#حب_من_رحم_الكراهية
الحلقه الأولي.
سامر حبيبي نوض ...سامر رد عليا وحياتك ..سامر تسمع فيا تنفس بالله عليك تنفس ماتخوفني حبيبي وفجأه تسكرو عيونه وعيطت بقوه اااااااااه.
فقت مفزوعه من النوم قعدت نمسح ف ايديا زي المجنونه ونشوف لملابسي بهستيريا وجسمي كله يرتعش ..هذه أنا #سمر وهذا حالي من 3 سنوات نفس الكابوس كل ليلة مصر يزورنا ويعيشني الوجع من جديد بكل تفاصيله ...مديت يدي المرتعشه جهة الكوميدون خذيت حكه الحبوب المنومه💊💊 طلعت منها حبتين بلعتهم وتمددت من جديد ع السرير ودخلت ف سبات عميييق يسحبني من واقعي المرير.
الساعه3:00 الظهريه.
فقت من النوم ونحس ف راسي بينفجر نضت من ع السرير لبست جاكيتي فوق البجامه لفيت شعري بأهمال ومسكته بتوكه وطلعت من دارى مشيت للمطبخ لقيت سماح أختي عندنا أكيد مالك عنده شغل ومسافر.
سماح:-نقول صباح الخير.والا مساء الخير .
سمر:-_هني روحك وريحي فمك وماتقولي شي .
سماح:-_هذا اللي فالحه فيه قلة الأدب وطولت اللسان.
سمر:-فتحت الثلاجة طلعت أميه🍸🍺 شربتها وكيف بنرد سمعت صوت ضحك وخطوات تقرب جهة المطبخ وفجأه دخل سراج يجري ومسك ف رجليا قمته ف حضني وبوسته ع خذه بعمق
سراج:-ثباح الخير عمتو.
سمر:-صباح الورد يا روح عمتك .
سراج:-_وين بتلفعيني اليوم عمتوا
سمر:-أمم انت وين تبي تمشي.
سراج:-_نمثو المول تثريلي ثكلاطه وبعدها الملاهي.
سمر:-_رديت بسته بعمق وقتله حاضر من عيوني.
هاله:-_أنتي عارفه انك ادللي فيه بالزايد وهو يستغل فيك.
سمر:-خله يستغل قداش عندي سراج أنا هو واحد حبيبي ونور عيوني حطيته ع الأرض وقتله أجري لماما تلبسك .
"هاله هيا مرت خوي سامر وسراج ولد خوي وبعد ماتوفي سامر قعدت معانا بالحوش عشان تربي سراج وسط أهله".
قعدت ع الكرسي ف المطبخ وقلت لسماح/أحسبيني معاك ف طاسه قهوة وقعدت نفرك ف راسي نحس ف صداع رهيب بيقتلني
سماح:-بس أنتي ...
سمر:-_قطعت عليها مافطرت وماتغديت ولا تعشيت أمس حفظتها هالدسكه متع كل يوم.
سماح:-ودامك حافظاته لأمتي بتقعدي هكي ماتشوفيش ف شكلك ف المرايا عيونك محقنه وشعره متريش ووزنك كل يوم ف النازل فيقي لروحك ياسر ومديتلها طاسه القهوة.
سمر:-كان كملتي محاضرتك بري وتي ياسر ويمني عشان نطلعهم مع سراج.
سماح :-الحق فيا أصلا اللي قاعده نتعب ف روحي ونكلم فيك وطلعت سيبتها.
............
سمر :-خذيت طاسة القهوه وشربت منها وسرحت ف ذكرياتي:-.
صباح الخير ياأحلي سامر ف الدنيا.
سامر:-صباح الفل بأحلي سموره انتيميتي الحلوة...شن مفيقك بدري هكي
سمر:-ريحة قهوتك اللي ادير فيها طعمتها ابداع. ..ديرلي معاك فنجان
سامر:-مكاره تنوضي بس لمصلحتك.
سمر:-سامر حبيبي امتي بتبطل مكر وتعلمني كيف ادير فيها عشان تطلع معاك حلوة هكي.
سامر:-االسر يابيبي الغبيه ف الشخص اللي يدير ف القهوة مش في القهوة نفسها.
سمر:-ياسلام ع ساس ان انت مز وطرف هذا ليش قهوتك حلوة .قول انك تبيش تعلمني كيف وخلاص بلاش جو .
سامر:-ايه تعرفي ليش.
سمر:-ليش يافالح.
سامر:-عشان لما مسافر تشتاقيلي وتذكريني كل ماتجي تشربي قهوة.
سمر:-بحزن يعني خلاص مصر اانك تسافر هكي تبي .
سامر:-مش أنا اللي نبي ياقلبي بوك اللي يبي ...بعدين هما كلهم سنتين نكمل فيهم تحضير ونروح.
سمر:-طيب سيمو ارفعني معاك وحياتك بليييز.
سامر:-وين بنرفعك ياهبله اقعدي هني بلكي يولي ويصير منك وتصاحبيلك بنت تتحمل كلامك ومشاويرك اللي ماتمش بدل مني وانتي نهار ماطلوه ملصقتني فيك حتي تطلعي للمحلات تكريني معاك.
سمر:-خزي عليك مليت مني هكي بنبكي أنا.
سامر:-ياحليلي أختي الحساسه نمزح معاك ياهبله أنا بنمشي أصلا عشان نتعرف ع شاب طرف من الجاليه اللي غادي ونزوجه ليك.
سمر:-بالحاق😍 لا خلاص امشي سافر من غدوى .
سامر:-ههههههههههه خزي بياعه بس تعرفي شني أةل حاجة بنديرها لراجلك وهو جاي بيروح بيك اني بنخنقه ..نقوله دير بالك تفكر تزعل تونزتي والا تبكيها نقتلك.
سمر:-لااا ياحبيبي انت هكي بطلقني من قبل مانوصل.
قطع عليها شرودها صوت الصغار يجرو ودخلو المطبخ
ياسر:-هيا خالتو نحن واتيين.
سمر:-مسحت دموعي اللي مغرقه وجهي وقتله _أستنوني بجنب السيارة حبيبي نلبس ونجي .
............
سمر:-ركبت لدارى وخشيت للتواليت غسلت وجهي وطلعت للدولاب فتحته وقابلوني سوريتين وحده كحله و وحده بيضه مرسوم عليهم قلب بالأحمر....غمضت عيوني ومسكتهم بين ايديا وشميت ريحتهم.
سمر:-سيمو شفت شن جبتلك السوريه الكحله ليك عشانك لئيم والبيضه ليا عشان انا طيبه هههههه
سامر:-ياسلام خف علينا ياعبد الواثق انت.
سمر:-هههه البسها وخلينا نصورو بيهم سلفي مع بعض .
فتحت عيوني ورديتهم بيد مرتعشه للدولاب وخذيت بلوزه قهوي وبنطلون جينز أزرق ووشاح وسكرت الدولاب .
لبست حوايجي بسرعه ومافكرت حتي نوقف قدام المرايا ونعدل منظرى او نحط ميكب ...نزلت نجري لقيت الصغار يتعاركو قدام السيارة ع من يركب القدام.
سمر:-الكل ف الخلف واللي بيعترض فيش مشي يلا.
ركبتهم ومشيت بيهم المول خذيتلهم شوكلاته وعصير وبعدها رفعتهم الملاهي ... ركبوا ف الألعاب وأنا كالعاده شردت ورجعت بيا الذاكرة للخلف
سمر:-سامر انا نبي نركب الاولى ف الدرجيحه .
سامر:-لا أنا الاول عشان أنا الاكبر.
سمر:-بلاش كذب نسيت ان نحن توأم ونفس العمر 8 سنوات زي بعض.
سامر:-ايه صح بس ماما قالت ان انا نولدت قبلك بدقيقه يعني انا اكبر.
سمر:-ماما تمزح معاك اصلا هيا كانت مش واعيه وين تندري سيمو بليييز .
سامر؛-خلاص بلاش تقعدي تبكي توا تعالي اركبي.
بوسط شرودي قطع عليا هاتفي يرن...فتحت الشنطه وطلعته ورديت.
هاله:-_ألو سموره .
سمر:-نعم هلوشه حبيبتي.
هاله:-سمر احم جدك ف الحوش وقال يبي يشوفك ضروري.
سمر:-وخيره جاي شن يبي
هاله:-نعرفش تعالي عشان نعرفو وهو قاعد يستني فيك.
سمر:-تمام مسافة الطريق وجايه سلام.
خذيت الصغار وطلعت روحت وصلت الحوش وخشيت لقيت جدي قاعد ف الصاله.
سمر:-اوو الحاج سليمان مأنسنا اليوم أكيد ف كارثه جاي بيها.
سليمان:-بعصبيه تأددبي يابنت احسن مانعرف كيف نأدبك قعمزي عندي كلمتين نبي نقولهم قدام بوك وامك واختك ولازم تسمعيهم
سمر:-اهو قعدت سممعني خلي نشوف اخرتها.
سليمان:-ولد عمك وحفيدي مروان عقله خف وحاول يقتل واحد من عيلة عمران وساعده الأغبياء ولاد عمك بس الحمد الله ان ولد عيلة عمران ماماتش.
سمر:-هه الحمد الله صار...احيانا نحس انك واقف مع عيلة عمران ضدنا...أنسيت انهم قتلو حفيدك اللي هو خوي.
سليمان:-خبط بلقاحته الأرض احترمي روحك يا بنت انا ما نسيت شي بس عملت ولد عمك الغبي هذا فتحت علينا باب ثار جديد وياعالم من اللي عليه الدور.
سمر:-قصدك خوف جديد ودسان روس وثار مات مع صاحبه ومش رح يخلص لأن مالقي رجال تخلصه.
سليمان:-اوووف منك رقيتيلي الضغط بغباءك اللي نبي نقوله قبل ماتجيبيلي الجلطه ان عيلة عمران طلبو قصاد دم ولدهم ديه .
سمر:-وكم الديه وانا شن دخلني.
سليمان:-الديه هيا ....
.
.
.
.
#يتبع
صباح الفل للجميع هذه الحلقه الاولي وبدايه لمشواري معاكم بهالروايه نتمني تعجبكم ...بليز نوروني برايكم ف الكومنت وموعدنا بالحلقه الجايه ان .شاءالله .
ملاحظه/اللي بالصورة بطلين الروايه #سمر_جهاد .
تحياتي صديقتكم
#zezo_a_Saad.
