حب في ازقه نينوى

البارت (15) حب_في_ازقه_نينوى الكاتب #احمد

15
#حب_في_ازقة_نينوى
بقلم #احمد
البارت_15
تركتهم ورجعت كعدت بعيد عنهم واشوفها هي ومعتز يحجون وثنينهم معصبين رغم الي سويتو مالو معنى بس فرحت من ضوجتها تستاهل
.
.
اخير شي معتز طلع وهو روحو طافرة من الضوجة والعصبية واني خلصت مهمتي رجعت للملحق الدنيا عصر ومن الريوك ما اكلت شي لان ما رحتلهم وقت الغدا وما سويت بالبيت غدا لهذا جوعانة
.
.
فبدلت ملابسي ومسحت المكياج وسويتلي اكل وصار هو غدا وهو عشى ومن اكلت جنت نعسانة ونمت فورا
.
.
معتز: كعدت اول يوم العرس بديت اساعد جواد واجو اصدقائي واني اشتغل وياهم ولا كأنو عريس قبل الظهر اخذوني منتظر وزياد على بيت اهل زياد لان فارغ واهلو عندنا بالبيت واخذنا وياي ملابسي والاشياء الي احتاجها اخذتلي دوش وكفت تحت الماي وتفكيري مشوش من جهة حبي لنرجس ومن جهة سمعة بناتنا اختيارين ماكدر اجازف بواحد منهن ابد وزينب اعرفها اذا تزوجت نرجس بعدين راح تأذيها وتسمم عيشتها تركتها بايد رب العالمين وطلعت من الحمام لبست القاط شعري جان شوية طويل لان من جنت ملتحق وضعنا مو مال تدقيق عالشعر واللحية ومن رحت للحلاق ما قصرو بس رتبو وحدد لحيتي وسوالي زياد تسريحة شبابية مرتبة وجانو يعرفوني ضايج بس يحاولون يونسوني بكلامهم وافعالهم من كمل زياد التسريحة حطيت عطر
منتظر: حرامات هالكشخة يشوفها عمك
معتز: قابل اسكر عيونو
منتظر: اكلك شرايك اخطفك على اساس ارهابي واخلصك من هالزواج ههههههه
معتز: خوش فكرة اكون ممنونك اذا تسويها
منتظر: لا يابة علمود عمك يهجم بيتي بزواجة مثل زواجنك خليني ساتر على نفسي واضحك عليك
معتز: ههههههه قسم بالله يسويها
زياد: خليها بايد ربك حبيبي اذا ابتلاء فاصبر علمود يعوضك بالاحسن واذا خير فاحمدو على هالشي
معتز: الحمدلله الذي لا يحمد على مكروه سواه
.
.
رجعنا على بيتنا بدو الناس يسلمون علي ويباركولي الظهر حطو الغدا ورا الغدا بشوية مشو الناس الغربة وبقينا احنا الكرايب ورحنا جبنا زينب اني جنت اسوق سيارة العروس واخذت وياي امي واسماء وزوجة عمي ابو اسد من وصلنا دخلن النسوان بالبداية واشتغلت الهلاهل وتسكت وحدة وتشتغل الثانية من خلصت الهلاهل دخلت مع دخلتي وتسمطني امي بهلهولة الا طككت طبلت اذني مو هلهولة مدفع رحت كعدت عند زينب شوية وما معبرها بشي اجن البنات يصورن ويانا بس من كمت اخذت ايدها ومشيتها وياي ما حبيت افشلها كدام الناس مهما كان ابوها السبب مو هي صعدتها بالسيارة وصعدن امي وام اسد واسماء من ورا واني تعمدت علمود ما ناخذ راحتنا بالطريق ونحجي هي بقت مدنكة راسها وبالنسبة لزينب من ناحية الجمال فهي حلوة بشرتها خمرية وبيها سمار خفيف بس يجذب كلش مع جمالها بس تصرفاتها وحقدها ما يخلي الشخص يركز بجمالها ولو ما هالشي هذا جان يجوز من قبل ما اعرف نرجس اني متقدملها بس ماكول غير الله يهديها رحنا للمصور صورنا وبعدها رجعنا للبيت دخلنها النسوان وبعدها بشوية دخلت كعدت يمها ماكو 5 دقايق ودخلت نرجس بفستانها الاحمر غطت على كل البنات الموجودات وتمشي بهيبة وثكل كدام البنات جانت لابسة فستان احمر والردن تول بس ثخين ومو مبينة ايدها منو وحاطة شال على راسها ومن الجهتين نازل على كتوفها والشعر صاير بين الشال وكتوفها والصليب الذهب بركبتها رغم انو رمز لدين غير الاسلام بس جان كلش حلوة مع بياض ركبتها اجت باركتلنا وحجت ويا زينب شوية وراحت اول ما راحت حجت وياي زينب
زينب: شعدها اجو هاي
معتز: قابل اطردها
زينب: اعرفها اجت علمود تخرب فرحتي
معتز: سكري عالموضوع عيب منا الناس
زينب: ليش اسكر عالموضوع لو عجبك تشوفها وهي لابسة مثل الرقاصات كدام رجال غريب عنها
مغتز: انداريت عليها بعصبية من شافتني خنست تركتها وطلعت معصب رجعت عند جماعتي الدنيا عصر بين ما فلشو الجادر ورجعوه لصاحبو الدنيا صارت ليل وبلش الجوبي والهوسات واحتفالات شبابية اني ما شاركت مجرد اباوعلهم بقو لل ١٠ بعدها كالو لازم يدخل على عاروستو وراحو دخلت للغرفة جان كاعد عالتخت تقدمت عليها رفعت الاكليل من راسها وكلتلها توضي وتعاي نصلي ابتسمتلي وراحت توضت واجت صرت اني امام وهي وراي صلينا واخذت للسرير وكعدت مقابيلها وكلتلها جاهزة تسمعين
زينب: اي
معتز: شوفي زينب ركزي وياي وافهمي شراح احجي وياج كلمة كلمة علمود ما تصير ويانا مشاكل بالمستقبل اول شي تعاملج ويا اهلي راح يكون مثل اسماء بالضبط صوتج ما يعلى على احد بيهم حتى اسماء وجواد وابوي وامي اذا عليتي صوتج عليهم لا تلوميني عالي راح اسويه ثانيا نظافة غرفتنا وملابسنا واكلنا اني وياج انتي تهتمين بيه ثالثا نرجس وامها تنسين وجودهن ومن هسا اكلج اذا سمعت بيوم رايحتلهن لو مسوية مشكلة وياهن ابسط شي اسويه اتزوج نرجس واجرلها بيت ثاني هي وامها فاذا ما تريدين هالشي يصير لا تسوين مشاكل وياهن فهمتي علي
زينب: مثل ما تريد راح اسوي
معتز: واذا التزمتي بهالشي وما قصرتي وياي مستحيل اكسب ذنبج وازعلج وبنفس الوقت انتي لا تضوجيني
زينب: تمام
معتز: اخذتها واني ادعي ربي تكون فهمتني وما تشلع كلبي بالايام الجاية
نرجس: كعدت الصبح بال ٧ لكيت امي نايمة كمت سويت ريوك وما كعدت امي كلت يجوز رجعت متأخرة وتعبانة جان الجو بارد كعدت كدام الصوبة والمطبخ دافي والتيلفون شحنو ١٠٠ الجو مغيم ومدرس ماكو لان جمعة والكهرباء جاية بس اني طفيت ضو المطبخ وفتحت تيلفوني عاليوتيوب والهتفون باذني وضع فاخر عالاخر جنت حافظة كم طريقة للكيك من اليوتيوب شغلت اغاني وبديت احظر بالكيكة وادندن ويا الاغاني ومتونسة ولا كانو البارحة جان عرس معتز واصلا ناسية كلشي يجوز الرب استجاب لدعائي وخلاني انساه صارت الساعة ٩ امي كعدت واني كملت الكيكة وحطيتها بالفرن حطيتلها ريوك ورحت انظف الغرف ونبهت امي عالكيكة ورحت نزفت الغرف ومن كملت حطيت التيلفون عالشحن واخذتلي دوش ورجعت للمطبخ لكيت الكيكة كامل  وامي مقطعتها اكلت قطعة جان طعمها تحفة حطت الغدا امي وتغدينا بعدها رحت اراجع بالدروس القديمة
معتز: كعدت ثاني يوم وكعدت زينب وياي رحت اخذتلي دوش وبدلت ونزلت لكيت اهل زينب موجودين سلمت عليهم وباركولي وراها بشوية نزلت زينب كعدت يمي حطولنا الريوك من خلصنا احو ناس من معارفنا يباركولي ونسوان اجن علمود زينب فطلعت للاستقبال ولوقت الغدا بقو بس الكرايب رعد اشوفو يحوص واريد يفتح حلكو بكلمة علمود اهجم بيتو بس بقى ساكت الظاهر خايف تركتو وما اهتميتلو دائما العريس اول ايام يريد بس يحصلو فراغ علمود يختلي بزوجتو بس اني بالعكس حتى من ماكو احد ابقى ويا عمامي بالاستقبال جان ثاني يوم التحاقي بقيت لحد ما خلصت التعليلة بالاستقبال جانت الساعة ١١ راحو الغربة وبس اهل عمي ابو اسد باقين رحت للصالة جانت كاعدة زينب ويا النسوان وصحتها
زينب: امرني
معتز: حضريلي جنطتي باجر التحاقي
زينب: بزعل .. وايمتى ترجع
معتز: ماعرف التحاقي هالفترة متخربط بسبب الاوضاع
زينب: زين تعال وياي بس كلي شنو احظرلك لان ماعرف شناخذ وياك
.
.
معتز: رحت وياها طلعت الحنطة وكلتلها اهم شي الملابس العسكرية وحطيلي وياهن لبستين ثلاثة احتياط وهاي هي وبعدها نمنا
.
.
ثاني يوم كعدت الصبح اول ما تحركت فزت زينب صبحت علي ونزلت قبلي اني بدلت ونزلت لكيتها محضرتلي الريوك تركيت وطلعت
.
.
بسبب تفلش فوجنا صار التحاقنا كل مرة بمكان من يشوفون مكان بيه نقص عناصر يخلون ننتقل عليه وبهاي المرة انتثلنا لخط الصد بالانبار جانت الدنيا مشتعلة هناك وصلنا الظهر بالليل بلشت رحمة الله والجنود الي موجودين يعرفون صعوبة الوضع فماخذين احتياطاتهم ومجهزين وضعهم على اتم تجهيز من تبلش المعركة السيارات يكونن متفرقات وكدامهن ساتر مغطيهن علمود ما يكون استهدافهن مباشر واذا وكع على وحدة هاون ما تفجر باقي السيارات وبنفس الوقت الشضاية تجي بالساتر وما تأذي الجنود واحنا نصير بالساتر الامامي ونقاتل باسلحة رشاشة من الروسية والبيكيسي وبهاي الحالة كدرنا نصمد بالليل والدواعش بسبب تقدم الحشد عليهم بمناطق صلاح الدين وسامراء تحديدا وضعهم متزعزع كلش من صارت الدنيا نهار استلموهم الطيران دمروهم واحنا تقدمنا عليهم بحدود ٥ كيلوات وتوقفنا لان جانت الطرق كلها مفخخة وسلمونا سيارات مصفحة تمشي كدام السيارات العسكرية وتفجر التفخيخ الي بالطريق وهي ما تأذيها المتفجرات بس لان وصلا السيارة متأخرة اجلو التقدم لثاني يوم بعدها كل يوم بالليل يصير حرب وبالنهار تقصفهم الطيارات واحنا نتقدم وصار تبديل اجو الحشد بمكانا واحنا رحنا لصلاح الدين جانو الحشد واصلين تكريت وجان تحريرها عبارة عن قتال شوارع وهالشي اصعب من الانبار بهواي جنا بالليل نمسك المراكز الي احنا بيها وبالنهار نتقدم تعرضنا لهواي محاولات غدر بس ربنا حمانا منها وما كدر يسوونشي النا بقين على هاي الحالة لحد ما حررنا تكريت بس جان تحريرها كلش صعب ومر على التحاقنا شهر وماكو اي طاري عن وقت نزولنا من خلصنا من تحرير تكريت امناها عالاخير وفرق تفكيك المتفجرات فككت التفخيخ الي جانو الدواعش يريد يستخدموه كفخ النا من تأمنت تكريت بالكامل تقدمنا عالشركاط وهم كدرنا ناخذها ونأمنها ومر شهرين واحنا مو نازلين
.
.
نرجس: مرت الايام عادية اني نسيت معتز دائما ادعيلو بالتوفيق بس احس كلبي برد كلش من ناحيتو وكأنو مجرد شخص عادي بحياتي بلشت امتحانات نص السنة جان مدرستنا بيها قاعة خاصة بالامتحانات وجانت جبيرة وشبابيكها كلها كبار بحيث اذا يوكف كدام الشباك رجال الشباك يكون اطول منو بس عاليات وبسبب هالشبابيك القاعة بالامتحانات تصير قطعة ثلج جنا جنت دائما البس قمصلة ثخينة كلش والبس كفوف واخلي ايدي بجيوبي لحد ما يسلمونا الاوراق وبسبب البرد اطلع ايدي اليمين من الكف واخلي الكف تحتها كن اكتب واحس اصابعي يجمدن من البرد وكوة اتحمل البرد لحد ما اخلص امتحان وارجع للبيت اكعد كدام الصوبة لحد كا ادفى وارجع ادرس المادة البعدها لحد ما يصير الغدا اتغدا وارجع ادرس للمغرب بحيث ما اترك كلمة اذا ما ادرسها والتيلفون تركتو هالفترة علمود ما التهي زينب ما شفتها من يوم العرس جنت متوقعة من اول ما تتزوج كل يوم تسويلنا زيارة للبيت ووياها مشاكل بس خبيت ظني والحمدلله هيج احسن النا والها اسماء تكول تعاملها وياهم زين وتحترمهم وحجيها خلاني اتعجب لان كلنا نعرف زينب مو راحة شعجب تغيرت هيج بيوم وليلة بس هيج احسن معتز خوش ولد ويستاهل كل خير ويجوز الرب هداها علمود يرتاحون بحياتهم وخلي زينب تعوضو عني ويجوز بمرور الايام يحبون بعض وينسيني معتز واني بس يتحرر الموصل نرجع اني وامي للموصل لان هناك بيتنا ومنطقتنا ومحلات بابا خلصت امتحانات بعد تعب هواي بس الحمد للرب جانت اجاباتي كلها زينة وماكو اي مادة صعبت علي من خلصت اخر امتحان انتظرت اسماء لحد ما طلعت رجعنا للبيت من وصلت بدلت ملابسي وكعدت كدام الصوبة وحطيتلي كوب جاي وكعدت اشرب بيها ادفي نفسي بعد البرد الي بردتو بالمدرسة من خلصت كلت لماما لا تكعديني الا اني اكعد اريد ارتاح من التعب الي سببتو الي الامتحانات ورحت لغرفتي نمت بقيت للمغرب نايمة كعدت جسمي مكسر طلعت لكيت ماما رايحة على اهل معتز انتظرتها لحد ما رجعت كعدنا نحجي عن المدرسة وعن وضعنا وجانو جواد وابو معتز دائما من يتسوكون للبيت يجيبولنا مسواك ودائما يكولون لامي اذا سمعنا ناقصكم شي وما حجيتولنا نزعل منكم وبعد ما نحجي وياكم وبسبب كلامهم امي كامت من ينقصنا شي تكوللهم رغم هالشي صعب جان وانو نطلب من احد بس اهل معتز ما حسسونا بهالشي بالعكس يطيرون من الفرح من امي تكوللهم ناقصنا شي لهذا امي جانت تطلب منهم براحتها وما تتقيد بشي مرت الايام بحلوها ومرها  اني ما وصلت اهل معتز من يوم العرس ام معتز اجت اكثر من مرة علينا ولان تعرف السبب الي يمنعني اروحلهم ما طلبت مني اروحلهم جانت تجي تسلم علينا اني وامي وتكعد تحجي شوية ويا امي وتنصحني اهتم بدراستي اني واسماء وبعدها تروح وجانت كلش طيبة وسوالفها حلوة ابد ما تنمل ولو تبقى تحجي ساعات ما امل من كلامها وامي جانت كذلك كل كم يوم تروح ساعة او ساعتين بالهواي عندهم وترجع اني بعطلة نصف السنة بلشت اشتغل بالبيت واساعد امي لان ماعندي مدرسة وخلصت امتحاناتي معتز ماكو اي خبر عنو وتيلفونو خارج التغطية ومغلق بس الي متأكدين منو هو بعدو عايش ودائما ندعيلو يبقى عايش علمود اهلو وزينب لان صارت طيبة وما شفنا منها اذية وما لحكت تفرح بيه اسماء خطية حتى بعطلة نصف السنة 24 ساعة تقرا ما ارتاحت ابد ومن اشوفها هبج كلش اخاف واتوتر من السادس واكول الله يعيني عالسادس اذا اسماء شاطرة وعادت سنة وهيج ضاغطة على نفسها لعد اني شراح يصير بي باول سنة الا انحصر حصرة الجلب ههههههه خلصت العطلة ورجعنا لدوامنا ومعتز ماكو الاخبار كلها تبشر بخير الحشد والجيش تقدمو بصلاح الدين والانبار والبيشمركة تقدمو من الجهة الشمالية وبدت تنكسر شوكة داعش يوم بعد يوم واني وامي ننتظر على نار تحرير الموصل علمود نرجع لبيتنا بس خايفات انو من نرجع خوالي يستغلون وجودنا بدون رجال وهالشي مسبب قلق النا من الرجعة وبالاخص خالي عيسى مستحيل ينسى انو معتز اذاه علمودي اني وماما وشكد جنت احبو واحترمو بس حاليا كلش كرهتو حتى اول ما تعرفت على معتز من ضربني هو وامي علمود معتز ما كرهتو واعتبرت ضربو الي حرص وخوف علي من معتز وغيرو بس بالاخير اكتشفت انو جنت غلطانة وان خالي من يومو جان يكرهني من بلش  الربيع بنهاية الشهر الثاني عام 2015 بقى الموصل كدام الجيش والحشد تركو الموصل وتوجهو لتلعفر وخلونا نحتار ليش سوو هيج الموصل اكبر واهم من تلعفر بس اكيد عندهم خطة ودا يمشون عليها قبل ما يتقدمون الجيش للموصل رجعنا من المدرسة اني واسماء شفنا سيارة تكسي وكفت كدام بيت اهل معتز ونزل منها معتز اني ضحكت لا ارادي من شفتو بخير جان مو منتبهلنا قبل ما يدخل للبيت صاحتو اسماء اندار علينا واجت عيونو بعيوني وابتسملي وحظن اسماء وبوسها انا من وصلت كلتلو الحمدللرب رجعت بالسلامة
معتز: الله يسلمج شلون امج شلونها
نرجس: زينات انت شلونك
معتز: الحمدلله يلا دخلي لا تبقن واكفات بالشارع
نرجس: دخلت وىحت للملحق اول ما دخلت بلغت امي برجوع معتز وكلش فرحت ان رجع بخير وسلامة لاهلو اني رحت بدلت ملابسي ورجعت تغديت ونمت
.
.
يتبع

البارت اليوم بدون تعديل لان تأخرت بكتابتو ❤
حطولنا ارائكم وتوقعاتكم وتفاعلو ❤

https://www.facebook.com/الكاتب-احمد-106346968747988/