ما عارفه ليه بس كنت متوقعه إنو أستاذ حذيفه يتصل علي في أي لحظه أو يرسل و يسألني اشتغلت كيف ، بس خالص ما رسل لحد ما الزمن اتأخر و الساعه 12 جات ، ختيت تلفوني و نمت و أنا مقهوره منو 💔
في اليوم البعديهو ، لاحظت لـ وئام من الصباح ماسكه التلفون و بتتبسم ساي ، استغربت طبعاً لأنها ما عندها شغله بالتلفون و ما بتستخدمو إلا للضروره!
قلت ليها انشغلت مع الإمتحانات و نسيت ما سألتك مناقشتك كانت كيف؟
ختت التلفون و قالت لي و هي مبسوطه كانت كويسه شديد ، قلت ليها الحمدلله .....حسيتها لسه عندها كلام عايزا تقولو و ما صدقت إني سألتها ، قلت ليها خير بتتبسمي مالك؟
قالت لي و هي عيونها بتلمع صدقي انو بعد ما طلعت من المناشه في بت جابت لي قفة فرح و ورود الجوري البحبها مع كرت فيهو كلام حلو ! قلت ليها بختك دي وحده من صحباتك ولا شنو؟
قالت لي لا لا ما بعرفها أساساً ، بس قالت لي إنو الهديه دي وصلتك من مجهول ، قلت ليها اها عرفتي المجهول دا ولا لسه؟
قالت لي لا لا ما عرفتو 😅 حـ اعرفو من وين يعني! نسيت الموضوع و ما ركزت معاهو ، قلت ليها واضح إنك ما مركزه مع الموضوع ، قالت لي أيوه لأني حاسه إنو دي وحده من صحباتي ، لمن عاينت ليها شديد غيرت الموضوع و قالت لي دقيقه أوريك صورنا انا و صحباتي يوم المناقشه ، فتحت تلفونها و دخلت المعرض و بقت توريني في صورهم ، ما شاء الله كلهم كانوا حلوين شديد ، كانت كل ما تجيب صوره توريني أسامي الناس الفي الصوره لحد ما جات صوره كدا و هي أول ما ذكرت إسمين سكتت و صرت وشها ، قالت الصوره الزفته دي معقوله أنا ما حذفتها؟!!
قلت ليها تحذفيها ليه؟ الصوره حلوه شديد ، قالت لي ايي هي حلوه لكن عشان متصوره فيها الخاينه دي بقت ما حلوه و أشرت لي على بت في الصوره!
قلت دي منو و مالك معاها؟ قالت لي هه دي الكانت صحبتي و غدرتني و خانتني!
طوالي اتذكرت صحبتها الخطبها غسان ، قلت ليها يا سلاااام و كمان ليها عين تجي و تتصور معاكم؟
قالت لي ما إصور معانا و صحباتي كلهم قاطعوها من زمان بس اتصورت مع باقي الدفعه و دي من ضمن الصور الإترسلت في قروب الدفعه ، لو كانت عارفه إنها فيها ما كنت حفظت الصوره!
قلت ليها لكن النصيحه البت حلوه و ناعمه! عاينت لي بحده كدا ضحكت و قلت ليها بس ما أحلى منك ، قالت لي أساساً ، معروف يعني الذباب بحب الزباله ، ضحكت و قلت ليها غيتو إنتِ ، قالت لي دقيقه بس أحذف كل الصور الفيها الزباله دي ....مسكت التلفون دقيقه بعدها قالت لي تمت إزالة القرف بنجاح ، فجأه كدا قالت لي هييي ما وريتك طبعاً لازم اليوم نمشي السوق أنا و إنتِ عشان نجيب حاجات عيد الضحيه ، عادة وائل بجهزهم لينا من بدري بس هسي هو ماف ، قلت ليها يعني نمشي نجيب الخروف ولا كيف؟
ضحكت و قالت لي لا بجيبهم بابا نحنا حنجيب الخضار و البهارات و و و يعني كل الحاجات المفروض تكون في عيد الضحيه ، قلت ليها كنت تتكلمي من الصباح! هسي نمشي في الشمس الحاره دي بالإضافه لزحمة المواصلات؟!
قالت لي إطمني حنمشي مع السواق و العربيه مكيفه في حاجه تانيه؟
قلت ليها لا ، قالت لي تمام خليني نجهز و نطلع ، فعلاً جهزنا نفسنا و مشينا مع السواق ، لمن وصلنا قال لـ وئام حـ امشي أودي أبوك و اجيكم راجع لأنو رسل لي قبل شويه ، لمن تخلصي اتصلي علي ، قالت ليهو طيب بس ممكن نأجر لينا عربيه لحد البيت عشان ما نتعبك ساي ، قال ليها أساساً دا شغلي ، المهم هو مشى و نحنا لفينا السوق دا كلو و كل ما نشتري حاجه بنختها عند بتاع بقاله كدا اظنها وئام بتعرفو ، المهم بعد ما خلصنا و اشترينا كل الحاجات المطلوبه ، وئام قالت لي في مطعم صغيروني هناك خلينا نمشي ناكل لينا منو حاجه ، قلت ليها طيب ، مشينا طلبنا و جينا قعدنا ناكل بعد ما خلصنا قلت لـ وئام خلينا نمشي بعد دا تعبت أنا! !
قالت لي خلينا نشرب عصير و بعدين حـتى لو الزمن اتأخر السواق حـ يجينا فـ القلق لشنو؟
مشت جابت لينا عصير و جات شربتو قبليها و قلت ليها أسرعي ياخ تعبانه أنا! !
عاينت لـ تلفونها و قالت لي فعلاً الزمن اتأخر ، شربت سريع سريع و لمن طلعنا من المطعم المغرب أذن ، قلت ليها إتصلي على السواق! قالت لي ثواني بس مشت مني بعيد شويه و جات قالت لي ما برد على تلفونو! قلت ليها دي مصيبة شنو دي؟ ....طيب اتصلي على أبوك و شوفيهو معاهو ولا لا! قالت لي هسي حـ يقعد يجوط فيني و يقول لي ما فاضي ليك أنا ، قلت ليها معناها إلا نأجر عربيه ....قالت لي المشكله إنو قروشي قصرت و أكيد تأجير عربيه حيكون غالي ....قلت ليها ما مشكله أنا معاي إنتِ بس أرح ، قالت لي لا خلي قروشك دي معاك حـ تحتاجي ليها ....قلت ليها فعلاً هسي محتاجه ليها يلا خلينا نمشي ....قالت لي لا لا يا بت خلي قروشك معاك! ....قلت ليها أخليهم شنو! ! عندك حل تاني؟
سكتت مسافه بعدها قالت لي شوفي ، قبل شويه غسان رسل لي رساله و قال لي أنا جاي عليكم ، شكلها ماما قالت ليهو السواق ما جانا لأنها كانت معاهم ، ضيقت ليها عيوني و قلت ليها و إنتِ قلت ليهو شنو؟
قالت لي ما رديت عليهو بس هسي غصب عني حـ أرد ، قلت ليها اسمعي كلامي و خلينا نأجر عربيه ، قالت لي هسي كنت بقول ليك في شنو! ...."ثواني برجع ليك هسي " ....
قالت لي "ثواني " لمن تلفونها رن مشت مني بعيد شويه و ردت على تلفونها ، بعدها جات و قالت لي ماف طريقه إلا نمشي معاهو لأنو وصل .....عاينت ليها كويس و قلت في نفسي أصلاً دي خططها من البدايه ....حركاتها واضحه و عامله فيها صنديده!
شويه كدا جات عربيه مظلله و وقفت قدامنا ، نزل منها غسان ، قال لينا كيفكم؟ و طوالي عاين لـ وئام و إبتسم و هي كذلك!
قلنا ليهو تمام الحمدلله ، قال ليها حاجاتكم وين؟ قالت ليهو في البقاله ديك ....تعال حـ نجيبهم معاك ...قال ليها لا ، اركبوا إنتوا و أنا بجيبهم ، فعلاً ركبنا و أنا مستغربه في الإتنين ديل ، قعدت أعاين لـ وئام الكانت بتعاين ليهو و هو بنقل في الحاجات و بختهم ورا ....طبعاً عربيتو بوكسي دبل قبين ....لمن خلص و جا ركب قال لـ وئام ما كان تمشوا براكم! ليه ما كلمتيني؟
قالت ليهو جابنا السواق بس هسي لمن إتصلنا عليهو ما رد ، قال ليها دي حاجه كويسه و إبتسم!
أنا راسي ضرب و أفكاري جاطت ، دا شنو الحاصل دا؟ الإتغير شنو فجأه! معقوله يكونوا الإتنين عندهم مشكله عقليه!؟....ما بعيده بس لمن نصل بستفسر من وئام ، طبعاً طول الطريق كانوا بتونسوا عادي ولا كأنو في حاجه حصلت بيناتهم!
في البدايه استغرابي كان في وئام بس ، لكن بعد ما شفت نظراتو ليها استغربت فيهو هو كمان! كانت كل ما هي تتكلم هو بسكت و بكون مبسوط و مستمتع من كلامها مع إنو عادي!
بقوا يتكلموا لحد ما جابوا سيرة المناقشه حقتها، قالت ليهو كان يوم لطيف شديد ، دقيقه أوريك الصور.....طبعاً انا مراقبه بصمت! ....طلعت تلفونها و فتحت المعرض و بقت تجيب صوره و توريها ليهو ، شفتها حركت الصور بإستعجال و وقفت في صوره معينه لمحت فيها صحبتها الغدرتها ديك و خلت غسان يخطبها ، قالت ليهو طبعاً يا غسان دي أجمل صوره و طوالي رفعت ليهو التلفون ، إتلفت على السريع كدا لأنو كان سايق ، بس أول ما شاف الصوره ملامح وشو إتغيرت و على طول انتبه مع سواقتو و ساق بسرعه ، وئام قالت ليهو لسه في صور دقيقه أوريـ......قاطعها و قال ليها هسي أنا سايق ، قالت ليهو طيب يوم تاني .....بعدها ما إتكلم تاني لحد ما وصلنا ، نزل قبلينا و بقى ينقل في الحاجات لـ جوه ، وئام نزلت و أنا وراها ، دخلت و هي بتدندن ساي!
دخلنا جوه و أنا في ألف سؤال على بالي! قالت لي اها بتعاين لي كدا مالك من قبيل؟
قلت ليها انا كدا بالجد اتأكدت إنك ما طبيعيه ما إنتِ بس هو كمان ، قالت لي بكرا تكبري و تتعلمي ، قلت ليها أتعلم شنو؟
قالت لي أنسي أنسي كدي اشوفو دخل الحاجات كلها ولا لسه ، طلعت خلتني فاتحه خشمي ، قعدت في السرير و بقيت أفكر في كلامها و تصرفاتها بس ما فهمت شي ، قلت حـ اسألها تاني ....لمن مشيت على المطبخ أول ما ختيت رجلي على عتبتو سمعت غسان قال ليها ، برسل ليك ما بتردي و هسي جايه تقولي لي إنك كنتِ مشغوله؟ دا شغل شنو البخليك تكوني خاشه الواتس بس بمنعك من الرد على رسايلي! ....قالت ليهو ما كدا يا غسان ، قال ليها اها شنو؟ قالت ليهو ما عايزا نرجع للصفر تاني و ندور حول نقطه نحنا إتجاوزناها من زمان ....إنت هسي زول خاطب و الخاطبها دي صحبتي! ما بقدر اتجاوز الحدود و اتعامل معاك زي زمان لأنو الوضع إختلف ، خلينا كدا ، أولاد خالات حلوين ، عاين ليها بزعل و أول ما حسيتو حـ يتحرك دخلت الغرفه الجنب المطبخ ، بعد ما مشى ، دخلت المطبخ و ربعت ليها يديني و قلت ليها أولاد خالات حلوين!
قالت لي إنتِ التطفل دا عندك شي عادي! أول شي فتحتي دولابي من دون إذني و هسي بتتصنتي على كلامنا ، قلت ليها سمعتكم بالصدفه ، قالت لي و الصدفه دي عجبتك فقلت أحسن أسمع الكلام دا للنهايه!
قلت بس عايزا أعرف بتفكري كيف إنتِ ما قادره أفهمك أنا مش دا نفسو غسان الرغم معرفتو بمشاعرك مشى و خطب صحبتك؟ يعني خلاص نسيتي؟
قالت لي ما نسيت و برضو ما ناسيه إنو ولد خالتي و هسي أنا بتعامل معاهو على الأساس دا و بعدين تعالي هنا في زول قال ليك أفهميني و اعرفي أنا بفكر في شنو؟ ريحي دماغك يا عسل و ما تركزي معاي أنا زوله ما عندها موضوع ساي 😂 هاك العصير دا أشربيهو و أمشي نومي شي الشاطره ، قلت ليها محسساني إني شافعه قدامك! قالت لي أصلاً إنتِ شافعه ، شويه كدا جانا صوت خالتو هاجر و هي بتنادي علينا ، وئام قالت ليها نحنا في المطبخ ، جات داخله و قالت لينا ياداب جيتوا مش لأنو قبل شويه جيت البيت و ما لقيتكم ، قلنا ليها آيي ، المهم هي بقت توري في أمها الحاجات الجبناهم و أنا مشيت بدلت ملابسي اتوضيت و صليت المغرب و بما إنو العشا زمنو جا ما قعدت كتير في المصلايه يمكن بعد 10 ، 9 دقايق كدا أذن صليتو و رقدت في السرير و مسكت تلفوني و أنا ملهوفه ما عارفه ليه!
فتحت الشبكه و دخلت الواتس بس ما لقيت إلا رسايل ناس الدفعه في القروب ، دخلت محادثة أستاذ حذيفه ، و عرفت إنو كان نشط قبل ساعه!
أنا غبيه و كلبه و أصلي ما بتوب، مشكلتي لسه متعشمه و عديل كدا ما قادره على نفسي! كتبت في حالة الواتس : أخبرني حينها أن لا أفلت يده مهما اشتدت الصعاب و العواصف 💜
في الحاله البعديها دخلت الفيس جبت لي صور هدايا كتيره و جيت ختيتهم في حالة الواتس و كتبت عليهم أجمل حاجه حصلت لي أمبارح بعد ما خلصت إمتحانات 💜
في الإستوري البعدها كتبت :
بالجد ما كنت عارفه انو في مجهول مراقبني و متابع أخباري أول بأول 😭😭💜💜 كل حاجه رهيبه ، الهدايا و الكلام الإنكتب في الكرت 💜
ختيت تلفوني و قلت أنتظر شويه ، قعدت في السرير و بقيت أهز في رجلي ، شويه كدا لمحت حاجه واقعه تحت سرير وئام ، لمن مشيت شلتها لقيتها كرت مكتوب عليهو :
"أجمل الورد لأجمل ورده "
بتمنى الحاجات دي تصلك في الموعد بعد مناقشتك بالظبط ، موفقه يا برينسيسه 🌻
"لمن يكن بها جانب أسود حتى عيناها كانت عسليه "
غسان 🌻
