حب في ازقه نينوى

البارت(44) حل في ازقه نينوى الكاتب#احمد

تصويت ومتابعه دا توصلكم باقي البارتات والقصص ❤
#حب_في_ازقة_نينوى
بقلم #احمد
البارت_44
.
.
معتز: بقيت ويا جماعتي لحد ما راحو سعد اخو هند بقى عندنا ووصيت جواد يجيبلو فراش علمود ينام ويانا بالاستقبال
.
.
بقينا اني وهو وعمي ابو اسد نتعلل لل 11 بالليل ونمنا لان باجر عندنا كعدة من الصبح وعمي ابو اسد يضحك ويكول سويت الي تريدو واخذتها واني اضحك على سوالفو
.
.
نرجس: كعدت ثاني يوم الصبح بس كلش تعبانة اخذتلي دوش ونزلت تحت تريكت واكلت هواي لان راح اروح للصالون واتأخر هناك لورا الغدا
.
.
من خلصت صعدت فوك اخذت بدلة العرس والاشياء الي احتاجها جنت متفقة نروح اني وهند واسماء على حساب الحجي ونسمة وبسمة على حساب ابوهن لان ما قبل يروحن وياي على حساب الحجي
.
.
جهزنا غراضنا واخذنا جواد للصالون ورجع بلشت اول شي بالبنات جانن 3 يتشغلن بالصالون اول شي اسماء وبسمة ونسمة من خلصن اجى دورنا اني وهند
.
.
بالنسبة لهند هم جانت حلوة كلش حتى ام الصالون توقعت احنا اخوات كلتلها لا صديقات من بلشت تمكيجني كلتلها اريد مكياج خفيف لان اضوج من المكياج الثكيل بلشت بي من 11 الظهر لل 12:30 بس هند تأخرت شوية خلصت بال 1
.
.
معتز: كعدنا الصبح وراحو جواد واسد جابو الجادر والكراسي بين ما وصلو الشباب الي بالفرع تجمعو بربع ساعة نصبو الجادر
.
.
اني طلبت من عمي السيارة علمود نزينها لان سيارتو اوتوماتيك وسياقتها سهلة علي وما حبيت اخذ احد وياي اني ونرجس بالزفة
.
.
وواحد من اصدقائي اخذها يزينها ومن اهل زياد اجو علينا رحنا اني و الشباب الكبار على بيت اهل زياد علمود ما ينخبص البيت بحيث اصغر واحد جان اسد
.
.
اول شي غسلت بمساعدة جواد وبعدها طلعت لبست ملابسي ولان الدنيا شتاء وبالليل يصير الجو بارد قررنا نسوي عزيمة العرس غدا وهم الناس البعيدين يلحكون يروحون لبيوتهم
.
.
من خلصت تبديل رجعنا لبيتنا وكفت بباب الجادر علمود الي يجي يسلم علي ويدخل ومن اتعب اكعد عالكرسي ولان ايدي مكسورة ماكدر اصافح احد مجرد بوسة ويبارك ويدخل
.
.
جنت واكف وطبت سيارة تكسي ونزل منها اخوي ميزر وعائلتو العائلة دخلو داخل وهو اجى سلمي علي ويباركلي ويتطمن علي
.
.
وتجمعو الاهل والكرايب يسلمون عليه لان صار من زمان مسافر وكعد يمي يسأل عني ويتطمن علي كلتلو اني بخير ومشتاقلك
.
.
ميزر: خوما حنيت لذيج السوالف
معتز: لا يخوي الحمدلله تركتها
ميزر: ابنك وينو
.
.
معتز: اسد جيبلنا عبدالهادي
اسد: تمام
ميزر: مشاءالله اسد صاير زلمة من رحت منا جان جاهل
.
.
معتز: اي طبعا يخوي صارلك هواي من سافرت
ميزر: اي والله يخوي شسوي غير شغل
معتز: إن شاء الله تكون مرتاح هناك
.
.
ميزر: الحمدلله راحة فول بس مفتقدكم
معتز: الي يريد شي يضحي بشي
ميزر: اي والله
.
.
اسد: عبدالهادي دا تبدلو جدتو من تكملو اجيبو
ميزر: تمام
معتز: اي شاكو ماكو بعد
.
.
ميزر: ماطول كاعد وياكم ماكو الا الخير
معتز: شلون اجوائكم هناك
ميزر: يابة انتو صيف مقارنة ببردنا هناك
.
.
معنز: ليش
ميزر: من جيت الكاع هناك بيضة ثلج
معتز: لا الحمدلله هنا احسن
.
.
ميزر: اي والله بس هالشي يأثر عليكم بالصيف
معتز: ما تتذكر قبل شجان يصير بينا ههههههههه
ميزر: اي والله اتذكر من اقفل باب الحوش واتركك خارج تكمز من حر الكاع
.
.
معتز: هههههههههه اي والله خبيث
ميزر: اي ولك احجيلي شجابك عالمسيح
معتز: جابني قسمتي التخبل
.
.
ميزر: والله وكبرت وحبيت ولك
معتز: مو بس حبيت الله وكيلك متخبل عليها
ميزر: الله يسعدكم ويا بعض
معتز: امين ويسعدك حبيبي
.
.
اسد جاب عبدالهادي تخبل عليه ميزر لابس قاط وطالع احلى مني ووجهو ابيض والقاط اسود طالع يخبل اجى جواد كال البنات خلصن من الصالون وابوي كال جيبوهن والغدا بعد الزفة نحطو
.
.
وتحظرو الناس وصديقي جاب سيارة عمي خليت جواد يسوقها لحد ما وصلنا للصالون نزلنا وناس تهوس وناس تركص واني كل الي ببالي ادخل واشوفها
.
.
دخلت داخل جانت واكفة بين البنات وبدت الهلاهل من البنات وهي منزلة راسها تقربت منها رفعت الغشاوة الي على راسها (الطرحة-الاكليل)
.
.
ورفعت راسها من حنجها واجت عيوني بعيونها الي مدوختني كلتلها مبروك علينا يا روحي كوة كالت الله يبارك بيك رغم عايشين ويا بعض بس مبين عليها الخجل وجها احمر طماطية ومن تحجي كوة يطلع صوتها من الخجل
.
.
بستها من كصتها ورجعت غطيتها ومسكتها من ايدها وطلعنا زادت الهوسات والهورنات وهلاهل النسوان صعدتها بالسيارة وجواد نزل وراح بغير سيارة واني سقت بدالو
.
.
صحيح جانت السياقة صعبة علي بس كلشي يهون لخاطرها جان صديقي حاط ميموري (بطاقة ذاكرة) بالسيارة وجامع بيها اغاني كلها رومانسية وحب علمود العرس
.
.
نرجس: من دخل معتز نزلت راسي وبلشن البنات يهلهلن رفع راسي وكلي مبروك اريد احجي ماكدر وين ذاك لساني الي ما محد يكدرلو شو اختفى
.
.
جاوبتو وطلعنا والي عجبني محد ضرب طلق ماعرف اذا معتز موصيهم ولا لا ركبنا بالسيارة وهو ساق ومشينا وشغل اغنية ناصيف زيتون (مش عم تزبط معي)
.
.
ويغني وياها والابتسامة مالية وجهو ومن خلصت شغل اغنية نورالزين ومحمد الفارس (حبك يدك بالراس) وشكد ما اوصف فرحتنا اني وياه ماكدر غمضت عيوني وكلت بكلبي
.
.
((يارب انت ادرى بحالي وحالو واقوى مني ومنو ارزقنا حياة سعيدة وفرحنا بالباقي من عمرنا ولا تحرمنا من بعض ولا تنقص فرحتنا واذا اخطأنا سامحنا))
.
.
معتز: ترا ما يصير هيج
نرجس: شنو
معتز: اول شي اهدي واحجي براحتج
.
.
نرجس: تمام
معتز: ليش هيج حلوة انتي
نرجس: عيونك الحلوات
.
.
معتز: مو مصدك وربي انو اخيرا تزوجنا
نرجس: واني هم
معتز: والله احس البارحة جنت الحكج بالموصل
.
.
نرجس: عادي من اداوم بالجامعة الحكني
معتز: ههههههه عاجبج الموضوع
.
.
نرجس: هذا الموضوع بالنسبة الي مو بس ملاحكة وحب هالشي اكبر بهواي بالنسبة الي
معتز: شلون يعني
.
.
نرجس: هذا الموضوع عرفني على شخص رجل بكل معنى الكلمة رجل وكف وياي من تخلو كل الناس عني رجل وعدني وكان عند وعدو
.
.
وغير هذا عرفني على الحب والحنان الموجود بكلوب العراقيين الحب الي لكيتو بين اهلك مستحيل الكيه عند ناس غير العراقيين حبهم خلاني اعشق العراق اكثر من كونو وطن
.
.
جنت دائما افكر لو مو جاية عندكم شنو كان مصيري لو امي متوفية وباقية لحالي شلون اكدر اعيش لو ماخذيني الدواعش جان هسا بيا مكان اني وتحت رحمة اي وحش منهم .. دا احجي وانتبهت انطاني كلينكس
.
.
معتز: امسحي دموعج طول ما اني وياج ما اريد اشوف دموعج وممنوع تبجين مرة ثانية
نرجس: تمام
معتز: يلا وصلنا المصور
.
.
نرجس: مسحت دموعي علمود ما يخرب المكياج من نزلنا جواد جاب عبدالهادي لابس ملابسو وطالع يخبل صرت بينهم من جهة معتز ومن جهة هو ودخلنا للمصور
.
.
اخذت صور ويا معتز لحالنا وويا عبدالهادي واخذت صور بس اني وعبدالهادي واجو اخوان معتز وخواتو صورو ويانا وتعرفت على ميزر اخوه الجبير
.
.
جان يشبه معتز بس مو كلش ومبين عليه شخصيتو كلش ثكيل ورزن من سلم علي صافحتو واخذ كم صورة ويانا وطلع
.
.
واكثر واحد اخذت وياه صور هو عبدالهادي اكثر حتى من ابوه ومن خلصنا تصوير خليتو ويانا بالسيارة ورجعنا للبيت من وصلنا استقبلونا ابو اسد والحجي وابو اسد يكول لولا العيب الا احرك الجو بالطلق ومعتز كالو وجودكم يكفيني
.
.
مسكت عبدالهادي من ايدو ودخلت واشتغلت الهلاهل خارج البيت وداخلو والحجية تطش جكليت فوكنا وفرحانة كلش بالعرس
.
.
وكفت بالحوش وصارن البنات وراي وزتيت الوردة واجت بايد والبنات كامن يصفكن دخلت سلمت عالحجية وام هند وام اسد والنسوان كلهن باركلي
.
.
كعدت بالكوشة وبدو بتوزيع الغدا اني اخذتني الحجية اني وهي وام اسد للغرفة مالتها تغدينا من خلصت اجت اسماء رتبتلي المكياج ورجعت للكوشة وبلشن البنات يركصن
.
.
جنت اتمنى امي وياي بعرسي وهي الي تجهزلي كلشي بس اهل معتز وعائلة ابو اسد ابد ما قصرو وكفو وياي بكل شي ما حسسوني باي نقص ولازم ما ابجي
.
.
اني صحيح راحت مني امي واكيد مثل اي بنت صعبة علي اتزوج بدون حظور امي بس اني ربي عوضني بدال امي ولهذا لازم اشكرو على التعويض الي انطانياه
.
.
بقن البنات للمغرب وهن يركصن واني فرحانة لان جان عرسي كلش حلو من صارت الدنيا مغرب تعشينا وورا العشى بلشت هوسات الزلم خارج البيت
.
.
معتز: من رجعنا من الزفة التهينا بالغدا لان صارت الساعة 2 ولازم يتغدون المعازيم والي يريد يروح يروح وللي يريد يبقى يبقى
.
.
كضينا اليوم بالعرس وخبصتو تعرفون الي عندو عرس مايفتهم منو شي وجنت انتظر الليل لان بالليل يبقون بس الكرايب وتبلش الونسة المرتبة
.
.
اصدقائي بقو وياي بالاخص زياد ومنتظر صحيح مايكدرون يشتغلون بس ماعافوني من صارت الدنيا مغرب تعشينا واصدقائي عزلو الكراسي بالجادر على صفحة وبلشت الهوسات
.
.
زياد: جبنالك وردة تشم بيها .. بس كون الوردة تداريها 
منتظر: اخونا خوش اخو يستاهل الهوسة
جيراني: هاي الرادها وهاي التمناها بنت الشيخ لابن الشيخ جبناها
.
.
جواد: اريد اردح ردح واكسر الكاشية
احنا اهل الولد مو اهل البنية
اسد: اريد اردح ردح واكسر الكاشية
احنا اهل الولد واحنا اهل البنية
.
.
معتز: تفضل جواد قصفك اسد
ابو اسد: كفو من ابني
اسد تربيتك يابة
.
.
معتز: كضوها هوسات لل 10 بالليل تونسنا خوش ونسة وكل ما واحد يكول هوسة يرد عليه الثاني باحلى منها بس سعد بقى ساكت لان ما يعرف بالهوسات
.
.
ميزر جان يتشاقة ويهوس بالفصحى عود هو مثقف وجاي من الخارج والشباب كضوها ضحك وياه ومن تعجبهم هوسة يخلوه يحجيها بالفصحى
.
.
اني بردت وبدت رجلي وايدي وصدر يوجعني لان مكان كسر كلتلهم خلي ندخل للاستقبال وكالو ما بقى وقت وترخصو وراحو وابوي اتصل على امي كال راح ندخل معتز جهزو نفسكم
.
.
نرجس: بال 10 اجت الحجية وكالت خلي ناخذج على غرفتج قبل ما اصعد تذكرت معتز ما يكدر يصعد عالدرج براحتو كلتلها من يجي معتز نصعد سوا
.
.
الحجية: ما يصير بنيتي لازم تصعدين قبلو
نرجس: لا ماما اذا ما يصعد معتز وياي ما اصعد
ام اسد: هسا يجي ما يتأخر
.
.
نرجس: حاولن وياي وقفلت وما كلتلهن ليش اريد اصعد وياه جابوه اصدقائو لباب الصالة ومن دخل هم رجعو اني وكفت كدام الدرج
.
.
من وصل عندي استغرب لان واكفة عند الدرج مو بالغرفة رفعت راسي وكلتلو من اليوم اني سندك واذا هالدرج يتعبك فلازم اتقاسم التعب وياك
.
.
وحطيت ايدو على كتفي وسندتو وصعدنا سوا وهو مبتسم والنسوان يصفكن على حركتي وصلنا للغرفة ودخلنا سوا رفع الغشاوة
.
.
معتز: الله يديمج الي
نرجس: ويديمك الي
معتز: بدلي ملابسج بين ما اصلي واخلص
نرجس: تمام
.
.
معتز: كعدت ارتاح شوية ونرجس اخذت ملابس ودخلت للحمام نسيت نفسي وما صليت لحد ما طلعت من الحمام
.
.
جانت مبدلة باوعتلها ابتسامتها احسها سحر يدخل لجسمي ويسحب شكو تعب بيه كمت فرشت سجادتي وقبل ما اصلي حجت وياي
.
.
نرجس: معتز ممكن طلب
معتز: اطلبي
نرجس: صلي بصوت عالي
.
.
معتز: ليش
نرجس: حابة اسمعك
معتز: تمام
.
.
بلشت صلاة وسويت مثل ما كالت وصليت بصوت مسموع جانت صلاتي صعبة لان مجبص بس صليتها واني واكف لان اعتبر هالشي تعويض من ربي ويستاهل تعبي
.
.
كملت الركعتين وسلمت انداريت وراي شفتها كاعدة وراي ولابسة ازار الصلاة (ملابس الصلاة الخاصة بالنسوان) بعني جانت تصلي وراي لهذا طلبت مني اصلي بصوت مسموع
.
.
ابتسمتلها وكلتلتها الله يأجرج وإن شاء الله ربنا يوفقنا بهالزواج ويكون بداية خير الي والج كمت اخذت ملابس خفيفة وبدلت ملابسي
.
.
ورجعت لكيتها كاعدة عالسرير صدري من البرد جان يوجعني كعدت يمها ومبين علي الوجع
.
.
نرجس: من بدلت اخذت ازار الصلاة وياي بس ما لبستو اريد اخليها مفاجأة الو توضيت بالحمام مثل اسماء والحجية وطلعت
.
.
من اندار للصلاة لبستو بسرعة وصرت ورا معتز واطبق مثلو بالضبط وماعرف جان صوتو بقراءة القران حلو ولا لان احبو احس صوتو حلو
.
.
ومن خلص واندار علي شفتو ابتسم ودعى كلت امين اخذ هو ملابس واني انتظرتو من طلع شفتو عاقج وجهو ومبين عليه موجوع كلتلو شبيك معتز
.
.
معتز: ماكو شي
نرجس: لا اكو شي احجي بسرعة
معتز: صدري شوية يوجعني لان بردان
.
.
نرجس: تعال اتمدد وارتاح
معتز: لا يابة عدنا شغل هواي
نرجس: معتز صحتك اهم اني موجودة وياك تعال تمدد
.
.
دا نحجي ودكت الباب اسماء ومبين صوت عبدالهادي دا يبجي احس كلبي انعصر وطلعت ركض كالتلي ما اريد اجيبو بس خبص الدنيا اخذتو وتشكرت منها
.
.
من اخذتو هدأ بس لزمتو الشهكة كلت يمة وليدي تروحلك فدوة ماما نسيتك والتهيت بابوك خلص اسكت هاي هي ما اعوفك بعد
.
.
معتز: ها ابن الجلب شرايد
نرجس: معتز لا تعلمو يحجي هيج
معتز: لعد يخرب احلى ليلة بحياة ابوه
.
.
نرجس: لا مشتاق لامو
معتز: قسم بالله هذا غضب مو جاهل
نرجس: هههههههه ليش تغار من ابني
.
.
معتز: ابنج الله مسلطو علي ما يخليني ارتاح
نرجس: حقو لان امو كضت شهر بعيدة عنو ووراها تحظيرات العرس وبعدها الحفلة غير اشتاقلي
.
.
معتز: واني
نرجس: شبيك انت
معتز: اني هم مشتاقلج ومحترك جد جدي عليج
.
.
نرجس: ههههه حشاك لا تحجي هيج اني يمك وراح ابقى طول عمري وياك وانت اليوم مريض لازم تنام انت وابنك من وقت علمود ترتاحون واني هم تعبانة ونعسانة واريد انام وارتاح
.
.
معتز: لا ماكو هالكلام لعد تزوجتج علمود شنو
نرجس: يااااا معتز صدك تحجي انت
معتز: جنت اريد اضوجها .. اي صدك احجي
.
.
نرجس: وكفت محتارة منا معتز ومنا عبدالهادي شفت معتز ما تحمل وضحك وكال تعالي تعالي دا اشاقيج رحت كعدت عند مسح دموع ابنو وكال والله انت ابن جلب كلتلو كافي عاد ما اسمحلك تحجي على ابني وعلى حبيبي
.
.
معتز: ومنو حبيبج
نرجس: ابوه
معتز: ويريدوني اصبر واصير عاقل
.
.
نرجس: هههههههه لا لا خلص اني استسلم
معتز: اي اسكتي لان راح تتورطين
نرجس:  هههههههه تمام
.
.
كلتلو يلا وليدي نام انت وابنك كال ماشي ماما وتمددت وحطيت عبدالهادي بيناتنا ولان معتز جسمو ضخم صرنا اني وعبدالهادي ثنينا بحضنو باسنا ثنينا ونمنا كلنا مع بعض
.
.
........... يتبع
تصويت ومتابعه ❤
حطولنا ارائكم وتوقعاتكم ❤