#ليُحيا_بك_قلبي9
بقلم: ميامن أحمد
وقت البريك كنا قاعدين في الكافتيريا بنفطر، الاء نبهتنا وقالت لينا عاينو مش ديل دكتور يحيى وهبة! براءة قالت ليها وين قالت ليها هناك في الطربيزة القصادنا ديك، عاينا تجاة ما هي قالت كانو قاعدين سواً وطبعا هي شغالة تضحك ساي وبي أعلى صوت عندها وشكلهم كان بيوحي أنهم منداحين في الونسة، براءة قالت ليها شوفيها التافة متصلقة فيهو كيف بالله صوتها واصلني هنا، ألاء قالت ليها بالجد صوتها عالي لكن كدي خليك من داً وركزي في يدها اليمين شوفيها لابسة دبلة، براءة قالت ليها أنصدمت الزولة طلعت مخطوبة! الاء قالت ليها يا بت أنا شفت الدبلة دي في يدها من أول يوم شفناها فيهو، براءة قالت ليها عان بتتمايع كيف مع دكتور يحيى هسي خطيبها لو شافها وهي متلصقة ومتحكحكة فيهو كدة ح يعمل شنو! قلت ليها خليهم في حالهم نحنا ما لينا دخل بيهم قالت لي هسي إنتي مالك! ما عادي قاعدين نتكلم فيهم قلت ليها ما مالي بس ما عاوزاك تركزي معاهم خصوصي أنو هبة المديرة حقت القسم بتاعتنا يعني ولو شافتك بتعايني ليها بالنظرة دي يمكن ما يحصل خير، الاء قالت ليها كلام ميامن صح قالت لينا أمم طيب ما ح أركز معاهم قلت ليها حبييبتي أنا البتسمع الكلام قالت لي هيي ما بسمح لي زول يقول لي حبييبتي غير زوجي قرة عيني😌💅قلت ليها مشمم خلي ينفعك قالت لي أصلا هو نافعني الاء قالت ليها ربنا يرزقنا ود الحلال ويعرس لينا بسرعة أنا خلاص فاض بي قلت ليها على فكرة العرس دا كلام فاضي ساي قالت لي برضو عايزة أعرس قلت ليها أن شاء الله تلقي البستاهلك قالت لي الله يسمع منك❤️.....
ونحنا شغالين كدة جابو لينا حالة أسعافية كانت بت حامل وأجهضت ووضعها كان صعب جداً وحياتها كانت في خطر، كانو معاها أمها وأختها أستغربت جداً راجلها ليه ما جا معاها لانو الوضع الهي كانت فيهو ما كان ساهل خالص، دخلناها غرفة العمليات وعملنا ليها العملية، لمن طلعت برة غرفة العمليات أمها سالتني وقالت لي عليك الله بتي حالتها كيف! قلت ليها والله يا خالتو ما عايزة أكذب عليك بصراحة كدا بتك وضعها صعب شددديد أدعي ليها قالت لي كر علي يا حشاااي، وبقت تبكى قلت ليها خالتو أهدي شوية قالت لي كيف أهدى وأنا بشوف بتي بتمر بنفس الموقف لي المرة التالتة كيف بس💔! في الاول ما فهمت كلامها بس تاني جات أخت المريضة وقالت ليها حسبي الله فيهو يا أمي، الأم قالت ليها كلمتها وقلت ليها ما تشتغلي بي كلامو الدكاترة وروك وقالو ليك حملك ما بيثبت وح يعرض حياتك لي الخطر وممكن تموتي بي سببو لكن هي عشان خايفة منو ما سمعت كلامي وبب علي يا الله تتطلع بتي سالمة، أستغربت شدديد من كلام أمها وما فهمت هي قاصدة شنو بالظبط لكن بعد شفت تقارير المريضة عرفت أنو دي المرة التالتة تجهض لانو عندها مشكلة في الرحم وحملها ما بيثبت وهي كانت على علم بي المشكلة دي، المريضة ما صحت الا بعد أربعة وعشرين ساعة ووضعها أستقر شوية وقدرت تفتح عيونهم، مرة يومين وهي معانا في المستشفى أنا كنت المسؤلة منها ومن صحتها ومن أنها تاخد علاجتها في الوقت المحدد، في مرة بعد ما أديتها الدواء سالتني وقالت لي ما جا واحد هنا وسال عني؟! قلت ليها لالا والله، عاينت لي بحسرة وسكتت، قلت ليها معليش بس ممكن سؤال قالت لي أتفضلي قلت ليها إنتي ليه أذيتي نفسك بالطريقة دي! يعني رغم أنك عارفة أنو حملك من سابع المستحيلات يثبت ومرتين حصل معاك أجهاض ليه خليتي التجربة دي تتعاد وإنتي كنتي عارفة أنو كان ممكن تفقدي حياتك بسببها لكن الله ستر! قالت لي لانو ما في يدي حيلة غير أني أحاول أجيب ليهو عيال قلت ليها هو ما بيؤمن بي ربنا وبي القضاء والقدر! يمكن ربنا كاتب ليكم ما تجيبو عيال لخير بيعملو قالت لي هو وراني وقال لي أنو أذا عملت شي بوقف الحمل زي شريحة ولا حاجة بالشكل داً حيدقني ويطلقني قلت ليها ليه هو ما هاميهو صحتك! ما عارف أنو هو كدة بسوقك لي الموت سواقة! قالت لي عارف بس... سكت وما عرفت تكمل، قلت ليها لا بعدين إنتي كيف ترضي تعرضي حياتك للخطر! قالت لي ح يطلقني قلت ليها ويعني الطلاق ما عيب والطلاق لي بنات الرجال قالت لي للأسف المجتمع العيشين فيهو دا ما ح يخليني في حالي إذا اتطلقت، ح يقعدو يعايروني كل ما يشوفوني المطلقة فلانة .. قالو راجلها طلقها عشان عقيمة وما بتجيب أولاد .. شوفوها طلعت عاقر وتاني ماف زول ح يرضى بيها وحتفضل تعاني لمن تمووت، و... وهكذا، بعرف واحدة أطلقت من راجلها لنفس سببي ومن كتر كلام الناس أنتحرت💔قلت ليها لا حول ولا قوه الا بالله أنتحرت عديل كدة! قالت لي أيوة، قلبي وجعني شدددديد وأنا بسمع في كلامها ودموعي نزلو، في قعدتنا ديك فجاة يجي واحد داخل الغرفة وكان هايج شددديد ومن شاف البت طوالي جا جراها من السرير لمن وقعها في الارض بطريقة مخيفة وبقى يضرب فيها بكل غضب الدنيا وشغال ليها أجهضتي تاني مش يا عاقر!، هي بقت تصرخ بي أعلى ما عندها وهو نهائي ما فكاها جيت دايرة أمسكها منو كداً دفرني لي ورا بي أقوى ما عندو وكنت ح أقع لولا يحيى الثبتني، قال لي إنتي كويسة! هزيت ليهو راسي بي معنى أيوة، مشى على الراجل ومسكو من لياقة قميصو وقال ليهو ما بتخجل معقول رافع يدك على مراً يا وسخ! قال ليهو وأنت مالك ومالي دي مرتي وأنا حر أرفع يدي عليها ولا أقتلها، يحيى قال ليهو وأنت حاليا واقف في المستشفى حقتي وأنا ما ح أسمح ليك ترفع يدك عليها تاني طالما هي هنا ولزهو على الباب وقال ليهو يلا أمرق برة المستشفى دي سرييع، الراجل قال ليهو يا زول أنا داير أسوق مرتي معاي، يحيى قال ليهو ما ح تسوقها ونادى الامن حق المستشفى جو طلعوه، أنا ما قدرت أستحمل شكلها وهي مرمية في الارض ومضروبة لحظتها رجعت لي الذكريات المؤلمة تاني، طلعت برة بسرعة وقعدت في كرسي في النجيلة حقت المستشفى وبقيت ببكي بي حرقه ومنظرها كل ما هو بيتعاد في مخيلتي، المطرة كانت صابة بس أنا كنت في حالة تانية وما حاسة بي شي غير الوجع، رجعت لي الذكريات السئية كلها وحاصرتني، قريب النص ساعة وأنا قاعدة في حتتي ديك وببكي وزدت في البكى أكتر لمن سمعت صوت دكتور يحيى وهو بقول لي ميامن💔كان واقف قدامي وبيحاول يقول كلام بس ما عارف يقول شنو، قلت ليهو هو ليه عمل كدا! قال لي للاسف لانو واحد ما عندو قلب أو ذرة انسانية قلت ليهو طيب هي ليها مكتوب ليها تتعذب بالطريقة دي! هي ذنبها شنو أذا ربنا ما كاتب ليها تجيب أولاد، ليه تخاف من كلمة مطلقة! طلاق ... طلاق .. طلاق ليه مجمعتنا معتبر الطلاق حاجة عيب ومخجلة! ليه الناس ما بتحترم المرة المطلقة وبشوفوها زي العامله جريمة، ليه لمن واحد يحب واحدة ويكون عاوز يتزوجها أهلو يرفضو ويعارضهو لمجرد ما هي مطلقة! لمتين مجتمعنا حيفضل عقيم كدة؟! الواحدة من تتطلق يحرمو عليها حاجات كتتيرة، ما تلبسي كدا إنتي مطلقة الناس حتقول عنك شنو! ما تتمكيجي إنتي مطلقة، وأفعلي داً وما تفعلي داك، ولو عليهم الضحك يقول ليها ما تضحكي بس عشان إنتي مطلقة، ولمن يجيبها عريس كبيير طوالي يواقفو بحجة أنها مطلقة وتاني ما ح تلقى واحد يقبل بيها حتى ما بفكرو يسالوها عن رأيها أو يسالو عنو هو زاتو ويشوفو هل هو مناسب ليها ولا لا! ح يحترمها ولا تاني ح تمر بنفس المعاناة! .. أيوة صاح أن أبغض الحلال عند الله الطلاق بس دي ما بيعنى أنو المطلقة دي يعاملوها زي المرتكبة جريمة أو طلاقها حاجة تخجل منها، بس العكس أنا شايفة أنو الطلاق مفروص يقوينا عشان المرة الجاية نعرف نختار صح، الزول المناسب ما أي زول سااي، أخخخ هو ما من حقو يرفع يدو ويضربها كدة، كنت بتكلم وبتنهد ويالله قادرة أتنفس، قال لي نعمل شنو نحنا هو عامل نفسو راجل بالضرب قلت ليهو أتفوو على الرجولة لو كانت بالضرب قال لي ما تشغلى بالك بيهم كتتير ربنا حيأخد ليها حقها قلت ليهو ما قادرة والله، أنا مفروض أتكلم معاها وأخليها ترفع قضية ضدود هو لازم يتعاقب قال لي ميامن لا ما تعملي كدة خلي الناس في حالهم هما بعرفو يتصرفو صح براهم، لمن قال كدة أنفعلت فيه وقلت ليهو لا ما ح أخليهم قال لي ما صاح تحرضي البت هي ح تقعد مع نفسها وتفكر في حياتها وتعرف تختار الصح من الغلط قلت ليهو أنت ما عندك فيني شغلة حأمش أتكلم معاها قال لي بطلي الحشرية البتعملي فيها دي وخلي الناس في حالهم قلت ليهو بغيظ أنا حشرية! قال لي أيوة حشرية لانو ماف داعي أو سبب يخليك تدخلي في حاجة ما بتعنيك قلت ليهو بصوت عالي أشبه بالصراخ لا في داااعي أتدخل، في دااعي لاني مريت بنفس مواقفها وأنضربت نفس ضربها داً ولنفس السبب كمان💔......
_____
_جاهد ألا تلتفتَ إلى الوراء فإِن المرء على قدر حنينه يُهان...💔
أشوفكم❤️...
