رحت ركض للكيه ناقصها نفر و جان اصعد و اباوع الكاعدين يباوعن الي بصدمه و استغراب
لان بعدني صغيره و مبين الخوف ع ملامحي ، المهم كعدت و تحركت الكيه و تقريباً كل جسمي يرجف و جانت نظرات الناس هيه الي تخوفني و توترني اكثر ضلت تمشي الكيه تقريباً ساعه او ساعتين
... جنت كاعده بصف رجال جبير بالعمر يطلع بالاربعين ، خايفه و متوتره وافكر شلون اني شسويت وين راح اروح اذا لزم ني يذبحوني اكيد و ألم بطني مال خوف ، فزيت لمسه ايد ع فخذي و يعصر بي احس دخت من الخوف دفرت ايده بيدي باوعتله ،
- ابتسملي بطرف شفته و يغمز بعينه الطابه لجوه من كبر سنه
.. مد ايده وكرص فخذي ، روحي شاغت من الوجع لزمت ايده القذره وحفرت اضافري بيها وشمرتها عليه
.. صحت خويه نازل نازل نزلني اهنا
.. وكفت الكيه و انطيته فلوس و نزلت بنص الطريق مسحت ايدي بثوبي بس حتى تروح قذاره الي لزمتها ، ياربي هسه اني وين اروح ما اندل اي مكان اروحله ضليت امشي ع طريق و هوى السيارات يطير بالحجاب و ارجع الفه
.. طلعت موبايلي من الجنطه و شفت ١١٥ اتصال من انفال واني دا اباوع رجعت هم تصلت يالله حرت شسوي طفيته و ضميته بالجنطه مسحت العرك الي ع كصتي شفت اكو جذع مال نخله تقدمت يمه وكعدت استراح ، بس لو اعرف هسه اني وين التفت منا ومنا بلكي اشوف لافته شي بس منطقه فارغه
.. كمت و شفت وراي بستان ، واحس ميته عطش طبيت للبستان ضليت امشي و الشمس غربت باوعت من بعيد ناس عرب نسوان شادات ع خصرهن العبايه و زلم بدشداشه البيضه و نصهم ع راسهم عكل ، حسيت بخوف و ألم صار بطني خفيف من التوتر ، اذا سئلوني شكول الهم ، لا لا روانا شردي بعد شيخلصني اذا لزموني
.. فريت جسمي و شردت للاتجاه الثاني و اني اجر بحجابي منا وارده منا
دحام : رجعت للبيت و جان اشوف امي كاعده و الحيره ع وجهه
.. خير يوم شكو شبيج
زهره : درت وجهي و شفت دحام ، يمه دحام يمه روانا روانا
- ماتحملت اكمل كلامي ضليت ابجي واضرب ع اجدامي
دحام : شبيها روانا لج انفال احجي شكو شبيها روانا ، احس تخبلت من كالت اسم روانا اصيح بدون وعي
انفال : روانا طل طلعت الصبح ولحد الان مارجعت حباب دحام سوي اي شي جيبها والله خطيه خاف واكعه بمصيبه
دحام: غمضت عيوني حتى اهدي نفسي ، صميت ايدي بقوه
... بكلام حاد و متقطع ، احجي .. منو .. خلاها .. تطلع .. وحدها؟
انفال : حباب مو مهم منو خلاها بس روح رجعها الله يخليك
دحام : انطيني رقمها
