بين الاجبار و الوَجد 💚

15

#بين_الاجبار_والوَجد 💚
الخامسة عشر -15-
//
//
زين>> عشان ثابت كيف يعني ؟
هارون >> عشان ثابت صاحبي .. عشان مانبيش نخسره ف متحملك
زين>> وجيتني فالمستشفي عشان ثابت برضو ؟
هارون>> عشان الجيره بس وماكنتش نبي يسير هضا كله بس صار
زين >> عارف في مليون كلمة بنحكيها بس مش ح نقول شي

خذت حاجتها وخشت للدار

و طلع هارون بدخانه برا

رفع راسة وقعد يذكر في يوم اللي جاه ثابت.. بعد صارت القصة و بسام قلب الدنيا جا ثابت الهيرو

ثابت بدون ما يبحت في هارون>>اطلع نبي نحكي معاك " وبرم طلع"

هارون خدا الباب في يده و لحقه

ثابت >> انا ثابت السبع يالهيرو مش عيل عمري خمس سنين .... وحول القصة هذي علي جنب بس انا رفيقك وحافظك حفظ ... من لما زين بدت تكبر و عارفك تبيها .. تذكر يوم المزرعة ودوتكم انت ونجم ؟
كله كنت عارفه وكنت نضحك وزدت تأكدت... و عشان عارفك وعارف نيتك اضايقت عشان مشيت للمستشفي كنت نبيك تجي وتحكيلي نراجي فاليوم هضا و تعرف نقولك حاجه ؟ لو قصر الزمان ولا طال وزين جوها ناس ماكنتش ح نعطيها كنت نراجي فيك انت تجيني

هارون >> مدامك ياصاحبي عارفني .. ف تعرف اني ما نجبرش روحي علي حد... انت عارف اختك بنت صغيره و مدلعه من الجد واالبات والخوت مش متاعت مسؤوليه ولاهي متاعت زواج فالعمر هضا ... وانا اكبر منها ب 13سنة؟ ح تقولك لاا و حتهزى عليا
تبي تخش الجامعه وبتشوف جيلها مش هارون الي مكمل عمره شغل فالصحرا .. حقك عليا اني ما صنتش الامانة بس وديني انت عارف نيتي وربي يشهد عليا حتي نظرة ما كنتش نبحت .. ويوم المستشفي غصبا عني واللي تبيه انا حاضر فيه بس ما تشيلش مني

ثابت >> هيرو انت الوحيد اللي عارف وضعي و عارف شغلي و عارف انه زين امانة باتي ليا في رقبتي ... مش ح نأمن علي حد عليها الا معاك من ناحية عارفك ح تشيلها في عيونك ومن ناحية جيران ومطمن عندكم و مع هلك ... لو تبينا نقعدو اصحاب ف كمل الموضوع و اخطبها

هارون>> و زين ؟

ثابت>> هذي شورك مش شوري

ماكانش من هارون الا انه يوافق بعد كلام ثابت .. وشوية شويه بدت صحبتهم ترد ببعضهم .. كان يبي يهرب من زين عشان هي نقطة ضعفه .. بس حاليا نقطة ضعفه معاه في نفس الحوش ومش قادر يدير اي شي لاهو اللي قادر يتحملها وما يقربش منها ولا هو اللي قادر يفوتها وما يعبرهش 💔

//
//

ثاني يوم في الصبح

خش ليث للحوش وماسك جواز سفره في يده
كانن البنات مقعمزات فالصور ... جمانة اول ما خش ليث صبت وخشت جوا

جوري بتمشي الجو >> بتسافر بينا ولا شنو
ليث >> لا مسافر بروحي
جود >> كيف؟
مسرة>> وامتى؟
ليث >> بكرا الفجر ... مسافر مصر ومن مصر الاوكرانيا
جوري >> عليش؟
جود>> ما قلتش الهلي
مسرة>> ونحن ما نندروش
ليث >> ما قلتش ماشي للمريخ انا مسافر فترة وجاي
جوري >> اخرى فترة مش محدد حتي
ليث >> بناخذ كورس نقوي بيه قرايتي اللي قريتها ما نعرفش كم مدته" بحت في زين " هيرو وين؟