#ليُحيا_بك_قلبي2
بقلم: ميامن أحمد
من سمعت الريكورد قلبي بقى بيضرب بطريقة ما طبيعية وبقيت برجف من فوق لتحت لمن التلفون أترمى من يدي، ناس مهاد ما كانو منتبهين لي لانو بحضرو في حاجة في التلفون ومركزين معاها، يالله قدرت أرفع تلفوني من الارض وما عارفة من وين جاتني الجراءة وخلتني أكتب وأرسل ليهو " أنت الاحسن ليك ما ترسل أو تتصل علي تاني لانو أنا لو وريت أبوي بي مكالماتك ورسايلك دي ح تبقى في خبر كانة" رسلت الرسالة وحظرت رقمو وحذفتو سرعة سرعة وما حبيت أبين لناس مهاد أنو في شي فطوالي شلت عبايتي ونقابي وقلت ليهم هيي أنا ماشة ناس خالتو سلمى ومرقت منهم سريع وبدون ما أسمع ردهم حتى وكنت بحاول بقدر الإمكان ما أنهار قدامهم أو أقطع الكلام، لبست عباتي في الحوش وحاولت أعمل نفسي عادية وقلت لي أني لازم أهدا عشان أبوي لو عرف برسايلو ومكالماتو دي ما حيحصل خير وممكن عادي يوديهو ورا الشمس وأبوي ح يتعب لمن يشوفني منهارة فإنا لازم أكون قوية عشانو، أخخ يا رب أنا ما مستغربة الا من حتة أنو كيف ممكن إنسان يقول ليك أنو بحبك ويستمر معاك في علاقة لمدة أربعة سنين بي أكملها والسنين دي كلها تكون كلام معسول منو وطول المدة دي ما زعلك ولا خلاك تبكي بس بيبن ليك حبو وهو قدر شنو متمسك بيك فجاة تكتشف أنو كل دة كان كذب وخداع ومجرد مشاعر مزيفة، أخخخ بس💔مسحت دموعي النزلت وعدلت نقابي ومشيت لي ناس خالتو دقيت الباب فتحت لي بعد مسافة وقالت لي معليش يا بتي ما سمعت الباب عشان كنت راقدة جوا في الغرفة قلت ليها لالا ما مشكلة خير فيك حاجة ما متعودة تنومي بدري كدة؟! قالت لي مصدعة بس قلت ليها وهسي كيف ما خف شوية! قالت لي لالا والله لسه قلت ليها ح أخت ليك زيت في التلاجة يبرد لحدي ما أصلي العشاء عشان ما صليتو في بيتنا وبعدين بجي بعملو ليك في راسك قالت لي أصلك ما بتقصري قلت ليها يقصر الملح، ختيت الزيت في التلاجة وأتوضيت وجيت صليت بعد خلصتا بقيت بدعي وبقول يا رب تفرجها علي من عندك، يا رب تشيل كل السوء الفي قلبي دا، يا رب تخيليني أنسى كل الذكريات المؤلمة دي وتلزمني الصبر، يا رب ما تردني خايبة❤️رفعت المصلاية وختيتها في مكانها وجبت لي خالتو الزيت، كانت لسه راقدة في الغرفة قلت ليها الزيت برد لكن وين المشط! قالت لي في الدرج داك وأشرت لي عليهو قلت ليها طيب هسي بجيبو، أها أثناء ما أنا بجيب في المشط من الدرج كدة لاقاني ظرف زي حق رسائل زمان أتعجبت ورفعتو، خالتو قالت لي جبيهو معاك وتعالي قلت ليها سمح، شلتو وأديتو ليها قالت لي دة من عمك أبراهيم هاك أقري الرسالة الفيهو، شلتها منها وقريتها كان مكتوب فيها كلام رومانسي وحلو جداً جداً قلت ليها الله دة شنو الكلام السمح دا قالت لي لسة بتذكر كيف كان بيديني الجوابات الزي دي ودة كان أول جواب منو قلت ليها مسافة أعمل ليك الزيت في شعرك إنتي أحكي لي قصتكم وأحكي لي كيف أتعرفتو على بعض وكيف عرستو قالت لي طيب أسمعي، بقيت أعمل ليها في الزيت وهي بدت تحكي قالت لي نحنا هناك في البلد كلنا أهل وساكنين سوا وبيوتنا فاتحة في بعض وهو كان ولد عمي لكن بي اللفة، كان بيقرا معاي في نفس المدرسة هو أكبر مني بكم سنة بس لمن دخل المدرسة دخل كبير، المدرسة دي كلها كانت بتشهد وعارفة أنو هو بحبني ودايرني لكن سبحان الله أنا ما كنت بحبو خالص وما بحب أتكلم معاهو، طبعا مافي جواب ما رسلو لي مع أختو، ولمن جيت أمتحن شهادة سودانية هو كان عايد معاي حتى في الامتحانات الشهرية كان بيجدع لي البخرة حقتو وبخليني أكتب وبغششني قلت ليها عااسل🤣💔قالت لي بعد أمتحنا هو ساب القراية وأشتغل في حواشة بس عشان يجي يخطبني من أبوي ويعرسني لكن أنا ما كنت راضية بيهو خالص وكنتا عايزة أتم قرايتي وما خاتة فكرة العرس في بالي لمن أبوي جا قعد معاي وفهمني وقال لي أنو لو ضاع من يدي فأنا ما ح القى أحسن منو تاني وهو قال بيقريني لحد ما أخلص الجامعة حتى بعداك واقفت والله عزبتو وجرجرتو ليك جرجرة وبالفعل كان راجل وعند كلمتو وخلاني أقرا لحد ما خلصت الجامعة وكان مرة أتكلمت معاهو وقلت ليهو أنو لازم يرجع يكمل تعليمو وهو كان عاوز يقرا طب فاتضر يرجع يمحتن تاني صاح واجهتو صعوبات كتتيرة بس هو قدر يتغلب عليها وجاب نسبة عالية وخشا طب كان بيقرا وبشتغل في نفس الوقت، لسه بتذكر وقت كان يكون عندي أمتحان ولا قراية كان بيمسك العيال وبطلعهم مشوار وبخليني أقرا بمزاج فعشان كدة أولادي كلهم متعلقين بيهو شددديد وبالاخص الكبير، صاح مجالاتنا كانت مختلفة هو طب وأنا محاسبة لكن كنا بنقرا مع بعض ونسمع لي بعض وكدة قلت ليها يا سلام ياااخي قصتكم حلوة ربنا يحفظو ويخلي ليك أولادك قالت لي أمين يا رب، عملت ليها الزيت في شعرها وبعداك نمنا، فجاة ونايمة هلوست بي الحصل لي تاني وبقيت بقول:-
" لاااا ما تدخل راسي في البرميل والله أنا ما قاصدة، ما تدخلني الموية أنا ما قادرة أتنفس، خليني خليني وأرحمني شوية كفاية تعذبني كل العذاب دا، أخخ نفسي أتكتم ح أمووووت والله ح أموووت، دة شنووو لا ما تهبشني بيهو عليك الله، عمتو الحقينييي وما تخليهو يعمل كدة، إنتي لي بترضي أني أتظلم بالطريقة السيئة دي! حسبي الله فيك إنتي وهو، أنا ما عافية ليكم حقي والعذاب العذبوتني ليهو "
