حب في ازقه نينوى

البارت (20) حب_في_ازقه_نينوى الكاتب #احمد

#حب_في_ازقة_نينوى
بقلم #احمد
البارت_20
.
.
نرجس: الدكتور منع الزيارة علمود ترتاح بقينا ننتظر لل 9 رجع عليها الدكتور وطلع كال المرة تريد معتز وابوه اخذهم ودخلو عليها واني كلبي انعصر من الموقف وليش طلبت معتز وابوه وما طلبتني اني
.
.
شوية وطلع ابو معتز اني جنت كاعدة عالكرسي من شفتو يبجي اريد اوكف على رجليني ماكدر من الخوف احس ما بقت عندي ذرة طاقة حجو وياه جواد والحجية وما رد عليهم وراح يمشي ويمسح بدموعو وراها بشوية طلع معتز
.
.
معتز: جنا ننتظر الدكتور يطلع ويطمنا على ام نرجس بس من طلع طلبنا اني وابوي احس كلبي وكع لان عرفت نهاية اللقاء هذا دخلنا جانت كوة تحجي ومبين عليها دا تتوجع بس متحملة علمود نرجس ما تسمع صوتها
.
.
الوالد: امري ام نرجس
الاء: حجي هالكلام الك انت ومعتز بنيتي ما الها احد لا عمام ولا خوال هي امانة عندكم واهم شي اريدكم تسووه لا تخربون بيت زينب علمود بنتي
.
.
الوالد: توكلي بالله إن شاء الله تعدي سلامات
الاء: انتو ما تعرفون كمية الوجع الي دا احس بيه بس ما اريد نرجوسة تسمع صوتي واني اتوجع وتخاف علي بطني دا تتكطع و و وما .. تريد تحجي ما تكدر
.
.
الوالد: ام نرجس انتي من اول ما جابج معتز وانتي معتبرتني اخوج فاذا اخوج انطاج نصيحة اخيرة تتقبليها
الاء: اي
.
.
الوالد: خلي اخر كلامج الشهادة
الاء: جيبولي نرجوسة اريد ابوسها قبل ما اموت
.
.
معتز: واكف وماعرف شسوي من صعوبة الموقف ابوي ما تحمل وطلع يبجي واني طلعت شفت نرجس وجهها اصفر ومرتبكة
.
.
الوالدة: شكو معتز
معتز: تعالي نرجوسة امج تريدج
نرجس: تمام
.
.
معتز: دخلت عندها ام نرجس فتحتلها حضنها راحت تركضلها نرجس وتبجي عليها امها بس تمسح على راسها ودموعها تنزل وتبوسها من راسها ومن خدودها ومن كصتها الدكتور مابيدو شي يسويه اخير شي طلع بدت امها تنازع ونرجس تخبلت
.
.
الاء: اشهد ان لا اله الا الله . واشهد ان محمد رسول الله
نرجس: لا ماما لااااااا ماما فدوة ردي علي ماماااااا
معتز: سحبتها من امها وهي متخبلة
.
.
نرجس: ماما لا تعوفيني وحدي ماكدر بدونج ردي علي اروحلج فدوة ماكدر ماماااااااااا عوفني معتز فدوة عوفني لا تسحبني منها بعدي محتاجتها ما شبعت من حنانها عوفنيييييي
.
.
معتز: ما حجيت شي مجرد سحبتها لحضني وعلى صوتها دخلو امي وجواد ونزلت دموعهم عليها راحت امي غطت وجه ام نرجس وقرتلها الفاتحة
.
.
نرجس ذبلت بحضني سندتها قبل ما توكع وشلتها وديتها على غرفة ثانية وخليت جواد يتكفل بامور الجنازة واني بقيت عند نرجس اجى الدكتور حطلها مغذي وراح
.
.
وصل المغذي للنص وفزت فزة كلش قوية من نومها وتريد تشلع الكانونة من ايدها ومسكتها كلتلها اني اشيلها لان خفت تأذي ايدها
.
.
سحبتها من ايدها وهي ولا يمها ولا حست بوجع من رجعت اللزكة على مكان الكانونة سحبت ايدها وطلعت ركض دخلت على غرفة امها وجانت فارغة اندارت علي وعيونها بيهن الف وجع ودموعها مثل المطر
.
.
نرجس: فدوة معتز وين ماما
معتز: كافي يا عمري لا تعذبيني وياج امج راحت لدار حقها
نرجس: شلون كدرت تعوفني لحالي وتروح شلون اعيش بدونها
.
.
معتز: الموت حق عالكل وهي اجى يومها والله كاتبلها تعيش هالعمر هذا وتموت ادعيلها بالرحمة
.
.
كعدت بالكاع وحطت اديها على عيونها مثل الطفل وتبجي كعدت عندها وسحبت راسها لحضني وامسح على راسها بهدوء بعدها سندتها واخذتها للبيت
.
.
الطريق كلو حاطة راسها عالجامة وصافنة ودموعها تصب من وصلنا جانن اسماء وزينب ينتظرننا بالطارمة هي نزلت ركض راحت للملحق اشرت لاسماء تروح عليها واني رحت لبيتنا
.
.
زينب: شصار معتز
معتز: توفت امها
زينب: ياااااا خطية الله يرحمها
.
.
معتز: ويرحم موتاج حطيلي ملابس بالحمام اريد اسبح لان راح نسوي الفاتحة هنا من يجي جواد
زينب: تمام
.
.
نرجس: من كلي معتز امج تريدج احس ردتلي روحي بس بنفس الوقت اكو خوف من دخلت عليها جانت كلش تعبانة ووجها اصفر حضنتها وهي تبوسني من كل مكان بوجهي
.
.
فجأءة بدت تنازع وتشاهدت اني من صعوبة الموقف ما ركزت انها اسلمت قبل ما تتوفى ومن توفت احس الدنيا كلها انكلبت فوك راسي وضعت ضياع مالو نهاية
.
.
سحبني معتز واني اصارخ بس اريدها ترجعلي واكمل حياتي وياها وما اعرف شصار بعدها كعدت لكيت نفسي بغرفة ومعتز وياي وايدي بيها مغذي
.
.
رجعنا للبيت واني رحت للملحق اول ما دخلت احس امي بعدها موجودة بعدو الملحق بيه ريحتها وصوتها بعدها ذكرياتها مطبوعة على كل شبر بالملحق
.
.
رحت لغرفتها طلعت من ملابسها وحطيتها على وجهي واشم عطرها ودموعي ينزلن بدون توقف اجت اسماء تواسيني بس يا كلام الي يخفف وجعي بهيج موقف وهيج لحضات تمددت على فراش ماما والملابس بحضني وماعرف شلون نمت
.
.
معتز: سبحت وكملت ورحت للملحق جانت نرجس نايمة ودموعها على خدودها ولازمتها الشهكة كلت لاسماء ابقي يمها وطلعت خابرت جواد
.
.
جواد: نص ساعة واجيبها علمود ليندا تودعها
معتز: خايف تنهار بعد اكثر
جواد: مهما كان ما يصير ندفنها بدون ما تودعها نرجس
.
.
معتز: اعرف بس خايف عليها
جواد: إن شاء الله مايصير شي
معتز: امين
.
.
سكرت منو اجو ابوي وامي ماعرف وين جانو وراها بربع ساعة اجن نسوان من جيرانا على امي ومتعجب هي ما صارلها نص ساعة من توفت شبسرعة سمعو بالخبر رجعت على اسماء كلتلها كعديها راح يجيبون امها علمود تودعها وطلعت
.
.
نرجس: حسيت على اسماء تكعدني عبالي جنت بحلم فزيت وشفت الملابس بعدها بحضني ورجعت نزلت دموعي
.
.
اسماء: كافي يا روحي توكلي بالله وكومي بدلي راح يجيبوها علمود تودعيها بعدها ياخذوها يدفنوها
نرجس: هي تريد تندفن بالموصل اسماء بالموصل مو بغير مكان
.
.
اسماء: هاي ارادة ربي لهذا توكلي بالله وكومي بدلي علمود نروح على بيتنا قبل ما يجيبوها
نرجس: تمام
.
.
كمت بدلت ورحنا لبيتهم معتز جان واكف بالطارمة وما حجى شي دخلت داخل سلمن علي النسوان وعزني بوفاتها وكعدت وياهن بس احس روحي معزولة بمكان اظلم ومستحيل يجيها النور
.
.
بقيت ساكتة ودموعي تجري شوية وجابوها بتابوت دخلوها للصالة احس عاصفة من المشاعر اجتاحت كلبي خوف على انكسار على ضياع على حزن شكد ما اوصف مستحيل يكون مثل الاحساس الحسيت بيه
.
.
تقدمت عليها بخطوات بطيئة وثقيلة وصلت يمها فتحت التابوت جانت مكفنة ومو مبين منها شي مديت ايدي واتلمس وجها من ورا الكفن
.
.
اتذكر عيونها من جانت تباوعلي اتذكر شفايفها من تحجي وياي اتذكر كل تفصيل بحياتي وياها اريد احجي بس لساني احسو ثقيل وماعرف شنو احجي
.
.
اكو هواي حجي بكلبي بس ماعرف منين ابدا وبشنو ابدا دنكت وبستها من راسها
.
.
كلتلها .. جنتي تكوليلي انجحي علمود تفرحيني وتساعديني ليش رحتي قبل ما احققلج حلمج ليش تركتيني وحيدة بهاي الدنيا
.
.
ترا جذبت من اكلج اني جبيرة بالعكس اني بعدني صغيرة بعدني محتاجة حنانج محتاجة حضنج الدافي محتاجة اهتمامج منو هسا يستقبلني من ارجع من المدرسة منو يشجعني ويدعيلي بالتوفيق
.
.
اعرف شكد ما احجي ماراح ترجعين بس كلبي مات وياج وانكسرت انكسار مستحيل يتعالج ياريتني ميتة قبل ما اودعج يا امني واماني ويا كلشي الي بهاي الدنيا
.
.
اجت ام معتز سحبتني لصدرها واجو معتز وجواد ووياهم شباب من ولد جيرانهم اخذوها كل خطوة يمشونها احس ينكسر كلبي بعد اكثر
.
.
معتز: بين ما جابو الجنازة انتشر الخبر بين جيرانا ومعارفنا ومن دخلنا الجنازة جنت اتمنى اكون ويا نرجس بهاي اللحضات بس وجود النسوان الغريبة منعني وطلعت
.
.
بعدها بشوية دخلنا نريد ناخذها جانت نرجس بحضن امي وصوتها عالي بالبجي وعيونها بيهن خوف وحزن كلش جبير وما يفهمها بس اليتيم
.
.
وهي مو بس يتيمة هي وحيدة لا اخ ولا اب ومهما نكون احنا مستحيل نكون مثل الاهل
.
.
انكسر كلبي عليها اخذنا امها للنجف دفناها ورجعنا الدنيا جانت مغرب وثاني يوم لازم نسوي العزا خابرت زياد ومنتظر كلتلهم ماراح اداوم وياكم وهم تفهمو الموضوع وسكرت منهم
.
.
رحت داخل جانت امي بالصالة وزينب تسوي العشى واسماء ونرجس ماكو سألت امي كالت بغرفة اسماء صعدت عليهن اسمع نرجس تبجي وتكول لاسماء نار تسعر بكلبي ومو كادرة اتحمل واسماء تبجي وياها
.
.
دكيت الباب سألت منو اسماء كلتلها اني وكالت ادخل دخلت جانت نرجس كاعدة عالسيرير ومقابيلها اسماء وثنينهن يبجن كلتلها اسماء اتركينا لحالنا وطلعت
.
.
كعدت كدام نرجس وكلتلها .. شكد ما احجي واواسيج مستحيل اكدر اخفف وجعج ولا اطفي النار الي بكلبج بس لا تنسين هذا قضاء وقدر
.
.
والله كاتب لكل شخص عمر محدد يعيشو وبعدها ينتقل لرحمة ربو واحنا لازم يكون ايماننا بربنا قوي ولازم نصبر ونحتسب علمود ربنا يعوضنا باحسن من الي فقدناه
.
.
لذلك ما اكلج لا تبجين لا بالعكس البنت ترتاح من تبجي بس اكلج لا تفقدين الامل بالله ولا تنسين اني واهلي كلنا وياج وما نتركج ولا دقيقة من اليوم انتي بنتنا واحنا اهلج
.
.
شفتها نزلت راسها بين رجليها وزاد بجيها تركتها وطلعت رغم رايد ابقى وياها بس ما اريد اضغط عليها وهي اليوم فاقدة امها وجرحها جديد
.
.
نزلت تحت حطتلنا العشى زينب واسماء اخذت الها هي ونرجس وصعدت فوك واكلنا كل واحد لكمة لو لكمتين وانسدت نفسو
.
.
من خلصت عشى اخذت جواد وخابرت زياد ومنتظر يجون علي ورحت جبت جادر ومن شافونا ولد جيرانا اجو ساعدونا نصبنا الجادر وجهزنا الكراسي
.
.
حتى صياني والجدور مالت الطبخ جبناها علمود ثاني يوم يكون كلشي جاهز من الصبح بقينا لل ١١ وبعدها اترخصو هم واني وجواد رجعنا للبيت اخذتلي دوش ونمت
.
.
نرجس: من اخذو ماما اخذتني ام معتز كعدت وخلت راسي بحضنها وكوة تحجي من البجي وتواسيني النسوان جانن ساكتات اول ما بجيت من ودعت امي بجن على بجيي
.
.
ورا شوية اجن غير نسوان وكل شوية تروح وحدة وتجي وحدة للمغرب وراحن كلهن وصعدنا اني واسماء للغرفة ومن اجى حجى وياي معتز احس انطاني جرعة امل وطاقة
.
.
طول النهار ما اكلت ولا الي نفس اكل ومن جابت العشى اسماء ما اكلت شكد حاولت تقنعني وما اكلت اخير شي تركتني واخذت الاكل نزلتو تحت
.
.
واني تمددت بالفراش وافكر بامي وذكرياتنا احسها شريط كدامي ينعاد من جنت طفلة لحد هاي اللحضة اسماء ما رجعت للغرفة واني ما اعرف ايمتى نمت
.
.
كعدت الصبح جسمي متكسر لان مو نايمة بفراشي نزلت تحت محد كاعد بعدهم نايمين غسلت وجهي وطلعت بالحديقة جان اكو ضو بس الشمس بعدها مو طالعة والجو بيه برودة كلش حلوة
.
.
بقيت كاعدة بالحديقة وساكتة من كعدو اجت اسماء شافتني بالحديقة واتنفست براحة مبين جانت تدورلي كمت وياها كعدت بالصالة وهي راحت تساعد زينب بالريوك
.
.
اجت ام معتز وبعدها ابوهم ومعتز وجواد حطو الريوك وما قبلت اكل وحجى وياي ابوهم وكال الي دا تسويه حرام تحملي واصبري ولا تأذين نفسج لان هذا يعتبر رفض لقدر الله وهذا ذنب جبير
.
.
اقتنعت بكلامو واكلت شوية وبعدها طلعو معتز وجواد وابوهم وزينب واسماء راحن للمطبخ بعدها بشوية بلشت النسوان تجي جانن ما يعرفني لا اني ولا امي بس يجن لخاطر اهل معتز لان الفاتحة صارت عدهم
.
.
واجن بسمة ونسمة بنات ابو اسد وامهن سلمن علي وعزني واجن ام زينب واختها هم سلمن علي والحجية موصيتني ابقى ويا النسوان لهذا بقيت كاعدة يمها واسمع النسوان
.
.
بعضهن يكولن بعدها صغيرة ويعضهن يكولن المفروض يزوجوها لجواد وكل وحدة تنطي راي من عندها وسوالف النسوان ما تخلص
.
.
معتز: طلعنا الصبح جان اخر يوم باجازتي اجو زياد ومنتظر وبلشو الناس يجون لان العزا عندنا والناس اكثرهم يعرفون ابوي ويجون علمودو
.
.
لان هو ما يقصر بالواجب ويا احد ومن يسمع بفاتحة يروح يعزي ويرجع اني وزياد تكفلنا بالجاي والكهوة وجواد ومنتظر راحو جابو لحم ورجال علمود يطبخ الغدا
.
.
جان اكو بيت لجيرانا فارغ فتحوه النا وطبخنا الغدا بالحوش ومن كملناه قدمنا للرجال بالجادر واخذنا للنسوان والي جانو ينقلون الاكل حطينالهم بالطارمة مالت البيت الي طبخنا بيه
.
.
تغدينا عالسريع وكمنا رجعنا الصياني من الجادر حطينا بيهن الباقي من اللحم والتمن ووزعناها للجوارين لان حرام ينذب نعمة هاي
.
.
رجعنا بلشنا بتنضيف المواعين غسلناهن ونضفناهن وحطيناهن على صفحة ونظفنا البيت الي طبخنا بيه بالعشى جانو بس عمامي موجودين لهذا رحنا تعشينا بالبيت
.
.
ورا العشى فلشنا الجادر ورجعناه لصاحبو وكمنا نستقبل الناس بالاستقبال لان صارو كلش قليلين
.
.
نرجس: تكسرت من الكعدة من اجى الغدا حسيت اجى الفرج كمت رحت للمطبخ عند البنات وجودهن شوية ريحني احسن من كعدتي ويا النسوان الكبار
.
.
اكلت وياهن شوية وانسدت نفسي ورا الغدا بقيت كاعدة وياهن نص ساعة تقريبا ورجعت عند الحجية لان يجن نسوان ولازم اني استقبلهن وياها
.
.
للمغرب صارن النسوان قليلات سون عشى البنات واجو عمام معتز تعشو بالاستقبال واحنا النسوان بالصالة تعشينا وخلصنا ورا العشى اجن نسوان ثنين سلمن علينا وكعدن نص ساعة وراحن
.
.
وراها راحو اهل زينب اني لان كاعدة من الفجر نعست كلش ترخصت منهم ورحت لفراشي وبجيت لحد ما تعبت ونمت والدمعة على خدي
.
.
كعدت ثاني يوم راسي يوجعني ومعدتي مو مستقرة ومبين عندي هبوط من قلة الاكل اجت اسماء كلتلها عندي هبوط وراحت
.
.
وراها اجت امها تسأل وكلتلي لا تنزلين اذا اجى احد نكللهم مريضة ومن تجيبلج اسماء الريوك تريكي ولا تزعليني منج علمود ترجعلج صحتج وراحت
.
.
وفعلا شوية واجت اسماء جايبة الريوك رحت غسلت وجهي وايدي ورجعت تريكت وياها واكلت احسن من البارحة لان جنت جوعانة ومن خلصت اخذت الريوك اسماء وراحت
.
.
بقيت كاعدة بالغرفة احس نفسي صرت غريبة بالدنيا رغم اهل معتز مثل اهلي بس فقدان امي محطمني رجعت اتذكرها ورجعن دموعي ينزلن مثل الجمر على خدي
.
.
شكد اسمع ان فقدان الام صعب بس ما تخيلتو بهاي الصعوبة عدلت حجابي ونزلت ام اسد والحجية بالصالة ما انتبهن علي تأكدت الحوش ما بيه احد ورحت للملحق
.
.
جان مسكر الباب بس مو مقفول دخلت داخل وامشي بخطوات بطيئة رحت للمطبخ واتذكر من جنت اجي وهي تنتظرني ومن نكعد نتغدا
.
.
رجعت للغرفة فراشها فارغ رغم حرارة الجو بس احس الملحق بارد والروح الي جنت احس بيها البارحة اليوم ماكو رجعت اخذت ملابسها وحضنتهن وتمددت بفراشها واحجي ويا ملابسها احسها تسمعني
.
.
كلتلها .. موجوعة كلش بعدج مدا اتحمل فراكج شلون بي واني بعدني ما شبعت منج شلون انطاج كلبج وعفتي نرجوسة لحالها
جنت اخاف ابقى بالبيت بدونج وهسا رحتي وعفتيني
.
.
وبعد ما اشوفج ولا ابوسج ولا اشكيلج همي وتعبي لمنو اشكي جرحي هسا واني مجروحة بسبب غيابج دفنت وجهي بملابسها وابجي لحد ما غفيت
.
.
معتز: جنت بالاستقبال وشفت ماكو احد كلت اروح اتطمن على نرجس دخلت ما شفتها سألت اسماء عنها
.
.
اسماء: مريضة وبقت فوك
معتز:شبيها وليش ما كلتي ناخذها لدكتور لمستشفى
اسماء: مابيها شي هبوط خفيف
معتز: روحي شوفيها وتعاي طمنيني
.
.
راحت تشوفها واني انتظرتها تحت رجعت وجها اصفر  اني رجال شكبرني من شفتها هيج كوة بقيت واكف كلت اكيد صاير شي للبنية ومحد يدري بيها
.
.
اسماء: ماكو بالغرفة
معتز: شلووووون ماكوووو لعد شنو فايدتكم هنااااا
اسماء: والله ما شفتها من نزلت بس اكيد هسا بالملحق
معتز: ادعي لربج تكون بالملحق
.
.
طلعت من عندها رحت للملحق شفت الباب مفتوح دخلت داخل سمعت صوت بجيها بالغرفة من جهة ضايج لانها تبجي ومن جهة مرتاح ان ما بيها شي
.
.
تقربت عند الباب واسمع حجيها وكانها تحجي ويا امها وتشكيلها واحس كلبي انمرد عليها بقيت كاعد عند الباب واسمعها اجت اسماء اشرتلها تروح
.
.
شوية وهدات نرجس وراح صوت بجيها دخلت للغرفة نايمة مثل الطفل من يكون برحم امو مكرفصة جسمها وحاضنة الملابس ودافنة وجهها بيهن ولازمتها الشهكة
.
.
بعدت الملابس عن وجهها علمود لا يخنكنها وطلعت رجعت للبيت كلت لاسماء روحي ابقي يمها واتركي الشغل هي فورا تركتو وراحت عليها طمنت امي وام اسد عليها ورجعت للاستقبال
.
.
الوالد: وين جنت معتز
معتز: بالملحق
الوالد: شعندك بالملحق
معتز: سولفتلو الصار
.
.
الوالد: عاشت ايدك
عمي: والبنية هسا شنو مصيرها معتز
معتز: والله عمي ماعرف
.
.
عمي: ماعندها بس خوالها مو
معتز: ياريت خوالها عليهم اعتماد
عمي: واذا طلبو ياخذوها
.
.
معتز: لو تنكلب الدنيا ما اخليهم ياخذوها
عمي: بس ترا القانون وياهم اذا اشتكو عليكم ما تكدر تبقيها عندك
معتز: منا لوقتها الله كريم
.
.
حجينا شوية وجابولنا الغدا تغدينا وكضينا الوقت ويا عمي لان صار مدة ما شايفينو العصر اجو كم رجال كالو مانعرف المرحومة بس سمعنا الفاتحة عند ابو ميزر واجينا
.
.
(( ابوي معروف بالمنطقة باسم ابو ميزر الي هو اخوي المسافر))
.
.
تشكر منهم ابوي وحجالهم قصة ام نرجس وشلون اجت علينا وسبب الوفاة كعدو نص ساعة وراحو وكضينا اليوم بدون احداث مهمة لحد ما دخلنا للبيت بالليل ونرجس جانت مو موجودة وامي تكول باقية بالملحق ما تقبل ترجع
.
.
نرجس: كعدت لكيت نفسي بفراش امي تذكرت اني جيت للملحق جانت اسماء دا تقرا بكتاب وانتبهتلي من فزيت من نومي
.
.
اسماء: صح النوم يا حلوة
نرجس: صح بدنج
اسماء: يلا امشي وياي
.
.
نرجس: ما اروح اريد ابقى هنا
اسماء: شعندج تبقين هنا
نرجس: اريد اكمل حياتي هنا لحد ما تتحرر الموصل وارجع لبيتنا
.
.
اسماء: تحجين صدك
نرجس: اي صدك
اسماء: بس اهلي ما يقبلون
.
.
نرجس: لا يقبلون لا تخافين
اسماء: زين امشي كليلهم وارجعي
نرجس: روحي انتي كليلهم مرتاحة بالملحق وتريد تعيش هناك
.
.
راحت اسماء شوية ورجعت جايبة وياها غدا اكلت شوية وهي اخذت المواعين وراحت واجت امها وام اسد للملحق علمود يحجن وياي
.
.
الحجية: ليش باقية هنا نرجوسة
نرجس: اريد ابقى هنا اعيش بالمكان العاشت بيه امي
.
.
ام اسد: بنيتي ما يصير هيج انت بنية مايصير تبقين لحالج وانتي تعرفين الدنيا ما تتأمن حتى لو اهل معتز يمج بس اذا صار شي بالليل لا قدر الله ماراح يحسون عليج
.
.
نرجس: ما يصير غير الكاتبو الرب واني مقتنعة بقراري ومثل ما عشنا اني وامي كل هالمدة وما صار شي هسا راح اعيش اني والملحق الو باب من انام اقفلو وما علي كلشي
.
.
الحجية: اني راح اكول لمعتز والحجي
نرجس: ماشي
.
.
حاولن وياي واني قفلت انو ما ارجع بقيت لليل ومحد اجى واسماء من اخذت المواعين ما رجعت المغرب سويت عشى وتعشيت بالساعة 10 اندك الباب رحت فتحتو جانو معتز وابوه رحبت بيهم ودخلتهم داخل
.
.
الوالد: ليش باقية هنا بنيتي سامعة شي احد ضوجج لو لمحلج بشي احجي ولا تخافين من احد واني وياج لاخر نفس بصدري
.
.
نرجس: لا عمو بالعكس انتو ماكو منكم الرب يحميكم ويحفظكم لبعض بس اني اريد اعيش بالمكان الي عاشت بيه ماما
.
.
معتز: ماكو احد يسمعها كلام غير زينب
نرجس: لا تظلمها ما دخلها هي اني قررت هالقرار بدون اي سبب
.
.
الوالد: بس ما يصير هيج بنيتي انتي هسا مو وحيدة انتي بنيتي مثل اسماء ومن اكول بنيتي لا تعاطف ولا شي بالعكس اكولها لان انتي مثل اسماء بالنسبة الي
.
.
اعرف نفسي ما اكدر اعوضج عن ابوج وامج مهما سويت بس الي متأكد منو مستحيل اتخلى عنج مهما صار وراح ابقى سندج وحمايتج من بعد الله
.
.
نرجس: ببجية .. ما اعرف شلون اجازيك على كلشي سويتو الي اني وماما
الوالد: تجازيني برجعتج للبيت وتعيشين ويانا علمود يوميا الصبح اكحل عيني بشوفتج
.
.
معتز: سحبها لصدرو وانفجرت بالبجي وحتى اني تأثرت بكلام ابوي بعدها خلاها تجمع ملابسها وتاخذ من ملابس امها ذكرى الها علمود تنتقل للعيش ويانا
.
.
سكرنا الملحق وبقت ذكرياتو بداخلو ورجعنا للبيت وراحت هي واسماء جهزن غرفة خاصة الها جنا مخلينها للضيوف
.
.
نرجس: على كد ما جنت مصممة على قراري بس من حجى وياي ابو معتز احس فعلا اكو احد يسندني بعد فقدان ماما ومن سحبني لصدرو حسيت بيه الابوة الي بحياتي ما حسيتها
.
.
بعدها اخذت ملابس وكم قطعة من ملابس ماما ورحت اخذت غرفة الضيوف الي ببيتهم الي علمود ابقى عايشة وياهم
.
.
بهاليومين صارت دموعي على اقل كلمة تنزل وما اعرف راح اتعود على فقدان ماما لو ابقى كل عمري مكسورة هيج بس بوجود اهل معتز اكيد راح اكدر اقاوم
.
.
صارت الساعة 11 نزلت لكيتهم بعدهم كاعدين وكعدت وياهم جانو حتى اسد وابوه موجودين اني كعدت يم الحجية وهم صايرين بالصفحة الثانية وما يشوفوني
.
.
الحجية: هلا بنيتي لازم مو نعسانة
نرجس: بلى بس اريدج تحجين ويا عمو ياخذني باجر ازوج ماما اذا يكدر
.
.
الحجية: من عيوني غالية والطلب رخيص .. حجي نرجوسة تريد تزور امها باجر
الحجي: تدلل نرجوسة باجر من الصبح نروح اني وياج وتزوريها ونرجع
.
.
نرجس: شكرا الك هواي
الحجي: ما يحتاج تشكريني بنيتي هذا واجبي
نرجس: اني اترخص اروح انام علمود اكعد من وقت
الحجي: مرخوصة بنيتي
.
.
نرجس: رحت نمت ثاني يوم كعدت من الصبح سويت ريوك واجى الحجي ومعتز وامهم تريكنا ورحنا للنجف لان دفنو ماما هناك
.
.
جان الطريق طويل وماعرف ليش بعدوها هيج ومن سألت الحجي كال جدهم متوفي هناك ومشترين قطعة صغيرة علمود الي يموت يدفنوه هناك لهذا دفنو ماما هناك
.
.
من وصلنا شفت المقبرة شي ما ينوصف القبور على مد البصر بحيث ما تكدر تعدهن من كثرهن واكو قبور صغيرة مال اطفال واكو مال كبار
.
.
مشينا مدة ربع ساعة داخل المقبرة ووصلنا لقبر مكتوب عليه اسم ماما وتاريخ الوفاة قرو الفاتحة هم ومن خلصو تركوني لحالي وابتعدو شوية علمود اخذ راحتي وافرغ الي بكلبي
.
.
......... يتبع
هذا بارت طويل هدية لان البارت القبلو تفاعلو قوي واذا هذا صار عليه تفاعل الكم هدية ثانية ❤
حطولنا ارائكم وتوقعاتكم ❤
https://www.facebook.com/الكاتب-احمد-106346968747988/