قريت الكلام دا تلات مرات و قلت دا منو كمان؟
كان خاتي صوره سودا على البروفايل حقو ، حالتو الكانت في الشريط الفوق كان كاتب فيها : اللهم هي فقط 💜
رسلت ليهو :
_ إنت منو؟.....بعد دقيقتين كتب لي تتوقعي منو؟
قلت ليهو لو كنت عارفه ما كان سألتك! قال لي لاحظي إني قلت ليك تتوقعي أنا منو ما قلت ليك إنتِ عارفه أنا منو!
قلت ليهو ما متوقعه زول! قول لي بس إنت منو و جبت رقمي من وين؟
قال لي بعد بكرا حـ تعرفي أنا منو ، بس جاهزه للمواجهه؟
قلت ليهو ما عايزا معاك عباطه منو إنت؟
نادر ولا قصي؟ ....أكيد واحد من الإتنين ديل و عايز تمقلبني! كويس حـ نتلاقى يوم السبت...
كتب لي : أنا لا نادر لا قصي ....ما تستعجلي يوم السبت حـ تعرفي أنا منو
قلت ليهو العباطه لزومها شنو؟
قرا رسالتي و ما رد علي!
بقيت مستغربه دا منو؟ مرات اقول دا أستاذ حذيفه و مرات اقول لا لا متأكده دا ما هو ، طيب دا منو و بيعرفني من وين و جاب رقمي من وين و ليه قال لي الكلام دا؟ بس الفهمتو إنو معاي في نفس الجامعه!
يوم الجمعه دا عدا و أنا منتظره يوم السبت دا متين يجي عشان أعرف الرسل لي دا منو ، لمن جا يوم السبت من بدري مشيت الجامعه و أول حاجه عملتها مشيت لـ قصي و نادر ، قلت ليهم في واحد منكم رسل لي من رقم غريب يوم الخميس؟
قالوا لي أبداً والله و كان واضح إنو فعلاً ديل ما هم ، مشيت منهم بعيد ، دخلت الواتس و كتبت لـ صاحب الرقم الغريب ، أنا في الجامعه وين إنت؟
ما كان خاشي ، بقيت كل دقيقتين أدخل الواتس و اشوفو دخل ولا لا بس لحد ما زمن المحاضره جا هو ما ظهر ، في إحساس قال لي إنو دا أستاذ حذيفه و شبه صدقت الإحساس دا ، مشيت القاعه و قعدت و أول ما الباقين جوا أستاذ عبدالله جا داخل ، كنت متوقعه يجينا أستاذ حذيفه لأنو هو الماسكنا الماده دي! !
دخل سلم علينا و قال لينا أستاذ حذيفه حـ يتأخر شويه عشان كدا حـ أديكم المحاضره الأولى و هو حـ يديكم التانيه ، قالوا ليهو ماف مشكله ، كنت منزله راسي و بعاين في تلفوني ، فجأه سمعتو قال لي مها!
رفعت راسي بخلعه و قلت دا عرف إسمي من وين؟ قلت ليهو أيوه!
قال لي ممكن تخلي التلفون و تركزي مع الكلام البقولو؟ قلت ليهو حاضر ، ختيت تلفوني على جنب و بقيت مركزه معاهو بس كنت مستغربه هو عرف إسمي من وين؟
بعد مسافه سأل سؤال كلنا بقينا نتلفت ، غيتو أنا شبه فهمت سؤالو بس صياغة الإجابه كانت غالباني ، فجأه سماح رفعت يدها و جاوبت ، قال ليها قربتي ، سكتت مسافه و تاني رفعت يدها و جاوبت ، قال ليها كويس إجابتك صحيحه ، قلت ليهو صحيحه كيف؟
بقى يشرح لينا كلنا السؤال و الإجابه بعد خلص قلت ليهو برضو ما مقتنعه بالإجابه دي! قال لي لو عندك جواب غير دا قوليهو! قلت لسه ما فكرت كويسه لكن ما مقتنعه بالإجابه دي ، ضحك و قال لي تمام لمن تفكري كويس و تلقي الإجابه الصحيحه تعالي قوليها لي ، قلت ليهو كويس.....طبعاً انا ساي قلت ما مقتنعه بالإجابه حقت سماح عشان هي الجاوبت عشان كدا قلت ما مقتنعه بالجواب و في نفسي ذاتي ما عارفه الإجابه الصحيحه شنو ، بعد ما خلص محاضرتو أول ما جا جنب الباب قال لي ما تنسي تجيبي لي الإجابه الصحيحه و طوالي مشى ، قلت كدي اشوف جواب السؤال دا في قوقل ، مع إني اتأكده انو إجابة سماح صحيحه بس مع ذلك دخلت قوقل و كتبت السؤال و المفاجأه كانت إنو الشرح و الجواب ما زي الإجابه القالتها سماح أو الشرح الشرحو أستاذ عبدالله ، قلت باااااس ، غلاطي الكان على الفاضي طلع صحيح ، هسي حـ أمشي أوريهو الإجابه ، شلت شنطتي و طلعت من القاعه ، بس وقفت في الممر قلت أشوف صاحب الرساله رد علي ولا لا ، لمن دخلت الواتس لقيتو رادي علي قبل دقيقه ، كاتب لي تعاليني في المكتب رقم (1) ، قلت دا المكتب الفيهو أستاذ حذيفه! !.....معقوله إحساسي صح؟
قلبي بقى شغال دق دق و جسمي كلو إرتعش و المشيه غلبتني و اتوترت شديد ، ما عارفه كيف حـ اقدر أقيف قدامو ....شجعت نفسي ، إتنهدت و مشيت على مكتبو و كل ما أقرب منو ضربات قلبي بتزيد ، لمن وقفت جنب باب المكتب حسيت قلبي دا شويه و حـ يجي واقع ، ضربت الباب و فتحتو و أنا منزله راسي و واصله الحد من التوتر ، لمن رفعت راسي عيني وقعت على أستاذ عبدالله ، عاينت في المكتب كلو بس ما شفت أستاذ حذيفه! ....عقلي بقى يودي و يجيب ، اتخشبت في مكاني و لساني بقى تقيل! يعني أستاذ عبدالله هو صاحب الرقم المجهول و هو الرسل لي الرساله ديك؟ افهم شنو أنا من رسالتو دي؟
المحيرني إنو ماف تعاملي بيني و بينو في السمستر القبل دا حدنا كان القاعه بس فـ على أي أساس كتب لي الكلام داك؟
إبتسم و قال لي أتفضلي ، لسه كنت واقفه و بعاين ليهو و أنا مصدومه ، للحظه فكرت أرجع بـ دربي و من هنا لـ بوابة الجامعه بس تاني إتراجعت و قلت لازم افهم منو كتب كدا ليه و أحسم الموضوع دا من بدايتو!
مشيت عليهو و أنا مذهوله شديده ، معقوله أستاذ عبدالله يكتب لي كدا!؟
لمن وقفت قصادو قال لي بإستغراب خير في شنو؟ مالك يا مها؟
من كنت عارفه ابدا ليهو من وين و اقول ليهو شنو خاصة إنو أستاذ و ما طالب زيي ، قال لي جايه توريني إجابتك ولا عندك مشكله؟
قلت كمان حتى بعد ما وقفت قدامو عايز يلعب بأعصابي؟ طلعت تلفوني من الشنطه عشان أوريهو الدردشه ، بس قبل ما أدخل الواتس أستاذ حذيفه جا داخل ، جا وقف جنبي و سلم على أستاذ عبدالله إتلفت علي و قال لي كيف تمام؟ هزيت ليهو راسي بس و أنا عيني على أستاذ عبدالله ، قال ليهو إن شاء الله تكون أديتهم المحاضره؟ قال ليهو إطمن أديتها ليهم ، عاين لي و قال لي اهاا يا مها منتظر جوابك أنا! ....أستاذ حذيفه قال ليهو جواب شنو؟ مالا هي؟
قال لي طبعاً دي أكتر طالبه بتحب المغالطه ، قبيل سألت سؤال و لمن جاوبت عليهو وحده هي قالت ما مقتنعه بيهو، قلت ليها طيب لمن تعرفي الجواب الصحيح جيبيهو لي بس شكلها إقتنعت بالإجابه الإنقالت...
قلت عايز يحرق أعصابي بس! كويس برضو حـ اعمل نفسي رايحه و بعدين حـ احظرو في الواتس ، قلت ليهو لقيت الجواب و ما نفس الجواب القالتو سماح و ما نفس الشرح القلتو لينا إنت! ....قال لي يا زوله؟ جبتي الجواب من وين؟
دخلت قوقل و مديت ليهو تلفوني ، عاين فيهو مسافه ، بعدها إبتسم و قال لي كويس! غلاطك ما طلع على الفاضي! عاين لأستاذ حذيفه و قال ليهو شكلي ما ركزت ، سألتهم سؤال و شرحت ليهم شرح بتاع سؤال تاني علشان كدا بعدين وضح ليهم الحاجه دي و أديهم الإجابه الصحيحه ، رجع تاني عاين لي و قال لي كنت مفتكرك بتغالطي ساي بس طلعتي ما هينه! ....قلت ليهو أساساً أنا ما بغالط ساي ، قلت ليهم عن إذنكم و طلعت من المكتب و أنا حاسه بعيون أستاذ حذيفه متابعاني ، أول ما طلعت دخلت الواتس حظرت الرقم الغريب و دخلت إعدادات المكالمات و عملت حظر للأرقام الغريبه بحيث إنو ما يتصل علي تاني ، رجعت القاعه و إنتظرت المحاضره التانيه ، لمن أستاذ حذيفه جا داخل علينا عاين لي بنظرات كدا ما قدرت أفسرها بس كان صاري وشو ، ما سلم علينا طوالي بدا محاضرتو و في الآخر نبهم على السؤال تبع قبيل و قال ليهم الإجابه غلط و أستاذ عبدالله ما كان مركز ، وراهم الإجابه الصحيحه و طلع ، بعدو ناس القاعه كلهم طلعوا ، أنا قعدت مسافه أفكر في الكلام الكتبو لي أستاذ عبدالله دا!!يعني في الوقت البتكون فيهو عشمان في زول و منتظر حبو يظهر لي واحد تاني من العدم و يلمح ليك بإنو بحبك أو معجب بيك!!.....شلت شنطتي و أول ما طلعت من القاعه لقيت أستاذ حذيفه في وشي ، قال لي بنبره حاده ألحقيني في المكتب ، مشى و أنا كنت واقفه و بقول دا مالو كمان! مشيت ليهو في المكتب لقيت ما معاهو زول كان قاعد في كرسيهو و بعاين لـ ساعتو ، إتحركت خطوتين بس و قلت ليهو و أنا واقفه خير في شنو يا أستاذ؟
عاين لي مسافه و قال لي ما قادر أفهم ليه إنتِ بتتغابي و بتعملي نفسك رايحه! يعني ما عارفه نفسك عملتي شنو قبل شويه؟
قلت ليهو عملت شنو؟ ...قال لي اتفضلي اقعدي ما تقيفي ، قلت ليهو كدا مرتاحه ، قال لي خايفه مني ولا شنو إنتِ؟ قلت ليهو لا ما كدا بس عايزاك تقول كلامك بسرعه عشان أمشي ....قال لي موضوعي معاك طويل و الوقفه حـ تتعبك ، عشان كدا بقول ليك أقعدي ، أول ما قعدت أخد نفس عميق و قال لي مالك إنتِ يا بت الناس؟
قلت ليهو شفت عشان الأسئله الما ليها طعم دي و كلامك المبهم ما بحب أتكلم معاك ، قال لي والله! ....طيب حـ أتكلم بوضوح أكتر
ما عارف اذا شريحة الأريبا ديك ضاعت منك ولا إنتِ الشلتيها من التلفون و حذفتي حساباتك ، لو صدقت إنك عملتي كدا عشان القرايه فـ أكون غبي بس إنتِ بالواضح قلتي لي ما عايزا اتواصل معاك!....ممكن توريني السبب؟
سكته ما رديت عليهو لأنو سؤالو مستفز ...كيف يعني ما عارف السبب! ناسي الموقف الحصل بيناتنا قبل كدا في القاعه و الكلام القالو لي؟!
قال لي عايز احل الموضوع دا من جزورو و أخت نقاط على الحروف لأني بالجد تعبت و ما قادر أتحمل الوضع الما مفهوم دا .....قلت بااااس معناها تاني عايز يعيد لي كلامو داك لأنو حس إني لسه عشمانه فيهو!
ربعت يديني و قلت ليهو مزاج مني بس! يعني ما عايزا اتواصل معاك مش حره؟ ....قال لي حره بس من دون سبب؟ قلت ليهو أيوه من دون سبب! ....قال لي اشمعنى أنا من بين كل الناس ديل؟ قلت ليهو ما إنت براك غيرك كتار عملت ليهم إقصاء ، قال لي غيري؟ منو ديل؟ قلت ليهو ما مهم و لو خلصت كلامك حـ أمشي ، قال لي لا لسه ما خلصت ....سكته مسافه بعدها قال لي عملتي كدا عشان زولك الجديد الجاب ليك هدايا طلب منك كدا؟
كلامو غاظني كأنو بقول لي عملتي دا كلو عشان الهدايا! قلت ليهو أيوه عشانو!
هز لي راسو و رجع بـ كرسيهو لـ ورا ، قلت ليهو الهدف شنو من الإستجواب دا؟
قال لي بتقدري تمشي بعد دا ....حسيتو طردني ، شلت شنطتي و طلعت من مكتبو و أنا ما قادره أفهم هو مالو من رجع من مصر مُصر يتكلم معاي و المشكله إنو بسأل نفس الأسئله و بدور في نفس الدايره!....حيرني معاهو! ما قادره أفهم قصدو من دا كلو!
لمن رجعت البيت حكيت لـ وئام الحصل معاي من أول رساله جاتني من الرقم المجهول لحد ما كنت في مكتب أستاذ حذيفه و وريتها الرساله و قلت ليها إتخيلي إنو الرسلها لي طلع دا أستاذي! !
قالت لي ما بصدق! جاده إنتِ؟ قلت ليها ايي ، قالت لي دي مصيبة شنو هسي دا حابيك مالو كمان! قلت ليها المحير إني ما حصل إتعاملت معاهو خالص! فما فاهمه رسل لي الرساله دي على أي أساس ، قالت لي هو وقت جاتو الشجاعه و رسل ليك الكلام دا ليه لمن مشيت ليهو في المكتب ما صارحك و قال ليك أنا الرسلت ليك الرساله؟ قلت ليها عايز يحرق أعصابي بس ، كنت حـ اسألو بس أستاذ حذيفه جا داخل ، قالت لي النفسنه مشت منك ليهو هو! ما عارفه بس من تصرفاتو و الحكيتيهو لي هسي حاسه إنو كان عايز يقول ليك حاجه مهمه....يمكن كان ناوي يصارحك و ينهي المهزله الحاصله دي بس إنتِ غبيه و أعور وحده في العالم دا كلو! الخلاك تكذبي عليهو شنو و تقولي انو الرسل ليك الهدايا الوهميه هو الطلب منك ما تتواصلي معاهو!؟
قلت ليها كلامو استفزاني و لو بالجد عندو حاجه مهمه عايز يقولها كان قالها احسن من الإستجواب دا كلو ، قالت لي يقول شنو بعد ما قفلتي ليهو نفسو؟ مها إنتِ كدا بتضيعي نفسك ، لو إستمريتي كدا حـ تندمي لـ قدام ، حذيفه حـ يشوف غيرك لأنو حـ يكون إتخلى عنك عن قناعه بسبب عمايلك دي بس إنتِ الحتكوني الخسرانه ، في البدايه حسيت انو هو معقد الموضوع أو إنو بلعب بيك بس هسي متأكده إنك المعقده الموضوع و كل ما يحاول معاك بتنفريهو منك!
قلت ليها يا بت الناس أنا ما ناسيه إنو قال لي أحب فيك شنو و ما توهمي نفسك ساي و و و ، بعد دا عايزاني أديهو فرصه و اقعد اتكلم معاهو بتفاهم؟
قالت لي بعد دا لسه بتراقبيهو في الفيس و الواتس و لو سألك بتردي عليهو طوالي ...دا إسمو شنو؟
قلت ليها اقفلي السيره دي عليك الله ، في نفس اليوم دا رسل لي نادر و قال لي يا أخت النتيجه طلعت ، إنخلعت و قلت ليهو بالجد؟ متين؟
قال لي لو ما طلعتي من قروبات الدفعه كنتِ عرفتي ، قلت ليهو غيرت الواتس أنا عشان كدا ، رسل لي رابط النتيجه و قال لي حـ أضيفك في القروبات ، قلت ليهو طيب....نسيت نتيجتك طلعت كيف؟
قال لي كويسه شديد ، 3 يا أستاذه ، قلت ليهو مبروووك والله و قصي معدلو كم؟ قال لي 2.88 ، قلت ليهو ما بطال ، قال لي منتظرنك إنتِ ، قلت ليهو حـ اشوفها و أعمل رايحه ، قال لي أصلك غتيته ، فجأه رسل لي و قال إنتِ أستاذ حذيفه دا ببقى ليك شنو؟ ولد عمك ولا خالك؟
قلت ليهو لا دا لا دا بس في قرابه بيناتنا ، قال لي والله كنت قايلو ولد عمك أو خالك أو ناضم فيك!
رسلت ليهو إموشن ضحك و قلت ليهو ليه يعني كنت مفتكر كدا؟
قال لي تصرفاتو بتقول كدا! السمستر الأول كلو بشرح ليك و لمن سافر مصر كل مره بسألني بطريقه غير مباشره اذا قاعده تجي الجامعه تحضري المحاضرات أول بأول ولا لا ، و بعد كل إمتحان برسل و بسألني اشتغلتوا كيف ، مره قلت ليهو اشتغلنا كويس و الإمتحان ماشي حالو ، قال لي طيب مها إشتغلت كيف؟ أنا اتحيرت فيهو والله، قلت ليهو ما عارف لأنها بتطلع بيتهم طوالي ، حس على نفسو و قال لي سألتك عشان بشوفها بتتجرس من الإمتحان ، و عشان ما أفكر كتير في كلامو قال لي قصي و ناس سماح اشتغلوا كيف؟ 😂😂
قلت ليهو عادي جداً ، بما إنو في قرابه بيناتنا فـ طبيعي يسأل عن شغلي في الإمتحان! ...قال لي طيب ليه ما بسألك إنتِ؟ ....قلت ليهو فترة الإمتحانات دي انا شبه كنت قافله تلفوني ، قال لي ايوااا ....
ما أكذب ، بقيت أفكر في كلام نادر ، من دون ما أحس لقيت نفسي مبتسمه ، نبهت نفسي و قلت شيلي الأفكار دي من بالك يا مها ، بقيت أعاين لـ رابط النتيجه و أنا مقلقه و خايفه منها ، كل مره اقول أشوفها بتراجع تاني ، في الآخر خليتها على جنب و قلت بشوفها بعدين على راحتي ، طلعت برا لـ خالتو هاجر و وئام و قعدت أتونس معاهم ، بعد ساعه كدا سمعنا صوت الجرس ، مشت الشغاله تفتح الباب ، شويه كدا جاتني داخله و هي شايله ليها قفة فرح ، جات علي و مدتها لي و قالت لي دي ليك؟
قلت ليها لي أنا! قالت لي آيي! ....وئام جات قعدت جنبي و بقت تشوف في الحاجات الفيها و شغاله لي أصلو ما بصدق! وووبعلي الحاجات دي راقيه شديد من منو جاتك؟ قلت ليها ما عارفه ، بقت تشغلها لي و تقول لـ خالتو هاجر خلاص يا ماما شكلها البت دي أمورها ظبت ، خالتو هاجر ضحكت و قالت لي عاد لو شد حيلو و جاك بالباب يكون ما قصر ، قلت ليها يا خالتو باب شنو؟ هو منو أساساً أنا ما بعرفو! والله ما عارفه دي جاتني من منو ، مع معروف يمكن من بت!
فجأه وئام قالت ، مبارك النجاح 💜و 3.57 شبهك والله ، عقبال ما أشوفك جايبه معدل أكبر من دا 🌻💜
قلت ليها دا شنو؟ مدت لي الكرت و قالت لي نتيجتك طلعت؟ ليه ما قلتي لينا؟
قلت ليها دقيقه دقيقه نتيجتي أنا ذاتي ما شفتها ، خالتو هاجر قامت تزغرد و جات حضنتني و قالت لي مبروك يا بتي والله فرحت ليك ، قلت ليها مع إني ما شفت نتيجتي بس الله يبارك فيك.....ماشه أشوفها و جايه ، جريت غرفة وئام و أنا ما مصدقه ، فتحت الشبكه و الواتس و ضغطت على الرابط و دخلت رقمي الجامعي ، شويه كدا نتيجتي ظهرت و عيني وقعت على 3.57 ، ختيت يدي على خشمي و أنا ما مصدقه إنو دا معدلي ، رجعت قريت إسمي تاني : مها محمد عبدالرحيم البدري ، ختيت يدي على قلبي و قلت الحمدلله ، في نفس اللحظه اتصلت على خالتي و كلمتها فرحت شديد و قالت لي هديتك حـ تصلك بإذن الله، قلت ليها رسلتي لي هديه إنتِ؟ قالت لي لا لسه بس حـ اجيبها ليك ، بعد مسافه قالت لي ما قلت ليك نتيجة التحاليل طلعت ....هنا سكته ساي ، أصلي ما كنت ناسيه نتيجتها بس والله كنت خايفه اسألها و تصدمني عشان كدا قلت أنتظرهم هم يتصلوا و يقولوا لي دا لو ما دسوا مني ، قلبي وقف و ضحكتي إتلاشت ، لمن لقتني ساكته قالت لي الحمدلله يا بتي المرض ما إنتشر و ياداب كان في بدايتو و الدكتور أكد لي إني حـ اتعالج بما إنو المرض ما إنتشر و من بكرا حـ نبدا علاج ، قلت ليها كـ عادتك بتكذبي علي مش يا خالتي ، قالت لي واحت اسم الله ما بكذب عليك يا بتي، انا من متين بحلف كذب؟
فرحتي بقت فرحتين و حسيت الدنيا دي ما سايعاني من الفرح ، بس عشان اتأكد قلت ليها أديني وائل لأنو ما بكذب علي و فعلاً لمن اتكلمت معاهو أكد لي كلامها و كان مبسوط شديد ، خالتي ورتو نتيجتي فـ طوالي بارك لي و قال لي برضو عندك عندي هديه بس لمن نجيك هناك ، إتكلمت معاهم مسافه ، بعدها جريت لـ ناس خالتو هاجر و بشرتهم ، خالتو هاجر دي فرحة فرح ما عادي ، و بقت تردد الحمدلله ، الحمدلله و ربنا يجيبهم سالمين ، كدي النمشي و اتصل على خالتك ...
وئام اف و اتنفست بعمق قالت لي كنت خايفه عليها شديد والله ، قلت ليها أنا برضو ، قعدت جنبها و بقينا سرحانين بعيد بعدها طقطقت لي و قالت لي و بالنسبه لـ القفه الجميله و الرهيبه دي لسه ما عرفنا من منو؟
قلت ليها واضحه أكيد دا أستاذ عبدالله ، قالت لي عرف من وين انك ساكنه هنا؟ قلت ليهو هو عرف رقمي بغلبو يعرف عنواني؟ ....قالت لي الرقم ساهل بس العنوان لا ما بالسهوله دي!.....قلت ليها ما عارفه جابو كيف بس متأكده إنو دا هو ، قالت لي تمام اسأليهو بكرا ، قلت ليها ما بسألو ولا حاجه دا إنسان سغيل ساي و عايز يلعب بس ما أكتر ، بعد صلاة العشا خالتو هاجر جابت لينا كيك و عصاير و عملت زلابيه مع شاي لبن ، طلعنا برا في الحوش و قعدنا نتونس و نضحك لحد ما جات الساعه 12....
في اليوم البعديهو أول ما وصلت الجامعه و دخلت المبنى و كنت ماشه على القاعه ، لمحت أستاذ حذيفه من بعيد واقف مع سماح و هي بتبكي ، ما عارفه كان بقول ليها شنو بس حسيتو شويه كدا و حـ يضمها ، قلت المستهبله دي المبكيها شنو كمان! المشكله إنهم كانوا واقفين جنب القاعه! قويت قلبي و جيت ماره جنبهم بس لا سلمت لا ركزت معاهم بس أستاذ حذيفه عاين لي لمن دخلت ، شويه كدا جوا داخلين هم الإتنين ، في سري قلت خلى رهف و جا لـ دي كمان ، شكلها حـ تكون خطيبتو الجديده ، كنا في القاعه نحنا التلاته بس و أنا غالبني أرفع راسي و أعاين ليهو أو ليها ، طلعت تلفوني و عملت نفسي مشغوله بيهو ، بعد مسافه سمعت صوت حركة ناس و زول بقول حـ تدخلنا يا أستاذ؟
قال ليهم ايوه ادخلوا اصلاً أنا دخلت بدري ، بدا محاضرتو و المره دي نهاي ما عبرني و ما عاين لي كأني ما قاعده معاهو في االقاعه ، لمن خلص قال لينا برك ساعه و تعالوا راجعين ، طلع و الطلبه طلعوا وراهو ، لمن طلعت مشيت لـ نادر و قصي و باركت ليهم و وريتهم معدلي ، قصي قال لي بقيتي خطيره عديل تاني حـ نجيك تشرحي لينا، قلت ليهو كمان ما للدرجه دي ، نادر عاين لـ قصي و قال ليهو سماح دي مالا شايفها من الصباح بتبكي! قال ليهو غيتو قبيل في المحاضره سامع صحباتها قالوا ليها ما مشكله ، اشتغلي في السمستر الجاي ، شكلو نتيجتها طلعت ما كويسه، نادر قال ليهو ما أعتقد لأنها شاطره شديد بس يمكن هي خاته معدل معين في بالها و عايزا تجيبو بس ما جابتوا، كدي تعالوا نتكلم معاها و نفهم منها الحاصل، قلت ليهم أنا حـ أمشي الكافتيريا، فعلاً مشيت و فطرت رغم إنو نفسي كانت قافله بعد ما شفت منظر أستاذ حذيفه مع سماح!
لمن الزمن قرب شلت شنطتي و مشيت المبنى ، كنت مستعجله شديد لأني اتأخرت ، اثناء ما أنا ماشه و مستعجله و بعاين في تلفوني كدا سماح جات طالعه من الممر التاني الجاي من مكتب أستاذ حذيفه، من غير قصد اصطدمت بيها و نظارتها وقعت و إنكسرت ، هي أصلاً شكلها كانت ماسكاها و ياداب عايزا تلبسها فلمن طقشتها وقعت منها.....غلبني أعتذر منها فـ طوالي إتحركت من جنبها، قالت لي على الأقل خلي عندك شوية ذوق و إعتذري، رجعت ليها و قلت ليها ما حـ اعتذر و ما عندي ذوق عايزا تعملي شنو؟
كنت بتكلم معاها بإنفعال و واضح إني ما طايقاها، قالت لي حـ اعمل ليك شنو مثلاً؟ أكيد ما حـ اضربك أو اصرف معاك عربي كتير لأنو الحاجه دي ما شبهي ، قلت ليها تضربيني؟ أساساً بتقدري إنتِ؟
قالت لي الشكل و الضرب دا اسهل حاجتين بس البيت و الأسره الطالعه منهم ما بسمحوا لي بالحاجه دي و نفسي ذاتا ما بتسمح لي لأني ما إتربيت كدا!
كلامها جاني في الجرح ، إنفعلت أكتر و قلت ليها قصدك أنا ما مربيه صح؟ قالت لي انا ما قلت كدا لأنو أسلوبك مع الناس بمثلك إنتِ!
بقيت أجوط فيها و أنا أصلاً من زمان محروقه منها و عايزا لي مشكله معاها عشان اتفشى فيها، لمن شاكلتها كتير قالت لي ماف داعي للكلام الما حلو دا و حصل خير و اعتذارك ذاتو ما كان حـ يعمل حاجه للنظاره الإتكسرت ، قلت ليها تقولي أنا ما مربيه و في الآخر تقولي لي خير؟ بقيت أرفع صوتي عليها و اشاكل فيها و هي ساكته ساي بس عيونها إتملت دموع، شويه كدا باب المكتب إتفتح و أستاذ عبدالله جا طالع و وراهو طوالي أستاذ حذيفه و انا بعد ما شفتهم ما رضيت أسكت! ...استاذ عبدالله قال لينا خير يا شباب في شنو؟ مها، سماح مالكم؟
سماح مسحت دموعها و قالت ليهو ماف شي و نزلت رفعت نظارتها و كانت حتمشي بس إستاذ حذيفه وقفها و قال ليها ما حتمشي من هنا إلا تحكي لي الحصل ، ألحقوني انتوا الإتنين في المكتب ، قلت ليهو انا ما داخله و العندي قلتو ليها، أول ما اتحركت استاذ حذيفه قال لي بنهره خليك واقفه مكانك! ....صوتو خوفني شديد ، كان معصب شديد و بعاين لي بنظرات كلها ضيق! ....قلت دا كلو عشان سماح؟
قلت عشان ننتهي من الموضوع دا اصطدمت بيها من غير قصد و زي ما شايفين نظارتها اتكسرت و هي قالت إني ما مربيه و أنا رديت عليها ، سماح قالت لي و هي بتبكي على الأقل لو ما اعتذرتي كنتِ تقولي الحقيقه و كذبك دا بثبت إنك غلطانه و فعلاً إنتِ غلطانه و عارفه كدا عشان كدا ما حكيت ليهم الحقيقه ....إتلفت على استاذ حذيفه و عبدالله و قالت ليهم الحاصل كدا و كدا و كدا ، أستاذ عبدالله قال لي فعلاً إنتِ غلطانه! و لو اعتذرتي ما كان دا كلو حصل، عاينت ليها بضيق و قلت ليها بنفس نبرة الشكل المهم إنو معنى كلامك انو أنا ما مربيه! قلت ليك تعالي ربيني! و هسي مالك بتبكي من قبيل ما كنتِ ساكته و عامله فيها صنديده بس التمثيل و الحركات دي أكيد ما حـ تخليهم، قالت لي انا ما قلت ليك ما مربيه، عاينت لأستاذ حذيفه و قالت ليهو اقسم بالله ما قلت ليها كدا ، عليت صوتي عليها و قلت ليها معنى كلامك كان بقول إني ما مربـ.....قبل ما أتم كلامي جاني صوت استاذ حذيفه و هو بقول لي بصوت عالي و نبره مليانه غضب فعلاً انتِ ما مربيه!
إتهجمت و بقيت أعاين ليهو! ....كلامو وجعني شديد لأنو عارف عني معلومات ماف زول غيرو عارفها و كلمة "ما مربيه " دي هو قاصدها حرف حرف لأنو عارف إنا شنو و أهلي عملوا شنو! 💔
قال لي بنفس النبره إعتذري منها ، سكته ما رديت عليهو! جاني قريب و حسيتو شويه كدا حـ يضربني ، قال لي إعتذري منها قلت ليك!
عاينت ليهو جوه عيونو و قلت ليهو ما حـ اعتذر و طوالي مشيت من جنبهم و الممر كلو كان ملان طلبه بتتفرج و جزو كبير كان من دفعتنا لأنو القصه حصلت جنب القاعه ، طلعت من المبنى بإستعجال ما وقفت إلا جنب بوابة الجامعه عشان أمسح دموعي ، لمن وصلت البيت جريت غرفة وئام و قعدت أبكي قدرتي كل ما اتذكر الحصل 💔
يتبع......
