#ليُحيا_بك_قلبي21
بقلم: ميامن أحمد
قال لي بدون مقدمات يا ميامن في واحد أتقدم ليك وأنا وافقت عليهو، قمتا على حيلي بخلعة وقلت ليهو شنوو؟! قال لي زي ما سمعتي قلت ليهو بس أنا ما مواقفة وما عايزة أعرس قال لي المرة دي مضطرة تقبلي قلت ليهو أبوي أنت عارفني مريت بشو صح! وأنا بصراحة ما حابة أكرر نفس التجربة دي مرتين، قال لي لا يا ميامن إنتي لازم توافقي لمتين حتفضلي كدة؟! أنا وأمك أكيد ح يجي يوم ونمشي نخليك الحياة ما دايمة لينا، وإنتي ما ممكن تفضلي بااقي عمرك كلو وحيدة وما يعني خلاص أتزوجتي وزواجك خرب وأتطلقتي توقفي حياتك قلت ليهو أبوي لو سمحت أنا ما حابة أفتح سيرة العرس دي ويا ريت ترفض العريس لاني ما مواقفة ولا ح أوفق قال لي أنا بعتزر بس المرة دي ح تتزوجي وغصب عنك المرة الفاتت سمعت كلامك وواقفت رغم أني ما كنت عايزو ليك خالص بس إنتي بكيتي دم عليه وأصريتي أنك تعرسيهو وفي الاخر ما لقيتي منو غير العذاب فهسي زي ما أنا أنجربتا المرة الفاتت أوفق إنتي كمان مجبورة توافقي ولا على كيفك وانا بأمرك بي الحاجة دي ولو بالجد عايزة راضاي وعفوي فواقفي، سكت مسافه وقال لي ميامن أنا ما داير الا مصلحتك، عاوزك ترتاحي وتنسي الحصل ليك وتبدي حياة جديدة وترمي الفات وراك قلت ليهو لكن يا أبوي أنا ما عايزة أعرس قال لي ميامن الله يرضي عليك واقفي وريحيني يريح بالك، خليني أموت وأنا مرتاح ومطمئن عليك قلت ليهو ما تقول كدة أنت ح تموت بعدي أن شاء الله قال لي ما حابب أجبرك عشان كدة بتكلم معاك وبفهمك فيك كان ممكن عادي أعقد ليك عليهو لمن جاني لانو ما فيهو أي غلط بس حبيت أكلمك أول قلت ليهو هو منو؟! قال لي العريس قلت ليهو إيوة قال لي يحيى ولد عمك إبراهيم، لمن قال أسمو أنا قلبي قال شحح وبقى يضرب بسرعة قلت ليهو بخلعة منوو! قال لي يحيى قلت ليهو ك..كيف يعني أنا ما فاهمة يحيى لي عاوز يتزوجني! قال لي جاني قبل كم يوم وو...
نحكي بلسان يحيى:-
________
لمن قلت لي عمي عبدالله أني عاوز أعرس والعروس موجودة بس منتظر موافقتها فانا فعلا كنت جادي وقتها وما قصة أني أتهرب منو أو كدة لانو بالفعل هي في لكن أنا لسه ما فاتحت أبوها والعروس دي كانت ميامن، إيوة ميامن، ح تسالوني كيف أنا عاوز اعرسها مش! طب تعالو أحكي ليكم القصة..
يوم أمي وقعت في المطبخ وقالت لي عايزة أتكلم معاك في موضوع ف بس أتكلمنا في الموضوع دة زاتو، قالت لي يحيى أنا عاوزاك تعرس ميامن، أتخلعت لمن قالت كدة وقلت ليها ميامن! لييه اعرسها! قالت لي عشان ميار قلت ليها ما فهمت الدخل ميار شنو في ميامن! قالت لي يعني أنت ما شايف أنو ميار متعلقة شددديد بي ميامن وما بترضى تجي لي زول غيرها قلت ليها شايف بس دة ما بيعني أني أعرسها، قالت لي يحيى أنت كنت عاوزة تعرس هبة عشان تربي ميار وهبة ما نفعت صح! يلا شوف خياري دا وأنا متأكدة انو ميامن حتكون أحسن أم لي ميار وأنت مضطر توافق يا يحيي عشان بت أخوك الصغيرة دي، هسي يرضيك أنها تفضل مشردة كدة لا أب با أم، إذا أنا ما بقدر أمسكها لانك بي عينك شفت أني كنت شايلاها ووقعت من يدي وأنا وقعت وراها ولو ما أنت كان هسي هي حتكون في خبر كانة يمكن بالمرة الجاية أنت تكون ماف ويحصل لينا نفس الشي وماف زول يقدر يصحيني وينقذها فيا ولدي فكر فيها كويس، أنت مش عايز مصلحة ميار! قلت ليها إيوة قالت لي كان كدة عرس ميامن، المرة الفاتت أنا شفت أختيارك وكان هبة والمرة دي أنت مجبور توافق على أختياري عشانها، عشان ما تعاني في المستقبل وما تنسى ريان قبل ما تموت وصت وقالت أدو ميار لي ميامن حتى أمها قالت ليها ما تقلعيها منها فأنت لمن تعرس واحدة تانية عشان تربي ميار كانك قلعتها من ميامن وأديتها لي مرتك، وبعدين ماممكن نخلي ميامن تمسكها النهار كلو ونتعبها وماف رابط بينا غير أننا جيران أهلها ما برضو بتهم تتولى مسؤولية شافع ما ولدها حتى ولو ما أظهرو لينا الحاجة دي، لمتين ميامن حتفضل تهتم بي ميار كدة! ولمتين ميار حتفضل بدون ام وأبو! عاين ليها شافعة صغيرة ما عارفة لي الدنيا حاجة أهلها فاتو وخلوها💔وقتها عاينت لي ميار لقيتها بتضحك وبتعلب بي كم لعبة قلبي وجعني شددديد وأنا بعاين ليها حسيت أنها بتستحق أني أضحي عشانها وأعرس ميامن حتى ولو ما كنت أنا مبسوط المهم أنها حتكون مبسوطة ح تلقى أم تهتم بيها، تديها أحتياجاتها وما تنقص منها شي، تاخد بالها منها، وزي ما قالت أمي ميامن أحسن واحدة عشان تكون أم ليها وريان لو ما كانت واثقة أنو ميامن ح تعبر ميار زي بتها ما كان خلت زول غير أمها يرعاها، قلت ليها أمي أنا موافق أعرسها قالت لي متاكد! قلت ليها إيوة ميار تستحق أني أضحي عشانها، هي حتة من أخوي وأنا واجبي أني أسعدها أهتم بيها كانها بتي هي أمانة في رقبتي لحد ما أموت قالت لي الله يرضى عليك وحضنتي وقعدت تبكي قالت لي كنت عارفة أنك ما حتردني خايبة وح توافق.....وباقي الايام كنت بفكر وحتى أني أستخرت وكل الحاجات حوليني كانت بتقول لي عرسها .. عرسها، يوم الاربعاء مشينا أنا وأبوي لي عم أحمد أستقبلنا أحسن إستقبال وضيفنا، شوية وأبوي بداً يتكلم وقال ليهو والله يا أحمد أنا جايك لي الخير وطالب يدك بتك ميامن لي ولدي يحيى، أبوها سكت مسافة وبعدها قال لينا صاح أنا ما عاشرت ولدك يحيى كتتير بس من وقت شفتو هو بعاملني بي أدب وأحترام وما شفت منو شي غير الاخلاق الكويسة وعارف أني ما ح القى أحسن منو لي بتي لكن... قلت ليهو لكن بتك مطلقة! قال لي عرفت كيف قلت ليهو ورتني أمي وما تخاف من الناحية دي أنا ما عندي مشكلة قبلان بيها زي ما هي، والطلاق ما عيب وأنا في سبب أساسي يا عمي خلاني أوفق على العرس دة وما حابب أدسو منك وما تعرف بيهو واللي هو أني أخترت ميامن بالذات عشان ميار بت أخوي متعلقة بيها شددديد ومتاكد أنو ما حيكون في واحدة أحسن منها عشان تكون ليها أم وأنا قاصد الخير في كلامي دا، بوعدك أنو بتك ما حينقصها شي وحأختها في عيني ورأسي، قال لي والله ما عارف أقول ليك شنو لكن مبدئيا كدة أنا موافق بس الراي في النهاية رأي البت قلت ليهو أخدو راحتكم نحنا ما مستعجلين، أتكلمنا معاهو شوية ورجعنا البيت، ما بعرف ردة فعل ميامن حتكون شنو لمن تعرف أني جيت وأتقدمت ليها بس كل العارفو أنها من يجيبو سيرة ميار إحتمال خمسين في المية توافق....
