#حب_من_رحم_الكراهيه
الحلقه الثانيه عشر.
جهاد:-
كنت طالع مع سراج خذيتله الألعاب اللي يبيهم وأنا مروح ووصلت للحوش وكان الباب مفتوح نسمع ف سمر تتكلم بعصبيه وسمعت كل كلامها حسيت أن سكين أنغرزت بصدري وماعاد قدرت نقاوم أكثر دخلت بعصبيه وقلت.
جهاد:-
الثار صح يقتلو فيه ف الرجاله بس مش الأطفال ياسمر.
سمر:-
وقفت جامده بمكاني لما سمعت صوته ودعيت بيني وبين نفسي "يارب مايكون سمع كلامي كله".
جهاد:-
قربت منها بخطوات مهزوزه وقفت وراها وقلتلها "أنا طول عمري مطلع روحي من موضوع الثأر وباعد عليه ومافكرت نوسخ ايديا بيه ويوم اللي متخيله اني نفكر تكون ضحيتي طفل ".لهالدرجة تشوفي فيا انسان حقير ومتوحش لهالدرجة أنا سيئ بالنسبه ليك
سمر:-
لفيت عليه وبنحكي وقفني بيده✋
جهاد:-
صدقيني ياسمر لو بيوم فكرت أن نقتل حد فهالحد مش رح يكون الا جدك سليمان ..وطلعت وسيبتها .
...........
عند الحاج عمران:-
كنت قاعد بالمربوعه ونتفرج ع الاخبار شوي وخبط الباب :-
بشير:-
السلام عليكم يابوي
الحاج عمران:-
اوو الغالي عندي اليوم مرحبتين وليدي خش.
بشير:-
قربت منه وبست ع راسه كيف حالك يابوي اليوم.
الحاج عمران:-
الحمد الله وليدي اهو حال الكساد والقعده ف الحوش.
بشير:-
ربي يدوم عليك نعمه الصحه ويخليك تاج ع روسنا.
الحاج عمران:-
طول عمرك رضي ياوليدي وكلامك يريح النفس ريت كل ضنوتي جت زيك
بشير:-
معليش ياحاج كلهم خير وبركه وكلنا ولادك وانت كبيرنا وعزوتنا.
الحاج عمران:-
كلكم رضيين الا ناصر ومحمود خوتك غضيبين.
بشير:-
وسع بالك معاهم يابوي هما بس دمهم حامي ومايعرفو يتصرفوا بوقت عصبيتهم
الحاج عمران:-
ااه ياوليدي ياسرنا ماراح مننا وياسر مافقدنا لازم يعقلو ويحطوا عقلهم براسهم وان ماجو بالطيب يجوا بالغصب للطريق
بشير:-
ربي يهديهم ويصلح رايهم المهم ياحاج أنا عازمك ع بازين بلحيمه وطنيه ودحيات مطبوخات من ايدين فتحيه.
الحاج عمران:-
الله ياسلام عاد فتحيه معلمه ف البازين ونفسها حلو ..الله يبارك فيك وفيها ع طول متفكريني انا وامك ومش ناسيينا .
بشير:-
بست ع راسه انت وامي والديا وجنتي بالدنيا والاخره ياحاج.
الحاج عمران:-
ربي يرضا عليك دنيا واخرى .
..............................
عند سمر:-
طلعت نجري وراء جهاد وانادي عليه وهو مش راضي يرد عليا لعند لحقت عليه وهو يفتح ف باب السياره .
