وئام قالت ليها أساساً دي وحده مخستكه ساي و أنا من أول يوم شفتها فيهو قلت دي أنسب مكان ليها مستشفى المجانين ....
خالتو هاجر قالت ليها لكن الطريقه المشت بيها بتحير والله! وئام قالت ليها ما تركزي معاها دي وحده مجنونه ساي ، طبعاً أنا ذاتي كنت مستغربه! يعني المره كانت طبيعيه و بتشوف في الصور عادي ، الحصل عليها شنو فجأه كدا! ....شي يحير والله!
المهم بعد صلاة العشا كدا كنت مع وئام في غرفتها و أي وحده بـ همها ، هي كانت بتعاين لـ تلفونها شويه كدا بقت تتصل بس ماف رد......قلت ليها بتتصلي في رقم غسان صح؟ ....عاينت لي و سكتت ، قلت ليها بعد دا ماف مجال للكذب لأنو العملتيهو أمبارح و بكاك و صريخك فضحوك! اعترفي بعد دا على الأقل بينك و بين نفسك! ما ردت علي فـ خليتها على راحتها ، بعد مسافه قالت لي حتفرق في شنو يعني و هو مختفي و ما لاقين ليهو أثر؟
قلت ليها حـ يتلقي أو يمكن يرجع براهو ، شكلو زعلان منك و من العملتيهو و إختفاؤ دا رد فعل بس مبالغ فيهو ، قالت لي يمكن......خلينا منو ، قولي لي أمبارح مالو لونك كان مخطوف كدا؟
قلت ليها أسكتي ساي ، راسي جايط و ما عارفه اقول شنو ، قالت لي قولي قولي! ....اتنهد و قلت ليها أستاذ حذيفه أمبارح إعترف لي! ....ختت يدها على خشمها و قالت لي بالجد! هزيت ليها راسي ، قالت لي يا معفنين انا كنت في حاله ما يعلم بيها إلا ربنا و انتوا قاعدين بمزاج و بتعترفوا لبعض كمان! قلت ليها قايلاني صدقتو يعني!؟
_ نعم نعم؟ كيف يعني ما مصدقاه؟ يا بت هو اعترف ليك أكتر من دا عايزاهو يقول شنو عشان تصدقيه؟
= ما يقول حاجه، بالنسبه لي كلامو كلو كذب في كذب و زي ما غشى رهف و حالياً غاشي البت الإسمها سماح أكيد مفكر يغشني زيهم و في الحقيقه حصل و غشاني بس هي عايز يواصل في لعبو
_ طيب ما وضح ليك ليه خطب رهف و علاقتو شنو بالبت ديك و تصرفاتو الفاتت ديك كلها تفسيرها شنو؟
= ما قال لي و أنا ما سألتو....ما عايزا أسمع كذب زياده
_ بتقعدي تراجعي تردشاتو و كل يوم بتبكي بسببو و بتقولي هو انسان ما جادي و ما عندو ليك حاجه و هسي لمن جا إعترف ليك بقى ما هاميك و ما ناويه تصدقيهو! .....مها شوفي أنا أكتر وحده عارفه المريتي بيهو لأني جربتو و شفتك بتجربي فيهو ، هو بما انو اعترف ليك معناها حسم الحاصل دا كلو و عايزك تديهو فرصه ....ما عارفه هو إعترف ليك كيف قال لي بحبك أو بريدك أو عايزك لـ قدام ، ختو كلامو دا في عين الإعتبار و أديهو فرصه ، متأكده ما قالوا من فراغ، بتقدري تقعدي معاهو و تستجوبيهو و تلقي إجابات لكل الأسئله الفي بالك دي بعدين لو ما اقتنعتي فإنتِ حره بعد دا ، كوني تنهي علاقتك بزول و إنتِ معاك كل الإجابات افضل من تنهيها و لسه في اسئله في بالك ، مع الزمن الأسئله دي حـ تنهش عقلك نهش و تهرد قلبك ، عشان كدا بقول ليك أقعد معاهو و اتكلموا سوا و ما تقومي إلا لمن يجاوبك على كل الأسئله الفي بالك ....
بقيت طول الليل بفكر في كلام وئام كدا لحد ما نمت ، حتى لمن مشيت الجامعه عقلي ما وقف عن التفكير ، طبعاً اليوم عندنا محاضره معاهو بس زي ما إتوقعت جانا أستاذ عبدالله ، أدانا محاضره وحده بس حسب الجدول يوم الأحد محاضرة الماده دي بتكون فرده ، بعد ما طلع مننا مشينا برك ساعه و انا طول المده دي بفكر لحد ما قلت كلام وئام معقول ، حـ أجرب ، بعد الساعه مضت رجعنا القاعه عشان عندنا محاضره مع دكتور عثمان ، لمن رجعت البيت إكتشفت إنو ماف زول غير الشغاله! لمن سألتها قالت لي ولدكم جا راجع و خالتو هاجر و وئام مشوا ليهو ، قلت ليها الحمدلله ، دخلت إرتحت شويه و فطرت ، اتصلت علي خالتي لأنها عارفه زي المواعيد دي بكون رجعت من الجامعه، بعد ما سألت عن أحوالي و كدا قالت لي صحي الولد رجع لـ أهلو؟ قلت ليها ايي رجع، قالت لي ان شاء الله رجع بعفيتو ، قبيل اتصل حذيفه على وائل و كلموا بس ما حكى ليهو التفاصيل ، قلت ليها انا ذاتي ما عرفت إلا من الشغاله لأني جيت داخله هسي من الجامعه و هسي حـ أمشي عليهم ، قالت لي آيي امشي ليهم ، بعد قفلت منها لبست لي عبايه و مشيت ، أول ما وصلت الباب كدا أستاذ حذيفه جا طالع! قلبي عمل شححح و ما عرفت أمشي وين و قلبي اشتغل دق دق! المشكله إنو واقف لي جنب الباب و ببتسم و ما مديني مجال عشان أدخل! ....اتحركت خطوه عليهو بحيث انو يفهم و يزح لي بس لسه كان واقف و بعاين لي شديد و انا عيني ما قادره أرفعها عليهو ، شويه شويه رفعتها و عاينت ليهو بقلق و قلت ليهو بصوت متقطع ز زح لي من الـ باب ....إبتسم زياده و قال لي ما مشكله الأيام بيناتنا ، زح لي و طلع و أول ما دخلت لمحت رهف! كانت بتعاين لي بغيظ و واضح انها شمتني شديد ، بصراحه بعد نظرتها دي إترددت أدخل ولا لا! بس بعد ما هي مشت طوالي دخلت قلت أوريهم وشي و أطلع ، مشيت ليهم جوه و سلمت عليهم كانوا كتار ، بنات على أولاد شباب على شفع على نسوان كبار ، بعد ما سلمت عليهم و حمدلت لـ غسان و أمو السلامه قعدت جنب خالتو هاجر ، قالت لي فطرتي؟ قلت ليها ايي ، طبعاً رهف لمن دخلتْ قبليني كانت جايبه معاها عصير للناس الجوا قبل شويه قدمت ليهم كلهم إلا أنا ، خالتو هاجر نادتها ، لمن جات شالت كبايه و مدتها لي ، رهف قالت ليها معليش ما شفتها و مشت!
أمو غسان كانت بتلوم فيهو ساي و بتبكي و خالتو و كل الموجودين لاموهو قدرتهم ، رهف قالت ليهو عملتك دي شافع ما بعملها! عارف الحاله الكنا فيها كلنا خاصة لمن بلغونا إنو لقوا جثه و احتمال الجثه دي تكون جثتك! عارف كمية الهلع الدخل فينا! .....أمو قالت ليهو الزعلك منو يا ولدي! كنت لمن بتزعل ما بتمرق مره زي دي! مالك هسي؟ ......في شنو يا ولدي ما تسكت أحكي لينا مالك؟
طوالي غسان عاين لـ وئام و هي ما عرفت تدس وشها وين و بقت تحاول تضاري نفسها بالجنبها ، قال ليها المهم رجعت يا أمي خليك من السبب ، قالت ليهو لا والله إلا تحكي لي الحصل عليك شنو؟
قال ليهم ولا شي ياخ و طوالي طلع مننا ، قعدنا معاهم شويه و رجعنا البيت ، يوم الإتنين ما كان عندي جامعه ، خالتو هاجر مشت تشرب الجبنه في بيت هدى أختها في بقينا قاعدين أنا و وئام بس في الهول و بنحضر ، شويه كدا سمعنا صوت الجرس ، وئام لبست ليها توب و مشت فتحتو ، جات داخله و جدعت لي التوب الكان في السرير القدامها، عرفت إنو في راجل داخل ، لبست التوب سرعه و قعدت ، فجأه وئام قالت اتفضل بعد دا يا حذيفه ، طبعاً لمن جا داخل قلبي بقى شغال دق دق وقفت على حيلي عشان أمشي ، جيت ماره بجنبو قلت ليهو كيفك تمام و كنت حـ أمشي بس هو وقفني و قال لي جاي مخصوص عشان أتكلم معاك بتتهربي مني ليه؟
وئام قالت لي زي ما قلت ليك يا مها اقعدي معاهو و إتفاهموا ، طبعاً فهمت إنها متفقه معاهو ، هزيت ليها راسي و رجعت قعدت مكاني و أنا متوتره ، جا قعد في السرير المقاصدني ، وئام قالت لينا حـ أجيكم هسي و طوالي طلعت و هي بتتبسم و أنا هنا توتري زاد ، بقيت أعاين لأي حاجه في الهول و لـ كل الإتجاهات ما عدا إتجاهو ، كنت مشربكه أصابعي و ما باقي لي إلا أهز رجليني ، قال لي خليك عاديه ماف حاجه بتوتر ، لمن عاينت ليهو لقيتو بتبسم ساي! قلت ليهو أساساً ما متوتره ، قال لي واضح......المهم يا زوله خلينا ندخل في موضوعنا ، بالنسـ......قاطعتو و قلت ليهو قبل ما تقول أي حاجه و تصرف عربي كتير خليني اقول ليك إني ما مصدقه ولا حرف من القلتو لي ولا حـ اصدق الحـ تقولو هسي ، لأنك ببساطه انسان ما جادي و بتحب الكذب و النفاق بدليل انك في البدايه كنت بتحاول تقرب مني بحجة انك عايز تشرح لي و تساعدني ، لمن حسيت إني بديت......سكته و تاني قلت ليهو بعدها مشيت خطبت رهف و في فترة خطبتك ليها بقيت تتقرب من سماح و بتحاول تلعب بيها! لمن خلاص قنعت من رهف فسخت خطبتك منها ، عشان تفضي نفسك لـ سماح البرضو حـ تتسلى بيها شويه و بعدها حتشوف غيرها.....الله أعلم لعبت على كم بت قبل كدا!
قال لي رغم إنو كلامك مستفز و كلو كذب في كذب بس لأني زول جادي و ما كذبت في كل حرف قلتو ليك لسه قاعد و مُصر أحل سوء التفاهم دا.......بعترف إني اتسرعت و من دون تفكير مشيت و خطبت رهف و دا كان بسببك إنتِ ، قلت ليهو أنا قلت ليك أمشي أخطبها؟
قال لي لا بس تصرفاتك المستفزه و الما مفهومه هي الخلتني في لحظة غضب أمشي و اخطبها ، قلت ليهو دي حجتك؟
اتنهد و قال لي بعد ما خطبتها و وعيت على العملتو كان صعب علي أتراجع ، كان لازم اتحمل نتيجة العملتو ، قلت ليهو و فسختك خطوبتك منها ليه مدام ما كنت قادر تتراجع ؟
قال لي لأننا ما قدرنا نتفاهم و كل يوم متناقشين مع بعض ، مشكلتها انها كانت عايزاني في اليوم اتصل عليها قريب الـ 7 ، 6 مرات ، حتى و أنا في عز شغلي بتتصل و بتلومني لأني ما اتصلت عليها ، مرات بتجيني في شغلي، تبكي و تقول إني ما مهتم بيها .....هنا إتذكرت لمن كان طالع و جاتو جنب الجامعه و كانت بتبكي و هو بحاول يهدي فيها ، واصل كلامو و قال لي ، أنا حاولت قدر الإمكان اتفاهم معاها بقيت حتى لو مشغول برسل ليها رساله بسأل فيها عن أخبارها ، بتزعل لمن تتصل و ما أرد عليها مع إني لو ما رديت فأكيد كنت بعيد من التلفون ، أنا و هي ما قدرنا نتفاهم، قعدت معاها و شرحت ليها إنها اذا استمرت كدا ما حنمشي لقدام ، جاطت شديد و قالت لي قول عايز ليك سبب عشان تخليني ، المهم في اليوم داك اتناقشنا شديد في الآخر قالت لي انا ذاتي ما بقدر أكمل معاك ، سكتنا على كدا لا أنا جبت سيره لزول لا هي جابت سيره لزول ، بس بعد فتره اتصلت علي و قالت لي ليه لسه ما كلمتهم اننا فسخنا خطبتنا؟ أنا حقيقة ما كنت عارف اعمل شنو و النقاش ذاتو ما كان بـ يسوى أكيد بعدين حـ انسئل خليتا ليه حتى لو حكيت ليهم النقاش الدار بيناتنا حـ يشوفوا إنو نقاش عادي ، بس كويس إنو الحاجه دي جات منها هي ، لمن سألتني ما رديت عليها، قفلت الخط و كلمتهم إننا فسخنا خطبتنا من زمان ، دا بالنسبه لـ رهف أما سماح فالموضوع ما زي ما إنتِ مفتكره ، قلت ليهو والله!؟ في دي بالذات ما تحاول تثبت لي العكس ، معاملتك ليها بتخلي الما عايز يشك يشك ، حتى ناس الدفعه كلهم ملاحظين ليكم و للمعامله البتعاملها بيها ، قال لي خليني اتكلم أصلاً انا جاي عشان أجاوبك على اسئلتك كلها و اتفاهم معاك ، سماح من أسره بسيطه و قدر حالها ، أبوها مشلول و أمها هي الماسكه البيت و إحتياجاتها هي و أخوانها و أبوها ، هي أكبر وحده فيهم عشان كدا أهلها متأملين. فيها و منتظرنها تتخرج و تساعدهم عشان كدا دخلوها جامعه خاصه ، لأنو الخاص أسرع من الحكومي ، المسؤوليه اتضاعفت على أمها بقت تشتغل شغل إضافي عشان توفر بيهو رسوم جامعة بتها ، سماح كانت مقدره تعب أهلها و خاته. هدف في راسها و مجتهده في دراستها و عشان أنا عندي خلفيه عن حياتها محترمها شديد و مقدرها لأنها بتعمل دا كلو عشان أهلها و هدفها عظيم...
ربعت يديني و قلت ليهو بالله!؟ و إنت عرفت دا كلو من وين؟
قال لي السنه الفاتت و تحديداً في السمستر التاني ، لمن الجامعه طلبت من الطلاب يدفعوا الرسوم ، هي غابت أسبوع ، يوم جيت داخل مكتب المسجل لقيتها واقفه مع أمها قدام المسجل و من خلال كلامهم معاهو فهمت إنهم عايزين زمن إضافي يقدروا فيهو يجموا المبلغ ، بتذكر انو المسجل قال ليهم امشوا لناس إدارة شؤون الطلاب لو عندهم ليكم حل ، فلمن جوا طلعوا لحقتهم و سألتهم عن الحاصل و سألت سماح ليه كانت غايبه ، ايوه من خلال كلامهم مع المسجل فهمت انو دا سبب غيابها بس برضو كنت عايز اعرف اكتر ، سماح كانت محرجه تقول لي بس أمها الكانت بتبكي ما إترددت و طوالي حكت لي انهم ناس بسيطين و ابوهم مشلول و و و.....حكت لي حاجات كتيره عنهم، و من يومها إحترامي لـ سماح زاد ، بس ماف أي شي بيني و بينها و أساساً ما مفروض تفكيري فيني كدا ، قلت ليهو طيب الحصل ليهم شنو بعدها؟
قال لي متأكد انهم لو مشوا لإدارة شؤون الطلاب ما حـ يفيدوهم بحاجه و يقعدوا يتحججوا ليهم و يقولوا ليهم امشوا للجهه الفلانيه ، حاجات زي دي معظمها بتم بالواسطات ، قلت ليهو اهاااا ، متأكده إنو نفسك السوبرمانيه ما سمحت ليك إلا تساعدهم و أكيد جبت ليهم توصيه و حليت ليهم مشكلتهم و ما بعيده تكون دفعت ليها الرسوم!
عاين لي جوه عيني و قال لي دا المفروض يتعمل ، قلت ليهو و لمن كانت بتبكي و إنت بتحنس فيهو برضو ما قدرت تدفع الرسوم و جات شكت ليك عشان تدفعهم ليها؟
قال لي سماح نفسها عزيزه و هي ما كدا ، حتى لمن عرفت إني دفعت ليها الرسوم جات و قالت لي حـ نرجعها ليك رغم رفضي و فعلاً جابتهم لي السنه دي بس مستحيل أشيلهم منها ، قلت ليهو بعد دا تقول لي ماف شي بينك و بينها؟
اخد نفس عميق و قال لي أنا من البدايه فهمتك و قلت ليك أي طالب بحسو مواجهه مشكله بحاول أحلها ليهو ، لقيت نفسي بقدر بقدر أساعدها فـ ليه أربع يديني و أقعد أعاين ليهم؟!
سكته مسافه و بقيت أعاين ليهو ، يعني حذيفه دا أنا بالجد كل مره بكتشف فيهو حاجه جديده ، مستعد يساعد أي زول حتى لو كان ما بعرفو! بدخل نفسو في مشاكل الناس كلها و بحاول يحلها ليهو ، يمكن عشان كدا كل الدفعه بتحبو ، لمن لقاني ساكته بقى يعاين لي زي البقول لي إجاباتي مقنعه و كافيه لكل الأسئله الفي بالك ، قلت ليهو طيب نفسك السوبرمانيه دي برضو هي القالت ليك اقيف مع سماح ضدي لمن حصل نقاش بيني و بينها و نظارتها إنكسرت من دون قصد؟
قال لي ايوه لأنك غلطانه!
اتغظت منو غيظ ما عادي ، قلت ليهو لا انت لا استاذ عبدالله كنتوا معانا لمن بدينا نقاش فكيف تتهمني بالكذب و إنت ما كنت موجود؟
قال لي كان واضح عليك ، مها أنا بعرفك أكتر من نفسك ، بعرفك لمن تكوني صادقه و لمن تكوني بتكذبي ، بعرفك في كل الحالات، بالإضافه لأنو سماح ما الطالبه البتحب المشاكل و ما ظنيتها تغلط على زول ، قال كدا و عاين لي شديد
غضبت قدرتي و حسيت نفسي حـ أطق من الزعل ، قلت ليهو سماح دي وقت ماليه عينك و عاجباك للدرجه دي أمشي عرسها و أصرف عليها على راحتك ، ابتسم و قال لي دي غيره؟
قلت ليهو غيرة شنو عليك الله! قال لي لو ما في غيره ما كنا هسي قاعدين القعده دي و عايزين نحل سؤء التفاهم و ما كانت أسئلتك كلها بتدور حولين رهف و سماح ، قلت ليهو ما تفهم غلط أنا قاعده القعده دي لأنو وئام أصرت علي أقعد و اسمع منك و هسي بما إنو قلت العندك فـ خلاص ، قال لي شنو هو الخلاص؟
قلت ليهو ما مهم ، قال لي عارفه إنك إنسانه لئيمه و عنيده و ما بتقتنعي بسرعه! و المشكله إنك ما بتعترفي! و المشكله الأكبر إني بعد دا كلو متمسك بيك و عشمان فيك!
طبعاً لمن قال لي كدا قلبي عمل شححح و الدلوكه إشتغلت ، حاولت أخفي توتري و الأثر العملو فيني كلامو بس فشلت و السبب في دا نظراتو لي و إبتسامتو المستفزه!
قال لي إنتِ شكلك مطوله و أنا خلاص تعبت من المماطله دي خاصة إننا الإتنين عندنا نفس المشاعر لبعض فـ الأحسن نختصر و نمشي خطوه لـ قدام ، قلت ليهو و أنا بتمتم مـ مـ مشاعر شنو أنا ما.......قاطعني و قال لي متذكره الصفحه الوهميه الكنت بتراسليني بيها!؟ متذكره الكلام الكنتِ بترسليهو لي؟
قلت ليهو أنا فهمتك إنو كان مقلب ، قال لي لا ما كان مقلب و أنا كنت عارف إنو ما مقلب بس الفتره ديك إتمنيت إنو يكون مقلب لأني ما كنت جاهز للقصص دي كلها و الأهم من دا كنت خاتي في بالي إنو الحاسه بيهو دا يمكن يكون مجرد إعجاب أو فترة مراهقه و حـ تعدي خاصة إنو دي أصعب فتره و كل البتحسيهو في الفتره دي اتجاه زول ما حقيقه ، دي أكتر فتره بتكون صعبه على البنات لأنهم بتعلقوا بسرعه و ممكن يفهموا أي تصرف عادي من واحد إنو حب أو إعجاب ليهم ، في الفتره ديك ما كنت عايز احسسك إني فاهم انو دا ما مقلب لأني متأكد لو واجهتك و لمتك على العملتيهو كنتِ حـ تكرهيني شديد و ما حـ ترضي تتعاملي معاي تاني و الأكعب من كدا كان ممكن تضري نفسك بعدم جيتك للجامعه أو كنتِ حتجي بس ما حـ تحضري محاضراتي و غير كدا متأكد انو إحساسك الخذلان ما كان حـ يريحك ، فكوني اعمل رايح و مصدق إنو مقلب دا كان أنسب حل في الفتره ديك....
سكته مسافه بعدها قلت ليهو عشان كدا قاطعتني فتره و اتغيرت علي!؟ لمن كنت أجيك و اقول ليك اشرح لي بتتهرب مني و تقول لي مشغول أنا!؟
قال لي ما كان قدامي حل غير كدا ، ما كنت عايز أعشمك فيني أكتر ، بس عارفه! في الوقت الكنت بحاول أنقذك من نفسي و أبعدك عني لقيت نفسي مقرب منك و غرقان!
طبعاً كلامو بوترني شديد ، حسيت جسمي بكل متلج عديل و جاتني رعشه خفيفه كدا ، الإتنين سكتنا مسافه بعدها هو قال لي ما عارف اذا جاوبت على الفي بالك كلو ولا لا بس القلتو كلو حقيقه و ما كذبت عليك في شي و أنا زول جادي و هسي لو وافقتي ما عندي مانع أكلم أهلي و نكلم خالتك و لمن تجي نتم العرس و يكون أحسن شديد لو أدتنا موافقتها من بعيد ، نططت عيوني و بقيت أعاين ليهو عشره عشره ، بعد مسافه قال لي بهظر معاك أكيد حننتظر خالتك لحد ما ترجع لينا بالسلامه ، اها رايك شنو؟
لمن سكته قال لي ولا زولك داك أداك كلمتو؟ طبعاً قالها و هو بضحك كأنو عارفني كنت بكذب ، قلت ليهو بغييظ أي أداني كلمتو ، قال لي طبعاً ما بتردي إلا على الكلام الفيهو نقاش أو جدل هسي انا من قبيل بنبح كدا و بقول ليك كلام زي العسل و إنتِ عامله صامت! 😂😂
المهم يا زوله فكري كويس ولا اقول ليك ذاتو ما تفكري و أديني موافقتك هسي ، قلت ليهو : هسي مش قلت ليك في زول أداني كلمتو!؟
ضحك قدرتو و قال لي زولك الخيالي؟ 😂 حـ تقعدي تختبري في غيرتك عليك كدا لمتين؟ أنا عديل جيتك و إعترفت ليك و لو عايزا تعرفي بغير عليك ولا لا فأنا بغير عليك و شديد كمان ، وقف على حيلو و قال لي عارفك سغيله و ما حـ توافقي بالساهل كدا حـ أديك تلات أيام تفكري فيهم و لو علي أديك ساعه وحده بس ، و لـ عِلمك الـ3 أيام بتبدا من اليوم دا ، إبتسم لي و طلع و هو بعد ما مشى أنا فجأه كدا بقيت أتبسم براي زي المجنونه حسيت الدنيا دي ما سايعاني من شدة الفرحه ، اثناء ما أنا بتخيل كدا و مبسوطه على الآخر جاني صوت وئام و هي بتقول خليك إنتِ أنا ذاتي إتكيفت من كلامو و حسيت كأنو الكلام دا موجه لي 😘💜
قلت ليها كنتِ بتتصنتِ علينا؟ قالت لي معليييش بس دا الحصل، أبت نفسي إلا اسمعو حـ يقول ليك شنو ، شلت المخده الجنبي و رميتها عليها قلت ليها إنتِ القلتي ليهو تعال صح؟
قالت لي بري والله بس هو عارف إنو ماما في بيت ناس خالتو هدى عشان كدا جا و إتكلم معاك ، قلت ليها ما مصدقاك ، أنا بس سألتو مره وحده و قلت ليهو عايز تتكلم معاها متين قال لي لمن ألقى الفرصه المناسبه و هسي لقاها ، بس حيييا أنا منك! ليه ما وافقتي طوالي يا غبيه! نظام عامله فيها تقيله و كدا و حركاتك دي هي الحـ تطفشو منك ، قلت ليها خليك من دا ، بالجد رهف هي الفسخت الخطوبه ، قالت لي ما عشان حسسها إنو ما عايزها عشان كدا لملمت كرامتها بس عارفه حاسه إنها عملت كدا عشان تخليهو يتصل عليها و يحنسها و ينفي الكلام القالتو حق إنهم فسخوا خطوبتهم بس هو ما صدق و طوالي أكد ليهم كلامها 😂 المهم يا زولتي ما تضيعي فرصتك دي و بسرعه وافقي و خلونا نفرح بيكم ، قلت ليها حصل شنو تاني بينك و بين غسان؟
قالت لي عامل فيها زعلان و بقى شاميني شمه ما عاديه ، قلت ليها طيب دي حاجه كويسه ولا لا؟ ....شوفي يا وئام بما هو قال عايزك و ما عندو مشكله يتقدم ليك و انتِ لسه بتحبيه فـ ليه ما توافقي عليهو؟
قالت لي الموضوع ما سهل علي ، انا ما واجعني إنو اتجاهلني لمن إعترفت ليهو ، يمكن كنت حـ اسامحو بعد كلامو دا بس هو عشان يندمني و يوجع قلبي مشى خطب و ما أي وحده خطب صحبتي الروح بالروح ، لو خطب أي وحده ايوه كنت حـ ازعل بس برضو كنت حـ أخت في بالي إنو انا الحبيتو ما هو و ما بقدر أجبرو علي، بس هو خطب صحبتي! يعني ما لقى غيرها!؟
قلت ليها أكيد هي لصقت فيهو و لعبت ليهو بعقلو ، قالت لي و ليه تلعب ليهو بعقلو! شافع هو؟ هو واحد بتاع لعب ، بمشي من بت لـ بت و لعبو بكون على حسب الأجمل ، عمايلو دي من زمان أنا بعرفها و كتير سمعتو بتكلم مع بنات مع ذلك مشيت و حبيتو عشان تعرفيني كنت غبيه و وهميه كيف.....بمناسبة الخاينه دي اتصلت علي أمبارح و جاطت فيني شديد و قالت لي إنتِ السبب أصلاً من عرفت إنو جا من السفر قلت أكيد حـ تمشي تتلصقي فيهو و تلفي ليهو راسو ، بسببك خلاني و فسخ الخطوبه من دون ما يفسر لي و لمن أهلي اتصلوا و اتكلموا معاهو يقول ليهم ما نفعنا مع بعض!؟
عملت ليهو شنو إنتِ ، مشيتي لـ شيخ منو ، قعدت أضحك على كلامها و هي هناك مغيوظه و لسه بتجوط ، قلت ليها الشيوخ ديل بتمشي ليهم إنتِ و بعدين كدي فهميني أنا الدخلني في دا شنو؟
قالت لي قايلاني غفلانه ولا ما بجيبوا لي الشمار ، قلت ليها برضو ما فهمت عملت ليهو شنو يعني؟ قالت لي ما أكيد عملتي ليهو حركات البنات الشلابات و الرخيصات ديل و لفيتي ليهو راسي ، ضحكت ليها ضحكه طويله و قلت ليها إنتِ أكبر شلابه و أرخص بت في العالم كلو ، أذكرك إني غدرتيني و خنتيني و إنتِ عارفه هو بالنسبه لي شنو؟ مع ذلك ما سمعتك فارغه و خشمي ما فتحتو ليك لأنو عديم ضمير و إحساس زيك كلامي ما حيفرق معاها و بعدين تعالي هنا، دي شنو لفيتو ليهو راسو و بتاع! هو أصلاً راسو لافي و لو ما كدا ما كان إتلفت لـ وحده زباله زيك ، و مووووتي بغيظك يا شلابه و خاينة العشره ، مسكك 4 سنوات و حاجه و في الآخر فكاك زي كيس النايلون 😂😂
قلت ليها كدا و قفلت الخط و حظرت رقمها، بس لاحظت إنو رقمها دا إتصل علي قبل كدا ، قبل ما غسان يختفي
