حب في ازقه نينوى

البارت (14) حب_في_ازقه_نينوى الكاتب#احمد

14
#حب_في_ازقة_نينوى
بقلم #احمد
البارت_14
.
.
اسماء: البارحة ابوي جبر معتز يخطب زينب ورحنا خطبناها واني ما ردت احجيلج علمود ما ازعلج وتنقهرين فدوة نرجس لا تزعلين مني لو ما احبج جان ما استصعبتها هيج
.
.
نرجس: رغم اعرف هالشي راح يصير ومتأكدة منو بس من سمعت بالخبر احس اجتني ضربة على راسي تركت اسماء وكملت طريقي وهي تتوسل عبالها زعلانة منها بس اني زعلانة على حظي الي حرمني من اكثر انسان تمنيتو وياي
.
.
وصلنا المدرسة ورحت للصف واسماء راحت هي هم لصفها بلش الدوام ولاول مرة ما اركز بالشرح وانتبهتلي المدرسة كلتلها ماما مريضة وبالي مشغول عليها وانطتني اجازة بس ما طلعت كلتلها اذا ارجع من دوامي تزعل مني
.
.
من طلعنا اجت اسماء كلتلها مو زعلانة منج رحنا للبيت من وصلت رحت فورا للغرفة وقفلت الباب ودفنت وجهي بالفراش وانفجرت بالبجي امي اجت دكت الباب كمت بكسل فتحتلها الباب وتعجبت من وضعي
.
.
الاء: شبيج نرجوسة ليش تبجين
نرجس: راح ماما
الاء: منو هو
.
.
نرجس: معتز خطب بنت عمو البارحة
الاء: تعاي اكعدي وياي
نرجس: كعدت عالسرير واني كعدت يمها ودموعي ما توكف
.
.
الاء: بنيتي انتي تعرفين من الاول راح يتزوجها مهما يصير ومهما كان حبكم لبعض فمستحيل يترك بنت عمو علمودج
.
.
ثانيا ديري بالج بيوم من الايام اسمع انو متقربة منو خلص انسيه هو تزوج وراح ينساج واذا حاولتي تخربين بينو وبين زوجتو ترا ما تتوفقين بزواجج لهذا انسيه بنيتي وكلها كم يوم وراح يروح من بالج اهتمي بدراستج هاي اهم شي ترا
.
.
نرجس: ماما ماعرف شسوي احس نار شاعلة بكلبي
الاء: العذراء تريحج بنيتي كومي صلي وادعي الرب يكون بعونج وارجعي اهتمي بدراستج علمود تكدرين تفيديني طبعا اذا تريدين تفيديني
.
.
نرجس: اكيد اريد افيدج ماما خلص هسا اصلي واجي اتغدا
الاء: تمام
.
.
نرجس: راحت ماما واني صليت ودعيت العذراء والرب يريحوني وينشال حب معتز من كلبي مثل ما انزرع بيه ومن خلصت رحت تغديت ونمت
.
.
معتز: كعدت الصبح الضوجة فول بقيت بغرفتي وقافل الباب ويجون يدكون الباب ومن اصيح بيهم يروحون للضهر اجت اسماء كالتلي اريد احجيلك عن نرجس كمت ركض فتحت الباب ودخلتها وكلتلها شبيها
.
.
اسماء: حجيتلها اليوم عالخطبة
معتز: اي وشكالت
اسماء: شكالت يعني كتلها القهر
.
.
معتز: ليش كلتيلها
اسماء: اولها وتاليها راح تعرف
معتز: لو منتظرة بلكي اكدر اني اشوفها واحجيلها
اسماء: غلط تحجيلها انت راح تضوج منك بعد اكثر
.
.
معتز: طلعت اسماء واني نزلت بعدها مرت الايام بسرعة وجانو جواد وامي يروحون ياخذون زينب وامها يجهزون واكثر من مرة يسألون علي ويكلولهم مشغول وهم احسن علمود ما يشوف العروس ليوم العرس
.
.
اني ما جهزت كلشي راح جواد جابلي غرفة نوم جديدة وملابس للعرس صار يوم الاربعاء قبل العرس بيوم كعدت الصبح اخذني جواد للحلاق حلقت ورتبت نفسي ورجعت جماعتي اجو وبدت احتفالات صغيرة وجوبي بالاستقبال
.
.
اجى عمي ابو اسد هو وعائلتو ومبين عليه ضايج لان يعرف اضطريت اوافق واتزوجها وكمت افكر بيني وبين نفسي معقولة انت يا معتز ما يكون الك قرار بزواجك بس الك بيها حكمة ياربي
.
.
جانو الكل فرحانين بس اني وكم واحد من الي يعرفون علاقتي بنرجس ضايجين
.
.
بين كل ثانية وثانية تجي نرجس ببالي وافكر هسا شدا تسوي ضايجة لا اكلت شربت نامت كعدت درست كل هاي الافكار ببالي وماعرف شلون اسيطر عليهن
.
.
نرجس: مرت الايام كضيتها بين الدراسة والنوم من اتذكر معتز اضوج هواي بس اغير تفكيري واحاول اشغل نفسي باي شي علمود انساه
.
.
يوم الاربعاء اسماء طلبت اجازه الها والي بدون ما اعرف علمود ما نجي يوم الخميس ومن رجعنا بالطريق كلتلي وضجت منها بس لان احبها ما زعلت وكلت خليني ارتاح هاليوم هذا
.
.
ولان نعرف هسا اكو ناس رجعنا من الباب الي مخليه النا بظهر البيت من وصلنا البيت سمعنا صوت احتفالات اصدقاء معتز بوقتها شكد حزت بكلبي واني اسمع احتفالات عرس حبيبي وما راح يكون الي
.
.
دخلنا وراحت اسماء لبيتهم ومبين عليها ضايجة واني دخلت للملحق لكيت امي مكملة الغدا وتنتظرني من دخلت ابتسمت بوجهي ومن شفتها هيج لا ارادي ابتسمت الها
.
.
الاء: شلونج نرجوسة
نرجس: ها الاء شو صايرة نرجوسة مو جان قبل نونو
الاء: اني احس نرجوسة احسن
.
.
نرجس: اي صحيح حجيج الاوة .. وغمزتلها
الاء: طولان لسانج ولج
.
.
نرجس: كامت علي اني انهزمت للغرفة وهي رجعت تحط الغدا واني بدلت ملابسي ورحت اتغدا وياها احسها ضايجة بس ما وضحتلي واني هم ما بينتلها
.
.
من خلصت غدا رحت غفيت شوية وكعدت الساعة ٤ وبلشت دراسة للمغرب احس راسي انفجر من الدراسة والتفكير طلعت من الغرفة لكيت العشى جاهز
.
.
من تعشيت غسلت المواعين وامي راحت على اهل معتز واني من خلصت المواعين كلبت شوية بالتيلفون وراها نمت
.
.
معتز: بقو اصدقائي وياي العصر اجى الجادر ونصبناه وجهزو الذبايح ومستلزمات العرس كلها لليل صار كلشي كامل
.
.
اني كاعد من الصبح وتعبت كلش بال ١٠ ترخصت منهم ورحت انام وبقى جواد وياهم اول ما طبيت البيت صارت بوجهي تم نرجس رايحة للملحق
.
.
معتز: هلا ام نرجس شلونج
الاء: هلا معتز الف مبروك وشايف الخير
معتز: الله يبارك بيج بس ماعتقد اشوف الخير
.
.
الاء: الرب دائما يختار الخير لعبدو
معتز: ومرات يبتليه علمود يختبر ايمانو بس كليلي نرجس شلونها
.
.
الاء: زينة تركتها تغسل المواعين
معتز: تمام تصبحين على خير
الاء: وانت بالف خير
.
.
معتز: راحت هي للملحق واني صعدت لغرفتي اخذتلي دوش سريع وتمددت واجت ببالي نرجس وايامنا الي راحت وصرت ابتسم مثل المخبل على ذكرياتنا لحد ما نمت
.
.
نرجس: كعدت ثاني يوم الساعة ٩ واهل معتز تكول عدهم فاتحة مو عرس حتى صوت اغاني ماعدهم تريكت اني وامي وراحت امي عليهم واني رحت للغرفة
.
.
طلعت فستان احمر اخذتو من رحنا اني واسماء للسوق سبحت ولبستو وسويت تسريحة لشعري وحطيت مكياج خفيف شفت نفسي بالمراية طالعة اخبل الا اخرب فرحتها هالحية
.
.
انتظرت لحد ما اجت الزفة ودخلوها وراها بشوية دخل معتز ورحتلهم اني علمود اباركلهم اول ما دخلت جانت الاغاني مشتغلة والبنات يركصن وام زينب تصفك من شافتني انصدمت ووكفت عن التصفيك
.
.
اني تقدمت عليهم وابتسامتي واضحة معتز مثل الشايف جني ما بعد نظرو عني ابد زينب جانت مبتسمة من شافتني اختفت ابتسامتها
.
.
وصلت عندهم مديت ايدي لمعتز وصافتحو وباركتلو رجعت بوست زينب وكلتلها الف مبروك وكلش لايكين لبعض العذراء تحفظكم وما تتفرقون
.
.
زينب: الله يبعد عنا عين الحساد
نرجس: اي صح حجيج تعرفين الناس تحسد حتى الي ما ينحسد لهذا خايفة عليكم
.
.
زينب: شنو قصدج
نرجس: ما اقصد شي يلا اني اتركم متونسين ويا بعض والف مبروك مرة ثانية
.
.
تركتهم ورجعت كعدت بعيد عنهم واشوفها هي ومعتز يحجون وثنينهم معصبين رغم الي سويتو مالو معنى بس فرحت من ضوجتها تستاهل
.
.
اخير شي معتز طلع وهو روحو طافرة من الضوجة والعصبية واني خلصت مهمتي رجعت للملحق الدنيا عصر ومن الريوك ما اكلت شي لان ما رحتلهم وقت الغدا وما سويت بالبيت غدا لهذا جوعانة
.
.
فبدلت ملابسي ومسحت المكياج وسويتلي اكل وصار هو غدا وهو عشى ومن اكلت جنت نعسانة ونمت فورا
.
.
يتبع
حطولنا ارائكم وتوقعاتكم ❤
إن شاء الله من باجر ارجع انشر بارتات طويلة بس تفاعلو علم توصل القصة لعدد اكبر من الناس
https://www.facebook.com/الكاتب-احمد-106346968747988/