حب في ازقه نينوى

البارت(16) حب_في_ازقه_نينوى الكاتب#احمد

16
#حب_في_ازقة_نينوى
بقلم_احمد
البارت_16
.
.
نرجس: دخلت ورحت للملحق اول ما دخلت بلغت امي برجوع معتز وكلش فرحت ان رجع بخير وسلامة لاهلو اني رحت بدلت ملابسي ورجعت تغديت ونمت
.
.
معتز: من حررنا الشركاط انطونا اجازة 10 ايام رجعت للبيت بس لهفتي مو مثل كل مرة وادري راح ارجع الكي زينب كالبة الدنيا وتعال يا معتز تورط وياها
.
.
اول ما وصلت اريد ادخل البيت سمعت صوت اسماء صاحتني انداريت عليها جانت وياها نرجس ومبين عليها الفرح بشوفتي سلمت عليهن
.
.
دخلت داخل واستغربت من الوضع امي كاعد بالصالة وزينب بالمطبخ والبيت نضيف بيني وبين نفسي كلت خاف دا احلم معقولة زينب تسوي كل هذا
.
.
رحت على امي سلمت عليها وزينب من سمعت صوتي اجت تركض وحظنتني وكامت تبجي والصراحة مبين دموعها مو تمثيل ودا تبجي من صدك
.
.
مسحت شعرها بايدي لحد ما هدأت حجيت وياهم شوية تطمنت عليهم جواد وابوي مو بالبيت وصعدت اريد انام اجت وياي حطتلي ملابس بالحمام
.
.
زينب: محتاج شي بعد
معتز: لا سلامتج بس اغسيلي ملابس الدوام
زينب: بضوجة ... تمام
.
.
معتز: عرفتها ضايجة كلتلها ... ترا اني هم مشتاقلج بس كلش تعبان ورايد ارتاح
زينب: بابتسامة .. تشتاقلك العافية
.
.
معتز: صحيح جذبت عليها بس بصراحة ما حبيت اكسر بخاطرها ودا احاول بكل الطرق اتقبلها واخليها تتغير علمود اكدر اعيش  وياها
.
.
ومنا لحد ما تتخرج نرجس الله كريم لان بالوقت الحالي لا اكدر احكم بمصير نرجس ولا اريد اكسب ذنب زينب دخلت عالحمام فتحت الماي الحار ووكفت تحتو لحد ما ارتخت اعصابي وجسمي احسو ذاب
.
.
من حسيت بالماي بدا يبرد لبست ملابسي وطلعت تمددت بفراشي ماكو ثانية واني نايم كعدتني زينب المغرب كالتلي اهلي عازيمنا عالعشى
.
.
كمت بدلت وسلمت على جواد وابوي واخذتها ورحنا على بيت اهلها كعدت اني وابوها واخوانها بالاستقبال وحجى وياي عمي
.
.
عمي: معتز هسا نرجس شنو موقعها من الاعراب
معتز: شبيها نرجس تراها عايشة ويا امها ومابيها شي
عمي: اعرف عايشة ويا امها بس على فرض كبرت وتخرجت بعدها شيصير
.
.
معتز: قصدك اتزوجها لو لا مو
عمي: اي صحيح
معتز: الحواب تلكيه عند بنتك عمي مو عندي
.
.

عمي: شلون الكيه عند بنتي قابل هي راح تتزوجها
معتز: القصد يا عمي اذا بنتك بقت مثل ماهي مدارية اهلي ومهتمة بي وبنفسها وما تسوي مشاكل فمستحيل اتزوج عليها
.
.
واصلا نرجس من سابع المستحيلات امها تخليها تتزوجني واذا زينب رجعت مثل قبل وطفرت روحي منها اتزوج عليها ان كان نرجس او غيرها
.
.
عمي: زين اذا بالحالتين ماراح تتزوج نرجس ليش ترفض يتزوجها رعد
معتز: عمي ابنك رعد حط عينو عليها وهي ببيتي يعني حتى ما احترم وجودها ببيتي واني هسا وبعد نرجس ما اخليها تتزوج رعد
.
.
رعد: وشبيه رعد ضاغطك هيج
معتز: بابتسامة .. مضغوط لو تعرف شكد مضغوط بس للاسف مو منك
رعد: لعد من منو
.
.
معتز: من قسمتي ومن حظي الي خلاك ابن عمي ولك شفت الموت بعيوني ورحت بنص داعش علمودها وبالاخير اجيبها علمود تحط عينك عليها
.
.
هذا الحجي صار ورا العشى وشفت راح نتخارب اذا بقيت فاخذت زينب وطلعنا رجعنا لبيتنا لكيت ام نرجس موجودة سلمت عليها وكعدت وياها هي وامي
.
.
الاء: شلونك خوما تعبان
معتز: والله يا ام نرجس ماعرف شكلج شهرين اني ماعرف شلون انام وشلون اصحى
.
.
الاء: زين ما تعرفلي الموصل ايمتى يحرروها
معتز: حتى لو حرروها تبقين انتي ونرجس هنا
زينب: ليش يبقون
.
.
معتز: انداريت على زينب وخزرتها وخنست
.
.
الاء: لا تعصب عالبنية سؤالها مابيه شي وفعلا ليش نبقى
معتز: اعتقد تتذكرين شلون انسحبت نرجس من بين ادينج وكدام عيونج
الاء: وشنو الحل
.
.
معتز: الحل البيت يتأجر والمحلات نشوفلج احد يشتغل بيهن او نبيعهن ونشتريلج محلات هنا بدالهن ويبقن احتياط الج انتي ونرجس
.
.
الاء: وشلون اترك بيتي الي كضيت نص عمري بيه
معتز: اعتقد نرجس اهم من البيت واني ماكدر امن عليج انتي ونرجس بالموصل هنا حالج من حال اهلي واذا اني مو موجود ابوي وجواد موجودين وما يقصرون وياكن إن شاء الله
.
.
الاء: محتارة يا معتز من جهة حجيك صحيح ومن جهة مشتاقة لبيتي بس على كل حال منا لوقتها نقرر واني استأذن
.
.
معتز: كاعدين وين رايحة
الاء: تعبانة ومن الصبح كاعدة تصبحون على خير
معتز: وانتي بالف خير
.
.
راحت ام نرجس حجيت شوية ويا امي ومدحت بزينب وطبعها وزينب كضتها ابتسامات كمنا اني وزينب صعدنا قبل ما ادخل لغرفتي مريت لغرفة اسماء
.
.
شفتها نايمة فوك الكتب اخذت الكتب حطيتهن عل  صفحة وعدلتها بفراشها وغطيتها ومبين على وجها تعب الدراسة طفيت الضو ورجعت على غرفتي
.
.
زينب: اشتاقيتلك من اول زواجنا غبت شهرين
معتز: زينب شلون تفشليني هيج كدام ام نرجس
زينب: والله مو قصدي هيج لا ارادي طلعت مني
.
.
معتز: لا ارادي لو من كرهج الهم
زينب: والله يا معتز اذا تريد الصراحة اكرهن صح بس والله هاي طلعت لا ارادي وماعرف ليش كلتها
.
.
معتز: ديري بالج تعيديها سواء بموضوع يخصهن لو يخص غيرهن
زينب: ما تنعاد وعد
معتز: خير إن شاء الله
.
.
نرجس: كعدت ورا الظهر درست ومشتاقة اشوف معتز صار هواي ما شايفتو انتبهت لنفسي وكلت انجبي ثكلي شوية هو تزوج غيرج شنو مشتاقتلو
.
.
صرت مثل المخبلة مرة ارزل نفسي ومرة اطلعلها اعذار ما الهن داعي خلصت دراسة المغرب تعشيت ودخلت اتصفح باليوتيوب وماما راحت تسلم على معتز تكول عيب صارلو شهرين من داوم
.
.
نعست وهي ما موجودة ونمت كعدت ثاني يوم ورحت اني واسماء للمدرسة من خلصتا دوام وطلعنا لكينا معتز ينتظرنا وكال صارلي شغل هنا ومريت عليكن
.
.
رجعنا وياه واني رحت للبيت دخلت سلم على ماما شفتها وجها اصفر كلتلها شبيج وجهج اصفر
.
.
الاء: ماكو شي بنيتي
نرجس: مو شايفة وجهج اصفر خاف صاير عندج هبوط
الاء: يجوز .. المهم بدلي وتعاي نتغدا
نرجس: اكعدي ارتاحي هسا ابدل واجي احط الغدا
.
.
رحت بسرعة بدلت ورجعت حطيت الغدا واكلنا بس مبين عليها تعبانة خليتها تروح تنام واني غسلت المواعين ورحت راجعت دروسي وكل شوية اشوف اذا حرارتها صاعدة لو لا لحد المغرب
.
.
شفتها شوية تحسنت وراح الصفار الي بوجهها تركتها نايمة ورحت سويت عشى وراها بشوية اجت حطيتلنا عشى وتعشينا وخليتها تجي تكعد عندي بالغرفة لان خايفة عليها
.
.
معتز: كعدت الصبح رحت لزياد تونسنا شوية ومن رجعت مريت عالبنات رجعتهن وياي ومن صعدت لغرفتي اجت زينب تعاتبني
.
.
زينب: شعندك مرجعها وياك
معتز: شنو
زينب: نرجس ليش راجعة وياك بالسيارة
.
.
معتز: وشبيها اذا رجعتها هي واسماء
زينب: شو كل يوم يروحن ويرجعن مشي الا اليوم
معتز: شنو قصدج
.
.
زينب: يعني خليهن يرجعن مشي ليش تجيبهن انت
معتز: ها بدينا
زينب: لا ما بدينا بس اغار عليك منها مو بيدي
.
.
معتز: اولا رجعتها من المدرسة مو ماخذها لغير مكان ثانيا رجعتها هي واسماء قابل لحالنا راجعين من تشوفيني ماخذها او مرجعها من مكان لحالها وقتها الج حق تحجين
.
.
زينب: يعني هسا لو اني ادرس ويجي شخص غريب يرجعني ما تغار علي
.
.
معتز: زينببببببببببب شبيج انتي مجحشة عالاخر اكو وحدة عاقلة ومتزوجة تحجي هيج حجي شنو فاتحلي مكودة اني لو شادلي كرون شبيج انتييييييي
.
.
.. دخلت امي وزينب كامت تبجي من الخوف
.
.
الوالدة: شبيك ابني شصاير
معتز: ماكو شي يمة
الوالدة: لعد ليش صوتك طالع عالبنية
.
.
زينب: ماكو شي عمة اني غلطت بحقو ووياه حق يعصب
الوالدة: الله يهديكم بس حلو مشاكلكم بينكم وبهدوء
معتز: إن شاء الله يمة
.
.
طلعت امي واعتذرت مني زينب تفاهمنا ونمنا العصر رحت ويا ابوي للمحل كضيت وقت وياه للمغرب ورجعنا تعشيت وتعللنا بيناتنا ومن صار وقت النوم نمنا ثاني يوم قبل الظهر بشوية اتصل علي زياد
.
.
زياد: اكلك تريد نقل لبغداد لو لا
معتز: شنو من نقل
زياد: شبيك صاير مطي نقل خدمة
.
.
معتز: والله اذا اكو اكيد اريد
زياد: البس ملابسك العسكرية ومرني للبيت
معتز: تمام
.
.
سكرت منو ولبست ملابسي العسكرية ورحت عليه اخذتو ورحنا على مكان دوام خالو اخذنا وياه خالو وعندو ضابط من اصدقائو تناقشو على موضوعنا شوية ونقلنا اني وزياد ومنتظر تشكرنا منو وطلعنا
.
.
معتز: اكلك زياد شو منتظر ما اجى
زياد: اصلا حتى انت جيتك مو مهمة بس ردتك توصلني ونصبت عليك
.
.
معتز: قسم بالله انت جلب
زياد: ترا ما يخاوي الجلب غير الجلب
معتز: هسا اني من زمان جلب هاي منتهين منها بس انت جنت جرو وهسا صرت جلب
.
.
زياد: ههههههههه خرب بيومك خلص يابة نعوضك عالتوصيلة تدلل
معتز: وشلون يابة
زياد: انطيني تيلفونك
.
.
معتز: انطيتو تيلفوني طلع رقم منتظر واتصل عليه وكلو معزوم يمي عالغدا وسكر منو ورجعلي التيلفون
.
.
زياد: مشكور
معتز: يعني هسا التعويض عزيمة
زياد: ومنو عزمك انت حطيت نفسك بالنص
.
.
معتز: دكل نعال اجي غصب عنك وليش ما خابرتو من تيلفونك
زياد: قابل زوج اني اعزمكم وفوكها اخسر رصيد علمودكم
.
.
معتز: ههههههههه قسم بالله ما تصير ادمي انت
زياد: لا يابة حشى الادميين منا
معتز: هههههههه اي والله
.
.
رحنا اخذنا منتظر لان على طريقنا ورجعنا على بيت زياد كعدنا تعللنا وتغدينا وكضينا وقت كلش حلو وبشرنا منتظر بالنقل وفرح بالخبر ودوامنا رجع مثل قبل 10 ب 10
.
.
الضابط كال لخال زياد راح يحطونا بنقطة والمفروض يكون بيها ثنين بس راح احطهم ثلاثتهم علمود تخف عليهم الواجبات و
.
.
انا كلتلهم تعرفوني متزوج جديد وما لحكت اشوف زوجتي فتعذروني هالالتحاق هذا ما اداوم
.
.
زياد: ومنو الي جانت تبجي علمود ما تتزوج
معتز: ببجية .. اهلي جبروني بس اني زعلانة عليج
زياد: ياااا عزااا ليش ولج
.
.
معتز: ما خليتي حبيبي يتزوجج
منتظر: هههههههه قسم بالله فلا اكو انقص منكم
معتز: هههههههه لا والله صدك ماراح اداوم
زياد: معذور يخوي معذور
.
.
معتز: رجعت العصر للبيت اول ما دخلت شفت زينب جاية من جهة الملحق ومعصبة وما انتبهتلي من دخلت دخلت وراها وصحتها واخذتها للغرفة وهي من شافتني استغربت ومثل الي انصدمت
.
.
نرجس: ثاني يوم داومت طبيعي بس بالي مشغول على امي وخايفة عليها وتندمت انو ما سويت اكل للغدا قبل ما اداوم علمود تبقى مرتاحة
.
.
من رجعت شفتها شوية احسن تطمنت عليها تغدينا ورحت درست العصر اندك باب الملحق رحت فتحتو لكيت زينب بوجهي كلتلها تفضلي
.
.
زينب: شلونج نرجس
نرجس: تمام وانتي
زينب: الحمدلله بس اريد منج طلب
.
.
نرجس: تفضلي فوتي
زينب: يزيد فضلج اريد ارجع مستعجلة
نرجس: اطلبي بشنو اكدر اساعدج
.
.
زينب: اريدج تبعدين عن معتز
نرجس: ابتعد عن معتز
زينب: اي
.
.
نرجس: ترا اني وياه على كد السلام
زينب: مو ذاك النهار رجعج بسيارتو
نرجس: ترا رجعني اني واختو قابل اكلو ما اخليك ترجع اختك بسيارتك علمودي
.
.
زينب: ما دخلني المهم ابتعدي عنو
نرجس: تعرفيني اني مبتعدة عنو وجيتج هاي لو جاية علمود غير موضوع كل الهلا بيج بس موضوعج هذا مالو داعي ترا
.
.
تركتني وراحت وهي معصبة والله يالله الي يسمعها يكول واكفة لمعتز بالركن والحكو من مكان لمكان سكرت الباب ودخلت كملت دراستي وما خليت الموضوع ببالي
.
.
معتز: شعندج عند نرجس
زينب: شعرفك رحتلها
معتز: احجي
.
.
زينب: ماكو شي
معتز: بعصبية .. احجي عاد
زينب: ردتها تبعد عنك
.
.
معتز: لج مخبلة انتي شبيج دخيل ربج شايفتها لاحكتني لو كاتلة نفسها علي وتروحين تحجين وياها يعني تورطت جبتها هي واسماء من المدرسة
.
.
زينب: اني احبك واغار عليك ليش ما جاي تحس بي
معتز: لج اذا تحبيني تفشليني كدام الرايح والجاي وتروحين تحجين هيج ويا البنية
.
.
زينب: انت لو تحبني ومهتم لامري ما تدافعلها كدام
معتز: اللهم صبرج يا روح قسم بالله راح تجلطيني بتصرفاتج خرا بهالعيشة الي عايشة
.
.
تركتها تبجي بالغرفة وطلعت من البيت لا اكدر احاسبها ولا اكدر اعذرها واني مو من النوع الي يحب يضرب المرة بالعكس هي كائن ضعيف مجرد تخوفها تمشي مثل المسطرة والرجال ما يضرب مرة
.
.
افتريت ببغداد للمغرب ورجعت للبيت كضيتلي كم يوم بهدوء زينب رجعت لطبيعتها بدون مشاكل واني تركت نرجس واسماء يرجعن لحالهن علمود ما تصير مشاكل ومن اجى وقت التحاقنا اني ما رحت بقيت بالبيت
.
.
نرجس: مرت كم يوم امي تحسنت ورجعت لطبيعتها ومعتز خلصت اجازتو وماراح واسماء حجتلي عن النقل وعن دوامو كلت بعد احسن لان جان دوامو خطر وهنا احسن
.
.
خطية اهلو يبقون خايفين من يداوم لحد ما يرجع وفوكها ما صارلو هواي من تزوج صحيح الموت ما يعرف مكان بس القلق الي يحصلونو اهلو من يداوم هناك ياخذ من عمرهم عمر لهذا دوامو هنا احسن
.
.
بلشنا بامتحانات الشهر الثاني وكضيت وقتي بالدراسة لان المواد صارت بيها صعوبة بعد نص السنة وضغطت على نفسي علمود ما تنقص درجاتي
.
.
امي لاحضتها مو تمام وشكد ردت منها اخذها لدكتور وهي رفضت تكول ماكو شي مجرد هبوط لان ما اشتهي اكل وماكدرت اقنعها وكمت ادرس واهتم بالبيت واحاول كد ما اكدر اريحها وما اخليها تتعب
.
.
من تكعد وترتاح تتحسن ومن تتحسن ترجع تشتغل وتتعب واني ابقى اعاتب بيها لان تشتغل وتتعب مرة من المرات رجعت من المدرسة شفتها مسوية غدا وتعبانة وكعدت ساعة اعاتبها
.
.
خليتها تتغدا وتروح لغرفتها واني غسلت المواعين ورحت درست يمها بالغرفة جسمها مابيه حرارة طبيعي بس وجه اصفر وما تشتهي تاكل وياريت تقتنع اخذها لدكتور تبقى معاندة
.
.
بس كلت خلي تكعد اخذها عالدكتور لو شماتسوي المغرب خلصت دراسة ورحت اسوي العشى شوية واجتني كوة اكلت كم لكمة وراحت للغرفة
.
.
اني وكفت عالسنك اريد اغسل المواعين ومن اخلص اخلي جواد او ابوه ياخذنا للدكتور لان اذا ودانا معتز تفتخلي موضوع ثاني زينب
.
.
اريد اغسل المواعين وسمعت صوت طبة بالصالة طلعت لكيتها امي واكعة بالكاع وكلبي وكع على منظرها صحت بكل صوتي ماماااااا
.
.
ركضت عليها واحجي وياها كلتلها ماما شبيج ردي ماما بس كليلي شبيج احجي وياها وما ترد وماعرف شسوي كمت ركض ورحت على اهل معتز اريدهم يساعدوني وكوة امشي من الهبطة
.
.
معتز: تعشينا ودا نشرب جاي بالصالة سمعت صوت صياح بس مو واضح كلتلهم كالو متوهم رجعت اكمل جايي ماكو دقيقة وطبت علينا نرجس
.
.
دموعها تجري ومو لابسة حجاب لاول مرة بعد ما اجت لبغداد ومبين عليها كلش خايفة ووجها اصفر حجت وحجيها متقطع كوة كالت ماما ووكعت واحس روحي وكعت وياها
.
.
ركضتلها وكلت لجواد بسرعة روح شوف امها شبيها شلتها بين اديني مثل الطفلة راحت اسماء جابتلي كلاص ماي حطيتها عالقنفة ومسحت وجها كامت تحجي بس حجيها مو واضح وفززني صوت جواد وراي
.
.
......... يتبع
عندي ضروف لهذا اتأخر بالتنزيل اتمنى تتفهموني وتعذروني ❤
حطولنا توقعاتكم وارائكم

❤https://www.facebook.com/الكاتب-احمد-106346968747988/