني الذكرى لهذاك اليوم:-
كنت قاعده بالشغل شوى ووصلني مسج📧 وكان من رقم غريب فتحته
"طالعه تجنني زي العاده...بس مش شايفه أن بلوزتك ضيقه شوي".
تجاهلت المسج وكنت نحسابه أن حد غالط شوى ووصلني مسج تاني "أميرتي وحياتك ألبسي الجاكيت فوقه نقدرش نتحمل أنا" قعدت نتلفت يمين ويسار مالقيت حد شوى ووصلني مسج تالت "بدل ماتتلفتي دورى عليا بأقرب مكان تلقيني بقلبك ..سامر" ...
فقت من شرودي ومسحت دموعي اللي نزلت لحالها جففت شعرى ولبست بجامتي وقربت من سراج لقيته غفيان حضنته وبست ع راسه "ااه ياسامر لو تعرف قداشني مشتاقتلك ياروحي ".
................
عند سماح:-
أكلت الصغار ودخلتهم لدارهم وقعدت نستني ف مالك ..قعد كل يوم يتأخر بالشغل وهالشي بدى لايطاق قعدت بالصالة نستنى فيه لعند جت الساعه 11 بالليل فتح الباب ودخل.
مالك:-
السلام عليكم.
سماح:-
وعليكم السلام
مالك:-
خيرك قاعده ف الظلام العفو
