حب في ازقه نينوى

البارت(47) حب في ازقه نينوى الكاتب#احمد

تصويت ومتابعه حتى توصلكم باقي البارت والقصص ❤
#حب_في_ازقة_نينوى
بقلم #احمد
البارت_47 
.
.
كملو تحظيراتهم وجانو يريدون يسوون حفلة تلبيس الذهب (نسميه نيشان احنا) وبعدها باسبوع او اسبوعين يسوون العرس
.
.
يعني على وقت فراغهم ويضبطون اوضاعهم وبعد زواجهم باسبوعين يتزوج جواد وصار وقت حفلة تلبيس الذهب
.
.
قبل بيوم اجو عائلة ابو اسد وراحت اسماء وبسمة لصالون التجميل طلبت مني اسماء اروح وياها بس ماكدرت اول شي ما يبقى احد بالبيت وهم عبدالهادي ماكدر اتركو
.
.
راحت الظهر ورجعت بعد العصر جانت الفرحة مبينة بعيونها دعيتلها بالتوفيق من كل كلبي كملنا اليوم طبيعي ثاني يوم هم هي وبسمة راحن للصالون واني جهزت نفسي وحطينا مكياج لبعض اني ونسمة
.
.
وعبدالهادي جهزتو ودزيتو لابوه علمود ما انخبص بلشن يجن النسوان الي جيران اهل معتز جواد وابوه راحو للمول وبقى بس معتز
.
.
اجت اسماء جانت لابسة فستان احمر وطالعة كلش حلوة بيه مع المكياج والتسريحة ووراها بنص ساعة تقريبا اجو اهل الولد جانت الدنيا عصر
.
.
دخل هو وخواتو كعد عند اسماء جانت منزلة راسها وركبتها شوية وتنكسر من كد مو منزلتو وهي طبيعتها خجولة وبهذا الموقف خجلها صار اضعاف
.
.
بدن خوات العريس يركصن ومكيفات باخوهن العريس جان شكلو الخارجي حلو ومبين عليه انو زين لان ابد ما رفع عينو عالنسوان وجان متوتر وبايدو كلينكس وبس يمسح بعركو من التوتر
.
.
من خلصن ركص البنات جبت صينية الذهب وانطيتها لوحدة من خواتو وهي وصلتها الو بدء يلبسها الذهب وايدو ترجف من التوتر
.
.
ابتسمت على موقفهم وهم واكفين مع بعض كلش حلوين من كمل الذهب اخذت الحلقة اسماء وشكد ما ايدها ترجف وكعت منها
.
.
ضحكت اخت العريس ورجعتها لاسماء وكوة لبستها الو وباسها من راسها وطلع وجها صار قطعة دم من الخجل بس لان طلع شوية رجعت طبيعية
.
.من خلصت الحفلة وراحو الغريبين صورنا ويا اسماء للذكرى وبعدها راحت بدلت ملابسها ورجعت وتسولفلنا شكد جانت خجلانة وشنو جان شعورها من لبسها الذهب ومن باسها
.
.
من خلصت الحفلة معتز راح للمول ويا ابوه وجواد وعبدالهادي رجعتو عند الحجية وام اسد واحنا البنات نظفنا البيت واتصلو اهل الولد عالحجي كالو بعد اسبوع العرس يعني الخميس الجاي
.
.
ومن اجى الحجي بالليل انطانا خبر وجواد كالو يتصل على اهل خطيبتو ويكوللهم ان الاحد تحظر نفسها علمود يسوون العقد ومعتز كال انتي هم حظري نفسج نروح وياهم
.
.
وفعلا يوم الاحد الصبح طلعنا اني ومعتز وجواد مرينا على اهل البنية واجت هي وامها ورحنا للمحكمة ومن وصلنا هناك اجى زياد علمود يكون شاهد على زواجهم ثنينا
.
.
وصارو معتز وزياد شهود على زواج جواد وجواد وزياد شهود على زواج معتز بلشو اول شي بعقد جواد دخل هو وخطيبتو للقاضي ودخلو معتز وزياد
.
.
شوية وطلعت البنت ودخلت اني وبلش القاضي بعقدنا وسألني اذا موافقة ولا لا كلتلو موافقة وكرر السؤال وكلتلو موافقة بدون اي ضغط او اجبار
.
.
بس الي استغربت منو من القاضي كال لمعتز شكد المقدم والمؤخر كالو مقدم 10 مليون ومؤخر 20 مليون وما ذكر المول ابد بس كلت هو ادرى بالي يسويه
.
.
من خلصنا طلعنا وزياد بارك لجواد وكال لمعتز كافي قابل كل يوم اكلك مبروك وضحكو كلهم وتشكرو من زياد وراح واحنا وصلنا خطيبة جواد ورجعنا للبيت
.
.
لكينا خطيب اسماء ماخذها يسوي عقد محكمة هي وام اسد يعني صدفة غريبة 3 عقود ببيت الحجي ورجعت هي الظهر مر اليوم طبيعي
.
.
من اجو بالليل الحجي صاحني وجانو كاعدين هو والحجية وابو اسد وام اسد وكال الحجي بزواجج انتي ومعتز ترا ما جنت راضي عن المول يكون مهر
.
.
لان جان هدية والمهر ما دخلو بالهدية لذلك مهرج راح يكون 10 ملايين وانتي بكيفج تريدين تستثمريهن بالمول تتبرعين بيهن تشترين اي شي تسوينو ما دخلنا
.
.
كلتلو اتبرع بيهن لمعتز ضحك وكال لو اريد اوافق على هالشي ما كلتلج المهم حط علاكة عالطاوة وكال هذا مهرج اخذيه وفكري كلش زين شنو تحبين تسوين بيهن بعدين قرري
.
.
حاولت ارفض وقنعوني كلهم ان هذا حقي ومستحيل يخلوني اتخلى عنو اخذتو وبست الحجي من راسو وكلش كبر بعيني لان ما استغل وضعي ووحدتي وغلس عالمهر
.
.
وفوك ما تخليت عنو لمعتز ما وافق من اجى معتز وصعدنا للغرفة عاتبتو علمود المهر كال اني تعمدت اسوي هيج لان مفكر بشغلة إن شاء الله بس يكون الوضع زين اسويها
.
.
حاولت اعرف منو وما جاوب باي شي نهائيا ثاني يوم جابلي خزنة صغيرة وكال كل ما يصير عندج فلوس حطيهن بيها حتى لو ربع ما تحتاجيه حطيه بيها
.
.
من صارت الدنيا ليل جنا كاعدين نتعلل كلنا بالصالة وجواد كال اكو شركة مالت تصدير واستيراد طالبة موضفين وباجر اروح اسجل بلكي يطلع اسمي
.
.
الحجي: ليش تسجل بيها
جواد: احسنلي يابة وانت ومعتز تبقون بالمول
نرجس: سؤال ولو حشري بس شكد حصتك من المول
.
.
جواد: شهريتي مليون وشوي
نرجس: والوضيفة شكد راتبك
جواد: بين 800-900 الف
.
.
نرجس: لعد ليش تسجل وتترك المول
جواد: المول اخليه لمعتز وابوي يستفادون منو اكثر
نرجس: ابوك ومعتز لو يريدون يستفادون اكثر جان كالولك سجل بس اذا طلعت يتورطون
.
.
جواد: باستغراب .. ليش يتورطون
نرجس: لان انت عندك خبرة بالسوك ويحتاجوك اكثر من غيرك
الحجي: حجي نرجس صحيح
.
.
جواد: انت شنو رايك عمي
ابو اسد: رايي من رايهم اكيد
جواد: لعد مثل ما تريدون
.
.
الحجي: انت تريد اكثر من مليون بالشهر
جواد: لا والله يابة مو هيج قصدي اصلا مليون زايد كلش
الحجي: لعد الغي سالفة التسجيل
.
.
نرجس: من خلال حجيهم فهمت ان مقسمين المول بينهم اني وجواد ومعتز كل واحد 20% والحجي 40% بس الطابق الاول
.
.
لان اني هم كل شهر اخذ تقريبا مليون وشوي من المول وفوك هاي دينار واحد مو حاطة وياهم بس وافقت لان معتز كال هذا هدية الج انتي وعبدالهادي
.
.
ومشاء الله المول صار شغلو اكثر من توقعاتنا كلنا لان بصراحة جنا متوقعين بالشهر اكثر شي يطلع مليون ونص مليونين بس لان موقعو كلش زين صارت حركتو كلش قوية والناس كلها تاخذ منو
.
.
وبعد هاي الليلة جواد لغى سالفة التسجيل واستمر ويا ابوه ومعتز بالمول ومعتز هم لغى سالفة العسكرية وما رجعلها من اجى يوم الخميس صار عرس اسماء
.
.
جان مثل اي عرس ثاني بس اكثر شي اثر بي من جانت تريد تمشي واجو ابوها اخوانها ودعوها اول شي ودعها الحجي ووصى زوجها عليها وهو كال بعيوني احطها
.
.
وباسها الحجي من راسها ونزلن دموعهم ثنينهم كاللها ما اريد دموعج تنزل طول ما خشمي يشم الهوا بس هي منو اليقنعها من كال هيج حضنتو وانفجرت بالبجي
.
.
كوة سكتوها اني كاعدة عالدرج اباوعلهم وابجي وبعد الحجي ودعها معتز وبعدو جواد بس اكثر واحد جان متأثر جواد رغم ما بجى بس مبين عليه كمية الحزن
.
.
وصار عندي فضول اشوف شراح يسوي قبل ما تطلع اسماء عدلتلها المكياج بسمة وراحو قبل ما يطلعون من البيت طب ابو اسد باركلهم وودعها وراحو
.
.
نزلت بسرعة وطلعت شفت باب الاستقبال مفتوح باوعت داخلها جان جواد واكف كدام الشباك يباوعلهم ودموعو تجري ومو منتبهلي وكأنو اسماء بعد ما ترجع حتى معتز والحجي ما زعلو مثلو
.
.
تركتو وبعدت ما اريدو ينتبهلي من فرغ البيت دخل وصعد فورا لغرفتو ام اسد تعرفو كالت اتركوه ضايج على اختو تركت عبدالهادي عند ام اسد وعزلنا البيت اني وبسمة ونسمة
.
.
ومن اول يوم افتقدنا اسماء وجانت الحجية وياها ما رجعت لليل وثاني يوم الصبح راحو هي والحجي عليها والسبت عزمناهم لان ابو اسد جان يريد يروح ويرجع قبل زواج جواد
.
.
كعدت الصبح اني والبنات هن نظفن البيت واني وام اسد التهينا بالطبخ بالنسبة للحجية من زمان واكعة على ظهرها ومتأذية بسبب الوكعة لهذا ماتكدر تشتغل
.
.
ولان علاقتها كلش حلوة مع ام اسد وتحترمها كلش ام اسد تشتغل بدون اي تحسس او زعل ومن تشتغل الحجية تكعدها غصب عنها
.
.
قبل الظهر اجو اسماء وزوجها وابوه وامو دخلت هي وحماتها استقبلناهن وكعدت حماتها ويا الحجية وهي اجت ويانا للمطبخ
.
.
ام اسد: شلونهم وياج اسماء
اسماء: الحمدلله عمة بناتهم شوية متكبرات بس اعتقد لان غريبة عنهم وبعدهن مو متعودات علي
.
.
نرجس: وزوجج
اسماء: شايلني على كفوف الراحة وكلش يحبني
ام اسد: ماطول زوجج يحبج البقية مو مهمين
.
.
اسماء: اي والله عمة
نرجس: الله يسعدكم يارب
اسماء: امين ويسعدج حبيبتي
.
.
نرجس: من كملنا الاكل راحت اسماء للصالة وبلشت ام اسد تصب الغدا واني ويناتها نساعدها واجو اسد وجواد اخذو الغدا للزلم وراحو
.
.
عبدالهادي من الصبح عند الحجية حطينا غدانا وكعدنا نتغدا وغديت عبدالهادي وياي وجنا كلنا فرحانين بوجود اسماء بالاخص جواد مو منطي فرحتو لاحد
.
.
بقو عندنا لقبل المغرب وترخصو وراحو وجان باقي عرس جواد لازم نتحظرلو وهالمرة راح يكون عندنا يعني الا يطيح حظي بالشغل بس مو مشكلة يتدلل جواد
.
.
بالليل اتفقو ان يكون عرس جواد بعد اسبوعين يعني بعد 12 يوم يكون الخميس يسوون نيشان ويوم الاثنين العرس وثاني يوم راحو عائلة ابو اسد
.
.
واحس البيت صار فارغ واكثر وحدة افتقدتها هي اسماء تعودت عليها كلش وجنت من اضوج احجي وياها بس ماكدر اكول غير ربي يسعدها طول عمرها
.
.
مشت الايام سريعة الا اني احسها بطيئة كلش بسبب ضوجتي على اسماء جواد جان دائما يسأل الحجية اذا ناقص شي من جهازو ولا لا واذا ناقص يجيبو وياه لحد ما اجى وقت النيشان
.
.
اجو قبلها بيوم عائلة ابو اسد وبلشنا بالتحظيرات للنيشان ومعتز يكول اريدج تطلعين احلا وحدة بيهن وثاني اجت اسماء وراحو جواد واسد للحلاق
.
.
ورجع الظهر وصعد سبح ولبس ملابسو ونزل ماعرف هو جان حلو بشكل مبالغ بيه ولا لان اني احبو واعتبرو مثل اخوي اشوفو هيج حلو
.
.
بسمة ونسمة يتشاقن وياه يكولن حرامات رحت للغريبة وهو يضحك شاف عبدالهادي لابس قاط مثلو طلع تيلفونو وشغل اغاني ويركصون هو وعبدالهادي واحنا نضحك عليهم
.
.
ومعتز يكول اثكل راح تتزوج وهو ولا مهتم لحجيو من صار وقت النيشان رحنا عليهم من نزل جواد خليت عبدالهادي عند ابوه وصرت اني والبنات وراه
.
.
ودخلنا ونصفك ونهلهل صارت دخلة رهيبة كعد عند عاروستو وبلشن البنات بالركص بس اني من دونهن ماركصت كملنا النيشان ورجعنا والاثنين صار العرس
.
.
((ماراح اذكر تفاصيلهن لان ذكرتهن بعرس معتز ونيشان اسما))
.
.
اتفقو بعد عرس جواد نروح شهر عسل كلنا وطلبنا من الحجي والحجية يجون ورفضو وقررنا نروح للسليمانية 15 يوم او اقل ونرجع علمود الحجي والحجية
.
.
زوجة جواد جانت كلش زينة من خلصو الخطار بلشت بالشغل وياي وجانت صوتها ما يعلى بوجود اهل معتز وتشتغل وياي بكلشي اسويه
.
.
وسوالفها حلوة وماعندها لا تكبر ولا نفسية وكلش حبيتها جواد جان طاير عقلو بيها ومو مصدك من يخلصون عشى يروحون لغرفتهم ومكضين حياتهم مثل طيور الحب من يشوفون بعض يكضوها ابتسامات
.
.
قبل ما تبلش الجامعات بشهر رحنا للسليمانية كضينا احلى ايام حياتنا بيها نكعد الصبح نتريك ونروح للاسواق او الاماكن السياحية ونرجع بالليل
.
.
جان احلى 15 يوم بحياتي كلها عبارة عن فرح وونسة سرور (زوجة جواد) تكول ياريت نبقى هنا وما نرجع بعد قبل ما نرجع بيوم رحنا للسوك واخذنا هدايا للحجية والحجي واسماء وزوجها وعائلة ابو اسد ورجعنا
.
.
جنت ميتة شوق لبابا وماما من وصلت تركتهم ونزلت ركض جانت الحجية بالصالة حضنتها وابوس بيها وهي تضحك على تصرفي ولحكوني البقية
.
.
والحجي جان بالمول الولد بس بدلو ملابسهم وراحو للمول علمود يساعدون ابوهم من اجى الحجي بالليل اول وحدة استقبلتو اني
.
.
سلمت عليه وبستو من راسو ودخلنا داخل شوية واجو اسماء وزوجها احسها ضايجة سألتها كالت متوهمة وما حجت شي كلت يجوز لان تشتاق لاهلها
.
.
او يجوز اكو موضوع بينها وبين زوجها ما اريد اتدخل بشي ما يخصني وزعنا الهدايا للكل وبال 11 راحو اسماء وزوجها
.
.
وبعد عدة محاولات عرفت ان معتز دا يخليني اجمع الفلوس علمود من يصير عندي مبلغ زين يفلش محلات بابا ويفتح بمكانهن مول صغير ويخلي سعد اخو هند يديرهن
.
.
وبصراحة عجبتني فكرتو بس جنت خايفة انو مايكون منو فائدة وكال معتز ماطول من جانن محلات مكفياتكم فاكيد من يصير مول يكون حركتو احسن من المحلات ووافقت على كلامو بس بعد هواي لحد ما يجي وقتهن
.
.
مشت الايام لحد ما بلشت الجامعة سرور جانت مرحلة رابعة تربية رياضيات يعني تدرس نص سنة وتروح تطبيق شهرين ثلاثة وتخلص
.
.
جواد جان معارض فكرة الدوام لسرور بس ماعندو مشكلة انو تكمل دراستها بس طول ماهو موجود ومو محتاج مستحيل يخليها تشتغل
.
.
واي رجال بمكانو راح يتصرف نفس تصرفو لان كلش يغار عليها وفوك هاي رجولتو ما تسمحلو يخلي مرة تصرف عليه
.
.
اني رجعت اداوم مرحلة ثانية سجللنا الحجي ويا ابو الخط القديم وصارت سرور بمكان اسماء جان مرات يجي معتز يزورني بالجامعة
.
.
مرة من المرات طلعت من المحاضرة لكيت معتز كاعد ينتظرني ووياه عبدالهادي عبدالهادي من شافني اجى ركض علي كلتلو هلا بوليدي الحلو وبستو
.
.
معتز: مو كافي بوس ترا مو شبع
نرجس: ليش تغار من وليدي
معتز: لج اغار عليج من نفسي تريدين ما اغار من ابني
.
.
نرجس: شعجب جبتو وياك
معتز: شفتو ضايج وجبتو
نرجس: هسا من تريد تروح يبجي علمودي
.
.
معتز: املص اذانو اذا فكر يبجي
نرجس: يمة وليدي بابا يخليك بدون اذان
عبدالهادي: بابا هيج اااخ ( بابا يسحب اذاني وتوجعني)
.
.
نرجس: ههههههه اروحلك فدوة انت وبابا
عبدالهادي: ماما لوح بيت ( نروح للبيت)
نرجس: اي ماما نروح للبيت بس مو هسا
.
.
معتز: شكد بعد للمحاضرة الثانية
نرجس: ١٠ دقايق
معتز: انتظريني لعد
.
.
نرجس: راح معتز عرفتو يريد يجيب عصير واجت سرى شافت عبدالهادي وكعدت تلعب وياه من رجع معتز استأذنت وراحت وقبل ما تبلش المحاضرة راحو معتز وعبدالهادي
.
.
وفعلا عبدالهادي ما بجى يمكن لان ويا معتز وهو متعود على معتز من خلص الدوام رجعنا اني وسرور لكيت عبدالهادي متغدي ومنومتو الحجية بالغرفة
.
.
............ يتبع
لايك وتعليق حلو مثلكم ❤
حطولنا ارائكم وتوقعاتكم❤
اسف اذا البارت اليوم ما عجبكم بس وضعي الصحي متخربط وكوة كتبتو علمود ما اقطع عنكم ❤