#ليُحيا_بك_قلبي6
بقلم: ميامن أحمد
جرينا مخلوعين على محل الصريخ لقيناها دي مرا قاعدة في الارض وبتبكي بي أعلى صوت عندها وشغالة تقول لا بتي ما ماتت، ما ماتت هسي قبل شوية دي قالت لي ماشة أسوي ليك الشاي رجعو لي بتي، دا كلو بي سببوو أنا ما ح أخليهو، هو القتلها، قلتها وحرمني من بتي غلطانة أنا العرستو ليها، واااا وجعتي عليك يا حشاااي، كررر علي يا المشيتي وخليتيني براااي، كانت قاعد قدام السرير الفيهو جنازة بتها وبتكي، لمن عاينت في البت لقيت جسمها كلو معلم بالضرب وراسها ملفوف بشاش تقريبا زي الكاسرين فيهو قزازة، منظر البت الشوفتو كان مأساوي جداً وبقطع القلب💔للحظة رجعت ذكرياتي السيئة كلها لدرجة بقيت حاسة أنو الارض ما بقى فيها توسعني، غمضت عيوني شددديد عشان ما أتذكر الحصل يوم داك بس للاسف ما قدرت...
____
في الماضي:-
قلت ليك مية مرة أني ما بحب ريحة السجائر أطفيها يااخي أنا عندي أزمة ودخانها بكتم نفسي😭، فاجاني بصوتو الخشن وقال لي عندك أزمة صح!، بقى مقرب السجائر مني أو بالاصح مدخلها لي في خشمي وكان بحاول يشربني ليها، تاني قفل لي أنفي بيدو وكتم نفسي والسجائر كانت جوا خشمي، للحظة حسيت نفسي ح أموووت وبقيت ببكى وما كنت قادرة أتنفس بسهولة وبكح بطريقة طبيعية يالله قدرت أبعد يدو مني وأرمي السجارة واتنفس، عيونو بقت شرار وقال لي كيف تزحي يدي من أنفك! وترمي سجارتي لكن أصبري انا ح أوريك، شال السجائر من الارض وبقى بممررها لي في جسمي وبتشني بيها تقريبا شوه لي نص جسمي وكان بقول لي أهو طفيتها فيك، قلت ليهو حرااام عليك البتعملو فيني دا😭قال لي حرام علي أنا! إنتي شكلك محتاجة تربية من أول وجديد ومشى جاب الصوت وكعادتو وقع فيني ضرب وما فكاني الا لمن أتاكد أنو جسمي كلو أنضرب💔....
______
لمن فتحت عيوني لقيت دكتور يحيى واقف جنب المرا بهدي فيها وبعاين لي، كنت باخد نفس بصعوبة لمن صحباتي أنتبهو لي، براءة قالت لي إنتي كويسة! قعدت في أقرب كرسي لقيتو وما أتكلمت مع زول، الاء جابت لي موية شربتها وهديت شوية، بعدها قلت ليهم أرح من هنا أنا ما عاوزة أقعد في الحتة دي طلعوني😭💔براءة قالت ليها شكلها لمن شافت البت أتاثرت أرح نوديها البيت، وبالفعل رجعوني البيت وأنا باقي اليوم كلو ما كنت فاهمة ليهو حاجة بس قاعدة في ركن غرفتي وضامة رجليني علي وببكي، وكل ما منظر البت بجي في بالي بزيد في البكى...
____
مرة شهر من نحنا نزلنا شغل وأتعودنا على الروتين حقو رغم أنو هو متعب شددديد لكن مع كتر التعويد بقينا نشوفو ساهل، ما كنت بلاقي دكتور يحيى كتتير ولو إتلاقينا بالصدفة بتحصل بينا مشكلة يعني لازم نتشاكل عشان كدة بتجاوز فكرة أني ألاقيهو، بتذكر في يوم جمعة كداً قريب لي العصر كنا قاعدين أنا وماما في الصالة وبنتونس فجاة يجونا مهاد ورزان شبة جاريين، ماما قالت ليهم بسم الله مالكم جاين جاريين بالطريقة دي! مهاد قالت ليها قبل شوية ضرب لي زياد وقال لي أنو بعدين المغرب ح يجونا هو وأهلو عشان عاوزين يتناقشو معانا بخصوص العرس، ماما قالت ليها سمح أسرعن رتبن البيت دا وخلو لينا المطبخ أنا وميامن بنعمل الاكل قالت ليها طيب وبدو هيا ورزان يمسحو ويرتبو البيت، وأنا وماما بدينا نطبخ خالتو سلمى جات لقتنا جايطين وملخومين شديدد قالت لينا في شنو! ماما قالت ليها الليلة جايننا نسابة مهاد وهي ما ورتنا الا هسي عشان كداً ملخومين قالت ليها جاين المغرب! ماما قالت ليها إيوة، جات هي برضو وساعدتنا عملنا حلويات وكيكة شوكولاتة وبسبوسة وشاي لبن وشاي سادة وقهوة، بعد خصلنا منهم ماما قالت لي ياتو صواني نخت فيها الكبابي والصحانة حقت الاكل! قلت ليها ما عارفة والله والمشكلة أنو الصواني حقت الطقم مافي هنا عند ناس عمتو من عقد ولدها تاني ما جبناهم، خالتو سلمى قالت لي أنا عندي طقم حلوو والصواني فيهو بالتدريج يعني واحدة صغيرة تختو فيها كبابي الشاي والقهوة وتاني واحدة كبيرة شوية تختو فيها الصحانة أمشي جيبهم من البيت قلت ليها محلهم وين! قالت لي في الرف الفوق حق الوسيط ولو ما عرفتيهم خلي ريان أو أفاق تديك ليهم قلت ليها طيب، ماما قالت لي أمشي سريع عشان الزمن جا خلاص قلت ليها سمح ومن الاستعجال لبست توبي ولفيت بيهو وشي ومشيت بيتهم فتحت لي الباب ريان، قلت ليها ريان أزيك! قالت لي تمام الحمد لله وإنتي قلت ليها كويسة والله قالت لي أتفضلي خشي قلت ليها جاية عاوزة أشيل صواني حقت طقم خالتو وصفتهم لي قالت لي ياتم لكنن! قلت ليها قالت لي في الوسيط فوق قالت لي أها عرفتو تعالي أديك ليهو، دخلنا المطبخ كدة كان سمعنا صوت ميار بتبكي قالت لي عايني هداك ليهو في الرف الفوق شيليهو لو ما ميار بكت كان أديتك ليه قلت ليها ما مشكلة أمشي شوفيها مالا بتبكي وأنا بجيبو قالت لي طيب، مشت هي والدرج كان بعيد وأنا قصيرة وما قادرة ألحقو، مديت يدي وبقيت بحاول أحصلو كدا يحيى جا داخل قال لي هيي إنتي بتعملي في شنو! قلت ليهو يعني ما شايفني بحاول أجيب الصواني، جا قريب مني وفتح الدرج وطلعهم وقال لي الزول لمن يكون قصير بينادي زول تاني أطول منو عشان يجيب ليهو الحاجة اللي هو عاوزها قلت ليهو وأنا ما طلبت مساعدتك قال لي طيب تمام ورجع الصواني محلهم ومشى على جهة التلاجة طلع موية وبقى يشرب🙂💔، يعني بارد بشكل ما طبيعي في قلبي قلت ماف داعي لي العناد أحسن أخليهو يجيبهم لي لانو ماف زول غيرو، لمن كان ماشي على الباب كدا قلت ليهو هيي أستنى قال لي بتتكلمي معاي أنا! قلت ليهو في زول هنا غيرك قال لي خلصينا عاوز إيه! قلت ليهو نزل لي الصواني قال لي أطلبي مني بي أدب وأسلوب بعداك بنزلهم ليك، في قلبي قلت شوف التفاهة🙂، قلت ليهو طيب ممكن تنزل لي الصواني قال لي إيوة كدة تمام، نزل لي الصواني توبي كان عايز يتفكى وحسيت بيه فطوالي قبلت على الجهة التانية وعدلتو وبعدها أتلفت عليهو قال لي الصواني دي تقيلة حبة ما ح تقدري تشيليهم براك قلت ليهو لالا بقدر وشلتهم منو، فعلا كانو تقال لانهم زي أربعة أو خمسة وغير كدا هم صواني قزاز النوع التقيل داك صراحة ما قدرت أتحرك بيهم ولا خطوة قال لي إنتي لي راسك قوي وعنيدة كداً! مش قلت ليك ما بتشالو لأنهم تقال جيبيهم شالهم مني ومشينا على بيتنا، في الشارع هو كان ماشي قدامي وأنا وراهو غايتو أتعولقت عولاق بالتوب حلفت تاني ما البسو، دخل لي الصواني لحد جوا، ماما قالت ليهو شكرا ليك ما قصرت قال ليها العفواً يا خالتو ومشى، بعد خلصنا من الشغل كلو مهاد قالت لينا وااي عانو وشي عامل كيف وجرت جري عملت ماسك بن بي بيض وتاني جات راجعة قالت لينا شعري برضو ما مسرح ومشت سرحتو وتاني عملت عروكة ومشت أستحمت غاايتو كل مرة تجي لينا بحاجة جديدة وأنا ورزان بس نضحك فيها وفي وضعها كانت موترة شدديد الأخت🤣💔قريب لي المغرب مهاد كانت جاهزة بس فضل ليها لمسات بسيطة لبست فستان كبدي سادة والطرحة كانت بيج جات قالت لي أعملي لي المكيب عشان بتعرفي تعمليهو سمح قلت ليها أحم أحم الله يخليني ليك😌✅قالت لي ح أتجاوزك بس عشان تعملي لي قلت ليها وسخة، عملت ليها مكيب خفيف وظبطت ليها شعرها وطلعت تحفة❤️أما أنا فكان عندي عباية خليجة لونها أسود سادة وفي آخر يدينها في خزرفة لبستها ولبست معاها نقابي الاسود، شوية والضيوف جو نزلنا تحت أنا ورزان ضيفناهم كانو أمو واختو بس الجو من الحريم وأدينا مؤيد أخوي يضيف الرجال، بعد مسافهة بسيطة مهاد نزلت ليهم وطبعا شغالة تتخجل ساي، قربت من رزان وقلت ليها البشوفها وهي خجلانة كدة ما يشوفها وهي معانا🤣قالت لي حرفيا والله عان عاملة نفسها مسكينة كيف وهي في الحقيقة أكبر شيطان قلت ليها التمثيل واصل ليفل بعيد يختي خليهم لمن يتعودو عليها بعدها ح يرجعوها بي خبيزها🤣↗️قال لي فعلا فعلا، مهاد شافتنا بنتكلم وبنعاين ليها حمرت لينا وأدتنا ليك نظرة بعيونها نظام أصبرو لي لبعدين، المهم تاني الرجال جو من الصالون وقالو أنهم أتفقو وحدود العرس بعد شهرين والشهر الجاي ح يجيبو الشيلة والحاجات الزي دي، شوية والباب ضرب مشيت فتحتو لقيتو دا دكتور يحيى قال لي أمي معاكم! قلت ليهو إيوة قال لي معليش بس ممكن تجيبي لي منها مفتاح الغرفة حقتها قلت ليهو أتفضل خش قال لي لا لا مستعجل والله قلت ليهو ثواني طيب، رجعت جوا وقلت لي خالتو دا يحيى قال ليك عاوز مفتاح غرفتك، ماما قالت لي قولي ليهو يدخل قلت ليها قال مستعجل قالت لي خليهو يدخل يشرب قهوة ولا شاي على الاقل ما ممكن يمشي ساي كدا قلت ليها كلمتو قالت لي دقيقة، مشت ليهو وعدت مسافه وبعدها جا داخل معاها سلم على الموجودين وقعد جنب ناس أبوي، ماما مدت ليهو الضيافة شال من البسبوسة وقال لي ماما البسبوسة حلوة قالت ليهو عجبتك دي عملتها ميامن قال ليها بالله! قالت ليهو أيي قال ليها طيب تاني لو عملتوها عليك الله يا خالتي رسلي لي منها قالت ليهو حااضر من عيوني وعاينت لي نظام جيبي ليه موية، مشيت المطبخ جبتها ليهو وجيت وهو بس ياكل في البسبوسة سااي ويعاين لي نظام ما مصدق أنك إنتي العملتيها، المهم بعد ما هما أتفقو على تجهيزات العرس كلها مشو مننا ومعاهم ناس خالتو سلمى ... بعد مشو غسلنا العدة أنا ورزان ومشينا لمهاد فوق في الغرفة، قالت لينا تعالو هنا أنا بس كنت منتظرة الضيوف ديل يمشو عشان أسالكم قبيل لمن كنتو بتتكلمو وبتعاينو لي قلتو شنو فيني! قلت ليها قطعنا فيك وقلنا أنك حتجي راجعة بخبيزك قالت لي لا أطمني يا أختاة ح أكلو وأنا جاية في الشارع وبجيكم راجعة فاضية ما تخافي😃قلت ليها غايتو إنتي بتعمليها قالت لي أصلا أصلا ....
صباح اليوم التاني كنتا طالعة من البيت وماشة على الشغل كدا لاقاني دكتور يحيى جنب باب بيتهم، قال لي ماشة المستشفى! قلت ليهو إيوة قال لي أنا زاتي ماشي أركبي أوصلك قلت ليهو لالا شكراً ما عايزة أعذبك معاي قال لي ما فيها عذاب نحنا ماشين نفس المكان وبعدين الساعة 8 جات وما ح تلقي مواصلات بسهولة، ضربتها في راسي ولقيت أنو فعلا كلامو صاح ركبت ورا وهو ركب قدام وفتح الشبابيك حقت
العربية وشغل قران❤️ونحنا في الطريق كدة جاني إتصال من رقم غريب في الاول ما رديت بس هو كان مصر شدديد أنو يضرب لمن زهجت رديت، قلت ألو، ماف زول ردا لي تاني قلت ألوو منو معاي! فجاة سمعت نفس الصوت الانا برجف لمن أسمعو، قال لي ترسلي لي أنا كدة وتهدديني لا دقيقة إنتي قايلة نفسك منو عشان تهدديني! شكلك نسيتي أنا منو وممكن أعمل فيك شنو! أصبري لي ح أوريك نجوم الظهر يا بت.... قلت ليهو أن..أنت ع..عايزز مني شنو! أنا المرة دي ما ح أسكت ليك وتاني ما ترجع تضرب لي وقفلت الخط في وشو طبعا كنت بتكلم بالعافية، ختيت يديني على أكتافي وكنت برجف وخايفة ودموعي نزلو وبقيت شغالة أقول " أنا ما ح أخليهو يخوفني تاني، أنا ما ح أسمح يرجع يخوفني " كنت بقول الكلام دا وأنا برجف، يحيى قال لي دا منو وقال ليك شنو خلاك خايفة كدا! ما رديت عليهو هو لمن شافني ما متجاوبة معاهو وحالتي كانت بتخلع الزول وقف العربية على جنب ونزل وجا فتح الباب، قال لي ميامن بسم الله مالك في شنو ولي بترجفي وخايفة بالطريقة دي! قلت ليهو لااا ززح مني وما تهبشني، أنا بقيت ما بخاف منك، أيي ما خايفة منك وح أخليك تندم لانك لمستني وعذبتني عارفة أنك ح تدقني عشان قلت ليك الكلام دا لكن أنا ما ح أصرخ، دقني، عذبني، دخل لي راسي في موية البرميل وأكتم نفسي، أرميني في المخزن المضلم وخلي الحشرات تاكلني، قطع لي شعري، أحرق لي جلدي، لكن أنا المرة دي ما ح أصرخ وح أستحمل💔.....
____
_إلى ذاكَ الكابوُس الذي بداخلي أعدك بأنه سوف سياتي ذلكَ اليوم الذي تمحُو فيه من داخلي وتكون مُجرد ذكرةً هايفة علي جدار عقلي💔..
" Khadija Osman❤️ "
أشوفكم❤️.
