#ليُحيا_بك_قلبي13
بقلم: ميامن أحمد
قلت ليها نسيبة في شنو أتكلمي! قالت لي ألحقيييني بسرعة ح يقتلني وما تمت كلامها الخط فصل رجعت فيهو كم مرة بس أداني أنو خارج نطاق التغطيه، من الخوف والتوتر الدخلو فيني لمن رجليني بقو ما شايلني، لبست العباية والنقاب سريعع وجيت نازلة في السلم جرى حتى ماما سالتني ماشة وين من الخلعة ما رديت عليها، وأنا جارية على باب الشارع طقشت زول لما عاينت ليه لقيتو دا خالد، قال لي براحة براحة جارية كدة وين؟! قلت ليهو ما شغلتك زح من الشارع قال لي ما ح أخليك تمشي بالحالة الاتني فيها دي الا توريني مالك في زول حصلت ليهو حاجة! ومالك بترجفي كدة! قلت ليهو وأنت منو عشان تمنعني زح من طريقي يا ود الناس انا مستعجلة قال لي ح أتجاوز كلامك والا تقولي لي ماشة وين حتى تمشي وقفل الباب، قلت ليهو أفتحو يااخ البت منتظراني قال لي أحكي قلت ليهو خلاص ماشة بيت ناس صحبتي في الشهداء سريعع أفتح الباب قال طيب ح أوصلك بالركشة حقتي، ما أتجادلت معاهو كتتتير بس ركبت من سكات وكل همي في اللحظة ديك كان أني أصل لي نسيبة في أسرع وقت، الشارع كلو وأنا بقول ليهو أسرع أسرع، لحد ما وصلنا البيت كان عاوز ينزل معاي قلت ليهو لا أنت خليك هنا أنا ح أدخل وأجي قال لي طيب، شكلو ما كان حابب يتدخل في خصوصياتي عشان كدة فضل أنو يقعد في الركشة، دخلت البيت وكنت سامعة أصوات صريخ وحاسة برجليني تقال وأنا ماشة عليهم لمن وصلت جوا الصالة لقيت نسيبة واقعة في الارض وفي دم سايل من راسها وراجلها واقف بضرب فيها زيادة، جريت جري زحيتو منها بي أقوى ما عندي ورفعتها وقلت ليها نسيبة إنتي كويسة؟! كانت بتبكي بس وما قادرة ترد علي جبت أقرب طرحة لقيتها وختيتها في راسها راجلها طوالي جا وضربني أنا معاها بي القزازة الكان شايلها في يدو، ضربني في كتفي على قدر ما اتوجعت لحظة ضربني على قدر ما أتوجعت أكتر لمن شفت حالة نسيبة وهي مرمية في الارض ودمها سايل💔قال لي إنتي منو السمح ليك تجي وتدفريني وتزحيني من البت الكلب دي؟! قلت ليهو ياااخي تفو عليك وعلى رجولتك يا باطل هسي ما بتخجل رافع يدك على مرتك؟! قال لي وإنتي الدخلك شنو قلت ليهو دخلتني بطالتك دي، معقولة ما عندك ذرة إنسانية! لكن أستنى ح أخليها تتطلق منك يا وسخ مفتكر أنك حتفضل تعذب فيها لي الأبد! قال لي ما ح أطلقها وح أدقها كل مرة قلت ليهو بعد دا يدك ما حتصلها، من قلت ليهو الكلام دا طوالي مش تجاهها وضربها ضربة لمن جات واقعة في الارض تاني وقال لي أهو ضربتها، في اللحظة ديك ما كنت شايفة قدامي من الغضب ولحسن الحظ كان في سكين مختوتة في الطربيزة وجنبها صحن سلطة شكلهم كانت عاوزين يقطعو بيها، شلت السكين ورفعتها في وشو هو من شاف السكين قال لي هي...هيي إنتي نزلي البتاع دي من يدك قلت ليهو ما ح أنزلها وح أطلعنك بيها لو فكرتك تلمسها، وقلت ليها نسيبة قومي، قامت براحة من الارض لمن جات وقفت وراي، قلت ليهو نحنا ح نطلع ولو فكرت تمنعنا ح أطعنك طوالي وأنا ما بهظر قبل كدة طعنت ولد جيرانا أربعة طعنات ومات في لحظتها، طبعا هو خواف شدددديد لكن عامل نفسو قوي وما بخاف فبقى يتراجف من قلت ليه الكلام دا وانا أصلا كذابة ولا طعنت ولد جيرانا ولا شي وزاتي بخاف أشيل السكين لكن ما بينت ليهو كدة، بقينا راجعين لي ورا وماشين على الباب وأنا مادة السكين تجاهو لمن طلعنا برة الصالة قفلت عليهو الباب بالمفتاح ورميت السكين في الارض وجرينا الشارع خالد أتخلع لمن شفنا جاين وفي دم نارل من راس نسيبة ويدي برضو، قال لي في شنو ومنو الضربكم كدا؟! قلت ليهو بس ودينا المستشفى سرييع نسيبة حالتها صعبة💔ركبنا الركشة وهو كان متوتر جداً وكل خمسة دقايق يتلفت علينا ويسالنا الحاصل شنو بس ماف واحدة فينا قدرت تجاوبو، نسيبة بدت تغفى وأنا كنت بحاول أصحي فيها وأخليها ما تفقد وعيها لمن حصلنا المستشفى نزلنا وخالد كان ساندها معاي، دخلناها قسم الحوادث بسرعة رقدوها في النقالة وبدو يضمدو ليها الجرح وأنا بس كنت واقفة ببكي وخالد شغال لي أهدي ما ح تجيها حاجة ومشى جاب لي موية وأداني أشربها بس أنا رفضت، شوية وجا دكتور يحيى وأتخلع شديدد لمن شافني ببكي وشاف نسيبة الممرضين واقفين حولها، أستغربت هو الجابو هنا شنو بس لمن ركزت لقيت أننا في المستشفى حقتو، جاني بلهفه وقال لي ميامن الحاصل شنو؟! ما رديت عليهو وكنت لسه ببكي، عاين لي نسيبة وقال لي واحدة من الممرضات وضعها كيف؟! قالت ليهو لسه الدم ما راضي يقيف، أتفلت تاني علي شوية وشاف دم نازل في الارض من يدي، قال لي ميامن إنتي ما شايفة يدك دي! قلت ليهو خليني أنا أنقذ نسيبة😭قال لي الممرضة القبل شوية زاتها شوفي يدها وخلي لي المريضة دي، الممرضة جات ساقتني القسم التاني عشان كان لازم أرفع العباية لانو الضربة في الكتف فوق، ملصت عبايتي وهي عقمت لي الجرح ولفتو لي بي شاش وقالت لي تاني بعدين غيريهو هزيت ليها راسي وما اتكلمت فجاة جو براءة والاء جاريين قلت أكيد كلمهم يحيى أو خالد، براءة قالت لي ميمي فيك شي؟! الاء قالت لي إنتي كويسة! قلت ليهم اهدو أهدو أنا ما فيني الا العافية، بقو يتكلمو معاي وريتهم الحصل كلو، براءة قالت لي أخخخ بتوقعي نفسك في المشاكل ليه؟! هسي إنتي ناقصاك القصة الحصلت دي قلت ليها براءة انا وريتكم موقفي شنو ورجاء ماف زول يتناقش معاي بخصوص الموضوع دا، الاء مشت جابت لي عباية فاتحة لبستها عشان عبايتي ديك أتوسخت، هو أساسا كنا ح نبيت في المستشفى عشان عندنا دوام لكن انا ما جيت بدري وصادفتني مكالمة نسيبة ومشيت ليها، لبست العباية وهما نزلو تحت يجيبو لي أكل، تلفوني ضرب وكانت دي ماما في الاول ما رديت لانها ح تعرف من صوتي أنو في شي، لمن هديت شوية حتى بعداك رجعت ليها، قلت ليها أيوة يا ماما قالت لي إنتي وين؟! قلت ليها في المستسفى قالت لي شنوو؟! قلت ليها لالا ما تخافي عندي شغل وجيت عشانو قالت لي لكن جريتك بالطريقة ديك خوفتني قلت في شي قلت ليها لالا كلو تمام+ح أبيت في المستشفى عندنا شغل قالت لي طيب طمئيني عليك قلت ليها طيب وقفلت منها وأتنهدت تنهُيدة طويلة، سمعت دكتور يحيى بقول لي طالما عارفة البتعملي فيهو دة غلط وبتكذبي على أمك بسببو ليه عملتيهو! أنا مش نبهتك وقلت ليك أطلعي من المشكلة دي إنتي ليه ما بتسمعي الكلام نفسي أعرف قوة الراس والعناد ديل جايباهم من وين! قلت ليهو ما ضروري تعرف قال لي حتى حاليا لسه مصرة تعاندي! ميامن سيبي البت في حالها وبطلي تدخلي في متاهات ما ليها أول ولا أخر قلت ليهو ما ح أخليها معقولة أنت ما شايف حالتها اللي هي هسي فيها! دايرني أسيبها كيف! قال لي على فكرة إنتي كدا بتوقعي نفسك في مشاكل أنتي في غنى عنها قلت ليهو أنت بس خليك بعيد مني وما تتدخل فيني قال لي طيب يا ميامن طيب على عيني ورأسي ح أخليك وما ح أحذرك تاني يلا أقعي في المشاكل زي ما عايزة وصدقني ح تقعي في ورطة وأنا متاكد أنو راجلها ما حيسيبك في حالك وشوفي قوة راسك دي حتوديك لي وين وفات خلاني، ناس براءة جو بعدو قالو لي دكتور يحيى كان بعمل هنا في شنو! قلت ليهم نبهني وقال لي ما اتدخل في قصة نسيبة، براءة قالت لي كلامو صح شوفي الليلة أنضربتي في يدك بكرة ما معروف تنضربي وين الاء قالت لي ميامن أسمعي الكلام وأطلعي من القصة دي قلت ليهم حاولو أفهموني ياااخ، براءة قالت لي نحنا متعاطفين مع البت وعارفين حالتها تكسر الخاطر بس برضو خافيين عليك يا ميامن وما دايرنك تتاذي قلت ليهم زي ما أنتو خايفين علي أنا كمان خايفة عليها، إنتو ما شفتو هو بضربها كيف، أنا لمن كنت بنضرب زيها كدا ما كنت بلقى زول بجيبني المستشفى أو يساعدني فهي هسي لمن لقت زول يجيبها هنا ويساعدها أنا لي أخليها!، سكتو الاتنين مسافة وبعدها قالو لي طيب نحنا ح نكون واقفين معاك لحد ما تحسي نفسك ساعدتيها وهسي أكلي وبقو ياكلو فيني بالغصب...
