حب في ازقه نينوى

البارت (6)حب_في_ازقه_نينوى الكاتب #احمد

ال 600 واحد حطو لايك ما تخسرو شي وانا اتشجع واكمل القصة ❤️
#حب_في_ازقة_نينوى
بقلم #احمد
البارت_6
راحو ضحاية وراحو شهداء وانهدرت دماء بدون اي سبب جان المواطن العراقي مثل فريسة گدام سلاح الصياد اذا صابها فهي ملكو واذا اخطأ فراح يفترسها حيوان مفترس
.

بعدها وصل خبر لكل الجنود الي تركو العسكرية ان داعش عندو اسمائهم فعندهم خيارين الاول يجون يسجلون توبة عدم الرجوع للعسكرية او الموت
.
.
وهاي جانت خطة لان داعش ماعندهم اسماء بس من اجو الشباب علمود التوبة وخوفا على حياتهم داعش سجلو اسمائهم علمود يسيطرون عليهم
.
.
والي راحو للتوبة جانو ياخذون منهم اما اسلحة او فلوس وكل واحد وحظو وصنفو بللعسكرية بهاي الخطوة تحققت احلام داعش بانهم يمسكون الناس من الايد التوجعهم لان ماكو بيت مابيه عسكري او يعرفون عسكري وعزيز على گلبهم ويخافون عليه
.
.
معتز: بداية الصيف يوم 10/6/2014 بدا داعش يقتحم الموصل واكثر شي اذانا هي التيلفونات كل عسكري تيلفونو ما يسكت اهلو والي يعرفوه يگلولو انسحب وهالشي كلش اثر على موقفنا
.
.
وفوگها القيادات كلها تركت من ضباط وقادة ومسؤولين بالسلك العسكري كلهم تركو الموصل
.
.
الغرافي الي جان مسؤول عن الجيش عرف انو راح يقتحمون الموصل وطلب دعم وعتاد من وزارة الدفاع وانطوهم سيارات عسكرية وكل سيارة وياها آحادية بس عاطلات وطلقة وحدة ما طلعت منهن وطلع هو بلقاء وحجى هالشي ومن شاف الوضعية هيج انسحب فورا
.
.
خلال 3 ايام سقطت مدينة الموصل 30 الف عسكري بين شرطة وجيش واتحادية كلهم انسحبو مقابيل 300 من داعش والاسباب معروفة وجانت الموصل مبيوعة قبل المواجهة
.
.
جان مشغول بالي على نرجس بكل فرصة اراقب بيتهم واگول هسا يطلعون وهسا يروحون لغير مكان وماكو جيرانهم اكثرهم طلعو وهم بقو واني محترك بنار ولو بايدي اروح اطلعهم غصب عنهم علمود لا يتأذون
.
.
بالاخير انسحبو الضباط المسؤولين علينا وانجبرنا ننسحب وياهم ولحد ما انسحبنا بيت اهل نرجس مقفول ومحد طلع منو او دخل عليه وجنت ادعي ربي يكونون طالعين بدون ما انتبه عليهم
.
.
طلعنا من الموصل وبكل متر نتراجع داعش يتقدم وتزيد المناطق الي يسيطر عليهن واكبر فاجعة صارت من سيطر على قاعدة سبايكر بقضاء بيجي والي راح ضحيتها 1700 شاب بعمر الورود انقتل بكل دم بارد
.
.
وانتشرت فيديوهات القتل بكل مكان وكانهم دا يلعبون مو يقتلون روح بعمر الورد تراجعت قواتنا لبغداد وانطونا استراحة كم يوم نروح نزور اهلنا
.
.
وصلت اهلي سلمت عليهم اريد اگول ل اسماء تحطلي ملابس بالحمام واجاني اتصال اخذت التيلفون شفتو رقم ام نرجس رديت بسرعة
.
.
نرجس: ببداية دخول داعش راح خالي عيسى على خالي الثاني ابو برجس وقبل ما يجي صار انفجار بنص الطريق واتصل علينا گال لماما
.
.
تعالو لبيت ابو برجس وماما تريدو بس يرجع علمود يوصلنا لان نسوان ومانگدر نطلع بهيج وضع وهو خايف وما يقبل يجي اخير شي طلعو من الموصل وتركونا لحالنا
.
.
انصدمنا صدمة عمرنا معقولة خوالي يتركونا لحالنا بهيج وضع امي جانت اذكى مني فورا قفلت البيت والشبابيك وبقينا داخل البيت ومن يصير قصف نختل جوا الدرج لحد ما يتحسن الوضع
.
.
عشنا برعب بس الله يعلم بيه بكل ثانية اگول عسا يجون خوالي وهسا يطلعونا وماكو فايدة كل الي نعرفو داعش دا يتقدم بالموصل وصوت الطلق والانفجارات كأنو فلم اكشن مو حياة واقعية
.
.
اندگ الباب وصعدنا اني وامي للطابق الثاني وشفنا كم واحد من داعش واگفين عند الباب انسحبت روحنا من الخوف گلت لامي خلي نفتح الباب بلكي يخلونا نطلع من الموصل گالت ديري بالج ماطول مانعرفهم ما نفتح
.
.
تركناهم لحد ما راحو جان عندنا مونة بالبيت وهذا الشي كلش ساعدنا علمود نگدر نطبخ وناكل بعد ايام رجعو الناس لبيوتهم بس خوالي ماكو خبر عنهم
.
.
اخر مرة حجينا وياهم طبو اربيل هم واهل هند وقسم من معارفنا المسيحيين ومنها انقطعت اخبارهم وماما زعلت عليهم وما حجت وياهم
.
.
داعش من سيطر على الموصل بالكامل اجبر المسيحيين يطلعون من المدينة ما جان الي حل ثاني غير انو اتصل بمعتز لذلك اخذت تيلفون امي وصعدت لغرفتي واتصلت عليه
.
.
نرجس: هلو معتز
معتز: هلا يروحي وينج انتي هسا
نرجس: بعدنا بالموصل
معتز: شنوووو ليش ما طلعتو ... سمعتها دا تبجي
.
.
نرجس: تركونا وراحو
معتز: منو تركج بس اهدي يا عمري واحجيلي منو تركج
نرجس: خوالي تركونا وراحو لاربيل حتى خالي عيسى الي طول عمرو عايش من خير ابوي تركنا وراح وياهم
.
.
معتز: حجيت وياها وافتهمت منها كلشي
نرجس: وهسا راح اسكر واكيد ما تشوفني لان راح نروح سبايا لداعش
.
.
معتز: اقسم بالله ما تروحين وخشمي يشم الهوا اني جايج
نرجس: الرب يخليك معتز لا تجي لا تحرك گلب اهلك بدون اي فايدة خلص هذا قدري
.
.
معتز: انقطع الخط احس دمي يفور من العصبية نزلت من غرفتي وطلعت خارج البيت ماعرف منين ابدي وشلون اروح وما اريد اتسرع وادخل للموصل واروح بيها ووقتها لا ابقى عايش ولا اگدر انقذها وبنفس الوقت خايف اتأخر عليها ويصير بيها شي
.
.
نرجس: سكرت منو واحس گلبي مقبوض فورا بجيت احس هاي اخر ايامي شگد ما نبقى داخل البيت الا ما يجي يوم ويدخلون للبيت بالقوة او يخلص المسواگ ونضطر نطلع من البيت
.
.
وقتها بس الرب يعلم شراح يصير بينا بقينا عايشات بخوف رهيب الناس بدو يرجعون للموصل وداعش مسوي احتفالات لان انتصر واخذ الموصل ونسى الجرائم الي ارتكبها بحق الابرياء من قتل وتفجير وترهيب
.
.
المسيح طلعو من الموصل بس اني وماما محد يعرف بينا موجودات بالبيت لان الناس من رجعو ما شافونا اجينا وماعدنا تواصل بس ويا اهل هند لهذا محد يعرف بعدنا بالبيت
.
.
جنت مرات اراقب الشارع من شباك غرفتي واحاول اطلع بس عيوني علمود محد ينتبه وجنت اشوف النسوان كلهن لابسات خمار اجباري
.
.
رجعت لتفكيري انو هالدين صحيح لو لا بس اكيد مو صحيح وين اكو دين يسلب حرية الاشخاص ويقتل ويخوف ويرهب ويهجر الناس
.
.
المسيح بعمرهم ما آذو المسلمين بس المسلمين طلعوهم من بيوتهم واخذو ممتلكاتهم معتز بعد اتصالي بيه ماعرف شصار عنو هند اتصلت اكثر من مرة وگلت لامي ما اريد احجي
.
.
مو كره بهند بس اني نفسيتي صفر ورصيد الخط صفر وما نحب نطلب من احد اني وامي ولو نگدر نطلع جان طلعنا وجبنا مسواگ ورصيد
.
.
معتز: اتصلت على زياد وحجيتلو وتخبل مثلي لان خوال نرجس تركوها بالموصل هي وامها گلتلو اني جايك ورحت عليه هو هم ببغداد عايش من وصلت عندو رحب بي ودخلنا عندو بالاستقبال نحجي
.
.
زياد: فهمني شلون تركوهن شبيهم لا عدهم غيرة ولا رجولة
معتز: والله ماعرف يخوي اني جنت مراقب بيتهم وما شفت احد طلع منو گلت يجوز طلعو واني ما منتبه الهم بس من حجت وياي نرجس تأكدت مو طالعين
.
.
زياد: وشتسوي هسا
معتز: لازم اروحلهم
زياد: تخبلت انت وين تروح وانت تعرف بنفسك تروح ما ترجع
.
.
معتز: لعد تريد اتركها تبقى لحد ما تموت من الجوع لو ياخذوها ذول الگوا… د
زياد: انت تعرف ان عدهم اسماء المنتسبين شلون تضمن ما تنمسك
.
.
معتز: عندك احد يزورلي هوية
زياد: عندي واحد بالنفوس بس ماعرف يكدر يدبر هالشي لو لا
معتز: وين هو نروحلو
.
.
طلعنا اني وزياد لبيت الولد واني ادعي الله يگدر يساعدني واخلصها من الوضع الي هي بيه وصلنا عند الولد وحجى وياه زياد
.
.
زياد: عقيل بدون مقدمات طويلة وماعرف شنو الولد هذا محتاجينلو هوية بمعلومات جديدة وقبل ما تسأل او تقرر اكو بنت هي وامها مسيحيات بالموصل واذا ما راحلهن هالكم يوم لو يموتن من الجوع لو يروحن سبايا لداعش
.
.
عقيل: والله ماعرف يا زياد تعرف هاي مسؤولية ومو بهالسهولة اگدر اسوي هالشي
زياد: يعني افهم من كلامك ما تگدر
.
.
عقيل: .. اتصل على صديقو ..
.
.
زياد: ها شصار وياك
عقيل: راح اگدر ادبرلك هوية بس اذا استخدمتها لغير شي اني وصاحبي نتضرر وبهالحالة تكون جازيت الخير بشر ولولا معزة زياد عندي مستحيل اسوي هيج
.
.
زياد: الله يعزك يخوي
معتز: مو معتز الي يسوي هيج
عقيل: انطيني صورة الك
.
.
معتز: ما عندي يصير تصورني هنا بالتيلفون
عقيل: تمام بس ثواني اجيبلك قميص
.
.
معتز: جنت لابس ملابسي العسكرية لان ما لحگت ابدل نزعت القميص العسكري ولبست قميص عادي من عقيل وصورني واتفقنا بالليل توصلني الهوية
.
.
تشكرت منو ومن زياد وباقي هسا الجزء الاصعب وهو شلون ادخل للموصل رجعت للبيت سألوني اهلي گلتلهم جان عندي موضوع مع زياد
.
.
سبحت عالسريع ورحت لغرفتي اتصلت على اصدقاء الي من الموصل جنت اعرفهم بالدوام ويشكون من داعش وان ماعندهم اسماء كلها كذب
.
.
واحد منهم جان صديق كلش مقرب الي وهو الوحيد الي گدرت اسألو اذا اگدر اطب للموصل لو لا گال حاول تدخل ويا الناس الي دا ترجع للموصل والافضل تدخل عن طريق الشمال لان اكو اتفاقية سلام بين الاكراد وداعش
.
.
تشكرت منو سكرت بالليل وصلتني الهوية باسم (فاضل جاسم عامر) السكن الموصل حي الوحدة ومرتبها كأنها حقيقية
.
.
جهزتلي جنطة ملابس وانتظرت الدنيا تصير صبح علمود امشي ومحتار شلون اقنع اهلي بروحتي وبالاخص امي نمت يمكن ساعة او ساعتين وگعدت جهزت نفسي واخذت فلوس وياي واخذت جنطتي ونزلت لگيتهم بتريگون
.
.
الوالدة: ها وليدي وين رايحة
معتز: للموصل إن شاء الله
الوالدة: عزا العزاني شيوديك للموصل
.
.
الوالد: شعندك بالموصل معتز انت تعرف انها سقطت
معتز: خلوني احجيلكم ولا يقاطعني احد .. حجيتلهم مختصر عن نرجس وامها وليش اريد اساعدهم
.
.
الوالد: لعد توكل والله يحرسك
الوالدة: وين يتوكل تدزو للموت بهاي السهولة
.
.
الوالد: محد يموت الا بيومو واذا مات عالقليلة يموت وهو رجال  ومثل ما هو تطوع علمود يدافع عن هذا البلد ويحمي سكانو هسا اجى الوقت الي محتاجينو هالنسوان الثنين ومستحيل اوگف بوجهو وامنعو بالعكس اشجعو واگلو الله يحرسك وترجعلنا بالف سلامة إن شاء الله
.
.
معتز: الله يسلمك يابة واني ما محتاج بس دعواتكم
الوالد: اخذت وياك فلوس
معتز: وياي مليون
.
.
الوالد: اخذ من يمي مليونين وروح صرفهن ورق ولا تخليهن ويا بعض حتى بجواريبك وزعهن علمود اذا صار وياك شي يبقى عندك شي منهن
.
.
معتز: امي گضتها بجي صحيح اضوج من اشوفها تبجي بس هاي المرة تختلف مستحيل ابقى بالبيت واترك نرجس وامها بهيج وضع
.
.
رحنا اني وجواد صرفنا الفلوس وسويت مثل ما گال ابوي وطلعنا للگراج وجواد وياي من وصلت اخذ هو السيارة ورجع
.
.
لگيت سيارة تاخذني لاربيل بس طلب 70 عالنفر الواحد ويگول ماكو بانزين لان توقف مصفى بيجي بعد ما سيطرو عليه الدواعش
.
.
والطريق طويل وخطر ولازم ياخذنا لديالى ومن ديالى على اربيل لهذا المبلغ غالي حاولت وياه سواه ب 60 وتوكلنا على الله
.
.
جان الطريق خالي مجرد تمشي بيه تحس بخوف ورهبة الهوية الجديدة وياي هي وهويتي القديمة لان من ادخل لاربيل ماراح استخدم الجديدة
.
.
السايق جان هم خايف مثلنا بس مجبور يشتغل ويعيش عيلتو ومن القلق محد يحجي بس ندعي نوصل بخير وسلامة
.
.
زياد واهلي كل شوية يخابروني ويسألون اتصلت على رقم ام نرجس حصلتو بس محد يرد حاولت كم مرة ونفس الحالة گلت اكيد خايفين
.
.
وصلنا مدخل اربيل لگينا الامة مگلوبة من كثرة السيارات والناس وگوة يدخلون الناس الا يتأكدون منهم ويدخلوهم اتصلت على زياد وگلتلو يخابر خالو اذا يگدر يدخلني
.
.
زياد: انت وين هسا
معتز: بالمدخل مال اربيل
زياد: انتظرني هسا اخابرو وارجعلك
معتز: تمام
.
.
سكرت منو انطيت السايق اجرتو ورحت امشي للمدخل شوية واتصل زياد وانطاني رقم خالو گال اتصل واحجيلو يريد هو يحجي وياك اخذت رقمو واتصلت عليه
.
.
گلي .. ابقى وياي عالخط .. طلعلي انتظار وتركتو وكملت طريقي صرت قريب عالمدخل گال اكو واحد ويانا بالمكالمة انطيه مواصفاتك
.
.
گلتلو .. لابس بنطرون ازرك وقميص اسود شعري خفيف ومحلق لحيتي بس شواربي لا .. انتبهت واحد واگف بالسيطرة ويدور بين الوجوه
.
.
تقدمت عليه وگفوني الجنود اشرتلهم عليه واجى اخذني جيكو اسمي ومعلوماتي ودخلت وبعدها رحت على المدخل الي يودي للموصل
.
.
من الواحد يطلع من الاقليم ما يدققون عليه مثل الدخول من طلعت شلت الهوية القديمة تحت الملابس الي بالجنطة وطلعت الهوية الجديدة
.
.
وشفت گدامنا سيطرة الدواعش ودعيت بگلبي انو ما انمسك علمود اكدر انقذها اني رجال ما علي شي اذا اخذوني ابسط شي يسووه يقتلوني واعتبر شهيد بس النسوان كلش صعبة
.
.
نرجس: صارت المونة قليلة وشفنا بالتلفزيون انو الدواعش اخذو بيوت المسيح يسكنون بيهن او يسووهن مقرات الهم وهالشي خوفنا ان يقتحمون البيت واحنا بيه
.
.
الاء: شوفي نونو اذا صار واقتحمو البيت تصعدين لغرفتج وتقفلين الباب
نرجس: لا ماما شلون ابقى لحالي واتركج والله اموت
.
.
الاء: شوفي اني راح اگللهم مقفولة ومضيعة المفتاح وانتي ابقي داخلها من تصير الدنيا ليل اطلعي وانهزمي بلكي تلگين ناس زينين ويگدرون يساعدوج ولا تنسين من تطلعين البسي حجاب ولفي شال على وجهج
.
.
نرجس: وشلون اتركج لحالج
الاء: اني راح احاول انهزم اذا گدرت بس اذا اجيتي وياي انتي وشافوج هيج حلوة وصغيرة مستحيل تكدرين تخلصين منهم وماراح اگدر انهزم بسببج
.
.
نرجس: كأني جنت محتاجة خوف لو قلق علمود امي تكملها اعرفها تريد مصلحتي بس مجرد التفكير بالموضوع يسببلي قلق وخوف مو طبيعي
.
.
بس من گالتلي انهزم انجبرت اوافق جان يوم جمعة ومن الاشياء الي سووها انو ممنوع منعاً باتاً يشوفون شاب مو رايح للصلاة اذا طلع من البيت وقت الصلاة ومو رايح للجامع وشافوه يتورط
.
.
وجنت اشوف الي ما يريدون يروحون للصلاة ينهزمون قبل الظهر ومستغربة اذا هم مسلمين ليش ينهزمون من العبادة
.
.
صعدت فوگ السطح وصرت ورا التانكي علمود محد يشوفني واستمعت للخطبة حسيت صوت الشيخ هالمرة مختلف وطول الخطبة يكرر اللهم انصر المجاهدين وانصرنا عالكفار واخوانا المجاهدين
.
.
ولان ماعرف الدين الاسلامي تلخبطت علي الامور وبالاخير من وصل للدعاء گال .. اللهم انصرنا على الشيعة واليهود وارزقنا الصلاة في القدس
.
.
وقتها عرفت انو واحد من الدواعش وهو دا يخطب بدال الشيخ معناها عندو علم اكثر من الشيخ (هالشي جان بتفكيري)
.
.
نزلت تحت عند امي وعاتبتني لان صعدت تخاف لا احد يشوفني تغديت وخلصت ومن صارت الساعة 2 الظهر صعدت لغرفتي اريد انام
.
.
لان ماعرف شسوي لهذا اضيع الوقت بالنوم ومن وصلت لغرفتي سمعت هوسة خارج البيت بالشارع باوعت من طارف الشباك
.
.
شفت عدد من الدواعش ووياهم قسم من اهل المنطقة وواحد من اهل المنطقة يأشرلهم على بيتنا يگول .. هذا البيت لمسيح ومابيه احد اخذوه
.
.
من گال هيج احس رجليني تيبسن اريد اركض اگول لامي ماگدر اتحرك سمعت صوت وراي انداريت شفت امي وجها اصفر
.
.
سكرت باب الغرفة وگالتلي مثل ما گلتلج رحت قفلتو من داخل وسرگتو بالسرگي علمود ما ينفتح بسهولة رجعت عند الشباك شفت ثنين دا يدفرون بالباب يريدون يدخلون والبقية راحو
.
.
دموعي تجري عشرة عشرة وخايفة على امي لان راح يلگوها والخوف مو طبيعي واني اشوفهم يريدون يدخلون اخير شي انكسر الباب گوة لحگت احط ايدي على حلگي واكتم صرخة الخوف دخلو وجانت امي بالمطبخ وقافلة الباب كسروه ودخلو
.
.
الداعشي:  منو انتي وشعندج بالبيت
الاء: اني صاحبة البيت
الداعشي: البيت هذا لمسيح
.
.
الاء: هو اني صاحبتو وزوجي متوفي
الداعشي: وليش ما طلعتي مو انطيناكم خبر
الاء: ماگدرت اطلع لان خفت وماعندي غير هالبيت اگدر امن على نفسي بيه
.
.
الداعشي: منو ساكن وياج
الاء: وحدي
الداعشي: گال لصديقو .. روح فتش البيت
.
.
نرجس: راح فتش البيت من بداية الطابق الاول لنهاية الطابق الثاني وجانت امي تحت من سمعتو يريد يفتح باب غرفتي گعدت بالزاوية وكاتمة على صوتي بايدي وابجي
.
.
الداعشي: من فوك يصيح .. هاي الغرفة ليش مقفولة
الاء: هاي لبنتي المتوفية من ماتت قفلتها وضاع مني المفتاح
الداعشي: لصديقو .. اكسر الباب لازم نفرغها
.
.
الاء: لا والعذراء هن الذكرى الوحيدة منها
الداعشي: ضربها راشدي كل قوتو .. من تحلفين احلفي بالله وانتي اصلا راح تروحين ويا السبايا الي عند الامير
.
.
نرجس: بدا صديقو يكسر بالباب واسمع صوت امي تترجاهم ومايفيد گلوبهم من حجر وحدة من الضربات كسرت القفل وبقى السركي
.
.
اسمعو يگول لصديقو الباب قوي واجو ثنينهم دفروه مرتين والثالثة انكسرت السرگي ومع الكسر صرخت ومن شافوني صفنو علي نظارتهم جانت مقززة بكل معنى الكلمة
.
.
امي واگفة وراهم اجت ركض تريد تدخل عندي واحد منهم سحبها وضربها راشدي ويضرب بيها لان جذبت عليهم واني من الخوف حتى ماگدر اگوم علمود احاول ادافع عنها الي دا يضرب امي رفع راسو علي وگال
.
.
الداعشي: عبالج تگدرين تضميها مو تعال اخذها تحت واتركلي البنت هاي غنيمة الي هي والبيت وراح تكون جارية الي
.
.
نرجس: راح الثاني سحب لمي نزلها تحت وتريد بس تنقذني ما تگدر اني گاعدة بزاوية الغرفة بس اتابع وابجي اجى الداعشي نزع قميصو والبلوزة الداخلية گدامي
.
.
اني فورا غطيت عيوني واسمعو يضحك ويگول هسا تشوفين كلشي اجى سحب ايدي وقاومتو وسحبتها منو رجع سحبني من شعر وگفني مقابيلو واني مسكرة عيوني لان اول شي نص جسمو عاري ووجهو احسو مخيف
.
.
فتحت عيوني شفت عيوني تتجول بمعالم جسمي ونظراتو بحياتي مو شايفة هيج نظرات مقززة دفعني عالسرير وصار فوگي ويسحب بملابسي واني اقاومو وصراخي وصوت بجيي احسو عبر الموصل من الخوف وكل ما يمسك مكان بجسمي ادفع ايدو واسحب ملابسي
.
.
اخير شي طلع خارج الغرفة لميت نفسي فوگ السرير واحس حلگي يوجعني من كثر الصراخ وهو كانو ثور قوي كلش شوية ورجع بايدو حبل واجى ربط ايديني ورجليني بزاوية السرير وحاولت اقاوم ماگدرت
.
.
من خلص مسك بلوزتي من عند الحلگ وشگها بالطول وحط ايدينو النگسات على بطني وعيونو مفتوحات على كبرهن على جسمي
.
.
وقتها عرفت انو شرفي راح على ايد انگس ما خلق الرب عشت عمري كلو احافظ على نفسي وشرفي وهسا دا يروح گدامي واني ماگدر اسوي شي
.
.
……… يتبع
حطولنا ارائكم وتوقعاتكم شراح يصير بمعتز واذا وصلها شنو ردة فعلو راح تكون

https://www.facebook.com/الكاتب-احمد-106346968747988/