#حب_من_رحم_الكراهيه
الحلقه السادسه عشر.
سمر:-
طلعنا من المزرعه ومشينا لحوش أهلي زي ماأتفقت مع جهاد بالليل وأول ماوصلنا طلبت منه ينزل معاي نزوروهم ونروحو مع بعض تعودت عليه يكون معاي ع طول ونحسه قريب مني ...نزلت أنا وياه وصلنا الباب وخبطنا :-
وفاء:-
مرحبتين بيكم سموره ماما كيف حالك
سمر:-
الحمد الله ماما وانتي
وفاء:-
الحمد الله بشوفتك ..جهاد كيف حالك.
جهاد:-
الحمد الله ربي يحفظك
وفاء:-
هيا تفضلو شن .قعدنا واقفين ع الباب.
دخلنا وسلمت ع هاله وسماح والصغار وقعدنا ف الصاله نهدرزو شوي وجي بابا:-
خالد:-
اوو سموره عندنا كيف حالك بابا
سمر:-
الحمد الله وانت
خالد:-
والله الا طيب أستاحشتك بس...جهاد كيف حالك
جهاد:-
تسلم ياعمي الحمد الله
قعدنا نهدرزو وناضت هاله أدير ف القهوة شوي سمعنا جرس الباب يرن .
هاله:-
من المطبخ اهو تو نفتح أنا .
وبوسط أندماجنا بالحديث نسمعوا ف صوت عكاز شفنا كلنا جهة الصوت وبصدمه للكل دخل جدي سليمان.
الحاج سليمان:-
السلام عليكم.
الكل :-
وعليكم السلام
خالد:-
بأرتباك احم تفضل يابوي.
الحاج سليمان:-
شن ياسي خالد ريحة عيلة عمران معبيه حوشك
جهاد:-
عند هالكلمه وقفت وماعاد قدرت نمسك روحي ونحس في روحي بننفجر
سمر:-
قربت من جهاد ووقفت قدامه ومسكت يده وقتله بهمس خلينا نمشو وغلاوتي عندك
جهاد:-
عند هالكلمه ضعفت وسمعت كلامها وتبعتها وكيف وصلنا بجنب جدها
الحاج سليمان:-
اووف ع الفضاعه قداش ماتشبه لبوك وخوتك نفس الوجه
جهاد:-
عند هالكلمه أنفجرت ووليتله وعيطت فيه يا ...
سمر:-
جيت نجري ووقفت قدام جهاد مسكت وجهه بايديا وحطيت جبيني ع جبينه ونسيت اهلى وخجلى قدامهم"جهاد وحياتك ماتسمعله هو يبي يستفزك بس أسمع صوتي أنا بس خلينا نطلعوا عشان خاطري لو تحبني فعلا ".
جهاد:-
لثاني مره ضعفت لكلامها وقربها وكرهت ضعفي هذا بس سمعت كلامها وطلعت سيبتهم
سمر:-
تلفتت لجدي وقتله "كويس أنه يشبه لبوه وخوته وعنده نفس شكلهم عشان كل ماتشوفه تذكر جريمتك البشعه اللي درتها".
الحاج سليمان:-
لمي روحك يابنت أنتي شن قاعده تقولي ياقليلة الأدب
سمر:-
نقول ف الحقيقه .. الجزء المخفي من القصه اللي داسينه وتبوش حد يعلمه .
