#ليُحيا_بك_قلبي4
بقلم: ميامن أحمد
في قلبي قلت أجي يا الخاطفة، أتلفت على جهة الصوت لقيتو ولد شاب كدة، جا قريب مني وقال لي هيي إنتي خاطفة البت دي وين! قلت ليهو نعممم! قال لي وريني سريع سايقها وين قلت ليهو ومنو القال ليك أنو أنا خاطفاها دي بتي قال لي بتك في عينك دي بت أخوي وأنا عمها قلت ليهو عشان أوريك كذبك البت دي عمها ميت وليهو أربعة سنين كمان قال لي ما شاء الله قتلتيني وأنا واقف قدامك لكن إنتي عارفة شنو أنا ما ح أتكلم معاك كتتير لانو خسارة أصرف عربي مع واحدة خطافة زيك وجاي أديني البت دي وجا داير يشيلها مني كدة قلت ليهو لا ما ح أخليك تشيلها أنت العاوزة تخطفها قال لي بقول ليك أنا عمها كيف يعني عايز أخطفها وبعدين أنتو المنقبين دي ياها شغلتكم مش تخطفو شفع الناس أصبري لي ح أضرب لي الشرطة تجي تسوقك قلت ليهو لا أنا الحأضرب لي الشرطة عشان تجي تسوقك أنت لانك عاوز تخطفها مني، وفتشت تلفوني في جيب العباية بس ما لقيتو أتذكرت أني نسيتو في البيت، قلت ليهو لو ما تلفوني كان في البيت كنت ح أضرب ليهم قال لي دي حجتك صاح! لكن أنا ما ح أخلي ناس مخادعين وحرامية زيك كدة يمشو سااي قلت ليهو لو سمحت أنا ما فاضية ليك ولي قصصك ممكن عادي أصرخ والم الحلة دي كلها عليك وأوديك في خبر كانة قال لي أصرخي زي ما عايزة انا ما عندي فيك شغلة المهم تديني البت قلت ليهو ما ح أديك ليها دي بتي قال لي أستني هسي الشرطة ح تجي وتوريك الما بتعرفيهو وشال تلفونو عايز يضرب ليهم، أستغليت أنشغالو بالتلفون وطوالي جريت على بيت ناس خالتو سلمى والحمد لله الباب كان فاتح، دخلت جواً وكوركت بي أعلى صوت عندي وقلت ليهم الحقونييي الخطاف ح يخطفنا، طبعا الناس كلها أنتبهت معاي وجو جارين علي، خالتو قالت لي بسم الله مالك يا ميامن بتصرخي كدة! قلت ليها قبل شوية مشيت الدكان أنا وميار... وحيكت ليهم الحصل خالتو قالت لي أجي ودة منو كمان العاوز يخطفها دا؟! قلت ليها بري ما بعرفو دي أول مرة أشوفو في الحلة، ماما قالت لي الحمد لله أنكم جيتو سليمين هسي كان خدركم ولا حاجة قلت ليها وكمان قال أنو عمها والله كضاب كضب واحد منافق ما أكتر خالتو قالت لي النمشي أكلم ابراهيم يمشي يشوفو، ودايرة تمش كدة فجاة يجي داخل نفس الولد الخطاف كوركت وقلت ليهم هداك ليهو الداير يخطفنا وأشرت عليهو، خالتو قالت لي دة هو! قلت ليها أيي دا نفسو الكان عايز يخطف ميار مني قالت لي لكن دا ولدي الكبير، أنا هنا حسيت خشمي بقى ملح ملح وما عرفت أودي وشي وين، جا علينا وقال لي أمو شوفتي المنقبة دي أنا لقيتها في الشارع وكانت شايلة ميار وعاوزة تخطفها قالت ليهو لالا يا ولدي دي ما خطافة دي ميامن بت جيرانا شكلو حصل سوء تفاهم بينكم قال ليها أفتكرتها خطافة قلت ليهو يعني عشان لابسة نقاب ولا شنو😏! قال لي كان من الاول تقولي أنها بت جيرانكم وما كان تكذبي وتقولي أنها بتك ولا كمان قولتي عمها ميت وقتلتيني، هنا الناس كلها بقت تضحك وااي من الموقف الله لا وراكم ليهو طبعا ما قدرت أتكلم لانو ما كان عندي حاجة أقولها، حمر لي وفات في قلبي قلت عان الكريه دا بالله، ماما قالت ليها معليش يا سلمى على الجوطة الحصلت دي ميامن ما قاصدة تقول عليهو خطاف، خالتو قالت ليها ما مشكلة بتحصل قلت ليها أسفة يا خالتو والله ما كنت قايلاهو ولدك قالت لي لالا عادي ماف داعي تعتزي قلت ليها أنا بس كنت خايفة على ميار وما كنت عاوزة أديها لزول غريب قالت لي ما حصل شي خطير يا بتي أنسي الموضوع، أبتسمت ليها ودخلنا جوا الصالة وميار وسط الجوطة دي كلها لمن عاينت ليها لقيتها بتاكل في الشوكولاتة حقتها وما جايبة خبر منظرها ضحكني ضحك🤣💔يلا انا أساسا ما حصل مرة شفت ولد أو راجل خالتو سلمى نهائي لانو نحنا من رحلنا جنبهم لينا سنتين بس ولمن جينا هنا كان ولدها وراجلها مسافرين وما حصل مرة جو السودان غير المرة دي فعشان كدة ما عرفت ولدها، أتحمدلت لي عمو إبراهيم السلامة ورجعت بيتنا طوالي لقيت مهاد أختي في الغرفة قلت ليها أخخ ما شفتي الحصل معاي قالت لي في شنو! حكيت ليها القصة كلها قالت لي واااي أتختيتي في موقف لا تحسدي عليه قلت ليها إنتي متخيلة معاي أني بعد صرخت قدام الناس كلهم وأتهمتو طلع ولدهم واااي بسسس قالت لي والاحلى من دا كلو أنك عملتيهو ميت وهو واقف قدامك😹💔قلت ليها بعدين هو زاتو غياظ خلاص يعني عشان شافني منقبة يجي يقول أنا خطافة! قالت لي معليش ما تزعلي قلت ليها أصلا ما زعلانة حريقة فيهو لكن غاظني شدديد قالت لي ما تفكري في الموضوع كتتير وأتجاوزيهو قلت ليها أممم، عدينا مسافة بسيطة بعدها ماما جات ومن جات داخلة طوالي جضمتني وقالت لي تعالي هنا يا قليلة الادب كيف تصرخي قدام الناس بالطريقة دي ولا كمان متهمه ولدهم في نص بيتهم قلت ليها ااي ماما فكيني والله أنا ما كنت قاصدة هو براهو جا وكان عاوز يشيلها مني وأنا افتكرتو هو الكذاب وعاوزة يخطفها قالت لي المرة الجاية ما تعيديها قلت ليها حاااضر بس هسي فكيني، فكتني وحمرت
لي ومشت مني ومهاد شغالة تضحك ساي قالت لي ما عجبني ليك قلت ليها أسكتي مني أنا ما رايقة ليك، فجاة تجينا ليك أفاق داخلة انصدمت لمن شفتها وقلت ليها أفاااق! جات ضمتني وقالت لي حبييبي مشتاقين قلت ليها كتتتير كتتتير والله+متين جيتي من ناس خالتك! قالت لي جيت قبيل الصباح عشان ناس أبوي جو من السفر قلت ليها حلووو يااخي الحلة من دونك ما سمحة خالص قالت لي عارفة عارفة أصلا جيت عشان أنور ليكم حياتكم وحياتو هو كمان+ صحي ما شايفاهو قاعد وين🙈❤️!قلت ليها في الشغل لسه ما جا قالت لي طيب ما توريه أني جييت لانو حابة أعملها ليهو مفاجاة قلت ليها حااضر من عيوني، يلا هي بتتكلم عن بشاري، إيوة هي وبشاري مربطين ليهم زي سنة كدة وهو ناوي يخطبها من أبوها بس كان مستنيهو يجي السودان ويكلمو....
