حب في ازقه نينوى

البارت (22)حب_في_ازقه_نينوى الكاتب#احمد

ال الف واحد الي يقرونها حطولنا لايك ما تخسرون شي ❤

#حب_في_ازقة_نينوى
بقلم #احمد
البارت_22
.
.
نرجس: كعدت المغرب لكيت الحجية بالصالة وعندها جواد والحجي واسماء وبشرتنا ان زينب حامل ومودينها على الدكتور من جنا نايمين
.
.
فرحت كلش لمعتز والها لان هي صاير خوش بنية وما شفت منها شي مو زين من رجعها معتز وما ضوجتني ابد
.
.
ومن شفت معتز فرحان هيج فرحتلو بعد اكثر وضحكنا على شقى جواد وامو ومن انتهت الحفلة نزلت زينب وتعشينا وتعللنا لحد وقت النومة ونمنا
.
.
كعدنا ثاني يوم الصبح نزلت اسوي الريوك لان اسماء تدرس وزينب حامل كلت خطية ما اريدها تتعب كملتو بين ما كعدو ونزلو
.
.
اني اعتبرت نفسي منهم وبيهم وهم كذلك حاسبيني مثل اسماء ورا الريوك جواد راح للمحلات والحجي بقى وكال راح يجون بيت ابو رعد علمود يسلمون على زينب ويتطمنون عليها
.
.
معتز راح جاب نواقص الغدا وبلشنا بالغدا اني وام معتز جانت هي تطبخ واني اساعدها بال 10 الصبح اجو سلمو وكعدو بالصالة وكعدت زينب وياهم
.
.
ومن قرب يخلص الغدا راح الحجية واني كعدت اسوي زلاطة واجت اسماء تساعدني لان بقيت لحالي والحجي جان متوقع ابو رعد يجي بس لان زعلان على زينب ما اجى بس امها واختها اجن فالحجي قرر يتغدا ويروح للمحلات بمكان جواد
.
.
قبل ما نحط الغدا شلت لجواد حصتو وحطينا الغدا وكعدنا نتغدا كلنا بالصالة وام زينب عبالها اني جنت اطبخ لحالي لان الحجية ما تأخرت بالمطبخ بعد ما اجت علينا
.
.
ام زينب: شبيه اكلكم
الحجية: شبيه
ام زينب: مو طيب كأنو اول مرة تطبخ نرجس
.
.
الحجية: بس مو نرجس طبخت اني طبخت
ام زينب: ها لا جاي اتشاقة وياكم عاشت ايدج كلش طيب الاكل
.
.
الحجية: ههههههه عبالي بيه شي الاكل
اسماء: بصوت ناصي .. نرجوسة شو امي صايرة ما ترحم البارحة قصفت جواد واليوم زينب
.
.
نرجس: من كالت هيج اسماء انتبهت لام زينب وجهها صاير احمر من الفشلة وماكدرت الزم ضحكتي بس الحمدلله غصيت ومحد حس بضحكتي جان افتشلت
.
.
الحجية: بسم الله هاج ماي
ام زينب: على كيفج اكلي شعندج مستعجلة
اسماء: لا عمة اني ذكرتها بطالبة جانت ويانا بالمدرسة وجهها مثل الطماطة وتفشل نفسها دائما
.
.
ام زينب: وما لكيتي وقت تتذكرين بيه الا على الاكل
اسماء: مو بعد الغدا انساها وتصير السالفة مو حلوة
الحجي: كافي اسماء وقت اكل احترمو النعمة
.
.
نرجس: رجعت فشلتها اسماء مرة ثانية اني بس واحد ينفخ علي انفجر بالضحك عليها اخذت قطعة خيار وحطيتها تحت لساني وضغطت عليها بلساني علمود اسيطر على نفسي وما اضحك
.
.
ومن راحت الضحكة كملت اكلي عالسريع قبل ما يصير موقف ثاني هالمرة ماكدر اكمل الاكل لان اعرف نفسي راح انفجر بالضحك
.
.
وهمزين خلص الغدا على خير وما صار موقف مضحك بعد بس كل شوية اسماء تندار علي وتبتسم
.
.
من خلصنا غدا راح الحجي للمحلات ومعتز راح وياه واجى جواد جان كاعد بالصالة يحجي ويا ام زينب واني جهزتلو الغدا واخذتو وسمعتهم جانو يحجون
.
.
جواد: يابة كون تجي لمعتز وحدة مثل خلقة نرجس اخلي ابني يتزوجها لو اكبر منو ب 10 سنين
ام زينب: لا بنت زينب علي تطلع
.
.
جواد: لعد ما نريدها لا اني ولا ابني هههههه
ام زينب: ليش اني شناقصني علمود ما تريد لابنك وحدة تشبهني
.
.
جواد: المشكلة مو بيج عمتي المشكلة بابني الهتلي هو مثل عمو معتز يفقد عالصاكات وبالاخص المسيحيات ههههههه
.
.
نرجس: حطيت الصينية لجواد ورجعت واني كوة كاتمة ضحكتي مع دخلتي للمطبخ انفجرت بالضحك واسماء مو فاهمة الموضوع بس تضحك على ضحكي
.
.
اسماء: شبيج تخبلتي
نرجس: مو كادرة بطني كامت توجعني
اسماء: شكو فهميني
.
.
نرجس: حجيتلها الي سمعتو وكعت بالكاع من الضحك وتكول ام زينب بعد تحرم توصل لبيتنا من كملنا غسل المواعين وتنظيف المطبخ راحت اسماء تدرس
.
.
واني رجعت المواعين الي اكل بيهن جواد والستكانات وغسلتهن شوية واجتني اسماء بس مبين عليها خايفة وتتلفت كلتلها شبيج
.
.
اسماء: ديري بالج على نفسج هالفترة
نرجس: يا ساتر خوفتيني شبيج
اسماء: ام زينب تريد توكعج بمصيبة
.
.
نرجس: وليش تريد تسوي هيج
اسماء: هستوني جنت فوك وسمعتها تكول لزينب خلصي منها بس زينب رفضت
.
.
نرجس: ماطول زينب رفضت ماتكدر تسوي شي هي
اسماء: ماعرف بس امانة نرجوسة انتبهي لنفسج
نرجس: وليش خايفة هيج منها
.
.
اسماء: اعرفها حية وحقيرة اذا ما تسوي مصيبة ما ترتاح وكل هالمصايب الي دا تصير بسببها
نرجس: يا مصايب
.
.
اسماء: زواج زينب وتحريض عمي وغيرها كلو بسببها
نرجس: شدخلني بيها انا واثقة انو الرب راح يوكف وياي ضدها وماراح تكدر تسويلي شي
.
.
اسماء: الله يسمع منج بس من اليوم اي شي يصير وياج احجيلي لا تبقين ساكتة
نرجس: تمام .. بس ليش زينب رفضت
.
.
اسماء: ماعرف بس اكيد علمود معتز ما يطلكها او يرجعها على اهلها او يجوز شافتنا كلنا نحبها وتغيرنا وياها لان صارت حبابة وما تريد تخرب على نفسها
.
.
نرجس: تمام
اسماء: يلا اني اروح اكمل دراستي
نرجس: تمام باي
.
.
رغم مو مهتمة لام زينب بس استغربت ان زينب رفضت توكعني بمصيبة يلا بعد احسن بلكي تكون احسن من امها وما تفكر بالمشاكل مثلها
.
.
بقن ام زينب واختها لقبل العصر وراحن واجت زينب تشكرتني انو قمت بواجب اهلها كلتلها ما سويت شي وراحت نامت واني هم شفت ماعندي شي رحت درست احياء للمغرب
.
.
نزلت لكيت الحجية دا تسوي العشاء وساعدتها زينب ما عافت الشغل كسل بس الدكتورة كايلتلها لان اول حمل الها يكون صعب ولازم تبقى مرتاحة وما تتعب لان يأثر عليها
.
.
لهذا خايفين عليها وعلى الطفل هم خطية فرحانة بيه هي ومعتز لهذا خليناها تبقى مرتاحة اجو معتز وابوه من المحلات كعدنا نتعشى
.
.
معتز: بعد باجر نلتحق للموصل
الحجية: ليش تروحون للموصل
معتز: اتصل علي زياد اليوم وكلي ناقلينا لخط الصد
.
.
الحجي: مو اليوم كلو انت وياي ايمتى اتصل
معتز: من جنا بالمحلات اتصل وانت جنت ملتهي
الحجي: وانت شنو قرارك
.
.
معنز: قراري واضح باجر إن شاء الله اتوكل
الحجي: الله يحفظك ويرجعك بخير وسلامة بس انت مو سويت نقل ودوامك حاليا ببغداد
.
.
معتز: اي صحيح يابة بس تعرف الدولة انت ما تنحزر كل يوم قرار شكل
الحجي: تروح وترجع بخير وسلامة
.
.
معتز: انتبه لامي دا تبجي .. شبيج يمة
الحجية: خايفة عليك يا يمة
معتز: لا تخافين يمة اني رايح ادافع عن وطني
.
.
الحجية: ليش ما تعوف الدوام هاي عايشين من المحلات والله كافينا
.
.
معنز: يمة صدك تحجين اذا اني اكول ما دخلني والثاني ما يتدخل والثالث يمنعوه اهلو لعد منو يدافع عالعراق قابل النسوان تطلع تدافع عنو
.
.
جواد: معتز وياه حق ولو ما انتي وابوي من باجر اروح بالحشد
الحجي: انت ابقى اني ماكدر اوفر طلبات البيت واشتغل بالمحلات لحالي وانت لازم تبقى علمود تساعدني
جواد: وهو هذا الي ما يخليني اعاند يابة
.
.
معتز: جنت بالمحلات وخابرني زياد كلي عرفت اهلي راح يضوجون ومن ضمنهم زينب بس ما يصير الا الكاتبو الله
.
.
انطيتهم خبر بالليل وثاني يوم حلقت وجهزت نفسي علمود التحق وماعرف هالمرة شكد راح ابقى وراح يطلعون كل الراحة الشفتها ببغداد مني ههههههه
.
.
من اجى وقت الالتحاق توجهنا للموصل واحنا ندعي الله ينصرنا عالدواعش ونرجع بخير لاهلنا وناسنا وصلنا لخط الصد الدنيا ضهر
.
.
والوضع بهدلة لاخر حد لان لا غرف ولا مكان تكعد بيه مجرد منطقة فارغة وساتر يحمينا من الطلق بالليل الجندي وين ما لكى مكان تمدد ونام
.
.
هذا الي نام بسيارة وهذا الي نام على الهمر وهذا الي نام بالكاع والي واجبو بالليل هذا الله كتبها عليه لان بالليل ما ينام وبالنهار حارة يعني يتورط ورطة
.
.
اني وزياد ومنتظر اتفقنا كل يوم يصير الواجب الليلي على واحد ومن تصير الدنيا ليل نبقى مع بعض لحد ما يصير وقت النوم واحد يلزم واجب للصبح وثنين ينامون علمود نشبع نوم
.
.
وبهاي الحالة جان وضعنا احسن بهواي من الي يلزمون ساعتين بساعتين لان لا يرتاح بالليل ولا يكدر ينام بالنهار بقينا على هالحالة لحد ما انطونا امر بالتقدم على مدينة الموصل
.
.
نرجس: من راح معتز الكل ضاج لان مكانو بعيد الحجي وجواد يحاولون ما يبينون هالشي كدامنا بس مو بكيفهم مبين من تصرفاتهم انهم ضايجين
.
.
اجى موعد نتائجنا جنت كلش مرتبكة رغم اعرف اجاباتي بس يبقى الخوف بقلب الطالب لحد ما يشوف الدرجات بعينو
.
.
كعدت الصبح تريكنا وخلصنا وغسلت المواعين عالسريع ورحنا اني والحجي علمود استلم نتيجتي من وصلنا هو بقى ينتظرني بالسيارة واني دخلت عالمدرسة
.
.
جمعونا صف الخامس بالشعبة واجت المديرة سلمتنا النتائج من شفت درجاتي طرت من الفرح اخذت نتيجتي ورحت اركض عالحجي وبشرتو
.
.
خطية اخذها مني وشاف درجاتي وحدة وحدة وهو يمدح بي ويشجعني وفرحان اكثر مني من رجعنا نزلت ركض وبشرت الحجية واسماء وزينب وكلهن فرحن بنجاحي وباركنلي
.
.
الحجي: وهسا ببالج هدية محددة لو اجيبلج على ذوقي
نرجس: وجودكم بحياتي احلى هدية بالدنيا
.
.
الحجي: يا بعد روحي هاللسان الي ينكط عسل بس مع ذلك لازم نجيبلج هدية النجاح فاذا ببالج شي كوليلي وانا ابوج
نرجس: لا ماكو ببالي شي
.
.
الحجي: متأكدة
نرجس: اي متأكدة
الحجي: تمام بنيتي يلا اني اروح للمحلات في امان الله
نرجس: الله وياك
.
.
جنت نعسانة كلش وتعبانة لان ما ارتاحيت بنومتي واليل كلو افكر بالنتيجة كلتلهم راح انام ولا تكعدوني لان تعبانة رحت لغرفتي بدلت وتمددت اريد انام واجت ببالي امي
.
.
شكد جانت تشجعني وتنتظر هذا اليوم سحبت ملابسها وحضنتهن وكمت احجي وياهن كأنهن امي
.
.
كلتلها .. ماما اليوم حققتلج الي تريديه واوعدج راح اتعب واحقق حلمج واجيب معدل يرفع الراس بالسادس بس ماما مشتاقتلج تمنيت اليوم انتي وياي وابشرج بنجاحي وتفرحين وتبوسيني مثل كل سنة
.
.
حجيت هواي حجي وذكريات صارت وياي بنجاحي بباقي المراحل الدراسية من جانت ماما وياي وجنت احجي وابجي ونمت والدمعة على خدي
.
.
مشت الايام بطيئة بغياب معتز والجو دائما متوتر بالبيت زينب بدت فترة الوحام بس جان وحامها غريب كلش بحيث مرات تخلي جواد يجيبلها ورق زيتون وتفورو بماي وتبقى تشم ريحتو لحد ما تنسطر واحنا نكضيها ضحك عليها ههههههه
.
.
ومرات تاكل زيتون وسكر ومرات رمان وملح وخطية جواد متورط لازم هو يجيبلها الي يجي ببالها اذا مو موجود بالبيت
.
.
اسماء خلصت امتحاناتها وجانت كلش فرحانة باجوبتها وتستاهل هي لان تعبت هواي على نفسها
.
.
خطية جانت بالامتحانات تنام ساعة لو ساعتين باليوم وتكعد تدرس واكلها وشربها كلو بالغرفة من خلصت امتحانات رجعت الساعة 10 الصبح ونامت نومة وحدة لثاني يوم الصبح
.
.
قبل ما يبدا الدوام ب كم يوم نشرو خبر ان ثاني يوم النتائج مال السادس خطية هي صار عدها توتر مو طبيعية وبقت تنتظر بدون لا اكل ولا شرب
.
.
اخير شي العصر لكيتها بغرفتها تبجي من الخوف والتوتر هديتها وطمنتها ونزلتها وياي خليتها تاكل شي لا تتخربط صارت الدنيا ليل واحنا نمنا وهي كاعدة وتنتظر
.
.
ثاني يوم الصبح كعدنا نزلت هي من فوك ومبين عليها السهر وما تقبل تاكل لو تشرب شي وماسكة التيلفون وتنتظر بحيث حتى الحجي وجواد توترو بسببها
.
.
جواد عندو لابتوب جابو وينتظر وياها الحجي ما راح للمحلات انتظرنا لحد ما طلعت النتائج هي شافت الرابط حتى اديها كامت ترجف تريد تدخل للرابط ماتعرف شلون
.
.
اخير شي كاللها جواد هسا اطلعها وبدا يطلعها بس من الضغط عالرابط تأخر وهي ماعت روحها من الخوف واحنا ننتظر طلعت اسماء مدرستها جان اسمها بالبداية
.
.
طلع اسمها جواد ودا يشوف الدرجات وتحولت نظراتو لعصبية وهو يشوف الدرجات اسماء من شافتو هيج كعدت بالكاع وكامت تبجي
.
.
الحجي: احجي جواد شبيك ساكت ناجحة لو لا وشكد معدلها مو حتى احنا كلوبنا خلصت
جواد: ناجحة ومعدلها 99.84
.
.
نرجس: هو كال هيج واسماء فقدت الوعي والحجية والحجي يلومون بجواد لان خوفها شالها هو وحطها عالقنفة وجبتلو كلاص ماي بلل ايدو ومسح وجهها وكعدت
.
.
اسماء: ببجية .. صدك اني نجحت
جواد: اي يالجبانة نجحتي وراح تصيرين دكتورة واجي عليج وتضربيني ابرة بطيبة كلبي ههههههه
.
.
نرجس: من الفرح حضنتو وتبجي وتضحك بنفس الوقت تخبلت رسمي هههههههه وفرحنا بيها فرح مو طبيعي
.
.
اتفقو هي وجواد يروحون من ثاني يوم يقدملها عند المكاتب على الجامعة ومن قدملها وتفرغت كامت تشتغل بالبيت بدالي واني ادرس للسادس
.
.
واي سؤال او شي ما افهمو تكعد هي تشرحو الي لحد ما افهمو والحمدللرب جنت بسرعة افهم عل شرحها والها فضل كلش جبير علي بمساعدتها الي بالدراسة
.
.
كملت عل هذا النظام الدراسي بعد نجاح اسماء بيومين جابلنا الحجي كل وحدة كلادة ذهب اني جانت على شكل قلب وبالوسط مكتوب الاء يعني اسم ماما واسماء مثل كلادتي بس بيها اسمها
.
.
فرحت كلش بالهدية وتشكرت منو وخليتها هي والصليب سوا ولبستها والحلو باهل معتز ابد ما فتحو وياي موضوع الديانة ولا كانو اني مسيحية وهم مسلمين
.
.
وحتى نسيت موضوع انو ماما اسلمت لان بوقتها ما جنت مركزة من الخوف وصعوبة الموقف
.
.
من بلشت دراستي الحجي وصى جواد هو يوديني ويجيبني لان اسماء مو وياي واني ماكدرت اعترض لان استحيت اكللهم اروح وارجع لحالي
.
.
وثانيا هم يعرفون مصلحتي واكيد يختارولي القرار الي يفيدني ومن رحنا اول يوم استرخص جواد من المديرة وكاللها نرجس راح يوميا تجيب التيلفون وياها وتخليه يمج علمود من تخلص دوام تخابرني اذا اني مو موجود
.
.
وهي وافقت على هالشي وما كالت شي واول يوم بس استلمت كتب ورجعنا للبيت وجان يوم ثلاثاء انتظرت للاحد وبلشت دوام
.
.
كعدت من الصبح جهزت ريوك الي ولجواد ومن خلصت كعدتو تريكنا وكملنا وطلعنا وصلني للمدرسة وهو طلع للمحلات واول ما دخلت رحت للمديرة انطيتها التيلفون وبلشت دوامي
.
.
صح جنت ضايجة لان اسماء مو وياي بس وجود صديقاتي الي درست وياهن السنة الراحت شوية قلل من ضوجتي وجانن كلهن يحبني لان ما الي دخل بغيري وما احب المشاكل
.
.
من خلصت دوام لكيت جواد ينتظرني من رجعت تغديت وبلشت دراسة وقررت انسى موضوع النوم الضهر وابقى ادرس
.
.
اسماء انقبلت بكلية الطب وجنا مقررين نسوي حفلة بالبيت علمود قبولها خامس يوم رجعنا من المدرسة اني وجواد من وصلنا للبيت طرت من الفرح ردت اكمز من السيارة
.
.
......... يتبع
حطولنا لايك وتعليق حلو مثلكم ❤
حطولنا ارائكم وتوقعاتكم
❤https://www.facebook.com/الكاتب-احمد-106346968747988/