#ليُحيا_بك_قلبي1
بقلم: ميامن أحمد
لابسة التوب الأحمر المزخرف بالدهبي، والجدلة مختوتة فوق راسي، ووشي مغطى بالقرمصيص، والحنة مالية يديني ورجليني أضافة لبعض الاكسسوارات " دهب "، والبيت كلو مليان دلوكة وأغاني، وصوت الزغاريد ما يديك الدرب، وناس ماشة وناس جاية وفي جزو بيجرو محصلين العقد والشفع جارين بلعبو والحتة جوطة، ما بين الجوطة دي كلها كنتا بسال في نفسي، أنا عروس! معقولة داً عرسي التاني! طيب أنا لي حاسة أني ح أمر بنفس التجربة الاولى! صاح العرس الاول كان بي رضاي وأنا الاخترتو بس عشت أسوء عيشة ممكن الواحد يعيشها، أتعذبت كتتتير وصبرت، وبعد أتحررت منو ذكرياتو فضلت ملاحقاني وحاولت أتخلص منها بس ما قدرت وهسي فوق لي دا كلو ح أعرس تاني وأنا مجبورة، أنا يحصل لي كدة! معقولة المعاناة مكتوبة ليها ترافق قدري للابد! متين ح أرتاح! أخخخ يا رب، وأنا بسال في نفسي كل الاسئلة دي سمعت صوت طلق أتفكت وصوت الحريم وهم بزغردو والبنات وهما بصرخو وبقولو " عقدو .. عقدو " لحظتها أنا قلبي أتنفض من محلو وبقى يضرب بطريقة ما طبيعية، ويديني بدو يرجفو وحسيت أنني في حلم حلم وكانو دي المرة الاولى الاعرس فيها، كل شي مختلف المرة دي بس أنا حاسة أنو نهايتو حتكون نفس الاولى، فجاة سمعت صوت نفس البنات تاني بس المرة دي بقولو " العريس جا، العريس جا يبارك لي عروستو أمرقو .. أمرقو " هنا ضربات قلبي بدت تتعالى وأتوترت زيادة وبقيت ما عارفة يديني من رجليني، وحسيت الاوكسجين أنعدم من الغرفة وبقيت ما قادرة أتنفس بسهولة، وللحظة حسيت نفسي مهبطة يعني خلاص أنا بقيت مرة راجل ولي المرة التانية؟!...
أكيد إنتو ما فاهمين حاجة صح ف تعالو نحكي القصة من البداية....
_____
فكنيي، عليك الله فكني وما تهبشني، والله المرة الجاية أسمع الكلام وما أعاندك بس المرة دي خليني، ليي يااخي بتعمل فيني كدة معقولة نسيت أنا منو! طيب حن علي شوية وأرحمني بس المرة دي، البتعمل فيهو دة ما صاح، لاااا ما تقفل النور أفتحتو عليك الله أنا بكره الضلام وبخاف منو ما تخليني براااي سوقني معاك، الحتة كلها حشرات طلعني من هنا، لااا الحشرة طالعة فيني أفتح النور الله يرضى عليك، ما بتخاف ربنا انت! حرررام والله حرااام😭💔....
فجاة قمتا على حيلي وصحيت من النوم وأنا مفزوعة شددديد وجبهتي وجسمي كلهم كانو عبارة عن موية وبدون ما أغسل وشي حتى طوالي نزلت تحت من الخلعة، لقيت أمي قاعدة في الصالة من شافتني قالت لي صحيتي ياداب مش! كم مرة قلت ليك أنو السهر ما كويس متيين ح تسمعي الكلام متين بس! كنتا واقفة ساكتة ساي وبفرك في يديني من التوتر والخوف، أمي لمن أنتبهت أني ما مركزة معاها جات وقفت جنبي وقالت لي ميامن! ما رديت عليها وكنت سرحانة ختت يدها في كتفي وهزتني وقالت لي يا بت يا ميامن قلت ليها ااا قالت لي مالك! قلت ليها لالا م..ما..مافي شي قالت لي كيف يعني مافي شي وإنتي وشك مخطوف كدة وبتقطعي الكلام من الخوف! عاينتا ليها في عيونها وطوالي دموعي نزلو هما أساسا كانو في طرف عيني، بقيت ببكي وبدون ما أقول ليها حاجة ضمتني عليها وقالت لي لسه! لسه الذكريات دي ما عايزة تفارق بالك! قلت ليها وما أعتقد أنها ممكن تفارقني لانها كانت جزء كبيير شدديد من حياتي وبسببها أنا أتغيرت، ماما أنا لي اللحظة دي ما قادرة أنسى الحصل، كل يوم بصحى بنفس المشهد لسه بتعاد قدامي وكانو حصل أمبارح ما قبل سنتين قالت لي ربنا كريم يا بتي وأكيد ح يزيل كل المواقف السئية دي من بالك قلت ليها بتمنى يا ماما بتمنى أنو يزيلها لاني خلاص تعبت، أنا بس عاوزة أرتاح عاوزة يجي يوم وأنوم وأنا مطمنئة وما أتذكر الحصل لي قالت لي ح يجي اليوم دا بإذن الله قلت ليها يا رب وفي أسرع وقت كمان لاني ما قادرة أصبر أكتر من كدة كفاية قالت لي كلو ح يتحلاً ما تشيلي هم، فضلت تهدي فيني وتمسح لي في دموعي لمن هديت شوية بعدها قالت لي أرمي كل الفات وراك يا بتي لانو الذكريات دي ما ح تعمل شي غير أنها تاذيك قلت ليها ما قادرة أرميها والله ما قادرة💔قالت لي لا باذن الله ح ترميها وهسي أمشي غسلي وشك دة وتعالي عشان تشربي الشاي قلت ليها حاضر، مشيت غسلت وشي وأستحميت مرة واحدة وجيت شربت الشاي وسالتها وقلت ليها وين مهاد أختي! قالت لي فاتت الصيدلية من قبيل هي ورزان قلت ليها اها تمام قالت لي وصحي قالت ليك أعملي ليهم فطاير وجيبيها ليهم هناك أنا قبيل عجنت ليك العجين لي الوقت دا بكون خمر قلت ليها طيب هسي بقوم أسويها وأوديها ليهم أساسا ما عندي موضوع قالت لي وأعملي حساب لخالتك سلمى برضو عارفها بتحب الفطاير حقتك كيف! قلت ليها أصلا ما كنتا ح أنساها، مشيت عملت الفطاير وشلت منها جزء في عبلة وجزء تاني في ساخن بارد، يلا ناس خالتو سلمى ديل جيرانا وفاتحين فينا مباشرةً وعلاقتهم بينا قوية شددديد وأربعة عشرين ساعة يا هم معانا يا نحنا معاهم وبالذات أنا وماما دايما بنكون عندهم، هي عندها بت وولدين، بتها إسمها أفاق وحاليا قاعدة مع ناس خالتها، وولدها الكبير مغترب مع أبوه والتاني الصغير قاعد هنا ومعرس وهو ومرتو ساكنين مع خالتو عشان ما حابين يخلوها براها، يلا ولدها الصغير أسمو علي ومرتو أسمها ريان وعندهم بت أسمها ميار عمرها سنة ياداب لسه بيبي، بعد مرات لمن علي دا يكون عندو شغل في منطقة تانية ويسافر فإنا بمشي بيبت مع خالتو وريان وبعد المرات لمن أفاق تكون قاعدة يعني هما قربين مني شددديد....
لبست عبايتي ونقابي ومشيت ليهم " إيوة أنا منقبة " دقيت الباب فتحت لي خالتو سلمى زاتها، سلمت عليها وقلت ليها خاالتو كيف أصبحتي! قالت لي كويسة الحمد لله وإنتي! قلت ليها تمام التمام والله قالت لي قبيل مالك ما جيتي وشربتي معاي الشاي! مش كنت متفقين أنك تجي تونسيني لانو ريان فاتت بيت أهلها أمبارح قلت ليها معليش حقك علي يااخي بس كنت نايمة وما صحيت الا قبل شوية وأنشغلت لاني عملت فطاير قالت لي طيب بعدين تعالي لي قلت ليها حااضر ما طلبتي شي وطالما ريان عند ناس أمها وعلي مافيش بجي ببيت معاك قالت لي طوالي تجي قلت ليها هاك دي فطاير عملتها وقلت أجيب ليك منها قالت لي دايما ما بتنسيني قلت ليها ولا ح أنساك هو أنا عندي كم سلمى! قالت لي حبييبتي تسلمي، أديتها الفطاير وقلت ليها يلا أنا ماشة قالت لي خشي لي جوا على الاقل قلت ليها مرة تانية هسي مستعجلة ماشة لناس مهاد في الصيدلية قالت لي إيوة تمام لبعدين قلت ليها تمام ومشيت منها، لقيت ناس مهاد وزران قاعدين ومستكيين، قلت ليهم هااي هااي قالو لي أهلين قلت ليهم على فكرة أنتو مفروض تحمدو ربنا لانو عندكم أخت زيي كدة مهاد قالت لي شكار نفسو إبليس يا أستاذة قلت ليها معناتو ماف ليك فطاير قالت لي لالا خلاص إنتي بالجد أحسن أخت في الدنيا ومفروض نقيم الليل عشانك ما نحمد ربنا بس قلت ليها حناكة لكنن وحنكك مشى علي🤣↗️أديتهم الساخن بارد ختو الفطور وأنا فطرت معاهم، رزان قالت لي أخخخ من فطايرك حاجة كدة ترد الروح قلت ليها عارفة عارفة🙈✅قالت لي طيب عارفة برضو أنو لو ما الفطاير دي كنت ح أقطع علاقتي بيك! قلت ليها حيوانة بس ما أكتر بالله هسي مصاحباني عشان فطاير ما بتخجلي🙂!قالت لي للاسف دة الواقع المرير قلت ليها ربنا يصبرني عليك قعدت معاهم شوية وبعدها رجعت البيت...
بالمساء كنا قاعدين في الغرفة أنا وناس مهاد وبنتونس كدة ومهاد بتوري فينا في حاجات عايزة تجيبهم لعرسها فجاة جاني إتصال من رقم غريب ما رديت عليهو لانو ما قاعدة أرد على أي رقم غريب، شوية وجاتني رسالة واتسب من نفس الرقم فتحت الرسالة لقيتها ريكورد ركبت سماعاتي وشغلتو سمعت صوت زول بقول فيهو " أحسن ليك تردي على المكالمات والا ما حيحصل خير وإنتي عارفاني ممكن أعمل شنو " أنا من سمعت الصوت قلبي بقى يضرب بطريقة ما طبيعية وبقيت برجف من فوق لتحت لمن التلفون أترمى من يدي💔...
_____
_لنبدأ القصة يا عزيزي على أمل أن يتحول هذاً الطريق الطويل إلى مُنعطف قصير يؤدي إلى كتفُك🌍❤️...
أشوفكم....
