#حب_من_رحم_الكراهيه
الحلقه الثالثه.
سمر:-كنت شارده ف ذكرياتي زي العاده وماشيه من غير وعي فجأه سمعت صوته وراي ينادي بأسمي ومن غير مانعلم كيف سحبني للخلف وطاح.وطحت فوقه.
جهاد:-أنتي مجنونه يابنت ماتشوفي قدامك السيارة قريب خبطاتك غبيه انتي غبيه
سمر:-بعصبيه دفيته ونضت حول يدك من عليا ودير بالك مره تانيه تلمسني أنا هاين عليا نموت وتمزطني السياره ولا واحد من عيلة عمران يحط يده عليا.
جهاد:-الواحد هذا زوجك يامدام لو مش فاكره ومشيت سيبتها ركبت للسياره حطيت الحاجات اللي شريتهملها من الخلف وقعدت نستني فيها أمتي تركب.
سمر:-ركبت معاه ف السياره وانا مش طايقاته قعدت طول الطريق ساكته وفجأه قتله لاعاد ادير هكي مره تانيه.
جهاد:-بأستغراب ورفعت حاجبي ندير شني.
سمر:-أنت عارف ع شن نحكي قصدي تعاملك معاي وكأننا متزوجين بشكل طبيعي وزي اي أتنين وناسي أني مجرد ديه.
جهاد:-وسبق وجاوبتك وقتلك أن حتي لو تزوجنا ع هالأساس ف مش معناتها اني نعاملك بهالاساس ونكون قاسي معاك ونفذ كل شروط الزواج طالما أنتي بديتي مسؤوليتي فاتعاملي معاك رح يكون بما يرضي ضميري ويرضي ربي.
سمر:-شفتله ع جنب...بلاش تمثل دور الرجل الصالح لأنك طالما أنت من عيلة عمران مستحيل تكون طيب وبالنسبه ليا انت قاتل زيك زيهم.
جهاد:-حسيت روحي تعصبت من كلامها هلبااا وقفت السياره بقوه وعدلت تقعميزتي وشفتلها :-
"سمر خلينا نتفاهمو من أولها وأسمعي كلامي زين وحطيه ف راسك.
أول شي أنا مانطالب فيك لابحب ولامشاعر ولا أنك تعامليني كزوجة بس ع الأقل ماتخليني بتصرفاتك نضطر نعاملك كديه فعلا.
ثانيا ماتفكري أني نعامل فيك بهالطريقه عشان نكسب رضاك أو محبتك لأن نحن الاتنين عارفين أن مستحيل هالشي يصير بين أتنين واحد من عيلة سليمان والتاني من عيلة عمران ..صح أنا مش مجبور نعاملك بطيبه وصح أنا مش مجبور مانفذ اتفاقيه الزواج بس أنا من الاول قتلك انتي صرتي مسؤوليتي ومستحيل نأذيك وبيوم رح تعرفي أسبابي وأنا عشان خاطر من ندير هكي فاهمه "
ورجعت نسوق ف السيارة وأنا نحس ف روحي بننفجر.
سمر:-بعد فجر كلامه ف وجهي ماعاد قدرت نرد عليه وقعدت ساكته لعند وصلنا للحوش وزي عادتي نزلت من غير حتي مانلتفتله ولا حتي نساعده بتنزيل الأكياس وطلعت ع طول لداري.
...........
عند عيلة عمران:-
محمود:-بوي أنت متأكد أن جهاد قد المسؤوليه ورح يدير المهمه اللي مطلوبه منه.
الحاج عمران،:-مهمه شني وضح كلامك يا ولد
ناصر:-محمود قصده يابوي ان جهاد قلبه حنين ونحسو انه مش رح يعامل البنت بالطريقه اللي حني متفاهمين علاها.
الحاج عمران:-أسمع انت وياه كلام ف الموضوع هذا مانبيشي وجهاد حر ف تعامله مع مرته فاهمين.
محمود بعصبيه:-لا مش حر أنت عارف أن نحن سكتنا ع ثارنا ورضينا بهالراي عشان ننتقموا منهم ف بنتهم
الحاج عمران:-تعصب ووقف وخبط بعكازه ع الطاوله لم روحك يا ولد وماعاد تجبد هالموضوع ف فمك مش ناقصين رجوله نحن عشان نسترجلو ع مراه فاهم.
ناصر:-العفو منك يابوي محمود مش قصده هكي باهي يابوي كلم جهاد وخليه يجيبها تسكن معانا هني .
الحاج عمران :-قلتلكم الموضوع هذا منتهي وماعاد حد يفتحه يلا نوضو اربحو ع حالكم.
.................
عند سمر:-
فقت من النوم وكانت الساعه 11 ونص بالليل فتحت عيوني علي أيدين صغيره تلمس ف وجهي فتحت عيوني وكان سراج ولد خوي فتحت عيوني وحضنته حبيبي شن قاعد فايق لعند توا.
سراج:-جيت ندولك تثبحي ع خير.
سمر:-أممواه يا قلبي أنتي
هاله:-سموره سامحيني حبيبتي غافلني وجي نوضك من بدري نقوله لا .
سمر:-هو الوحيد اللي مسموحله يفيقني بأي وقت.
هاله:-جيت قعدت بجنبها بالمناسبه اللبس اللي خذيتيه حلو ع الأخر.
أسفه حبيبتي عارفتني انا وسماح فضوليين فتحنا الأكياس من غير أذن.
سمر:-عادي ولا يهمك انتي بس ذكرتيني بهمي.
هاله:-مسكت يدها وقلتلها"شوفي سموره مافيش واحد يمكن يكره عيلة عمران قدي بس انتي لازم تعطي لنفسك فرصه يمكن يطلع الولد كويس ويستاهل تعطيه فرصه".
سمر بدموع:-أنتي شن قاعده تقولي ياهاله لمجرد انه من عيلة عمران انا نكرهه و مستحيل نفكر حتي نستلطفه
هاله :-شديتها لحضني "أششت اهدي حبيبتي" كل شي رح يكون بخير
سمر:-مانبيش نتزوجه ياهاله وحياتك ساعديني عمرى مافكرت اني نتزوج بهالطريقه والله حاسه روحي بنموت ومحتاجه من يحس بيا.كل مانشوف وجهه نشوف فيه قاتل خوي مش قادره نتعايش مع هالواقع
هاله:-معليش حبيبتي أستريحي وكل شي رح يكون افضل ويتصلح يوم عن يوم اهدي وحياتك.
............
بمكتب سليمان:-
الحاج سليمان:-شن صار يالطفي ف الصفقه امتي بتموها
لطفي:-اليومين الجايات ياحاج انت عارف ان العين علينا هاليومين ولازم نهدو الوضع وخصوصا بعد الدوشه اللي دارها حفيدك مروان.
الحاج سليمان:-يصير خير بس اهم شي تكون .تحت السيطره وماتضيع الصفقه من ايدينا.
لطفي:-كون هاني ياحاج بأذن الله هيا لينا والامور تحت السيطره وف المضمون
الحاج سليمان:-تمام يالطفي انا مسلملك الموضوع ونظم امورك.
لطفي:-بيناتنا اتصال معناتها نشوفك ع خير ياحاج .
الحاج سليمان:-بالسلامه يالطفي نشوفك ف ساعه طيبه.
..............
جهاد:-روحت للشقه بعد مارقتهلي سمر خشيت دوشت وغيرت شوي ورن تليفوني فتححت :-
الحاجه فاطمه:-جهوده كيف حالك وليدي
جهاد:-أهلا بأميرتي كيف حالك
الحاجه فاطمه:-ننشد ع حالك شن صار معاك مشيت لسمر اليوم.
جهاد:-ايه مشيت ااه وخلاص قداش مابينتها عنيده وراسها كاسح ياطمطم عصبتني وطلعتلي خلوقي بجد
الحاجة فاطمه :-معليش ياوليدي وسع بالك معاها حتي هيا مظلومه وقلبها محروق ع اوخيها وانت عارف انها متهمتنا بقتله.
جهاد:-والله ياحناي صابر ومقدر بس مش عارفه لعند امتي
الحاجة فاطمه:-معليش مصيرها تهدى ويتبدل حالها ومصيرها تعرف الحقيقه وتتغير بعدها سايرها وكون صبور معاها بس تربح ياوليدي اعتبرها امانه منه.
جهاد:-حاضر حبيبتي يصير خير ان شاء الله .
الحاجه فاطمه:-يحضرلك الخير ياوليدي يلا نخليك توا تستريح وغدوى نحكيك .
جهاد:-تمام ياحنينه تصبحي ع خير .
الحاجه فاطمه:تلاقي الخير اوليدي.
........
سمر:-كنت قاعده بجنب الشباك ونتأمل ف السماء والنوم طاير من عيوني بأعتباري راقده أكثر من 8 ساعات شوي وسمعت صوت مسج جيت مسكته وفتحت المسج وكان 📧من جهاد"سمر غدوى الصبح وتي روحك الساعه 11 بنفوت عليك عشان ننتقلو للشقه" عصبت وجيت بنحذف تليفوني ع الحيط بس تراجعت عشان عندي فيه ذكريات مع سامر خوي ..قعدت ندور زي المجنونه ف الدار وندور فيش نفرغ غضبي وفجأه شفت الأكياس اللي جايبهم قربت منهم وشركتهم وبعد نطلع شن فيهم ونمزق فيه كله لعند حسيت روحي هديت جيت لحكه الحبوب وخديت منها حبتين وتمددت ع السرير ودخلت ف سبات عميق .
.............
عند سماح:-
رقدت الصغار وجيت فتحت سكايب واتصلت بمالك.
مالك:-مرحبتين حبيبتي كيف حالك
سماح:-الحمد الله كيف حالك انت.
مالك؛-اهو حبيبتي حال التعب شن جو الصغار
سماح:-_كويسين الحمد الله يسألو عليك امتي بتروح
مالك:-ماعاد نعطل 3 ايام ونروح
سماح:-ان شاء الله حبيبي ع خير
مالك:-شن جو سمر بالله
سماح:-ع حطت ايدك نهار كله راقده وتزح ف هالحبوب وخلاص .
مالك:-ربي يكون ف عونها هالبنت والله تسخف فيا انظلمت بيناتكم وتو نظلمت بهالزواج
سماح:-شن قصدك بكلامك في شن ظلمناها نحن
مالك:-سماح انتي عارفه قصدي بلاش نحكو بهالموضوع وما
سماح:-ماشي ماشي هيا ماتبي شي
مالك:-سلامتك بس وبوسيلي الصغار هلبا
سماح:-اوك سعيده ان شاء الله
مالك:-ف حفظ الله يا قلبي.
...........
عند هاله:-كنت قاعده بجنب سراج نرقد فيه وفجأه رجعت بيا الذكريات وسرقتنا .
سامر:-احم مش تحسي أن كان خذت الفستان الموف احسن من الوردي نحسله مطلعها فرخه.
هاله:-اووه انت التوأم صح
سامر:-نعنجد امه وصف ايه أسمي سامر
هاله:-اهلا بيك وعاشت الأسامي ..كنت تقول عن الفستان احم لو حاب تبدله عادي
سامر:-لالا خلاص عاجب العبيطه اختي
هاله:-بأستغراب امال ليش جاي تسأل
سامر:-لالا حبيت نقولك رأي بس عن أذنك سلام
وقعد ع هالحال كل يوم ماشي جاي يوم يسأل عن ماركة الفستان يوم عن القماش يوم عن الألوان التانيه والأحجام لعند عاشر يوم جي خاش وهو قرب مني وانا تفجرت فيه .
"شن تاني ..ليك كم يوم ماشي جاي ع المحل كانت عمله سوده لما عطيتكم راي انت وأختك"
سامر:-سحب فستان من غير مايحكي ومدلها بطاقه الدفع من غير مايحكي وخدي الفستان وطلع ..باليوم اللي بعده جيت وقعدت عيني ع الباب لاأراديا نستني فيه بس ماجاش هالمره .
سراج:-ماما ماما
هاله:-نعم حبيبي أسفه سرحت
سراج:-نبي نشرب عطثان
هاله:-أوكي حبيبي تو نوض نجيبلك وبست ع راسه وطلعت.
............
صباح اليوم اللي بعده الساعه ١١:-
سماح:-سمر سمر ياسمر نوضي راجلك يستني لوطه
سمر بنعاس؛-خيره شن جاي يبي
سماح؛:-قال مكلمها من البارح قلتلها بنمشو لشقتنا اليوم .
سمر:-اوووف نسيت بكل
سماح؛-وانتي امتي تذكري أصلا
سمر؛-اطلعي وتو شوي وننزل خله يستني.
سماح:-طلعت ونزلت لوطه وبلغته وقعدت انا وياه وماما مرت 15 دقيقه وسمر مانزلتش .
وفاء:-بضحكه صفراء تأكدتي انها ناضت
سماح:-ايه ياماما
جهاد:-مع اني بعتلها مسج من امبارح وعطاني تقرير التوصيل وعندها علم أني جاي.
سماح:-مش منها من السم اللي تشرب فيه
جهاد:-.
...
.
.
.
#يتبع
صباح الخير للجميع .....برايكم شن رح يصير وشن رح يكتشف جهاد وشن رح تكون ردة فعله ... يارب تعجبكم وتنسونيش بتعليقاتكم الحلوة .والاهم اللايك والتاق.
ملاحظه/مواعيدي معاكم ثابته كل يوم حلقتين بالصبح والمغرب وبعون الله نكون عند حسن ظنكم.
مع تحياتي صديقتكم
#zezo_a_Saad.
