حب في ازقه نينوى

البارت(43) حب في ازقه نينوى الكاتب#احمد

تصويت ومتابعه حتى توصلكم باقي البارتات والقصص❤

#حب_في_ازقة_نينوى
بقلم #احمد
البارت_43
.
.
معتز: عمي جان جايب 10 ملايين لان ابوي موصيه للعرس وكالو بعد العرس ننطيك ولان العرس صار بضرف استثنائي وخطيبة جواد تدرس اجلنا عرسهم لحد ما تعطل خطيبتو ووقتها يتزوجون
.
.
نرجس: كعدت ثاني يوم لكيت اسماء رايحة للجامعة خلصت ريوك كلتلي ام اسد علمود نروح نحجز بدلة وصالون تجميل كلتلها من تجي اسماء نروح
.
.
الحجي حدد يوم الاثنين العرس وبدو يعزمون الناس هو وابو اسد وجواد حتى معتز اتصل على الي يعرفهم وبلغهم واني اتصلت على هند وصيتها تجي هي وامها واخوها وما اقبل منهم اي عذر اذا ما اجو
.
.
عقد المحكمة بس يتحسن معتز نروح نسويه واني ما اعرف بهاي الامور لان صغيرة واول مرة اتزوج بس الي اعرفو ان شكو شي يسويه الحجي لمصلحتي لهذا ما اسأل ولا ادقق على شي من هو يحجي بيه وينطي قرارو
.
.
من صارت الدنيا ظهر اجت اسماء تغدينا ورحنا اني وهي وام اسد اول مرة رحنا لمحل بدلات اعراس واختاريت وحدة وصورتها اسماء ودزتها لمعتز
.
جانت بدون ردن ومعتز كال اختارو وحدة تكون استر منها وافتريت بالمحل ما عجبني شي وطلعنا رحنا عالثاني نفس الحالة ماعندو شي حلو
.
.
ثالث واحد لكيت وحدة عبارة عن تحفة من الجمال وجانت مستورة وعز الطلب صورتها اسماء ومعتز كال اخذوها ووصى اسماء تشتريها مو تأجرها وسوينا مثل ما كال واشتريناها
.
.
ورحنا للصالون واتفقنا وياه ورحنا للسوك علمود تشتري اسماء ملابس للعرس وهم اخذ لعبدالهادي افترينا وشافت اسماء فستان احمر كلش حلو
.
.
واني شفت قاط صغير بس جان جبير على عبدالهادي واخذت حجم اصغر منو ورحنا اخذنا مكياج لاسماء واخذتلي فستان لليلة الحنة جان اسود بس نقشتو كلش حلوة واني عجبني لهذا اخذتو
.
.
رجعنا من السوك ذابحنا التعب من رجعنا خليت معتز يتصل على اخو هند وينطيه العنوان علمود ما يضيع رجعت لغرفتي تعبانة ميتة تعب
.
.
تمددت على فراشي ومبتسمة معقولة تحققت امنيتي وحلمي الي قبل ايام اكول راح يروح من صار وقت العشى نزلت تعشيت واخذتني ام اسد والحجية للغرفة
.
.
فهمني عالحياة الزوجية وشلون اتصرف واتعامل ويا معتز علمود اعيش بسعادة وما تصير بيناتنا مشاكل
.
.
كالت ام اسد اول ما يدخل الزوج يسلم عالعاروس وبعدها يصلون سوا ركعتين لله علمود يوفقهم بزواجهم وبعدها يوصيها عالشي الي لازم تنتبهلو
.
.
مثلا انو صوتها ما يطلع وتحترم ابوه وامه وهيج اشياء وبعدها (الي حللو الله للمتزوجين) ولفت انتباهي من هاي صلاة الركعتين ماعرف ليش حبيت اصلي
.
.
كلت لعد راح اصلي علمود الرب يوفقنا بزواجنا بقينا لل 11 ونمنا ثاني يوم كعدنا الصبح وبدت التجهيزات لليلة الحنة والدنيا مكلوبة
.
.
اني جهزت الفستان الاسود ووياه اكسسوارات ذهب جنت مو مشترية كالتلي الحجية البس ذهب من عدها بس ما وافقت لان جبت اكسسوارات سود ويا الفستان
.
.
ولان بشرتي بيضة تكون اوضح واحلى من الذهب الظهر رحنا اني واسماء وام اسد للصالون وبلشت ام الصالون بشغلها .......
.
.
وبعدها بلشت بالمكياج والتسريحة طلبت منها تبقي شعري على لونو ما تصبغو بس تعدل طارفو وترفع شوية منو من كملت شفت نفسي بالمراية من صدك ماعرفت نفسي معقولة هاي اني
.
.
المكياج جان خفيف بس طالع حلو بشكل مو طبيعي ام الصالون وام اسد يصلن عالنبي ويسمن علي علمود ما تصيبني العين ام اسد ما تحب المكياج لهذا ما سوت شي ابد جانت مجرد مرافقة الي
.
.
واسماء سوت تسريحة بسيطة ومكياج خفيفة وطلعت تخبل جانت الدنيا مغرب اتصلت ام اسد بجواد واجى اخذنا والطريق كلو مشغل اغاني ولو عرسو ما يفرح هيج
.
.
جواد: خرب يومك عزو تزوج قبلي
ام اسد: صدك ليش ما تزوجت وياه وفضيتها
جواد: زوجتي دا تدرس
.
.
اسماء: اي بعدين احسن علمود يصير عرسين مو واحد
جواد: اي انتي تريدين تركصين مثل ابن اخوج ماتعرفين شلون
اسماء: بربك مو شبعتو ركص
.
.
جواد: لا والله طول النهار عند الحجية واني رحت ويا معتز للحلاق واخذتلو ملابس ما لحكت اركصو
اسماء: اليوم اخلي يركص وياي
.
.
نرجس: مو عبالكم اذا عاروس انسى ابني يا ويلكم اذا اخذتو
جواد: دسكتي لا اطلعج من الجام
نرجس: هههههههه علمود معتز يبتلي بيك
.
.
جواد: لا هالفترة ماخذ راحتي لان هو مايكدر
نرجس: يصير خير الا اخليه يكسرك
جواد: يلا انزلي انزلي
.
.
نرجس: نزلت جانو الشباب مو جايين بعد ودخلت داخل تلكني نسوان الجيران والكرايب باركلي وسلمن علي ولكيت هند وامها سلمت عليهن وباركلي
.
.
شفت عبدالهادي بيد الحجية وجانت مو مبدلتلو لان خطية ملتهية اخذتو منها وصعدت فوك وتخبلن شلون تبدليلو هسا تخرب كشختج كلتلهن مو مشكلة
.
.
طلعتلو بنطلون وبلوزة جديدات اول مرة يلبسهن ومشطت شعرو طلع يخبل نزلتو بالكاع ومسكتو من ايدو ونزلنا اني وياه كعدت بالكوشة وكعدتو وياي
.
.
والحجي طلبت يسوون الحفلة بوقت علمود تخلص بوقت شوية وسمعت صوت اغاني خارج وهوسات زلم وعرفنا معتز جاي
.
.
اني صحيح متعودة على معتز بس بسبب حجي ام اسد والحجية البارحة صار عندي توتر وخجل كلش قوي وفوكها مو لابسة حجاب واني تعودت عليه قربت اصواتهم لحد ما وصلو باب الصالون لبسن النسوان حجبهن ودخل معتز
.
.
معتز: وجود عمي واسد كلش فاد ابوي وجواد لان ساعدوهم هواي اني بسبب الحادث ماكدر اسوي اي شي يوم الحنة كعدو من النوم وراحو يحظرون الذبايح ابوي وعمي
.
.
واسد وجواد حجزو جادر بس ما جابوه بعد اجلوها ليوم العرس الظهر من راحن النسوان للصالون دخلت سبحت بس كوة خلصت
.
.
لان رجلي وايدي اليمين مجبصات وصدري ملفوف وساعدني اسد من خلصت رحت للحلاق زياد وصل اهلو ويا اسد وصار اجتماع الشباب عندو
.
.
وابوي كال لا ترجعون قبل ما يرجعن النسوان من الصالون علمود يدخلن للبيت براحتهن اني حلقت ورتبني الحلاق ورجعت لكيت جواد مجهزلي البدلة
.
.
كوة لبستها اصدقائي شبعو ضحك يكولون باجر راح نبجي عليك لان ماكو اي فايدة واني اضحك وياهم كلتلهم هسا خلي اتزوج ويتسجل اسمي بظهر هويتها والباقي سهل
.
.
من لبست البدلة نزلت حاملة الايد الي تتعلك بالركبة لان راح تخرب الغاط ومنظرها مو حلو المغرب اتصلت امي كالت اجن من الصالون
.
.
جبنا عشى من المطعم وتعشينا عالسريع ورحنا للبيت من الذهب جنا مشترين بس حلقات وكلت خلي بس يترتب وضعي الا اعوضها اضعاف الي تريدو
.
.
رحنا للبيت وصلوني جماعتي لباب الصالة وراحو ودخلت اني شفتها جانت كاعدة بالكوشة ولابسة فستان اسود وايدي بيض ثلج احس حرارتي صارت فول
.
.
حاولت امشي بثبات جانت رجلي توجعني بس تحملت وصلت عندها هي منزلة راسها وجها مو مبين كعدت عندها وكلتلها ارفعي راسج وياريتها مو رافعتو
.
.
العيون دوختني الشفايف حمر كأنو دم الخدود حلقوم الشعر اصفر بس اكثر شي دوخني بيها عيونها بحيث اكثر شي دققت عليه عيونها
.
.
هن خضر وبالمكياج طالعات يخبلن ولان مو مدمنة عالتيلفون او السهر بياض عيونها مابيه اي حمار تحسن عيونها زيتونة خضرة بوسط حليب ابيض
.
.
الركبة ابيض من الحليب ولابسة كلادة سودة وتراجي سود وانتبهتلها لابسة كلادة الصليب ابتسمت وتذكرت اول مرة شفتها هم جانت لابستها نفسها الكلادة ما تغيرت
.
.
نرجس: دخل معتز اني من الخجل دنكت راسي بس جنت اكدر اشوفو دخل يمشي بهيبة لحيتو لاول مرة تكون شوية طويلة ومرتبة لان قبل يحلقها بسبب الدوام
.
.
تقدملي وكعد يمي من رفعت راسي شفتو مدقق كلش على عيوني اسماء وبنات ابو اسد شغلن اغاني وكامن يركصن واسماء سحبت عبدالهادي وتركص وياه وهو يضحك ومتونس بعرس ابوه وامو
.
.
جنا كاعدين ودخلت وحدة اول مرة اشوفها ومبينة صغيرة بالعمر وجسمها ناعم يعني الي يشوفها يكول عمرها 24 او 25 بالهواي ووياها بنت تقريبا عمرها 8 سنين
.
.
من دخلت من باب الصالة طكتها بهلهولة يمكن بغداد كلها سمعتها معتز من شافها كام على حيلو وانرسمت ضحكة على وجهو وتقدمت هي علينا
.
.
هلهولتها ما خلصت الا وصلت كدام معتز وحضنتو وتبوس بيه ودموعها نزلن وهي تبوس بيه وتطمن عليه اني وكفت عند معتز تركتو واندارت علي بوستني
.
.
وكال معتز هاي داليا اختي رحبت بيها واجت اسماء حضنتها هي والحجية وسلمن عليها النسوان كلهن خطية هسا واصلة من المطار هي وبنتها
.
.
جانت حلوة كلش ومبين عليها بشوشة كالت لاسماء متحضرة للركص من قبل ما اجي وشاورت اسماء واسماء ضحكت وراحت لغرفة الحجية والحجي وجابت عكال الحجي
.
.
واخذتو داليا وكالت الي بنت ابوها ما تكوم تركص والبنات كامن يضحكن عليها ومن كل عقلها تكوللهن وربي الي ما تركص بعرس اخوي يا ويلها اني كمت اضحك على حركاتها
.
.
جابولنا الحلقات لبسني معتز ولبستو الحلقة وباسني من كصتي وراح واجت داليا تريد تكومني والحجية كالتلها ماتعرف وقنعتها
.
.
اني سحبت عبدالهادي وكعدتو بمكان ابوه واجت داليا حطتو بحظنها وكعدت يمي وتبوس بيه ومتخبلة على جمالو
.
.
داليا: الف مبروك حبيبتي شايفة كل الخير
نرجس: الرب يبارك بيج
داليا: والله هالمعتز مو قليل
.
.
نرجس: ليش
داليا: من كال عليج صاكة ماتوقعت هيج حلوة
نرجس: تسلمين عيونج الحلوات
.
.
داليا: ليش ما جنتي تحجين وياي علمود اشوفج واتعرف عليج
نرجس: ما احب الاتصالات بالاخص الفيديو
داليا: هي صحيح مزعجة بس احسن من الماكو
.
.
نرجس: صحيح بس اني ما احب احجي اتصال
داليا: براحتج حبيبتي هسا تعرفت عليج وتشرفت بمعرفتج
نرجس: الي الشرف .. بس سؤال
.
.
داليا: اسألي حبيبتي
نرجس: شكد عمرج 
داليا: شكد تتوقعين
.
.
نرجس: والله الي يشوفج يكول 25 اكبر شي
داليا: ههههههههه رجعتيني لايام شبابي
نرجس: لعد شكد عمرج
.
.
داليا: دخلت 31 سنة
نرجس: العمر كلو حبيبتي
داليا: الله يطول بعمرج مو مبين علي مو
.
.
نرجس: اي لان اعرفج اكبر من معتز وتعجبت من شفتج
داليا: لا تتوقعيني من النسوان الي يكرهن الجنة ويشوفنها نجوم الليل بعز الظهر اني بالنسبة الي حاليا ضيفة وانتي ام البيت واحترامج واجب علي
.
.
نرجس: بابتسامة .. تسلمين حبيبتي بس عندي واسطة
داليا: شلون يعني
نرجس: بابا وماما ما يقبلون احد يحجي وياي
.
.
داليا: قصدج ابوي وامي
نرجس: اي
داليا: هلا والله من هسا مظبطة وضعج
.
.
نرجس: ههههههههه لعد شعبالج
داليا: الله يعينك يمعتز هههههه
نرجس: لا ترا اني مسكينة
.
.
داليا: اعرفج حبيبتي معتز حجالي هواي عنج
نرجس: من ايمتى
داليا: من شافج بالموصل
.
.
نرجس: يعني واصلتج كل الاخبار
داليا: اسرع من الحدث ههههههه
نرجس: اي والرب
.
.
من خلصت الحفلة بدلت واحس راسي صاير طبل نزلت تحت الحجية موصية جواد على عشى جابلهم من المطعم والنسوان تعشن وراحن لان ماكدرو يطبخون بالبيت
.
.
طبعا بالحفلة ما حطيت حنة بس حفلة بسيطة ولبسنا حلقات لان ما احب الحنة اني واحب تكون ايدي بيضة ما بيها لا حنة ولا وشم ولا غيرو تطلع احلى
.
.
من حطو العشى تعشيت وتركت عبدالهادي عند الحجية ورحت فورا نمت من التعب بس حطيت راسي عالمخدة نمت
.
.
معتز: من سلمت على داليا رجعت كعدت جابتلنا امي الحلقات مسكت ايدها احس رجفة سارت بكل جسمي كلتلها ثبتي ايدج ولبستها الخاتم وهي لبستني الخاتم
.
.
من بستها جنت مشتهي ابوسها من شفايفها بس بسبب النسوان ما كدرت تذكرت من بستها بالمطبخ وبالمستشفى احس حرارتي ارتفعت وعركت
.
.
وبعدها طلعت من الصالة جماعتي جانو بالاستقبال رجعت عندهم جانو اسد وجود جايبين ( M B 3 ) جبير شغلة اغنية عليه اسد مالت دبكة واستلم الطارف
.
.
وبلشت الدبكة وجان اسد احسن واحد بيهم بالدبكة وحركاتو كلهن ينفذهن باتقان زياد جان ما يكدر يدبك هو ومنتظر لهذا كعدو يمي
.
.
زياد: اكلك ضلعك يوجعك
معتز: شوية من اسحب نفس
زياد: يعني وضعك باجر مو تمام ههههههه
.
.
معتز: لا اخوك ذيب
زياد: اكعد راحة ولك
معتز: يا راحة يا بطيخ
.
.
زياد: لا صدك والله دير بالك لا تتأذة لاحك على هالشي هي عندك مو منهزمة
معتز: الله كريم
.
.
زياد: شنو قررت علمود العسكرية تداوم لو لا
معتز: لا والله شرطها ابطل وابوي جبرني اوافق
زياد: والله يخوي احسن الك والها اذا تبطل
.
.
معتز: والله يخوي اريد ارجع اداوم
زياد: شتريد من الدوام الحمدلله الله رزقك وفتحت المول احسن من العسكرية واذا كدرت ابني طابق ثاني من يصير عندك فلوس
.
.
معتز: طابق ثاني علمود شنو افتحو
زياد: لوقتها تقرر هسا مو وقتو
معتز: وانت
.
.
زياد: اني عندي ال 20 مليون افتح بيهن محل واترك العسكرية
معتز: وانت منتظر
.
.
منتظر: والله يخوي بعد ما قررت بس الوالدة كلبت الدنيا الا ابطل
معتز: الله كريم
.
.
فكرت بيني وبين نفسي كلت فكرة زياد حلوة مالت الطابق الثاني وراح اشوفهم اذا وافقو نتشارك ثلاثتنا ونفتح طابق ثالث وهم افيدهم لان اعتبرهم اخواني
.
.
شوية واجى جواد جايب عبدالهادي وكام يركص وياه واني شبعت ضحك على عبدالهادي من تعب ترك جواد واجى علي وكعدتو يمي
.
.
بقيت ويا جماعتي لحد ما راحو سعد اخو هند بقى عندنا ووصيت جواد يجيبلو فراش علمود ينام ويانا بالاستقبال
.
.
بقينا اني وهو وعمي ابو اسد نتعلل لل 11 بالليل ونمنا لان باجر عندنا كعدة من الصبح وعمي ابو اسد يضحك ويكول سويت الي تريدو واخذتها واني اضحك على سوالفو
.
.
.......... يتبع
لايك وتعليق حلو مثلكم ❤
حطولنا ارائكم وتوقعاتكم ❤