بين الاجبار و الوَجد 💚

29

#بين_الاجبار_والوَجد 💚
التاسعة و العشرين -29-
ما قبل الاخيرة🤍
//
//
هارون >> حامل كيف ؟
زين >> كيف يعني كيف ؟
هارون خبط راسه>> يعني قصدي امتي شنو تأكدتي
زين>> درت الفحص و بكرا لازم نمشو المستشفى
هارون >> تي بكرا من اليوم هيا
زين >> انت مروح تعبان ماه
هارون>> صبي بس
زين >> لحظة باهي شويه

لبست زين عالسريع عبايتها وطلعت مع هارون اللي كانت مستغربة استعجاله

مشو للمستشفي و دارت تحليل الدم للحمل و علي اساس بكرا تطلع النتيجة

//
//

في الجامعة عند جمانة  اللي كانت فاقدة يوسف اخر فتره ومش عارفه في شنو مشغول

بدت اول سنة لها فالاسنان و رغم انه لها فتره فالجامعة بس برضو ما دارتش بس صحبات
كملت المحاضرة وطلعت وكان عندها ساعتين عشان المحاضرة الاخرى ف مشت و تشرب قهوة بروحها

لما خشت كان في حد يلحق فيها بس ما توقعتش يوسف طلبت قهوة و اول ما قعمزت سحب الكرسي و قعد

جمانة >> يوسف
يوسف>> يا عيونه
جمانة سكتت

يوسف>> عارف و فاهم عليك وحقك وانا اسف

جمانة ما ردتش مسكت القهوة بيديها الاثنين و بحتت جنب

يوسف >> ممكن تعذريني ؟  و تفهميني بس

جمانة بحتت فيه >> شن نفهم فهمني ؟  انت لي جيت لعندي من اول مره و انت لي حكيت وانت لي قلت عطيني فرصة مش انا ولما خليتني نبدا نتعلق بيك قعدت تباعد اخر فتره

يوسف >> عارف والله بس بدليل اني نبيك ومتمسك بيك اني جيتك و ما خليتكش كنت نقدر نكمل في البعد

جمانة>> يا سلام ! لا كمل ليش ما كملت

يوسف>> جمانه لو ح نقعدو هكي مش ح نفهمو بعضنا انا نبيك وشاريك و ياستي بالحلال مانبيش حتي نتعرف عليك كويس تمام ! نبي نخطبك و حكيت حتي الامي عليك بس الفتره هذي عندي مشاكل فالشغل

جمانة >> مشاكل شنو ؟ احكيلي عشان نفهم

يوسف>> لما يجي الوقت ح نحكيلك

جمانة>> يوسف انا كنت غبية و صارن معايا صدمتين من قبل و قصص  مايعلمش كيف مريت بيهن انت ولد ناس وكويس و نعرفك بس اعذرني مش ح نقدر نحكي معاك لحد ما نفهمك انت شنو بزبط

يوسف سكت وبحت فيها

//
//

اما عند مسرة و ثابت كان ثابت يحكي معاها وماكانتش مستوعبة او مصدقة انها تحكي معاه بصفتهم اثنين مرتبطين اخيرا

ثابت >> روحتي من الجامعة ؟
مسرة>> روحت من شويه ، نجم جاي بعدين؟
ثابت >> اها هكي قال عالمغرب
مسرة>> يستر الله جود متوتره بكل حتي الامتحانات محوتك مرن
ثابت>> عقبال مانجي انا و اتوتري انتي
مسرة ابتسمت >> وعليش جاي
ثابت>> بنخطفك
مسرة >> لوين؟
ثابت>> القلبي
مسرة >> ننننن
ثابت >> خليك هكي بس كله ح ينردلك
مسرة >> لا انت اللي ح ينردلك
ثابت ضحك بصوت عالي 😂
مسرة بعد غباء دقيقه فهمت الموضوع وصكرت فوجه