خالتي نزلت يدها عن الجرس لمن سمعنا صوت وحده بتقول براحه جايين جايين! و على طول فتحت الباب ، كانت مره كبيره كدا بس مجيهه و عندها صحه ، قالت لينا بإستغراب مرحب!
خالتي بقت تعاين جوه البيت و كانت حتدخل بس المره وقفتها و قالت ليها معليش ما بقدر أدخلكم! منو إنتوا ؟
خالتي قالت ليها دا مش بيت هيثم مصطفى؟ المره قالت ليها ايوه دا بيتو و أنا مرتو!
هنا خالتي سكتت شويه ، بعدها قالت ليها و أنا برضو مرتو....قصدي طليقتو و جيت عشان أشوف أولادي الساقهم مني قبل 18 سنه.....هنا حصلت لحظات صمت!!
= يا ربي يكونوا موجودين هنا في السودان ، انا خلاص صبري نفد و.....
قبل ما خالتي تقول حاجه زياده المره جاتني داخله ، قعدت و بدت تسألنا اسئله كتيره ، في الآخر قالت لينا إتصلت على هيثم قال هسي حيجي ، خالتي قالت ليها انا ما عايز شي غير أشوف أولادي ، لا عايزا هيثم لا غيرو ، هم وين هسي؟
طبعاً المره خلتنا ندخل بعد ما خالتي حكت ليها ، دخلتنا جوه و لسه كانت بتسأل و خالتي جاوبتها على كل الأسئله و بكدا هي إتأكدت إنو خالتي كانت مرة راجلها ، في قعدتنا ديك جانا صوت بت بتقول ماما جوالي وين؟
لمن نزلت و شافتنا عاينت لأمها و جات سلمت علينا ، قعدت و بقت مره تعاين لينا و مره تعاين للمره ديك يلي هي زوجة هيثم ، خالتي عاينت لـ المره و رجعت عاينت للبت و قالت ليها بصوت راجف ، إسمك منو انتِ؟
طوالي المره قالت للبت امشي جيبي الضيافه ، البت قالت ليها حاضر ، وقفت على حيلها و قالت لـ خالتي و هي ماشه: اسمي وئام يا خالتو و مشت .....خالتي ختت يدها على قلبها و وقفت على حيلها و من غير ما تتردد مشت لحقت البت في المطبخ ، لمن مشيت وراها لقيتها ضامه البت عليها و بتبكي و بت الناس ما فاهمه شي ، و أول ما أمها جات داخله بقت تعاين ليها نظام المره دي منو و مالا؟
خالتي بقت تبكي و تقول ليها أنا أمك ، البت قالت لأمها: يا ماما دي منو و بتقول في شنو؟
طبعاً المره سكتت ساي و ما قدرت تقول حاجه غير: هسي أبوك حـ يجي! ....شويه كدا سمعنا صوت الجرس ، جات الشغاله و مشت تفتحو و هنا خالتي لسه ماسكه في البت و بتبكي و البت بتحاول تتفكى منها! قالت ليها لو سمحتي ممكن تزحمي مني شويه؟ في شنو مالك انتِ يا خالتو!؟....لمن خالتي ما ردت عليها عاينت لي و قالت لي عندها مشكله عقليه؟
_ السلام عليكم ....خير في شنو يا جماعه؟
طبعاً الصوت ما كان غريب علي و زي ما إتوقعت! أول ما إتلفتنا شفت أستاذ حذيفه واقف جنب باب المطبخ و هو ذاتو اتفاجأ لمن شافنا! ....عاين لي و رجع عاين لـ خالتي ، لمن لقاها بتبكي مشى عليها و قال ليها خير في شنو يا خاله! ....عاين لي و قال لي مالا؟....في شنو يا جماعه؟
البت قالت ليهو ما عارفه يا حذيفه و ديل نحنا ذاتنا ما بنعرفهم ، جونا فجأه كدا و المره دي زي ما شايف من قبيل بتبكي و بتقول لي أنا أمك ، شكلها عندها مشكله عقليه أو حاجه بالشكل دا ، أم البت قالت ليهو تعال دقيقه يا حذيفه ، لمن مشى ليها ساقتو على جنب كدا و بقت تتكلم معاهو و أنا طبعاً الحكايه جاطت لي و الصدمات كترت علي! ....حذيفه علاقتو شنو بالناس ديل؟
جانا راجع و قال لينا كدي تعالوا برا خلونا نقعد و نتكلم ، خالتي قالت ليهو يا حذيفه لو بتعرف الناس ديل على الأقل خليهم يوروا أولادي إني أمهم ، قال ليها حاضر انتِ بس تعالي معاي! المره ديك قالت ليهو انت بتعرفها ولا شنو يا حذيفه؟
قال ليها ايوه بعرفها يا خالتي ، المهم طلعنا برا المطبخ و قعدنا في الهول ، كل واحد كان مستغرب و بعاين للتاني لحد ما فجأه كدا الجرس تاني رن ، حذيفه قام مشى فتح الباب ، شويه كدا جا داخل و معاهو راجل عريض كدا خالتي أول ما شافتو وقفت على حيلها و الراجل ذاتو ما إتحرك بس بقى يعاين لخالتي ، بعد مسافه قال ليها بدور؟
هنا خالتي كانت حتتشق من كترة البكى حتى الكلام غلبها فبقت تبكي بس ، أستاذ حذيفه إتحرك من مكانها و جاها باسها على راسها و قال ليها كفايه يا خالتي! .......المهم بعد محاولات حذيفه الكتيره خالتي سكتت و حذيفه خلاها تمشي تغسل وشها و تجي .....بعدها قعدتنا كانت طويله ، كلهم كانوا بتكلموا إلا أنا كنت ساكته و بسمع بس ، اتخيلوا إنو راجل خالتي مفهم أولادو إنو أمهم ماتت من زمان !؟ حذيفه قال ليهو معليش يا عم بس إنت غلطان ، كيف يعني تقول لأولادك أمكم ميته و هي حيه؟ و دا معناهو إنك كذبت علينا كلنا لمن قلت لينا إنو مرتك متوفيه! غلطان شديد والله و أساساً ما كان تشيل الأولاد من أمهم
خالتي قالت ليهو حسبي الله و نعم الوكيل فيك يا هيثم ....ما عافيه ليك دنيا و آخره و ما حـ أسامح على العملتو و نتلاقى قدام يوم الوقف ، طبعاً هو كان ساكت ساي و أكيد ما حيقدر ينكر إنها كانت مرتو و إنو شال أولادها منها......بعد مسافه أستاذ حذيفه عاين للبت و قال ليها زي ما عارفه يا وئام نحنا ما كذبنا عليكم فـ النقطة دي و انتِ و أخوك عارفين إنو خالتي ما أمكم و هي ما شاء الله ما قصرت منكم و ربتكم زي أولادها و أكتر بس دا ما بنفى حقيقة إنها ما أمكم و إنو دي (و أشر على خالتي ) أمكم ، طبعاً البت بقت مخلوعه ساي و ما عارفه تقول شنو! بعد مسافه وقفت على حيلها و مشت و خالتي بتنادي عليها و كانت حتمشي تلحقها بس حذيفه قال ليها خليها أنا بمشي أتكلم معاها و فعلاً مشى ، جانا بعد مسافه و هو بتكلم بتلفون ، قال للبتكلم معاهو ، تعال راجع البيت سريع و بطل حركاتك دي ....لمن قفل الخط جا قعد جنب خالتي و قال ليها عايزا تشوفي ولدك صح؟ هسي هو في الطريق شويه كدا و حيكون واقف قصادك ، مرة راجل خالتي قالت لـ حذيفه حيجي؟
حذيفه قال ليها ايي ، قالت ليهو الولد قاطع قلبي ليهو شهر ما جا البيت و لمن اتصل عليهو بقول لي أنا كويس بس ما حـ أوريك قاعد وين .....حذيفه قال ليها أصلو طايش و ما عندو حس بالمسؤوليه ....قالت ليهو بس كويس إنو سمع منك المره دي....
بعد قعده طويله سمعنا صوت الجرس ، مشت الشغاله فتحتو ، في الأثناء دي أنا كنت منزله راسي و بفكر في الحاصل دا كلو ، لحد ما سمعت أستاذ حذيفه قال أدخل أدخل يا وائل.....اتصدمت شديد لمن شفت وائل بذات نفسو جاي داخل و هو ذاتو إتخلع لمن شافني ، حذيفه قال ليهو مالك يا زول! تعال ياخ!!
قرب علينا أكتر و هو بعاين لي و أنا نفس الشي ، لمن جا و مد يدو لخالتي عشان يسلم ، وقفت على حيلها و ضمتو بقوه و بقت تبكي فيهو و تقول ليهو أنا أمك يا ولدي و طبعاً هو ما فاهم شي! خلها تبكي قدرتها بس ما قال ليها حاجه ، ما كانت حتفكو لو ما حذيفه جا و قال ليها اصبري شويه يا خالتي خلينا نفهمو الحاصل لأنو ما عارف شي ، طبعاً وائل بقى يتلفت ساي ، المهم قعدوهو و حكوا ليهو من الألف للياء ، بقى مره يعاين لي و مره يعاين لخالتي ، نفس حالة الصدمه و الذهول و الحيره الكان فيها أنا كنت فيها ، يعني وائل ولد خالتي؟
بعد مسافه قام مننا و طلع و أبوهو كان بنادي عليهو بس ما سمع منو ، حذيفه قال لخالتي ما تشيلي هم طبيعي ردة فعلهم تكون كدا و ما يستوعبوا الحاصل دا بالسرعه دي!
