#ليُحيا_بك_قلبي23
بقلم: ميامن أحمد
لابسة التوب الأحمر المزخرف بالدهبي، والجدلة مختوتة فوق راسي، ووشي مغطى بالقرمصيص، والحنة مالية يديني ورجليني أضافة لبعض الاكسسوارات " دهب "، والبيت كلو مليان دلوكة وأغاني، وصوت الزغاريد ما يديك الدرب، وناس ماشة وناس جاية وفي جزو بيجرو محصلين العقد والشفع جارين بلعبو والحتة جوطة، ما بين الجوطة دي كلها كنتا بسال في نفسي، أنا عروس! معقولة داً عرسي التاني! طيب أنا لي حاسة أني ح أمر بنفس التجربة الاولى! صاح العرس الاول كان بي رضاي وأنا الاخترتو بس عشت أسوء عيشة ممكن الواحد يعيشها، أتعذبت كتتتير وصبرت، وبعد أتحررت منو ذكرياتو فضلت ملاحقاني وحاولت أتخلص منها بس ما قدرت وهسي فوق لي دا كلو ح أعرس تاني وأنا مجبورة، أنا يحصل لي كدة! معقولة المعاناة مكتوبة ليها ترافق قدري للابد! متين ح أرتاح! أخخخ يا رب، وأنا بسال في نفسي كل الاسئلة دي سمعت صوت طلق أتفكت وصوت الحريم وهم بزغردو والبنات وهما بصرخو وبقولو " عقدو .. عقدو " لحظتها أنا قلبي أتنفض من محلو وبقى يضرب بطريقة ما طبيعية، ويديني بدو يرجفو وحسيت أنني في حلم حلم وكانو دي المرة الاولى الاعرس فيها، كل شي مختلف المرة دي بس أنا حاسة أنو نهايتو حتكون نفس الاولى، فجاة سمعت صوت نفس البنات تاني بس المرة دي بقولو " العريس جا، العريس جا يبارك لي عروستو أمرقو .. أمرقو " هنا ضربات قلبي بدت تتعالى وأتوترت زيادة وبقيت ما عارفة يديني من رجليني، وحسيت الاوكسجين أنعدم من الغرفة وبقيت ما قادرة أتنفس بسهولة، وللحظة حسيت نفسي مهبطة يعني خلاص أنا بقيت مرة راجل ولي المرة التانية؟! ...
جا داخل يحيى حسيت بخطواتو وهو بقرب مني و وقف قدامي مباشرةً وما كان في بينا مسافة الا كم سنتمتر، قال لي مبروك عليك حلال ربنا، الله يقدرني أسعدك حرفيا ما عارف أقول شنو حاليا بس بوعدك إني ح أخاف ربنا فيك❤️وهو بقول في الكلام دة قلبي كان شغال دق دق، عدينا مسافة طويلة ونحنا الاتنين ساكتين أتوقعتو ح يكسر حاجز الصمت دة بي أنو يرفع القرمصيص من وشي ويشوفني بس ما عمل كدة، كنتا مستغربة شددديد هو مالو ليه يعني ما عايز يشوفني! حتى يوم النظرة الشرعية ما عاين تجاهي ولا بالغلط، يا ربي يكون السبب شنو! كنتا بسال في نفسي كل الاسئلة دي بس ما لقيت ليها جواب، قال لي خلاص نمرق! قلت ليهو إيوة، مسكني من يدي وطلعنا برة وهو ببشر والنسوان بزغردو والاغاني كانت شغالة والبنات ماسكات الدلوكة وكانو بغنو في أغنية " الليل الليل العديل والزين " قعدنا في السرير وحبوبة يحيى جات وبدت تجرتق فينا والبنات لسه كانو بغنو وبقولو "يمة الخير بريدو سيرو الليلة يوم جديدو سيرو ، سار لي بت القلبية سيرو، ربطو لي الحريرة وللبت العديلة الليلة سيرو👏 " لمن جات لحظة أنو يرفعو القرمصيص من وشي ضربات قلبي بدت تتعالى وأتخيلتو ح يعاين فيني لكن للاسف لي المرة التانية ظني خاب وقتها عرفت أنو في حاجة مانعاهو أو بالاصح هو ما عايز يعاين فيني، رفعتو أفاق أختو وهو نهائي ما رفع عينو من الارض وعاين لي طول فترة طقوس الجرتق هو كدة، الجرتق كان بنات بس عشان أنا منقبة وأبوي جا داخل في أخرو، حضنتو وبكيت شدديد وأنا في حضنو قال لي بتي السمحة بقت عروس لي المرة التانية ما تصدقي أنا فرحان كيف قلت ليهو وأنا فرحانة لانك أنت فرحان قال لي ربنا يسعدك ويهنيك قلت ليهو أميين، براءة والاء كانو جابين بت إسمها تسنيم مصورة فوتوغرافية فصورت لينا الجرتق كلو وأخدت لقطات كتتيرة لينا أنا وأبوي وانا ويحيى❤️....
