#حب_من_رحم_الكراهيه
الحلقه التاسعه عشر
سمر:-
من وقت ماأمي طلعت من عندي وكل كياني تلخبط ومش قادره نفكر صح تفكيري مشوش وكل الخيارات مفتوحه قدامي من جهة مشاعري ناحيه جهاد اللي مش قادره نحددها وبصراع داخلي مع نفسي قلبي يقول أنه يحبه بس عقلي يقول أني لو حبيته رح ندخله ف مشاكل هو مايستاهلها وبوسط شرودي وتفكيري وتيت الغدي وكملت فيقت جهاد من النوم عشان يتغدي ووقت دخل المطبخ قررت أني نهرب عشان مايلاحظ تغيري المفاجأ
جهاد:-
مش بتتغدي معاي
سمر:-
لالا مش بخاطري صحتين .
جهاد:-
نضت بعصبيه من ع الطاوله "سمر خيرك اليوم مانك ع طبيعتك أمك شن قالتلك عشان متغيره".
سمر؛-
بدموع قلتلك رح نحكو بعدين ..وحياتك خليني ف حالي توا..ومشيت سيبته ودخلت لداري
جهاد:-
حسيت روحي زدت نرفزت وطفح الكيل عندي لحقتها للدار"سمر أحكي ماتخليني نفقد أعصابي"
سمر:-
ألتفتت عليه وعيطت بوجهه وبصوت كله دموع "أنت هذا اللي شاطر فيه غير تتعصب عليا".
جهاد:-
قربت منها وقت شفت بكاها ودموعها وحضنتها وبست ع راسها"خلاص حبيبتي بالله عليك اهدي أنا أسف مش بقصدي نعيط بوجهك".
سمر:-
حضنته بقوة وبعد نبكي ونعيط بأعلي صوتي وقداش ماحسيت اني ضعيفه ومحتاجه لحضنه بهاللحظه
جهاد:-
أششت أهدي وحياتي عندك يا عمري ..فيش شي يستحق بكاك هكي بس اهدي وقوليلي خيرك".
سمر:-
قعدت متمسكه فيه وساكته ومش قادره نحكي شي وقداش كلامه طمني وريحني
جهاد:-سموره عيوني أحكيلي خيرها امك شن قالتلك عشان ضايقاتك هكي
سمر:-
بعدت عن حضنه وقمت يدي بأرتباك وحطيت خصله من شعرى وراء وذني "أحم ماما جت تقولي أنها تبينا ننفصلو".
جهاد:-
مرت دقيقه وأتنين وأنا واقف زي الصنم ومش قادر نستوعب الكلام اللي قالاته وبعدها حسيت كأن عقرب لدغتني وعيطت فيها .
"شن قلتي ...شن أهلك يحسابو الزواج لعبه ..والا مفكرينا لعبه بأيديهم اليوم اتزوجو وبكرا اطلقو".
سمر:-
بأرتباك مش هكي قصدها هيا قالت ان هالزواج مش رح يحل المشكله بين العيلتين عشان هكي مافي فايده من هالزواج
جهاد -
لحظه لحظه...انتي توا بتقنعيني بوجهة نظرها ...قصدك أنتي أقتنعتي ياسمر
سمر:-
مش قصه اقتنعت ياجهاد..لكن هيا كلامها صح قصدي يعني لو هالزواج فشل أن يصلح الوضع بين العيلتين خلينا نشوفو طريقه اخري
جهاد:-
كتفت ايديا قدام صدري "وشن هالطريقه ...اننا نطلقوا"
سمر:-
بعصبيه "أنت ليش شديت غير ف هالكلمه ..أنا نحكي عن المشكله بين العيلتين كيف نلقولها حل وانت قعدت ماسك غير ف هالكلمه".
