#ليُحيا_بك_قلبي19
بقلم: ميامن أحمد
قالت لي يحيى ولد خالتك سلمى عاوز يعرس هبة، لما سمعت أسمو قلبي قال شحح ومن الصدمة ما رديت، قالت لي سمعتيني إنتي! قلت ليها ايوا ربنا يتتم ليهو على خير قالت لي أن شاء الله يااخ الشافعة الصغيرة دي محتاجة ليها أم ما ممكن تفضل كدة وهو وهبة حيتزوجو عشان يراعوها، وقالو ما عاوزين يعملو عرس كبير عشان ريان وعلي ما ماتو ليهم كتتير وهم لو ما الشافعة الصغيرة دي ما كانو فكرو في العرس في وقت زي دة بس مجبورين عشانها قلت ليها فعلا ميار عاوزة ليها أم تراعيها، وفي قلبي قلت بس الام دي ما هبة لانها ما تنفع تكون أمها الناس كلهم منخدعين فيها وشايفناها مسكينة لكن في الحقيقة هي واحدة عقرب أنا بعرفها، لا دقيقه هسي يا ربي ح تقدر تهتم بي ميار كيف! يعني ماف زول غيرها الا هي!....
بالمساء مشيت بيتهم عشان كنتا عاوزة أجيب ميار منهم فتح لي الباب يحيى، ما أتكلمت معاهو خالص بس دخلت جوا لقيت خالتو سلمى قاعدة قلت ليها خالتو يا خالتو كيفك قالت لي كويسة الحمد لله قلت ليها ميار وين؟! قالت لي مع أفاق في المطبخ قلت ليها طيب ح أمشي أشوفها أشتقت ليها بتي دي ولو ممكن عاوزة أشيلها معاي البيت قالت لي ومن متين بتستاذني أصلا هي طبيعي معاك! لمن قالت كدة عاينت لي يحيى نظام شوف أي زول عارف أني بشيلها وبدون ما أستاذن كمان، طبعا هبة قاعدة معاهم لسة وقالت يوم يحددو العرس هي بترجع بيتهم وتتحبس، المهم شلت ميار ورجعت بيتنا قضيت باقي اليوم كلو معاها وكنت خايفة عليها شددديد من هبة، يعني هي ما ينفع خالص تكون أمها، لاني نادراً ما أشوفها شايلاها حتى ولو كانت بتبكي جنبها هي ما بتشتغل بيها، ولو كلمت يحيى ما حيصدقني وحيفهمني غلط أنا متاكدة وما كنت عارفة ح أعمل شنو، جات مهاد أختي لقتني شاردة قالت لي الشاغل قلبك يتهنى بيهو قلت ليها ماف زول شاغلو بس بفكر في موضوع عرس يحيى وهبة قالت لي ليه في شنو عشان تفكري فيهو؟! قلت ليها هبة يا مهاد ما ينفع خالص تكون أم لميار، ما عارفة بحسها ما بتحبها، عادي ممكن أجي القى ميار بتبكي وهي جنبها ولا شغالة بيها ولا بتحاول تسكتها يعني نهائي ما بتحسسك أنها بتحبها أو ممكن يجي يوم وتهتم بيها قالت لي طيب كلمي يحيى قلت ليها ما ح يصدقني دا الحب عامي على عيونو قالت لي تبقى دي مشكلة قلت ليها مشكلة كبييرة جداً قالت لي عايني إنتي كلميهو ولو صدقك خلاص ولو ما صدقك في ستين ألف داهية المهم أنك تكوني نبهتيهو وريحتي ضميرك قلت ليها صح كلامك ح أتكلم معاهو وأوريهو والحيحصل يحصل....
تاني يوم لبست ميار ووديتها بيت ناس حبوبتها أم أمها وقلت ليهم بجي بسوقها منكم بعدين ومشيت الشغل، وأنا شغالة جابو لينا واحد بينزف ومضروب في رقبتو وكان معاهو بت كدة وبتبكي، أستلمت الحالة وكنت محتاجة قطن عشان أعقم ليهو الحرج لمن مشيت جبتو وجيت لقيت البت بتكورك فيهو وبتقول ليه يعني أنت ما عارفو عماد أصلا أنسان هزلي ودايما بتصرف كدة ما كان تتشاكل معاهو ياااخ هسي شوف جرحك وين قال ليها لمن شفتو بحاول يمسك يدك ما قدرت أمسك أعصابي، لا دقيقة هو كيف بيتجرئ يمسك يدك ما عارف أنو أنا خطيبك ما حصل مرة مسكت يدك أبن اللذين دة قالت ليهو أهدى هسي ما يطق ليك عرق قال ليها ح أهد بس لمن تمسحى دموعك دي وتبطلي بكى يلا أمسحيهم، وهي سمعت كلامو ومسحتهم قال ليها طب ما ممكن تبتسمي أبتسامة لطيفة كدة عشان قلبي يرتاح! أبتسمت وقالت ليهو أهم شي راحتك بس تاني ما تكررها وتتشاكل مع زول قال ليها حاضر من عيني دي قبل التانية، صراحة حسيت بالحب في وجوههم وفي نظراتهم لبعض، يعني كونو هو خاطبها وما حصل مرة مسك يدها وغار عليها لمجرد ما شاف زول بحاول يمسكها وشاكلو ، الموقف كان رجولي جداً ، وعجبوني شددديد، حتى وأنا بعقم ليهو في الجرح كنت بتبسم من تحت النقاب فجاة في يد جرتني بالله أنا لمن أتخلعت وكان دة يحيى، جراني وأنا بعقم لي الولد يعني تصرفو كان بيش شدديد، دخلني مكتبو وقال لي مقربة منو كدة ليه! قلت ليهو أنت بتقول في شنو؟! قال لي الزفت البتعقمي ليهو في رقبتو دا مقربة منو لي الدرجة دي ليه! مش ممكن تمدي يدك وإنتي واقفة بعيد قلت ليهو وأنت منو السمح ليك تمسك يدي وتجرني بالطريقة دي! وبعدين أقرب ولا أبعد منو ما يخصك، ضرب الطربيزة بي أقوى ما عندو وقال لي لا بخصني قلت ليهو بخصك في إيه ممكن توضح لي! سكت وما عرف يرد قلت ليهو تاني ما تكرر حركتك دي وما تتدخل فيني أفهم يا كائن أنو أنت ما أبوي ولا أخوي ولا أنا خطيبتك هبة عشان تهبشني وتمسك يدي وتتحكم فيني وراعي لي تصرفاتك أنا أنسانة منقبة ما ممكن تمسكني من يدي ولا تهبشني قدام خلق الله ورجاءً خليك بعيد مني قال لي بغض النظر عن كلامك دا ما القاك واقفة بتزفتي لي الزفت دة قلت ليهو دة شغلي وح أعملو ما تتدخل ومشيت منو وأنا متضايقة ومليانة، يعني هو منو الاداهو الحق عشان يقعد يتامر فيني! ولا كمان بمسكني من يدي قدام الناس، لمن وصلت لي المريض لقيت في ممرضة تانية تابعت ليهو بدلي، في قلبي قلت أحسن عشان أنا ما ناقصة مشاكل ولا كلام مع الاهبل دة.. بعد خلصتا من شغلي العصر كدة مشيت جبت ميار ورجعتها لي ناس خالتو....
