في اليوم البعدو مشيت الجامعه و أساساً ما كان عندنا محاضره مع أستاذ حذيفه ، قلت ما كان أجي من الأساس ، يمكن هو الوحيد البقيت اتكيف لمحاضراتو و أتمناها ما تخلص ، بعترف إني بجي الجامعه عشانو ، لمن زمن محاضرة دكتور إبراهيم جات قلت ما عايزا أدخل ، مشيت قعدت في البينشات البرا ، و بقيت اتذكر في وائل و لحظاتي معاهو ، ما عارفه انا بالنسبه ليهو شنو! مرات كتيره كان بحسسني إني بهمو و بحس إنو بحبني و مرات بحسو بستغلني و بلعب بي ، ما قادره أفهم حاجه أنا و ما قادره اتخذ قرار حاسم بخصوص الموضوع دا! بقيت أفكر و أفكر لحدي ما انتبهت انو أستاذ حذيفه جا و قعد قصادي ، قال لي مها و الزهج ، كيفك؟
قلت ليهو تمام ، قال لي القرايه ماشه معاك كيف؟ قلت ليهو غيتو هي الماشه أما انا واقفه في مكاني ما اتحركت ، ضحك و قال لي بعد تعبي معاك دا كلو؟
قلت ليهو أنا من البدايه كلمتك ، قال لي ما تكوني انسانه متشائمه كدا! ....المهم ليك يومين ما جيتي الجامعه يا أستاذه بالإضافه لإنك ما قاعده تجيني عشان أشرح ليك! قلت ليهو انا قلت ليك ما بقدر أفهم لمن يكونوا معاي ناس ، و عشان ما اضيع زمن ساي بقيت ما بجيك ، قال لي ضياع زمن؟ قلت ليهو كونو اكون قاعده و ما فاهمه حاجه دا أكيد ضياع زمن!
قال لي الما فاهمو هو كيف انك ما بتفهمي لمن يكون معاك ناس؟ حيقعدوا ليك في عقلك يعني ولا كيف؟
قلت ليهو أنا كدا ، قال لي عموماً انا هسي فاضي لو عايزاني أشرح ليك.....و بالنسبه لليوم الكان مفروض اشرح ليك فيهو براك طلع لي مشوار مهم ، فلمن انتي و زميلاتك جيتوني في نفس الوقت قلت احسن اشرح ليكم كلكم سوا عشان حـ أطلع طوالي ...
قلت ليهو اهااا و أنا من جواي متكيفه و عايزا أطير من الفرح لأنو برر لي ، أكيد حس إني زعلت منو عشان كدا ، في اليوم داك قعد شرح لي و بعدها مشى طوالي و دا الإتعودنا عليهو ، بقى حتى لو ما عندو محاضره معانا بناديني و بشرح لي مادتو و باقي المواد ، علاقتي بيهو بقت قويه شديد ، مرات كتيره بجي يزورنا في البيت حتى خالتي بقت تحبو و دايماً بتتصل و تسلم عليهو ، في يوم و هو بشرح لي قال لي ان شاء الله بعد دا ما تضيعي تعبي و ثقتي و ثقة خالتك فيك ، قلت ليهو خلاص أي زول يشيل ثقتو و يمشي بيها بعيد ما بقدر على الحموله الزايده دي كلها ، قال لي أصلك ما بتطمني مع ذلك انا حـ أخت ثقتي فيك و حاولي ما تخذليني ، نزلت راسي على التربيزه و إتثائبت قلت ليهو و انا مغمضه عيوني : بسبب ثقتكم دي أنا لي أيام ما نمت كويس ، مساهره في الشيتات ، قال لي والله؟
قلت ليهو آيي ، قال لي طيب دي حاجه كويسه! قلت ليهو بالنسبه ليك انت و خالتي ، أما أنا فـ لا ، جرا لي طرحتي و غطى بيها شعري و قال لي كدا أحسن ، جريتها لـ ورا و قلت ليهو لا عاجباني كدا و تاني ختيت راسي على التربيزه و غمضت عيوني ، بحس بإحساس حلو لمن اكون في نفس المكان الهو متواجد فيهو ، حسيت براحه و طمأنينه ما عاديه ، كان في نسيم بارد و هدوء جميل ، كنت مغمضه و مبتسمه ، بس ابتسامتي دي إتلاشت لمن قال لي : لي فتره عايز اسألك سؤال ....انتي أهلك وين؟....قصدي أمك و أبوك! ....رفعت راسي و أنا مخلوعه ، ما عرفت اقول ليهو شنو ، حسيت نفسي حـ أبكي ، قال لي خلاص خلاص آسف على السؤال ، أنسي اني سألتك عن حاجه و...
