بين الاجبار و الوَجد 💚

7

#بين_الاجبار_والوَجد 💚
السابعة - 7 -

فتح هارون الباب و بسام مسك في هارون من عند رقبته وهارون كان طالق يديه مابش يدير اي ردت فعل

خشو كيان ونجم وثابت و ماحد كان فاهم شن بيدير بس ما حد كان يبي الموقف يسير هكي و يطب عند بسام الي ما يمسكش في اعصابه

بسام يعيط وداير هرجة و ثابت واقف ويبحت في هارون

ليث>> وخرررر يا بسام بسسس وخر وافهم عيب ياراجل

بسام>> العيب عالي داره العاقل عمك

على صوت عياطهم نزلو بشر وعوض عمام البنات و البنات مصبيات فالسقيفة مش فاهمات شن فيه

بشر >> بساام حول يدك ووخر غادي

بعد ما نزلو لكبار بسام وخر

عوض>>شن فيه كنكم ؟؟؟ شيطان وخش بينكم
بسام >> نحكي ولا تحكي انت؟؟ ولا ياربي ح تبدا تآلف وادير دراما
عوض بحت في هارون>>احكو شن فيه

بسام>> ولدكم مش مراعي العشره اللي بينا نعدو فيه خونا و كيف ولدنا بس للاسف خسارة فيه مستغل غيابنا و يلعب من ورانا قاعد مع اختي فالمستشفي بدون ما يقول الحد  "بسام سكت ماحبش يقول شن شاف و يوسخ سمعة اخته "

عوض بهدوء>> شن الي تبيه يا وليدي وانا حاضر بدون عياط وبلا مشاكل وهرجه

ثابت اول كلمة يقولها >> كان يبيها بالحلال ياخذها وبلا لف ودوران وحركات عيال وطعن فالظهر ما تعودنش عليهن لو جا وحكالي كلمة راجل كنت نعطيه عيوني

هارون غمض عيونه من قوة كلام رفيقه >> الي تشوفه

عوض>> نسمعو كلام البنت قبل وناخذو موافقتهم وكان يبو بعضهم مافيش احسن من الحلاال انا مانيش فاهم القصة ولا عارف انت يا بسام شن شفت لكن كان في بينهم حاجه يكملوها بالحلال 

بسام كبرت في راسه >> بتاخذ بنتنا بساهل تقدر تعطينا بنتك باهي مدام الموضوع هادي ورايق كيف ما انت تحكي فيه تقدر؟؟؟؟

بشر >> بس عوض ماعندش بنات من دمه ولا انت في خاطرك تحكي وخلاص وتخلط الناس فبعضها

الكلمه الي قالها بشر ممكن كانت ساهله فالقول
بس كلهم سكتو بعد الكلمه هذي والبنات بحتن في جوري كلهن

"جوري"انا كلمت عمي بشر خلتني نجمد مكاني ونفكر وشريط حياتي يمر كله في عيوني ما قدرتش نتحمل الكلمه ،، الماضي الي بنهرب منه ملاحقني ... الماضي ورايا ورايا نص ثانيه مرن كأنهن ساعااتتتت طويله

خشيت بدون وعيي في وسطهم وصبيت جنب بابا او عوض يعني 💔

بحتت فيه>> انا موافقه لو هضا الي ح يحل المشكله الي مالهش داعي هذي ولي شايفه انها كبرت عالفاضي هارون وزين مافيش بينهم شي لو في كنت حانعرف اول وحده بس بسام اوڤر 😒بس شنو يعني كلها زواج ونصيب... انتو كبرتوني وربيتوني جا الوقت الي نعدي فيه و تهنو عليا انت وماما سعاد
لو تحبني خليني نعدي في حالي ونشوف حياتي صح كلام عمي بشر و بسام ماقالش غلط فنهاية زين اخته وخايف عليها