بين الاجبار و الوَجد 💚

1

#بين_الاجبار_والوَجد 💚

الاولى -1-

31 ديسمبر في ال 1994
السااعة ١١ فالليل
الدنيا شتاء و مطر و ظلام ، نحق في ضي بعيد بس خافت رغم هكي ما قدرتش نوخر !
طلعت نجري نجريييي ولا كآني حامل في نهاية التاسع ، من الخوف ماحسيتش ب اللي ف بطني كنت نجري حفيانه ونتلفت ورايا ..... ونشوف فيه وهوا جاي يجري ورايا والدنيا ظلام نشوف فيه كيف الشبح ومع البرق والرعد يبانلي وجه و نزيد نخاف ونجري بزياده !

الشارع فاضي و حسيت بالبيبي بينزل مني وانا مستمره نجري و نتنفس بصعوبه .... سمعت صوت فرينو سياره قوي وبعدها خبطه وقفت بحتت ورايا شفت سياره سودا او تهيآ لي انها سواد من الظلام الي كان فوقتها ... نزل منها راجل و شفت حميد الي كان يجري ورايا مرمي ع الارض !

وهذي اخر حاجه شفتها ، من الخوف و المنظر جريت جريت بعدها معش شفت ولا حاجه قدامي !
.
.
.

الممرضه>> الحاله حامل في نهاية التاسع جابوها ناس لقوها طايحه فشارع قريب من حوشهم

الدكتوره>> عالعمليات بسرعة

الممرضة >> شن اسمك ؟؟ معاك حد

انا بصعوبه و كنت دايخة >> اسمي حواء حواء

خششوني عالعمليات و كنت نسمع في اصواتهم بعدها معش سمعت ولا حاجه ...... سمعت صوت عياط بنتي الي ماكنتش نتخيل انها تطلع حيه من العذاب اللي شفته في الليله هذي بس كانت متمسكه بيا ل اخر لحظة !

الممرضه "سعاد" >>تاريخ الولاده 1 -1 - 1995
الساعه 1:00 " كملت كلامها مع الدكتورة وبرمت عليا وقالت لي:
"مبروك جت بنتك فالسنه الجديده ان شاء الله بداية خير عليها "

بحتت في الممرضه وانا نغمض في عيوني و حاسه بجسمي كله ساخن ماقدرتش نطلع الكلام مسكت يدها و خليتها تقرب مني وبصوت شبه مسموع>>سميها جُوري

الممرضه ابتسمت >> حاتنوضي وتمسكي صحتك و تسميها و تسجلوها في شهادة ميلاد❤️

غمضتلها عيوني بحزن ، مدتلي الممرضه جُوري شويه حطيتها في حضني وكانن خدودها حمرررر و شعرها اسوود داكننن و رموشها كثيفات قعدت نبحت فيها و دموعي ينزلنن كنت نبكي ومش قادره نوقف نبحت فيها ومش عارفه مصيرها كيف حا يكون ! شن داستلك الدنيا يا ماما ازعمك زي ما دست الامك؟؟ ح تقسى عليك زي ما قست عليا ؟ ح يكون لك سند ولا حا تقعدي بروحك في دنيتك وفي موتك بروحك زي ما قعدت ماما بروحها بدون ما حد يسندني ... ربي يقويك ياجوريتي

قربت من وذنها >> خليك قويه يا جوري خليك كيف ماما حاربت عشانك لعند اخر لحظه نبي بنيتي قويه دافعي علي روحك وخوذي حقك و ماتخليش شي يوقف في طريقك

و كأنه حواء كانت عارفه انه جوري ح تسمع كلمتها ! شن حا دير جوري ؟ و حاتقعد قويه ولا ح تنهار من بعدك !