حب في ازقه نينوى

البارت(45) حب_في_ازقه_نينوى الكاتب#احمد

تصويت ومتابعه دتوصلكم باقي البارتات والقصص❤
#حب_في_ازقة_نينوى
بقلم #احمد
البارت_45
.
.
نرجس: كلتلو يلا وليدي نام انت وابنك كال ماشي ماما وتمددت وحطيت عبدالهادي بيناتنا ولان معتز جسمو ضخم صرنا اني وعبدالهادي ثنينا بحضنو باسنا ثنينا ونمنا كلنا مع بعض
.
.
معتز: ثاني يوم كعدت الصبح شفت نرجس وعبدالهادي بحضني وجانت نومتهم بحضني ويا بعض كلش حلوة كانهم ابني وبنتي مو ابني وزوجتي
.
.
بقيت اباوعلهم وكلت بكلبي يارب لا تحرمني من هاي النعمة الي رزقتني بيها بعد صبري وتعبي وقدرني على الاهتمام بيهم ثنينهم
.
.
جنت اريد اكعد نرجس بس تراجعت لان هي نامت تعبانة خليها ترتاح احسن كمت من عندهم بدون ما يحسون توضيت وصليت الفجر نزلت تحت اهلي كلهم نايمين
.
.
جان الجو بارد واني لابس ملابس ثخينة علمود ما ابرد ويوجعني مكان الكسر ولان ماكو احد  رجعت صعدت لغرفتي اخذت تيلفوني ودخلت للفيس اكلب بيه بين ما اهلي ونرجس يكعدون انتبهت لعبدالهادي لكيتو كاعد
.
.
من باوعتلو ضحك كلتلو ها وليدي شبعت نوم بقى ساكت ومبتسم اندار على نرجس ومسكها من وجهها يريد يكعدها مسكت ايدو كلتلو عوف ماما نايمة
.
.
نرجس: صباح الخير
معتز: صباح الانوار .. شوف كعدت ماما
نرجس: عادي مو اول مرة يخرب نومتي
.
.
معتز: ما ادري بيه يكعدج من يكعد
نرجس: عادي ماصار شي
معتز: تمام
.
.
نرجس: شعجب كاعد من الصبح
معتز: ماعرف والله كعدت قبل شوية صليت ونزلت تحت ماكو احد كاعد ورجعت صعدت
.
.
نرجس: خوما اكو شي يوجعك
معتز: لا الحمدلله بس من اضغط عليهن او احس ببرد يوجعني
نرجس: الرب يشفيك ويريحك من تعبك
.
.
معتز: آمين يا روحي
نرجس: كمت اريد اسويلو ريوك
معتز: وين رايحة
.
.
نرجس: اسولك ريوك
معتز: ابقي مو جوعان
نرجس: عبدالهادي هم جوعان
.
.
معتز: لج بابا انتي اليوم عاروس شوية ارتاحي
نرجس: مابيها شي اذا سويتلكم ريوك
معتز: لا بيها وهسا ابقي وياي اني وابنج
.
.
نرجس: تمام
معتز: شرايج نروح شهر عسل احنا الثلاثة
نرجس: وين
.
.
معتز: بكيفج تريدين بالشمال تريدين خارج العراق ماعندي مشكلة المكان الي يعجبج اكيد يعجبني
.
.
نرجس: حاليا انت ماتكدر تسافر وتروح وترجع لهذا خلينا نأجلها لحد ما تتشافى وهم يتحسن شغل المول
معتز: اروحلج فدوة
.
.
نرجس: اروحلك فدوة انت وعجيانك
معتز: ههههههههه هاي جديدة
نرجس: صدك شصار عن محلات بابا
.
.
معتز: بالوقت الحالي تاركيهن لحد ما نشوفلهن حل مناسب
نرجس: اذا تبيعوهن مو احسن
.
.
معتز: والله ماعرف يا بنيتي خليها لوقتها
نرجس: اكو شي ببالك دا تفكر بيه مو
معتز: اي والله
.
.
نرجس: اندك الباب وسمعنا صوت الحجية والحجي كمت بسرعة وعدلت ملابسي ولبست حجابي وفتحتلهم الباب دخلو سلمو علينا وباركولنا
.
.
ودخلت وراهم اسماء بايدها صينية الريوك اعتذرت منهن انو ما نزلت من وقت وشبعن ضحك هي والحجية وكالتلي الحجية انتي عاروس ماكو شغل لحد ما يخلصون الناس وطلعو وعافونا نتريك لحالنا
.
.
اخذت عبدالهادي وغسلت ادينو ووجهو وغسلت اني هم ورجعت تريكنا اني ومعتز وكل شوية يكول وضعي يبجي الحجر واني اضحك عليه واعرف قصدو وصحيح هالشي حقو بس صحتو اهم من كلشي
.
.
من خلصنا ريوك بدل ملابسو ورتب نفسو ونزل تحت واني هم بدلت ملابسي اني وعبدالهادي واحتاريت بين الصينية وعبدالهادي كلت خلي انزل عبدالهادي وارجع للصينية
.
.
اخذتو من ايدو ونزلنا الدرج ولاكتني اسماء وسألت عالصينية كلتلها بس اودي عبدالهادي لماما وارجع انزلها كالت ما يحتاج اني اجيبها
.
.
اخذت عبدالهادي تلكني النسوان الي بالصالة سلمت عليهن كلهن وباركن الي وكعدت وياهن وطول الكعدة الحجية تمدح بيه وباخلاقي وواني مبتسمة على كلامها
.
.
وعبدالهادي كعدتو عندي وبقى يلعب بمكانو بعض النسوان جانن بعيونهن نظرة الشفقة على عبدالهادي انو ما لحك حتى يشوف امو
.
.
والحجية كالت صحيح امو ماتت بس اني متأكدة اهتمام نرجس بيه احسن من اهتمام امو والنسوان كلش عجبهن كلامها
.
.
جانن النسوان يجن يباركن والي تجيب وياها هدية وتكعد نص ساعة او ساعة وتروح الوحيدين الي عزمهم الحجي وما اجو هم عائلة ابو رعد محد بيهم وصلنا
.
.
مرات اكول اني السبب بالخراب الي صار بينهم وارجع اكول شدخلني هم من انطو زينب لمعتز بلشت مشاكلهم وقت الغدا بقو بس الكرايب
.
.
تغدينا النسوان لحالهن والزلم لحالهم جانو باقين عائلة ابو اسد واهل هند وكم وحدة من كرايب معتز الي بالجنوب من خلصت غدا شفت عبدالهادي نعس
.
.
استأذنت منهن واخذتو للغرفة نومتو ونزلت وشفت ماكو احد غريب تركت النسوان الكبار ورحت عند البنات بالمطبخ سولفنا وتونسنا شوية واجن نسوان ورحت
.
.
سلمت عليهن وكعدت يمهن لحد ما راحن جانن كل النسوان يكولن محظوظ معتز بهالحلوة والله يجعلها زواجة الدهر جنا كاعدين وطبت جدة عامر
.
.
كمت تلكيتها جانت كلش فرحانة كعدت بالصالون وكالت تعاي حبوبة كعدي يمي ورحت كعدت يمها كالت سواها المصكوع معتز وتزوجج
.
.
نرجس: شنو مصكوع جدة
الجدة: عوفج من هالخرابيط شلونج بنيتي
نرجس: زينة وانتي شلونج
.
.
الجدة: الحمدلله إن شاء الله فرحانة بزواجج
نرجس: الحمدللرب ما الكي احسن من معتز
الجدة: لا تسوينو ملاك بروسنا
.
.
نرجس: هههههههه لا جدة بس اقصد خوش رجال
الجدة: والله والنعم
نرجس: والنعم من اصلج
.
.
الجدة: لعد عبدالهادي وين
نرجس: نايم بالغرفة
الحجية: البارحة سوا دكة ناقصة بابوه
.
.
الجدة: شنو هي
الحجية: شافهم صعدو فوك وخبص الدنيا بالبجي الا اروحلهم
الجدة: هههههه الله يحفظو
نرجس: ويحفظج
.
.
تونست كلش ويا الجدة وكلامها مخلوط بلهجة جنوبية بحيث تشتهي تكعد وبس تسمعها من تحجي شكد مو لهجتها حلوة وكلامها بعد احلى
.
.
وبعض كلامات تشبها لهجتنا بس تكون طريقة اللفظ مختلفة بقينا للمغرب تعشينا ومن خلص العشى اخذن المواعين البنات للمطبخ وغسلنهن بسرعة واجن عدنا وحجت الجدة
.
.
الجدة: دهر صابج يا اسماء
اسماء: هههههه ليش جدة
الجدة: عرس اخوج البارحة ولا اغنية ولا ركصة
.
.
اسماء: هههههههه تريدين تركصين جدة
الجدة: لا ييمة اني راحت علي اركصي انتي وهالبنوات
اسماء: ما اركص الا تنفذين شرطي
.
.
الجدة: وشنو شرطج
اسماء: تكومين تركصين وياي
الجدة: دهر صابج هو اني اكدر اتحرك علمود اركص
.
.
اسماء: لعد اني هم ما اركص
الجدة: انتي منو يمة اول مرة اشوفج
هند: اني صديقة نرجس
.
.
الجدة: هم مسيحية انتي
هند: اي
الجدة: شمالكم انتو المسيح هيج حلوين
.
.
هند: ههههههه عيونج الحلوات
الجدة: ولج اسماء شمالج ما طلعتي مثلهن
اسماء: ليش شبي جدة تحسسيني اشبه جحى
.
.
الجدة: باعيهن شكد حلوات لو اني زلمة الا اتزوجهن ثنينهن
اسماء: هههههههههه جدة ترا نزلتي عالترابي
الجدة: هههههههه
.
.
اسماء: بعدين شناقصني اني شعري حرير وجمالي قاتل
الجدة: قاتل حشرات
اسماء: هههههههههه تغارين مني
الجدة: هههههههه
.
.
نرجس: من جانت تحجي ويا اسماء النسوان شبعن ضحك واسماء لان تحبها ومتعودة عليها ما تزعل منها من تكول مو حلوة او تعيب عليها وتضحك
.
.
بعدها اسماء شغلت مسجل وبلشت هي والبنات بالركص وشدت شال على خصرها وتجي تهز كدام الجدة والجدة تضربها وهي مكضيتها ضحك
.
.
اندارت علي الجدة وكالت كومي وياها كلتلها ماعرف وردت منها وكالت الا تكومين وكمت ركصت وياهن شوية ورجعت كعدت لحد ما صارت الساعة 10
.
.
اندك باب الصالة كعدن البنات وراحت اسماء فتحت الباب وجان معتز دخل سلم على جدة عامر وباركتلو ووراح صعد باوعتلي جدة عامر
.
.
الجدة: شعندج كاعدة يمصكوعة
نرجس: ليش جدة
الجدة: روحي شوفي رجلج
.
.
نرجس: شبيه رجلي
الجدة: ولج كومي لا اكسر العصى على ظهرج
نرجس: كايمة كايمة
.
.
شفتها سحبت العصى وانهزمت رحت ورا معتز ساعدتو ينزع ملابسو ودخل للحمام يغسل جنت اريد ادخل اساعدو بس استحيت وما دخلت وهو هم ما طلب مساعدتي بقيت انتظر لحد ما طلع ولبس غيرهن وتمدد بالفراش واني كعدت عندو
.
.
معتز: نزلت الصبح ماكو احد غريب بس عمي واسد وسعد كعدت وياهم وراها بشوية اجو زياد ومنتظر وكم واحد من الجيران الي ماكدرو يحظرون والناس البعيدين
.
.
الي بقى منهم ساعة والي راح واجى عامر سلم وكعد شوية وراح لان عندو شغل ببغداد وكال باجر امر لجدتي علمود اخذها
.
.
من صارت الدنيا ليل سمعنا صوت اغاني داخل البيت زياد كال يرادلها جوبي والله وشغلو اغنية بس هو خطية مايكدر يدبج
.
.
فتكفلو البقية بالمهمة وصارت التعليلة كلش حلوة بقو لل 10 وتعبو ومن راحو زياد ومنتظر رحت سلمت على جدة عامر وصعدت فوك
.
.
نرجس: احجيلي
معتز: عن شنو
نرجس: شلون جان يومك
.
.
معتز: طبيعي بس احس نفسي مقيد
نرجس: اني هم مثلك من يجن نسوان لازم ابقى يمهن
معتز: ركصتي وياهن
.
.
نرجس: شوية لان جدة عامر جبرتني
معتز: ليش ما تونستي وياهن
نرجس: بالعكس كلش تونست بس اني ماعرف اركص
.
.
معتز: ايوا صدك ترا ابو الولد الي خطب اسماء اجى وابوي انطاه موافقتو وموافقة اسماء
نرجس: صدك ربي يبشرك بالخير
.
.
معتز: الخير يصيبج
نرجس: لو كايللها مفرحها
معتز: هسا احجيلي منين يعرفها
.
.
نرجس: غير يدرس وياها
معتز: وبعد
نرجس: ماكو لا بعد ولا قبل
معتز: اكيد
.
.
نرجس: كل ما بالموضوع هو عاجبتو اسماء وكايللها وهي حجتلي واني كلتلها اذا يريدج صدك خلي يخطبج والولد طلع ابن حلال وصادق بكلامو
.
.
معتز: وكل هالوقت اني ماعرف
نرجس: والرب مو قصدنا نسوي شي بدون علمكم
معتز: لعد
.
.
نرجس: الموضوع صار بسرعة من ثاني يوم كالتلو اسماء اذا يريدها صدك يجيكم وهو فورا اجى
معتز: تمام
.
.
نرجس: امانة لا تزعل
معتز: لا بنيتي تطمني
.
.
نرجس: جان يحجي بهدوء بس احس هالهدوء مخيف اكثر من العصبية بحيث احجي وياه وكوة اجمع بالكلام من الخوف بس من كال مو زعلان ارتاحيت
.
.
معتز: اريد اخذ رايج بشغلة
نرجس: شنو هي
معتز: حجيتلها فكرة زياد عن المول وفكرتي بمشاركتهم
.
.
نرجس: خوش فكرة
معتز: يعني اسويها
نرجس: بس لا تنسى يرادلك 20 مليون
.
.
معتز: اعرف هالشي بس ماكدر اتأخر عليهم
نرجس: والحل
معتز: راح ابيع سيارتي
.
.
نرجس: وشلون تبقون بدون سيارة
معتز: سيارتي غالية اخذ من فلوسها 20 مليون واشتري وحدة ارخص منها بالباقي من الفلوس
.
.
نرجس: خاف تتندم
معتز: لا إن شاء الله ما اتندم بس اكيد راح اكول لابوي وجواد
نرجس: اي كوللهم قبل اصدقائك علمود ينطونك رايهم
.
.
معتز: اي هو هيج .. ماكو شي اليوم
نرجس: شنو من شي
معتز: تصبيرة تفطيرة
.
.
نرجس: لا وليدي انت مريض يلا نام
معتز: بس تصبيرة صغيرونة
نرجس: بوسة وحدة ماكو غيرها
.
.
معتز: بس انتي تبوسيني اني مريض ماكدر
نرجس: لعد ماكو
معتز: يلا ماما اني مريض ماكدر .. اندك الباب
.
.
نرجس: منو
اسناء: اني
نرجس: فتحت الباب جابت عبدالهادي ونزلت
.
.
معتز: رجعي ابن الجلب هذا لا اكوملج انتي وياه
نرجس: هههههههه لا يمة وين اودي ابني
معتز: ترا حرك جد جدي
.
.
نرجس: هههههههه على كيفك يمعود
معتز: ها ابن الزمال شرايد
عبدالهادي: ماما
.
.
معتز: جيبيه جيبيه
نرجس: بربك ما تزعلو
معتز: لا والله
.
.
نرجس: انطيتو الو اخذ البطانية يغطيه بيها ويرفعها ويلعب وياه وعبدالهادي يضحك ورجع حطها وكال يلا نفذي التصبيرة بسرعة قبل ما يبجي ابن الزمال هذا
.
.
اني اريد اسكت ماكدر كمت اضحك الا بطني كامت توجعني ما حسيت الا انسحبت للسرير وصار معتز فوكي وراحت ضحكتي وباسني واندمجنا ويا بعض ونسينا عبدالهادي ما حسينا الا مسك راس ابوه وكال بابا
.
.
معتز: الله مسلطك على بابا انت
نرجس: ههههههههه عفية وليدي
معتز: انتي وابنج راح تجلطوني
.
.
نرجس: ابعد عني خلي ابوس وليدي
معتز: ترا راح اشمر ابنج من الشباك
نرجس: ههههههه ترا ابنك انت هم
.
.
معتز: تورطت بيه اني
نرجس: يلا تحملو لخاطري هههههه
معتز: وتضحك فوكها
.
.
نرجس: اخذت عبدالهادي واني ميتة ضحك على معتز هو جان معصب من شافني اضحك ضحك وياي ومثل البارحة حطيت عبدالهادي بيناتنا واني وهو صرني بحضن معتز ونمنا
.
.
مرت بينا الايام مثل قبل ثالث يوم العرس راحو اهل هند وجدة عامر ومعتز تشاور هو وابوه وجواد علمود بيع السيارة وبناء الطابق الثاني
.
.جان القرار صعب عليهم لان يبقون بدون سيارة بس بالاخير وافقو لان كاللهم ماكدر اتأخر على اصدقائي خاف يصرفون الفلوس ويتورطون
.
.
ورجع حجى ويا زياد ومنتظر وجان قرارهم القبول بس كالو لمعتز عندنا شرط ان الطابق الثاني يكون 50% منو الك و25% لكل واحد من عدنا
.
.
وحسبوها هيج باعتبار 25% المبلغ الي يحطو معتز و 25% لان يبنون بالارض الي اشتراها معتز يعني ماراح يدفعون دينار واحد للارض
.
.
وباع معتز السيارة جانت سيارتو اسمها جيب واخذ النترا جان باقي 21 مليون 20 مليون حطهن ويا جماعتو وجواد هو تكفل بالبناء مثل الطابق الاول وهم لان هم مايكدرون يتعبون
.
.
والمليون الباقي شالو كال اجمع فوكو علمود نروح شهر عسل ومن عرفت ان ابو اسد يطلبو 10 ملايين جبرتو يوفي دينو بالبداية وبعدها لاحكين على شهر العسل والحجي كلش فرح بكلامي
.
.
ومن تحسن وضع معتز راح فك الجبص عن ايدو ورجلو بس ما تممنا زواجنا لان جان من يتنفس صدرو يوجعو وما يكدر يأدي جهد متعب
.
.
وفوكها ما نبقى دقايق الا ويجي عبدالهادي علينا ومعتز يعصب ويحجي عليه واني اكضيها ضحك وعبدالهادي يضحك على ضحكتي
.
.
وجنا مكضينها بالبوسة والحضنة بس لحد الان استحي اغازلو وجه لوجه من افكر احجي هيج احس لساني ينربط واشيل الفكرة من بالي
.
.
وهو نفس الحالة من نكون ويا بعض يحجي كلام عادي والي يشوفنا يكول اصدقاء مو متزوجين وزواجهم عن حب
.
.
بس من نحجي اتصال لا يختلف الوضع نتغازل وكل حجينا حبيبي وحياتي وعمري وكدام اهلو نبقى عاقلين ماكو لا بوسة ولا حضنة
.
.
بقينا على هالحال لحد ما اجى يوم جان معتز خارج البيت اجى فجاءة معصب والشرار يتطاير من عيونو اني جنت بالصالة وعبدالهادي بحضني
.
.
كال بعصبية نزليه والحكيني وراح للغرفة انداريت للحجية ومستغربة وهي اخذت عبدالهادي مني وكالت روحي يمة شوفي رجلج شرايد
.
.
وسويت مثل ما كالت ونزلتو عندها وصعدت واني خايفة لان مبين عليه عصبي الرب يستر اكيد صاير شي ومعصب هيج بسببو دخلت للغرفة واندار علي وحجى بعصبية
.
.
.......... يتبع
لايك وتعليق حلو مثلكم ❤
حطولنا ارائكم وتوقعاتكم ❤