#ليُحيا_بك_قلبي27
بقلم: ميامن أحمد
بعد كلامو دة معاي ما قدرت أتكلم ولا بحرف واحد وفضلتا ساكتة، فكاني وقال لي عارف أنو الموضوع صعب عليك شويتين بس حاولي عشاني طيب! هزيت ليهو رأسي بمعنى حاضر، قال لي وأتنقبتي ليه! قلت ليهو عشان بعد هو خذلني وخلاني أقرف من الحب والعلاقات وكل حاجة حلوة حوليني عرفت أنو العلاقة الوحيدة المفروض أنا أسعى عشان أصلحها هي علاقتي بربنا وكوني أتنقب دي كانت أول خطوة، قال لي ربنا يثبتك للممات قلت ليهو أمين يا رب قال لي في سؤال شاغل بالي ممكن أسالك ليه! قلت ليهو أسال عادي قال لي أبوك لمن كنتي بتضربي ليهو ما شك في رقمك السوداني! قلت ليهو كمال قاري أي تي وجاب شريحة ما سودانية تقريبا سعودية وعمل فيها كم حاجة ما بعرفهم شنو المهم وبكدة عمل أني لمن أتصل على زول كأني أتصلت من برة قال لي إيوة وسنتك الاخيرة في الجامعة كلمتيها كيف! قلت ليهو بعد أتطلقت بسبعة شهور وأتنقبت مهاد أختي وقفت جنبي وخلتني أرجع أقرا وأكمل أخر سنة لي قال لي أهاا، سكتنا لمدة وبعدها قال لي رأيك شنو نطلع نتمشى شوية وتأخدي نفس! قلت ليهو ياريت يعني أنا جد محتاجة أني أطلع وأشم هوا قال لي طيب أمشي أجهزي وتعالي، مشيت لبستا عبايتي ونقابي وجيت طلعنا الكبري، ميار كانت لسه في الحضانة، كنا ماشين ولافين والزمن بالمغريبة كدة والشمس على وشك أنها تغيب، فجأة مسك يدي وشربك أصابعيني مع أصابعينو وكأنو كان بيقول لي أنا هنا عشانك يا ميامن❤️فضلت ماسكة يدو وكنت مطمنئة ومبسوطة جداً بمسكتو دي، أتمشينا شوية وفضفضت ليهو كل الجواي وشربنا شاي لبن بزلابية وبعد هو أتاكد تماما أني أنا أرتحت حتى بعد داك رجعنا البيت ومعانا ميار، حرفيا يعني هو خفف عني كتتتير شددديد.....
تاني يوم بالمساء كان عندي ديوتي وبايتة في المستشفى، ما شلت هم ميار لاني أساسا وديتها لي ناس حبوبتها عشان قالت عاوزاها تقعد معاها يومين كدة، اليوم كان متعب شددديد والمرضى كتار حتى طريقة أكل بيها ما لقيت، كنتا بتفقد فيهم ولافة حوليهم كدة حسيت نفسي نعست فقعدت في أقرب كرسي لقيتو قدامي وقلت أغفى شوية وبعدها أقوم أتابع باقي شغلي، نمت وما صحيت الا بصوت يحيى وهو بقول لي ميامن .. ميامن حبييبي قومي، فتحت عيوني ببطئ وعاينت ليهو بي أستغراب وقلت ليهو يحيى! قال لي نايمة في الكرسي لييه! قلت ليهو نعست شوية وتاني ما وعيت على نفسي قال لي كان تجي مكتبي وتنومي هناك براحتك قلت ليهو ما خطر على بالي قال لي هسي ما فات شي قومي نومي هناك قلت ليهو ما بيحتاج بنوم هنا عاادي قال لي أسمعي الكلام وبطلي عناد قلت ليهو يحيى أفهمني أنا مهبطة وما قادرة أتحرك قال لي لييه من شنو قلت ليهو ما عارفة بس حيلي ما شايلني قال لي أكلتي إييه من الصباح! قلت ليهو ولا شي قال لي كيف يعني ولا شي ما معقولة الاهمال دة كلو كدة ح تمرضي، أخخ منك قلت ليهو ما لقيت وقت عشان أكل قال لي حاولي قومي معاي قلت ليهو يعني مصر أمش معاك! قال لي أيي قومي يلا قلت ليهو أمري لي الله، قمتا ومشينا مكتبو قال لي ح أستاذنك عشان ماشي مكان قريب وجااي طيب! قلت ليهو طيب، هو مشى وأنا قلعت طرحتي ونقابي والنعاس بدأ يغلبني خلاص وبقيت بقاوم فيهو، يحيى غاب زي ساعة كدة وبعدها جا راجع وشايل أكياس في يدو، دخل وقفل الباب وراهو بالمفتاح وقال لي عشان ماف زول يزعجك وتاخدي راحتك الكاملة قلت ليهو دا شنو الشايلو دا؟! قال لي أكل قلت ليهو أمممم، فتح الكيس وطلع بيتزا وبارد وقال لي يلا نأكل أنا ذاتي جعان، قعدنا في الارض وبدينا ناكل وهو بس بعاين لي في عيوني وما بياكل لمن عقدني، قلت ليهو أنت سرحان وين ركز في أكلك، قال لي هي عيونك السمحة دي بتخليني أركز في ألاكل! طبعا فصلت فصلة لمن قال كدة، قلت ليهو للاسف ما بعرف أرد على الكلام الحلو🤣قال لي ما ضروري تردي كفاية أنك شفتيهو كلام حلو قلت ليهو لساني عجز عن التعبير بالجد يعني قال لي المهم أنو أنا حاسي بيك وبي العايزة تقوليه فماف داعي تحاولي تعبري حتى قلت ليهو حبيييبي ياااه، طبعا ما لاحظت لي الكلمة دي الا بعد مسافهة وهو أنبسط شدديد بعد سمعها بس ما حسسني أنو ما كان لازم أقولها، أكلت شوية وهو كان عندو كرسي جلوس طويل في المكتب مشيت رقدت فيهو ونمتا.....
